Laithiangtho (Dokna Mark 1-2)

1. John ii thuson angaite sia koi sung pan ziam?
a. Judea, Jerusalem
b. Samaria le Judea
c. Jerusalem le Samaria

2. John thongtaak ciang TO JESU koi sungah pai in thuhil ziam?
a. Galilee
b. Jerusalem
c. Samaria

3. James le John te ii apa min bang ziam?
a. Zebedee
b. Zedebee
c. Bezedee

4. Capernaum khua ii koi sungah ah doai vei khat ciik au ziam?
a. Synagogue
b. Thaan
c. Tuilii hui

5. TO JESU koi sung ngambup synagogue te ah thuhil in doaite not ziam?
a. Galilee
b. Samaria
c. Judea

6. Miphakpa in a thu ason kakawi hang in, TO JESU khuapi sungah ___ hi.
a. tum nawn ngawl
b. ki del lialua
c. maipha ngaa

7. ___ ah Innkhuvum vutlet in TO JESU kung mipha khat dam ziam?
a. Jerusalem
b. Capernaum
c. Hebron

8. TO JESU nungzui Levi sia bang nasep seam ziam?
a. Ngasa man
b. Shiadong
c. Biakinn naseam

9. Levi sia koisung a om laitak sapna ngaa ziam?
a. Biakinn sung
b. A zum sungah
c. Ngasa man

10. Phariseete le akuate in antang ziam?
a. Suduce
b. John ii nungzuite
c. Mi pawlkhat

11. TO JESU koisungah apai laitak nungzuite in zungtaang ne ziam?
a. Ngamkhingna
b. Lo
c. Tuilii

12. Mihing sia bang atu kivawt hi ngawl ziam?
a. Satan
b. Sabbath
c. Mihingte atu

Mark 1
Tuiphumpa John Thuhilna
(Matthew 3.1-12; Luke 3.1-18; John 1.19-28)
1Hi thu in Pathian Tapa Jesus Christ Lungdamna Thupha ahi hi. 2Kamsangpa Isaiah at sa bangin kipan hi.
“Pathian in ‘Ka kamtaipa sia
na lampi hong honkholsak tu in, na mai ah ka paisak tu hi.’
3Senneal ngam sungah mihing khat hong au a, ‘Topa atu in lampi puakhol vun;
ama khualhaw natu in lamzin tang khat vawtsak vun!’ ” ci hi.
4Tuabangin John sia senneal ngam sungah hong kilak a, ama in thuhil in tuiphum hi. “Na mawna pan kisiik kik vun a, tui kiphum vun, tua hile Pathian in na mawnate hong maisak tu hi,” mipite tungah ci hi. 5Judea ngam pan le Jerusalem khua panin John thuson ngai tu in mihing tam mama pai uh hi. Amate in a mawnate pualaak uh a, tua zawkciang Jordan Ngun sungah, ama in tuiphum hi. 6John in kalaoh mul taw a kitak puan silh a, savun kawngkhau thua in, a anneak sia khaumaw le ngam khuaitui ahi hi. 7Mihingte ii munah, ama in, “Kei nung pan hong pai lai tu pa sia kei sangin lianzaw pek hi. Kunin a peangdap khau suut tu zongh in ka kilawm bua hi. 8Note sia tui taw tui kong phum hi, ahihang ama in Thaa Thiangtho taw hong baptize tu hi,” ci in taangko hi.

Jesus ii Kituiphum na le Ze-et A Thuakna
(Matthew 3.13-4.11; Luke 3.21-22; 4.1-13)
9Tua zawk ngei ngawlin Jesus sia Galilee ngam Nazareth khua panin hong pai a Jordan ah John in tuiphum hi. 10Tuisung pan Jesus a thaw to po ciangin, van kihong a, Thaa sia ama tungah ngam vakhu bangin hong tuaksuk mu hi. 11Vantung pan in aw khat nging a, “Nang sia ka it ka Tapa na hi hi. Nang tungah ka lungkim hi,” ci hi. 12Thakhat in Thaa in ama senneal ngam sungah paisak hi. 13Tua munah Satan in ama ni sawmli sung ze et hi. Tua munah ngamsate zongh om a, ahizong, vantung lalangte hong pai in ama hu hi.

