Jeremiah 29-30

Jeremiah 29

Babylonia ah a om Judah Mite tungah Jeremiah ii Laithak

1Jerusalem khua panin Nebuchadnezzar in Babylonia khua ah salin a paipui thiampite, kamsangte, mihonte ii lampuite le a dangte theampo ii tungah lai khat ka thaak hi. * 2Hi lai sia Jehoiachin Kumpipa, a nu, kumpi innsung a ukte, Judah ngam lampuite le Jerusalem khuapuite, khut thiamte le naseam thiamte a saltanna munah a kipaipui zawkciang ka at ahi hi. 3Tua lai sia Judah Kumpipa Zedekiah ii Babylonia Kumpipa Nebuchadnezzar tungah a thaak hi a Shaphan ii tapa Elasah le Hilkiah ii tapa Gemariah khut tungah ka pia hi. Tua lai sungah, 4“Vaanglianbelpa TOPA Israel ii Pathian in Jerusalem panin Babylonia ah Nebuchadnezzar ii salin a paipui sak mihingte theampo tungah hi bangin ci hi. 5‘Inn sa vun a teang vun. Huan vawt vun a, a sungah na ciin uhte ne vun. 6Kiteang vun a ta nei vun. Ama te zongh ta a nei thei natu in na tate uh zongh kiteang sak vun. Na pungto tu uh a, na kiamsuk batu uh hi. 7Sal a kong paisakna khuapite ii phattuam natu in naseam vun. Amate taangin ka tungah thu ngen vun, banghangziam cile amate a nuamsa uhle no zong na nuamsa tu uh hi. 8Note sungah a teang kamsangte hi kale maisang thu ka son khol thei hi a ci midangte in hi kale na theam sak ngawl natu in Keima, TOPA Israel ii Pathian in note kong hilkhol hi. Amate ii mangte na thudon heak vun. 9Amate in ka min taw no tungah leeilot thu hong son uh hi. Amate ka sawl bua hi. Keima, Vaanglianbelpa TOPA in ka ci zo hi,’ ci hi.

10“TOPA in, ‘Babylonia ah na om zawk uh kum sawmsali a cin ciang no atu a kong thin nopmawkna kong lak tu a, ka kamciam babang a tangtung tu in na khua na tui uh ah na cia kik tu uh hi. * 11No atu in tupna ka neite, siat natu hi ngawlin mi nuamsa va-ial na sua natu uh tupnate, no mai sangah lametna kong piak tu tupnate keima bek in ka he hi. 12Taciang kei nong sam tu uh hi. Ka kungah pai in thu nong ngen tu uh hi. Taciang kong zo tu hi. 13Kei nong zong tu uh a, nong mu tu uh hi. Banghangziam cile na thin sung theampo uh taw nong zon tu uh hang ahi hi. * 14Hi hi, Kei nong mu tu uh a, na ngam uh ah kong koi kik tu hi, ka ci hi. Note kong thethaangna ngam theampo le mun theampo panin kong kaikhawm kik tu a, saltang a kong puak ma na omna mun ah kong ciapui kik tu hi. Keima, TOPA in ka ci zo hi,’ ci hi.

15“TOPA in Babylonia ah kamsangte note hong pia hi, ci nu hi. 16David ukna ngam a uk kumpipa le hi khuapi sungah a om mihingte, noma taw saltang tu a, a pai khawm ngawl na bete uh taw kisai in TOPA thusonte ngai vun. 17Vaanglianbelpa TOPA in, ‘Keima in amate tungah ngal, kialpi le natna ka theng sak tu a, amate sia a kine thei ngawl theinga muat bang ka hi sak tu hi. 18Ngal, kialpi le natna taw amate ka zuizen tu a, leitung mite theampo in tasia a mu uh ciang lau tu uh hi. Mun theampo ah amate ka thethaang tu a, amate ii thuakna hangin mihingte in ingh in lau tu uh hi. Mihingte in amate ciammuina in nei tu uh a, a min uh sia haamsiatna in zangh tu uh hi. 19Hi thu sia amate tungah tung tu hi, banghangziam cile amate in ka naseam kamsangte tungtawn a ka puak tawntung ahi ka thute a nit ngawl uh hang ahi hi. Amate in ngai nuam ngawl uh hi. 20Babylonia khua ah saltang in kong puak note theampo awng, Keima, TOPA ii ka son sia ngai vun,’ ci hi.

