Laithiangtho Dokna (Jeremiah 25-26)

1. Amon ii tapa akua sia Judah kumpi ziam?
a. Josh
b. Jehoidah
c. Josiah

2.___sia dip hong kua sak mun suak tu hi.
a. Babylon
b. Samaria
c.  Judah

3. Judah le akiim ate Babylon ah kumbangtza naseam ziam?
a. Kumh 70
b. Kumh 90
c.  Kumh 120

4. Zuhai sia bang taw kidim ziam.
a. Chisan
b. Thinukna
c. Haamsiatna

5. Zuhai akhak bel a ne tu pa sia akua ziam?
a. Hezekiah
b. Judah kumpipa
c. Babylon kumpipa

6. Vuipi suangval khat sia ___ah va tu hi.
a. Jeresalem
b. Sinai mual
c. Leimong a khuala na mun

7. Josiah tapa Judah kumpipa min sia ___ hi.
a. Jehoiakim
b. Jehoidah
c. Josiah

8. Akua ii tungah son tu thu kheet nei ngawl tu ci ziam?
a. Jehoidah
b. Jehoiakim
c. Josiah

9. ___ khuapi ah ka vawt bangh Biakinn tungah ka vawt tu ci hi.
a. Jeresalem
b. Hebron
c. Shiloh

10. Khuapi susia tu, biakinn susia tu aiciang mipite in ___ uh hi.
a. Micah uumci
b. Nihnaveh kamsangpa
c. Jeremiah uumcii

11. Hezekiah Kumpipa in ___ ngawl uh hi.
a. Micah thatlum
b. kitek
c. Pathian silate huna

12. Zion sia  ___ tu hi.
a. ko
b. lo bangin kitho
c. hamphatna ngaa

Jeremiah 25
Saksang pan Ngal
1Josiah ii tapa Jehoiakim sia Judah kumpi a sua zawk kum li kum in, Judah mite theampo taw kisai TOPA ii thupuak khat ka nga hi. (Hi hun sia Nebuchadnezzar ii Babylonia kumpi a sua a kum khat kum ahi hi). * 2Keima in Judah mite le Jerusalem mite theampo ii tungah, 3“Amon ii tapa Josiah sia Judah kumpi a sep zawk kum sawm le kum thum kum a kipan tuni ciang dong, kum kul le kum thum sung, TOPA in ka tungah thu hong son a, ama ii hong sonte na tungah son ngawlin ka om ngei bua hi. Ahihang bangma na nadon bua uh hi. 4TOPA in ama naseam kamsangte na kungah hong pai sak tawntung hi napi a thu na ngai bua uh a, na awlmawk bua uh hi. 5Nang le na pu na pate ii a tawntung na lua tu in TOPA ii hong piak sa ngam sungah na ten tan thei natu uh in, na ngitlo nate uh le a sia a na ngamtatnate uh panin na kikheal natu uh kamsangte in no tungah hong son uh hi. 6Pathian dang na biak ngawl natu uh le tuate ii na nasep ngawl natu uh, na khut taw na vawttawm uh milimte biakna taw TOPA na thin uuk sak ngawl natu in kamsangte in no tungah hong son hi. TOPA thu na ni uhle, ama in note daan hong pia ngawl tu hi. 7Ahihang TOPA ama mama in a thu na ngai ngawlna thu son hi. Tasia luangin, na milim uh taw ama na thin uuk sak uh a, daan hong piakna sia no tungah noma le noma in tung sak nu hi.