Jesus in Ngasa Paai Mihing Li Sam
(Matthew 4.12-22; Luke 4.14-15; 5.1-11)
14John thong sungah a kikhum zawkciang, Jesus Galilee ngam ah pai a, Pathian Lungdamna thupha hil hi. 15“A hun hong tung zo hi, Pathian Ngam hong nai zo hi. Na mawnate uh pan kisiik vun a, Lungdamna Thupha um vun!” ci hi. 16Jesus Galilee tuili hui ah a va laitakin, ngasa paai mihing nii, Simon le a suapuipa Andrew ngeen taw ngasa man in om mu hi. 17Jesus in, “Hong pai tavun, mihing mante kong suaksak tu hi,” ci hi. 18Thakhat in amate in, a ngeen uh nusia in ama zui uh hi. 19Ama in mai sangah tawm a pai ciang, Zebedee ii tapate James le Johnte unau mu hi. Amate a ngeente puua in ngunkuang sungah om uh hi. 20Jesus in a mu po ciangin sam hi; amate in a pa uh Zebedee le a cial sa naseamte ngunkuang sungah nusia in Jesus zui uh hi.

Doaivei Pasal Khat
(Luke 4.31-37)
21Jesus le a nungzuite Capernaum khua hong theng uh a, Sabbath kik ni ciangin, Jesus in Jewte ii synagogue ah pai in hilhna nei tu in kipan hi. 22A thuhilna a za mihingte in ama thuhil zia lamdang sa uh hi, banghangziam cile, Thukham hil syate bang hi ngawlin, ama in thuneina taw thuhil hi. 23Tua zawk hiat ciangin doaivei pasal khat synagogue sungah hong tumin cik-au hi. 24“Nazareth mi Jesus awng, kote bang hong nuammaw ni ziam? Ko hong lalcipsak tu in hi sungah hong pai na hi ziam? Nang akua na hi hunlam hong he khu hi — Nang sia a thiangtho Pathian kamtaipa ni hi,” ci hi. 25Jesus in doai munah, “Pau heak in, pasalpa sung pan hong pusuak tan!” ci in thupia hi. 26Doai in pasalpa thing zazaan a, a nging in a cik-au zawkciang pasalpa sung pan pusuak hi. 27Mihingte theampo in lamdang mama sa uh a, “Bangbang thu hi thong ziam? Tu a sia kihilna thak khat ahi ziam? Hisia pa in doaite tungah thunei a, thu a piak ciangin doai in a thu ni hi!” ci in khat le khat kikum uh hi. 28Tuabangin Jesus huvau thupiangte Galilee ngam mun theampo ah manlang takin kizel hi.

Jesus in Mihing Tam mama Damsak
(Matthew 8.14-17; Luke 4.38-41)
29Jesus in a nungzuite taw synagogue nusia in Simon le Andrew te inn ah paisuak uh hi. Nungzui James le John zongh kihel hi. 30Simon sunghnu a cina in lum a, suuk hi. Jesus hong thet po ciangin, tua thu ama tungah son hi. 31Ama in nupinu kungah pai in a khut pan kaito in thosak hi. A suuk natna thai a, amate zin do hi. 32Ni tumin nitak hun a thet ciang, mihingte in Jesus kungah, cinate le doaiveite paipui uh hi. 33Khuapi sung pan mihing theampote innmai ah kikhawm uh hi. 34Jesus in natna satna namcin taw a na theampo damsakin, doaivei tam mama a doai nawkeaksak hi. Ama in doaite ii pau tu khaam hi, banghangziam cile amate in Jesus sia akua ziam ci in he uh hi.