21“Vaanglianbelpa TOPA, Israel ii Pathian in, ama min taw no tungah leeilot thu hong son Kolaiah ii tapa Ahab le Maaseiah ii tapa Zedekiah ii thu son zo hi. TOPA in amate sia Babylonia Kumpipa Nebuchadnezzar khut sungah aap tu a, Babylonia kumpipa in noma mu tang ma in thatlum tu hi, ci zo hi. 22Jerusalem pan Babylonia ah saltang a, a kipuak mihingte in khat papo a haamsiat nop uh ciang amate in, ‘Babylonia Kumpipa ii a hingtang a meisung a em Zedekiah le Ahab bangin TOPA in nang hong vawt tahen,’ ci tu uh hi. 23Hi bangin a thuak tu ma uh hi, banghangziam cile amate in khialna liante vawt uh hi– nupa palngul nate vawtin TOPA ii min taw leeilot thute son uh hi. Hi thu sia TOPA ii dei ngawl ahi hi; amate ii vawt theampo ama in he hi. Ama sia amate ii langpang tetti ahi hi. TOPA in ci zo hi,” ci in ki at hi.

Shemaiah ii Laithak
24-25Vaanglianbelpa TOPA, Israel ii Pathian in Nehelam mi Shemiah tungah thu khat son tu in hong sawl hi. Shemaiah in ama min mama taw in Jerusalem khua mite theampo tung le Maaseiah ii tapa thiampi Zephaniah tung le thiampi dangte theampo ii tungah lai khat thaak hi. Zephaniah tungah a thaak hi lai sungah: Shemaiah in, 26“TOPA in Jehoiada taangin nangma thiampi in hong koi zo hi, tua ahi ciang tu in nang sia Biakinn sungah a lian bel na hi hi. Kamsang khat in a kivawt tawm mihing mamaw papo a ngawng ah thikkol na bul tu sia nangma nasep ahi hi. 27Banghangin mihonte tungah kamsang khat bang a thu a son Anathoth khua mi Jeremiah tungah hi bangin vawt ngawl ni ziam? 28Ama sia thu son sak tu hi nawn ngawl hi, banghangziam ci le ama in Babylonia ah a om mipite tungah, tua munah khua ngei ma sal na tang tu uh a, inn na sa tu uh hi, teangin huan na vawt tu uh a, na ciin uhte na ne tu uh hi, a ci hang ahi hi,” ci hi. 29Zephaniah in tua laithak ka tungah hong sim hi, 30Tasia ciang TOPA in, 31-32Shemaiah ii thu taw kisai in Babylon ah thongtaakte theampo tungah hi thu puak in ci in kei hong sawl hi. “Keima, TOPA in, Shemaiah le a suan a paalte theampo daan ka pia tu hi. Ama in ka sawl ngawl bulin kamsang khat bangin no tungah thu hong son in leeilot thu note in hong um sak uh hi. Ama in no sungah suan le paal nei ngawl tu hi. Ama in ka mite atu in a pha ka vawt tu nate mu tu in nungta ngawl tu hi. Banghangziam cile ka mite ii keima hong langpan natu in ama in sawl hi. Keima, TOPA in ka ci zo hi,” hong ci hi.







Jeremiah 30
A Mite tungah TOPA ii Kamciam
1TOPA, Israel mite ii Pathian in, 2keima tungah, “Kong son theampo laibu khat sungah at in, 3banghangziam cile Israel le Judah ka mite, a ngam ka piak kik tu hun hong theng tu hi. A pu a pate tungah ka piak sa ngamah ka heak kik sak tu a, amate in tua ngam tang kik tu uh hi. Keima, TOPA in ka ci zo hi,” hong ci hi. 4TOPA in Israel le Judah mite tungah,