8“Tabang a, a thu na ngai nop ngawl uh manin Vaanglianbelpa TOPA in, 9‘Keima in saksang ngamah a om mihingte theampo le ka naseam Babylon Kumpipa Nebuchadnezzar ka sam tu hi. Keima in Judah le a ngam sungah a teang mihingte theampo le a kiim a paam a om ngamte theampo sim tu in amate ka sam tu hi. Keima in hi ngam le a kiim a paam ngamte ka susia cip tu a, taciang a tawntungin a siacipin ka nusia tu a, dip hong kua sak mun suak tu hi. Keima, TOPA in ka ci zo hi. 10Amate lungdam in a au nate, a kipaakna le mopoai sung lungdamna awngingte ka thim sak tu hi. Amate in a mei-innte atu in meitui nei ngawl tu uh a, neak tu antang om nawn ngawl tu hi. * 11Hi ngam buppi kisia thamin kinusia tu a, ngamkhing mun suak tu hi, a kiim ah ngamte in kum sawmsali sung tawntung Babylon kumpipa ii na seam tu uh hi. * 12Tua zawkciang Babylonia le a kumpipa sia a mawna uh hu in daan ka pia tu hi. Tua ngam ka susia tu a, a tawntung lalcip in ka nusia tu hi. 13Jeremiah tungtawn a ka son minamte tungah ka theng sak tu ci a ka thawmvauna tuasiatnate theampo– hi laibu sungah a kikhum tuasiatnate theampo taw Babylonia daan ka pia tu hi. 14Amate ii sep sa bangin Babylonia te ka thuh kik tu a, minam tam mamate le kumpi liante in amate salin kai tu uh hi, ci hi,” ka ci hi.

Minamte tungah Pathian ii Thukhenna
15TOPA Israel ii Pathian in keima tungah, “Hi lai ah ka thin uukna taw a kidim zu hai khat om hi. Kong paisakna minam theampote kungah tua hai paipui in tua hai sung pan amate in ne sak in. 16Amate in tua hai sung pan a neak uh ciang soai vadeng tu uh a, a thin uh amh tu uh hi, banghangziam cile amate do tu in ngal ka puak hang ahi hi,” hong ci hi.

17Tasia ciang tua hai sia TOPA ii khut tung panin ka la a, TOPA hong sawlna minam theampote tungah pia in tua hai sung panin ka ne sak hi. 18Amate kongaw ngam khat, a et nop huai ngawl het dip hong kua sak mun a sua natu le, mihingte ii ama te min sia haamsiatna in a zak natu in– tu hun dong a kizak lai bangma Jerusalem le Judah ngam khuapite theampo, a kumpite uh le a lampuite uh taw tua hai sung panin kidawn sak hi. 19-26Hai tasia sung pan a ne tu a dangte theampo ii min sazian sia hi bang ahi hi;

Egypt kumpipa, a khut nuai uliante le lampuite;
Egypt mite theampo le Egypt ngam sungah a om ngamdang mite theampo;
Uz ngamah kumpite theampo;
Philistine ngam ii khuapite Ashkelon, Gaza, Ekronte ii kumpite theampo le
Ashdod khuapi ah a taang lai kumpite;
Edom, Moab le Ammon mite theampo;
Tyre ngam le Sidon ngam kumpite theampo;
Mediterranean tuipi hui a om ngamte ii kumpite theampo;
Dedan, Tema, le Buz ii khuapite;
A sam uh a tomin a meet mite theampo;
Arabia ngam kumpite theampo;
Kongaw ngam minamte ii kumpite theampo;
Zimri, Elam, le Media ngam kumpite theampo;
Saksang ngam kumpite theampo, a khuala a nai ci om ngawlin, khat zawk ciang khat in ne tu uh hi.
Leitung a, minam theampo in ne tu uh hi. A khak belin Babylon kumpipa in ne tu hi.

27Taciang TOPA in keima tungah, “Mipite tungah Keima, Vaanglianbelpa TOPA, Israel ii Pathian in, amate tungah ngal ka theng sak hangin amate zukham in a luak dong, pukin a thaw kik zawk ngawl za dong zu ne tu in thu ka piak sia son in. 28Amate in na khut tung panin hai la nuam ngawlin a dawn nuam bua uh le a dawn nanak uh kul tu hi Vaanglianbelpa TOPA in ci zo hi ci in amate son in. 29Keima khuapi sungah suksiat nasep ka kipan tu hi. Daan thuak ngawl tu in kingaisun uh ziam? Hi ngawl hi, amate sia daan kipia tu hi, banghangziam cile leitung mite theampo tungah ngal ka theng sak tu hi. Keima, Vaanglianbelpa TOPA in ka ci zo hi.