Jesus in Galilee ah Thuhil
(Luke 4.42-44)
35Zingtuung khuavak maa in, Jesus tho in tua inn nusia hi. Khuapi puasang a ngamkhingna mun khat ah pai in thungen hi. 36Ahihang Simon le a kitholpuite in ama zong tu in pai uh hi. 37Tuaciang ama a mu uh ciangin, “A kuama po in nang hong zong hi,” ci uh hi. 38Ahihang Jesus in, “Hisung kiim le paam khua dangte sung zongh ah ih pai kul tu hi. Tua munte zongh ah thu ka hil kul tu hi, banghangziam cile, tua nasep ma seam tu in hong pai ka hi hi,” ci hi. 39Tua hi a, ama in Galilee ngambup synagogue te ah thuhil in doaite not hi.

Jesus in Pasal Khat Damsak
(Matthew 8.1-4; Luke 5.12-16)
40A phaak nasia mama khat Jesus kungah hong pai a, khupdin in, “Hong damsak nuam po lete hong damsak thei tu ni hi,” ci in hu ngen hi. 41Jesus in ama khuangai huai sa in, a khut vaan in tham hi. “Hong damsak nuam khi hi, dam tan, ” ci in zokik hi. 42Thakhat thuin pasalpa a natna damthiang paih hi. 43Tua zawkciang, Jesus in ama nasia tak talin, paisak paih a, 44“En in, hi thu kuama munah son heak in, pai vingveng tan a, thiampipa in vealsak tan,” ci in a sawl zawkciang, “Mihing theampo tungah na thianthona a kilangh tu in, Moses sawl bangin, sangaw biakpiakna vawt tan,” ci hi. 45Ahihang pasalpa pai in mun theampo ah hi thupiang sia son kawkoai hi. Pasalpa in nasiatak son ahikom Jesus sia khuapi khat pawpo ah, mipite ii mutang in, a tum ngam nawn bua hi. A ngamkhingna munte ah ama om a, mihingte in mun theampo panin ama kung zuan uh hi.


Mark 2
Jesus in Pasal Langngaw khat Damsak
(Matthew 9.1-8; Luke 5.17-26)
1Ni tam kihal ngawlin Jesus Capernaum khua ah pai kik hi, tuaciang ama inn ah om hi, ci in kiza hi. 2Tua ahikom mihing tam mama hong kikhawmtua uh a, om natu mun awng zongh
om nawn ngawl liangin kongbiang puasia dongin dim uh hi. Jesus in thu a hihil laitakin, 3pasal li hong theng a, Jesus kungah langngaw pasal khat puak hi. 4Ahizong mihonpite hu in cina sia Jesus kung tatak a then zo bua hi. Tua ahikom amate in Jesus omna sanh innkhum sulet uh a, pasalpa phak tungah lumsakin, innkhum sukletna pan khiasuk uh hi. 5Amate in bangza in upna nei ci sia Jesus in a mu ciang, langngaw pa munah, “Ka tapa awng, na mawnate hong kimaisak zo hi,” ci hi. 6Tua munah a to Thukham hil syate in, 7“Banghangin hi bangin pau ngam ziam? Hisia in Pathian min daisakna hi. Pathian bekma in mawnate maisak thei hi!” ci in ngaisun hi. 8Thakhat in Jesus in amate ngaisutna teng tel ahikom, “Banghang tuabangin ngaisun nu ziam? 9Hi langngawpa tungah ‘Na mawnate hong kimaisak zo hi’ cile, ‘Tho in, na phak luakin lampai in,’ ci koisia ol zaw ziam? 10Tua ahibuale Mihing Tapa in leitung mawmaisak theina nei hi, ci in no tungah lak tu khi hi,” ci in langngawpa munah, 11“Tho in, na phak luakin cia tan, hong ci khi hi!” ci hi. 12Amate mu tangin pasalpa tho a, a phak luakin lawn paih hi. Amate in lamdang sa mama in, Pathian pok uh hi. “Hi bang peuma mu ngei bua hing!” ci uh hi.

