Laithiangtho Dokna (Jeremiah 27-28)

1. Akuana hakkol bul tu in Jeremiah sawl ziam?
a. TOPA
b. Judah kumpi
c. Babylon kumpi

2. TOPA in Nabuchandnezzar sia ka ___ ci hi.
a. ngalpa
b. naseam
c. thuk kik tu

3. Mithisate thudongh leang Babylon kumpipa taw ___ son tu hi.
a. ki pawl tu vai
b. inn sak tu vai
c. ki pawl ngawl tu vai

4. TOPA in  Zedekiah tungah bang sawl ziam?
a. Babylon khutnuai tum tu
b. Leilot theite that
c. Babylon nuai tum ngawltu

5. Biakinn sumpite Babylon pan ki ___ tu acite leilot thu hi.
a. la kik pal
b. la kik ngawl
c. hawm nen

6. Jehoiachin Babylon ah a ki paipui lai ___ ki nusia hi.
a. Meingong tangaate
b. Biakinn vanh manpha pawlkhat
c. Puhuai le pi huaite

7. Hananiah in Babylon vaangletna ___  ci hi.
a. susia zo ngawltu
b. mitheampo tungah ki pia
c. ka susia zo

8. Hananiah in Biakinn vanhte kum bangza sung ciapui kik tu ci ziam?
a. Kumh 2
b. Kumh 5
c. Kumh 7

9. Jeremiah ngawng hakkol sia ababek in athiaktan sia akua ziam?
a. Hananiah
b. TOPA
c. Minam lampuite

10. TOPA in thing hakkol sia thik hakkol in alai tu thu kua tungah son sak ziam?
a. Judah kumpipa
b. Hannaniah
c. Minam lampuite

11. Akuate ngangawn in Nebuchadnezzar ii naseam tu hi.
a. Judah kumhpipa
b. Patangte
c. Ngamsate

12. Tha sali tha in athi kamsang leilotpa sia akua ziam?
a. Hananiah
b. Jezeel
c. Sham


Jeremiah 27
Jeremiah in Khuital Hakkol Pua 
1Josiah ii tapa Zedekiah in Judah ngam kumpi a sua tuungin TOPA in keima tungah, * 2Savun khau le thing taw hakkol khat vawt tu le ka ngawng ah bul tu in kei hong sawl hi. 3Taciang Jerusalem khua ah Zedekiah Kumpipa taw kimu tu a hong pai tongciinte tungtawn in Edom, Moab, Ammon, Tyre, le Sidon Kumpite tungah thu khat puak tu in TOPA in keima hong sawl hi. 4Vaanglianbelpa TOPA, Israel ii Pathian, TOPA in hi bangin ci hi ci in a kumpite tungah a son natu in a tongciinte thupia tu in kei hong sawl hi: 5“Ka vaangletna le ka thahatna taw in leitung, mihing, leitung ah a teang nganhingte theampo ka bitphua a, tuate sia ka piak nop papo tungah ka pia hi. 6Ka naseam Babylon Kumpipa Nabuchadnezzar khut sungah hi minamte theampo a koi pa sia Keima ka hi hi, taciang ngamsate ngangawn in ama ii na ka seam sak hi. 7Minam theampo in ama ii na seam tu uh a, ama ngam a bo tu hun a thet mateng in minamte in ama ii tapa le tupa ii na seam tu uh hi. Tua zawkciang ama minamte in a thahat minam dangte le kumpi liante ii naseam tu uh hi.

8“Ahihang minam khat papo ahibale kumpi ngam khat papo in, Nebuchadnezzar ii ukna sungah a tum bua ahile tua minam sia, Nebuchadnezzar ii ka suksiat cip sak mateng in keima in ngal taw, kialpi taw, natna taw in daan ka pia tu hi. 9Na kamsangte ahibale, mang matna taw ahizong, mithite ii thaa samna taw ahizong mitbum taw ahizong mailam thupiang tute a son khol thei a ci sia ii thu ngai heak vun. Amate theampo in Babylon kumpipa khut sungah na tum ngawl natu in no hong son hi. 10Amate in no hong theam a, na ngam uh panin a khuala na ah na paina tu uh hong piang sak tu uh hi. Keima in no kong hawlkeak tu a, kong sucip tu hi. 11Ahihang minam khat papo in Babylon kumpipa khut sungah tum a, a na a seam le, tua munah lotho tu le a teang tu in ka om suak sak tu hi. Keima, TOPA in ka ci zo hi,” hong ci hi.

12Judah Kumpipa Zedekiah tungah ta bangma in, ka son a, “Babylon kumpipa khutnuai ah tum in. Ama le a mite ii naseam in, tua hile na nungta tu hi. 13Banghangin nang le na mite in ngal taw ahibale kialpi taw ahibale natna taw in thi tu nu ziam? Tua thu sia Babylon kumpipa khutnuai ah a tum ngawl minam khat papo tungah piang tu hi ci a, TOPA ii son sa thu ahi hi. 14Babylon kumpipa khutnuai ah na tum ngawl natu uh a, hong son kamsangte ii thu ngai heak in. Amate in nang hong theam hi. 15Kamsangte sia kei ii sawl hi ngawl a, leeilot thu son tu in ka sawl bua hi. TOPA in ci hi. Tua ahikom ama in nang hong bengkeak tu a, nang le na tungah hi leeilot thute hong son kamsangte kithatlum tu hi,” ka ci hi.