30“Jeremiah awng, ka son theampo nangma in taangko tu ni hi. Hi mihingte tungah hi bang son tu ni hi.

‘TOPA in vantung panin hawk tu a,
vantung a saangna panin vanto bangin nging tu hi.
Ama in a mite hawksan tu a;
sapit nga a cilpa khat bangin ama au tu hi.
Leitung ah a om theampo in ama aw za tu a,
31leimong dongin a aw hawl tu hi.
TOPA in minamte tungah thu khat nei hi.
Ama in mihingte theampo thu kisit tu in paipui tu a,
mi ngilote thatlum tu hi.
TOPA in ci zo hi,’ ci in,” hong ci hi.
32Vaanglianbelpa TOPA in tuasiatna sia ngam khat zawkciang ngam khat ah theng tu a, vuipi suangval khat sia leimong a khuala na mun ah va tu hi, ci hi. 33Tua ni in TOPA ii thalup sa mite ii luangte sia leimong khat panin leimong khat ah ki thethaang in om tu hi. Kuama in amate kaa ngawl tu a, a luangte kila ngawlin kiphum ngawl tu hi. Amate sia ninthuk kiseng bangin lei tungah kiseng tu hi.

34Lampuite awng, kap vun, ka mite a cing a keamte awng, a ngingin kap vun! Naang in leivui sungah liik vun. Note hong kithalup tu hun hong theng zo a, tuutalte bangin note hong kisem tu hi. 35Na suatakna tu uh lampi om ngawl tu hi. 36-37Thin ngimin tau in kap vun, banghangziam cile TOPA in a thin uukna taw in na minam hong susia zo a, na ngamnuam uh a siacip in nusia zo hi. 38Tawpi khat in akua a nusiat bangin TOPA in a mite nusia zo hi. A lauhuai ngal kidona le TOPA ii a kiitak huai thin uukna in hi ngam kongaw ngam suak sak zo hi.

Jeremiah 26
Jeremiah Thu kisit
1Josiah ii tapa Jehoiakim Judah kumpi a sua zawk po ciang, * 2TOPA in keima tungah, “Biakinn huang sungah ding in a, Judah ngam khuapite pan tua munah Pathian bia tu in, hong pai mihingte tungah son tu a kong sawlte theampo thang sak in. Kheet nei heak in. 3Tua mihingte in na thu hong ngai tu a, a pha ngawl a ngamtatnate uh kheal thei tha tu hi. A kikheal uhle, amate ii ngitlo ngamtatna hang a, amate suksiat tu in ka tup ka ngaisut sia ka kheal kik tu hi,” hong ci hi.

4TOPA in mipite tungah son in ci a hong sawlna panin, “Keima, TOPA in, kong thu hilnate na zui na uh taw ahizong 5note kungah kong pai sak nithi ahi, ka naseamte, kamsangte ii pauna kammalte na nadon na uh taw ahizongin ka thu nong ni tu uh hi, ci in son zo khi hi. Amate ii a sonte na ni ngei bua uh hi. 6Thu na ni bua lalai uhle, Shiloh khua tungah ka vawt bangin hi Biakinn tungah ka vawt tu a, leitung minamte theampo in hi khuapi ii min sia haamsiatna in zangh tu uh hi,” hong ci hi. *

7Thiampite, kamsangte le hong pai mihingte theampo in Biakinn sungah ka son hi thute za uh hi. 8TOPA ii son tu a hong sawl theampo ka son tu ka man zawk ciang amate in kei hong man uh a au in, “Hi bang na son hu in thalup tu in kilawm ni hi! 9Banghangin TOPA ii min taw hi Biakinn sia Shiloh khua bang suak tu a, taciang hi khuapi kisusia cip in kuama teang ngawl tu hi ci ni ziam,” hong ci uh hi. Taciang mihonte in kei hong uumci uh hi.