Jesus in Levi Sam
(Matthew 9.9-13; Luke 5.27-32)
13Jesus Galilee tuili hui ah pai kik hi. Mihon khat ama kungah hong pai hi, tuasia ciangin amate thuhil tu in kipan hi. 14A pai kakawm in, Alphaeus ii tapa Levi kici shiadongpa a zum sungah to in om mu hi. “Hong zui tan” ci hi. Levi zongh ding vangiat in zui hi. 15Tua zawkciang Jesus Levi inn ah an ne hi. Shiadongte hon khat le a dang a kinialnamhte pawlkhat in, Jesus zui a, Jesus le a nungzuite taw an ne khawm uh hi. 16Pharisee a kici Thukham hil syate in, Jesus shiadongte le a kinialnamhte taw an ne khawm in om a mu uh ciangin, “Banghangin ama in mihing tuabangte taw an ne khawm ziam?” ci in dongh uh hi. 17Jesus in amate thu kidok za a, “Mihing cidamte in zatomamgpa tulmaw ngawl a, cinate bek in zatomang tulmaw uh hi. Mihingphate sam tu in kong pai bua a, a kinialnamhte sam tu in kong pai hi,” ci hi.

An tanna huvau Dokna
(Matthew 9.14-17; Luke 5.33-39)
18Hun khat lai in, Tuiphumpa John ii nungzuite le Phariseete an tang uh hi. Mihing pawlkhat Jesus kungah hong pai a, “Banghangin Tuiphumpa John nungzuite le Phariseete nungzuite in an tang a, na nungzuite in, banghangin an tang ngawl ziam?” ci in Jesus dongh uh hi. 19Jesus in, “Mopoai an kivaakna sungah leangnate in an ne ngawlin om tu na um uh ziam? Om ngawl tu hi! Zineipa sia amate taw a om khop laiteng amate in tuabang a ngamta buatu hi. 20Ahihang ni khat ni ciangin zineipa sia amate kung pan hong kila tu a, tuasia ciangin an tang tu hi,” ci in zokik hi. 21“Kuama in puanlui ek sa sia puanthak taw phaw ngei ngawl hi, banghangziam cile puanthak sia a ton ciangin a lui sia ekkeak tu a eksak seseam tu hi. 22Tuasia bangma savun thawl lui sungah sapittui thak kuama in thaal ngei ngawl hi, banghangziam cile sapittui thak sia in savun thawl lui sia saantham tu a, a sapittui le a thawl lalcip tu hi. Sapittui thak sia savun thawl thak sungah thaal tu hi zaw hi,” ci hi.

Sabbath huvau Dokna
(Matthew 12.1-8; Luke 6.1-5)
23Jesus sia Sabbath ni khat zungtaang lo tawntan in pai hi. A nungzuite zongh ama taw kithawl a, zungtaang huite hiat tu in kipan uh hi. 24Tuasia ciang Phariseete in Jesus munah, “En in, Sabbath ni na nungzuite ii zia bang a ngamtat tu sia ih thukham in khaam hi,” ci uh hi. 25Jesus in, “David in bang khat po a neak tu a kisap mama hun laitakin, a ngamtatna sim ngei ngawl nu ziam? Ama le a mite a ngilkial hi. 26Tua ahikom Pathian inn sungah tumin Pathian a kipia sa anluum ne hi. Tua hun laitak sia Abiathar in Thiampi Lianbel a sep laitak hi. Ih Thukham bangin ci leang thiampite bek in hi anluum a neak thei natu ahi hi, ahihang David in ne a, a mite zongh pia hi,” ci in zokik hi. 27A thukhupna ah Jesus in, “Sabbath sia mihingte ii phat natu in a kivawt hi a, mihing sia Sabbath atu a kivawt a hi bua hi. 28Tua hi a, Mihing Tapa sia Sabbath ngangawn ii Topa ahi hi,” ci hi.


0 comments:

Post a Comment