5“Launa le, patauna aw khat ka za a, thin nopna aw ka za bua hi.
6Tu in tawlnga in ngaisun vun!
Pasal in nau nei thei ziam?
Tua ahile banghangin pasal sim in
numei nautun bangin a ngil hum ziam?
Banghangin a kuama po a mai daang ziam?
7A lauhuai mama ni khat hong theng tu a;
nidang taw kitee thei ngawl tu hi ka mite ii ngimna thuak hun hi tu a,
ahihang amate suakta veve tu uh hi,” ci hi.
8Vaanglianbelpa TOPA in, “Tua ni hong thet ciang, a ngawng uh ah a kibul hakkol ka thiaktan tu a, a thikkolte ka vawk tu hi. Amate in ngamdang mite ii sal hi nawn ngawl tu hi. 9Amate in TOPA a Pathian le, kumpi ka sua sak tu David ii suan le paal khat ii na seam zaw tu uh hi.

10“Ka mite awng, lau heak vun; Israel mite awng, patau heak vun.
Ngam khualana na saltanna ngam uh panin kong suatak tu hi.
Na ngam uh ah nong cia kik tu uh a, thin nuam takin na teang tu uh hi;
na thin uh muang tu a, kuama in no hong lau sak ngawl tu hi. *
11Note kungah kong pai tu a kong ngum tu hi.
Kong thethaangna ngam mite theampo ka susia tu a, ahihang no kong susia batu hi.
Daan thuak ngawlin no kong om sak batu hi;
ahihang daan kong piak ciang, a kilawm in kong pia tu hi.
Keima, TOPA in ka ci zo hi,” ci hi.
12TOPA in a mite tungah, “Na meimate uh dam thei ngawl a,
Na liammate uh kidam sak thei ngawl hi.
13No hong ou tu kuama om ngawl a, Na meima uhte bawl natu zatui om ngawlin, na dam tu uh sia muanmawk om ngawl hi.
14Na it uh na lawmte theampo in no hong mangil zo a;
amate in no hong thusim nawn ngawl hi.
Keima in note sia ngal khat bangin kong sim a,
na mawna uh tam mama a, na ngitlona uh lian ahikom
na daan thuak uh nasia mama hi.
15Na liamma uh hangin phuphun nawn heak vun;
Na dam natu om ngawl hi.
Na khialna uh tam mama a,
na ngitlona uh lian ahikom
hi bangin daan kong pia hi.
16Ahihang tu in no hong valhtumte theampo kivalhtum tu a,
na ngalte uh theampo salin kikai tu uh hi.
No hong zawthawk vawtte theampo kizawthawk vawt tu a,
no hong suamte theampo kisuam tu hi.
17No kong dam sak kik tu hi;
Na ngalte in, ‘Zion sia a kipuavawk sa khat hi a,
kuama in awlmaw ngawl uh hi,’ ci ahitazong
na meima uhte ka dam sak tu hi.
Keima, TOPA in ka ci zo hi,” ci hi.
18TOPA in,
“Ka mite a ngam ka pia kik tu a,
a innkuan simin hesuakna ka nei tu hi;
Jerusalem khuapi kisa kik tu a,
a kumpi inn sia a omna ngei ma ah kikoi kik tu hi.
19Tua munah a teang mihingte in pokna la sa tu uh a,
lungdam in au tu uh hi.
Ka thupha piakna taw amate pung tu uh a,
ka thupha piakna in amate upatna nga sak tu hi.
20Nidang a, a nei vaangletna ka pia kik tu a,
kip takin ka phut kik tu hi;
amate a vawtsiate theampo daan ka pia tu hi.
21-22Amate a uk tu sia amate ii minam sung pan ma in hong pai tu a,
amate kumpi tapa sia amate minam sung pan ma in hong pai tu hi.
Ka sam ciang ama in kei hong neak tu hi,
banghang ziam cile sam ngawlin akua hong pai ngam tu ziam;
Amate sia ka mite hi tu uh a,
keima in amate ii Pathian ka hi tu hi.
Keima, TOPA in ka ci zo hi,” ci hi.
23-24TOPA ii thin uukna in vuipi nguapi hi a, mi ngilote lu tungah puaktham tu hi. Vawt tu in a tup theampo a tangtun siat mateng in ama tawlnga ngawl tu hi. Maisang hunah a mite in hi thu telthiang tu uh hi.

0 comments:

Post a Comment