16Taciang TOPA in hi bangin ci hi ci in thiampite le mipite tungah, ka son hi: “Biakinn sum le paaite Babylon panin kila kik pal tu hi ci a, a son kamsangte thuson sia ngai heak vun. Amate in no hong theam hi. 17Amate ii thu ngai heak vun! Babylon kumpipa khutnuai ah tum vun tua hile na nungta tu uh hi! Banghangin hi khuapi sia ninthuk suak tu ziam? 18Amate in kamsang tatakte hi in, ka thu a um tatakte ahi uh le, Biakinn sung le kumpi inn sungah a omlai sum le paaite Babylon ah a kipuak sak ngawl natu in Keima, Vaanglianbelpa TOPA tungah hong ngen ta uh hen,” ka ci hi.

( 19-20 Nebuchadnezzar Kumpipa in Judah ngam Kumpipa, Jehoiakim ii tapa Jehoiachin le Judah ngam le Jerusalem khua uliante Babylon khua ah a paipui lai in ama in khuamte, tau tuikuang, leangte le Biakinn vanh manpha a dang pawlkhatte nusia hi.)

21“Jerusalem khuasung Biakinn sung le kumpi inn sungah a ki nusia vanh manphate taw kisai in Keima, Vaanglianbelpa TOPA Israelte ii Pathian ii ka sonte ngai vun: 22Tuate sia Babylon ah kipua tu a, ka kat mateng in tua munah om suak tu hi. Tua zawkciang tuate ka la kik tu a hi munah ka koi kik tu hi. Keima, TOPA in ka ci zo hi,” ci in ka son hi.

Jeremiah 28
Jeremiah le Kamsang Hananiah
1Zedekiah kumpi a sua zawk a kum lina a tha ngana tua kum ma in Gibeon khua mi Azzur ii tapa kamsang Hananiah in Biakinn sungah kei hong paupui hi. Thiampite le mipite om honna ah ama in keima tungah, * 2Vaanglianbelpa TOPA, Israelte ii Pathian in “Babylonia kumpipa vaangletna ka susia zo hi. 3Nebuchadnezzar Kumpipa ii Babylonia khua ah a paipui Biakinn vanh manphate theampo kum nii sungin hi munah ka ciapui kik tu hi. 4Keima in Judah Kumpipa, Jehoiakim ii tapa Jehoiachin zongh Babylonia ah saltang a, a pai Judah mite theampo taw ka sam kik tu hi. Hi hi. Keima in Babylonia kumpipa vaangletna ka susia tu hi. Keima, TOPA in ka ci zo hi,” ci in hong son hi.

5Tasia ciang thiampite le Biakinn sungah a ding mipite theampo ii mai ah, Keima in Hananiah tungah, 6“Lamdang hi! TOPA in hi bangin seam tahen! TOPA in na sonkhol sia tangtung sak tu a, salin a kikai mihing theampote le Biakinn vanh manphate theampo Babylon panin hong ciapui kik tu hi ci in ka um takpi hi. 7Ahihang na tung le mipite tungah ka son thu sia ngai in. 8Nang le kei ii om ma a a om, taanghlai a thuson kamsangte in minam tam mamate tung le a thahat a vaanglian kumpi ukna ngam liante tungah ngal, kialpi le natna theng tu hi ci in sonkhol zo uh hi. 9Ahihang kilemna le thin nopna hong theng tu hi ci a son khol kamsang pa sia, ama ii sonkhol nate a tangtung takpi ahile Pathian ii sawl tatak kamsang hi ci in kisaang thei pheang tu hi,” ka ci hi.

10Tasia ciang Hananiah in ka ngawng pan hakkol hong la in a bebek in thiaktan hi. 11Taciang ama in mipi mai ah, “Nebuchadnezzar Kumpipa ii minam theampote ii ngawng ah a bul hakkol sia hi bangin ka thiaktan tu hi TOPA in ci hi; taciang ama in hi nasep sia kum nii sung sang seam tu hi,” ci in son hi. Taciang ka nusia hi.

12Hisia zawk tawmvei ciang TOPA in keima tungah, 13Pai in na Hananiah kungah son tan: “TOPA in, thing hakkol khat sia thiaktan zo peu tu ni hi, ahihang thik hakkol khat taw ka lai tu hi, ci hi. 14Vaanglianbelpa TOPA, Israelte ii Pathian in hi minamte theampo tungah thik hakkol ka bul tu a, amate in Babylonia Kumpipa Nebuchadnezzar ii na seam tu uh hi, ci hi. TOPA in ngamsate ngangawn in Nebuchadnezzar ii na ka seam sak tu hi, ci hi,” hong ci hi.

15Taciang Hananiah tungah hi thu ka son a, hi bangin belap in, “Ngai in, Hananiah awng! Nang sia TOPA ii hong sawl na hi bua hi. Hi mihingte leeilot thu na um sak hi. 16Tua ahikom TOPA ama mama in nang hong hep tu sia son hi. Tu kum bo ma in na thi tu hi, banghangziam cile TOPA langpan tu in mipite na son zo hi,” ka ci hi.

17Tua kum tha sali tha in Hananiah thi hi.

0 comments:

Post a Comment