10Judah ngam lampuite in hi thu a zaak uh ciang, kumpi inn pan Biakinn ah manlangin pai uh a, Kongpi Thak ah omna la uh hi. 11Tasia ciang thiampite le kamsangte in ngam lampuite le mihonte tungah, “Hisia pa thalup tu kilawm hi, banghangziam cile ii khuapi siatson hi. Na bil uh taw na za tek zo uh hi,” ci uh hi.

12Taciang keima in, “Hi Biakinn le hi khuapi ka siat sonna na zaak uhte theampo sia, TOPA in taangko tu a kei hong sawl hi. 13Na nuntak ziate uh le na ngamtat ziate kikheal vun a, TOPA na Pathian thu ni vun. Tabangin na hi uhle, na tung uh ah siatna theng sak tu in a son sa sia TOPA in a thin kheal tu hi. 14Kei ka hile, noma khut sungah ka om hi! Pha na sak uhle maan na sak uh bang papo in ka tungah hong vawt tavun. 15Ahihang hi thu telcian vun; kei nong that uhle, noma le hi khuapi sung mihingte sia mawna nei ngawl mihing khat thatin maw nei na tang tu uh hi, banghangziam cile hi kidop natu thu no tungah son tu in hong sawl pa sia TOPA ahi hi,” ka ci hi.

16Taciang ngam lampuite le mihonte in thiampite le kamsangte tungah “Hisia pa in TOPA ih Pathian min taw eite tungah thu hong son ahikom kithatlum ngawl tu hi,” ci uh hi.

17Tua zawkciang, upate pawlkhat ding to in a kikhawm mipite tungah hi bangin, 18“Hezekiah sia Judah kumpi ahi lai in, Moresheth khua mi kamsang Micah in mi theampo tungah Vaanglianbelpa TOPA in hi bangin, ci hi: *

‘Zion sia lo bangin kitho tu hi;
Jerusalem sia ninthuk suak tu a,
Biakinn dinna mual sia dui suak tu hi,’ ci in son hi.
19Hezekiah Kumpipa le Judah mihingte in Micah thatlum ngawl uh hi. Hezekiah in TOPA zatak vawtin TOPA ii mai pha a nga natu in hanciam zaw lai hi. Amate tungah tuasiatna ka theng sak tu hi a ci sia TOPA in a thin kheal kik hi. Tu in eima in a lau huai tuasiatna khat eima tung ma ah ih theng sak dektak hi!” ci uh hi.

20(Kiriath Jearim khua pan Shemaiah ii tapa Uriah a kici midang khat om hi. Ama in Jeremiah bang keak ma in TOPA min suangin hi khuapi le minamte son sia hi. 21Jehoiakim Kumpipa le a ngalkapte le uliante in Uriah ii thuson a zaak uh ciang, kumpipa in Uriah thalup tu in hanciam hi. Ahihang tua thu Uriah in za a, taciang lau in Egypt ngamah tai hi. 22Tua hangin Jehoiakim Kumpipa in, Achbor ii tapa Elnathan le midang pawlkhat sia Uriah man tu in Egypt ngam ah pai sak hi. 23Amate in Uriah sia Jehoiakim Kumpipa kungah puak kik uh hi. Kumpipa in Uriah thatlum in a luang sia mihon kiphumna thaan mual ah vawk hi.)

24Ahihang keima sia Shaphan ii tapa Ahikam in hong panpui ahikom thalup tu in mipite khut sungah hong ki aap ngawlin hong kithat ngawl hi

0 comments:

Post a Comment