Laithiangtho Dokna (Matthew 27-28)

1. Judah Iscariot ii sum taw alei lo sia ___ in kizangh hi.
a. Mizawngte than
b. Ngamdangmite than
c. Tualthalupna mun

2. ___sim ngamukpa in thongtaak khat veu suaktak hi.
a. Anluum poai nimasa
b. Paisan Poai tun sim
c. Kumthak ni masa

3. TO Jesu matthuak zawk asil puan sia ___ hi.
a. puankang neal khat
b. puantual kang
c. puantual san

4. Golgotha sia bang kici ziam?
a. Lungu Mun
b. Kithalupna mun
c. Chisan luanna

5. Mihing in ahuitat lian le bangthu piang ziam?
a. Ngua nasia tatak zu
b. Mithi pawlkhat thokik
c. Vanto in tuikhang

6. Ngalkapte in ___a mu uh ciang lau uh hi.
a. chisan luanna
b. thinglamte
c. zinliing le thupiangte

7. Maryte 2 thaan avil le thakhat in ___ hi.
a. ngua nasia tatak zu
b. zin nasia takin liing
c. khualeng nasia peuma

8. Vantungmi meal sia ___ taw kibang hi.
a. vuk bangh ngo
b. khualeng
c. paak

9. Thancingte banghang mithi sate taw kibang ziam?
a. Atha zongh thi
b. Heakna nei ngawl
c. Laulei

10. Thaw kik thu ngalkapte in aheak ciang ___ son masa hi.
a. Thiampite tung
b. Ngamukpa kung
c. Pilate kung

11. Ngalkapte in sum laa in ason leilotthu sia ___ kizelh hi.
a. Leitungbup
b. Jewte tungah
c. Ngalkapte sung

12. Nungzui 11 te koisungah pai ziam?
a. Sinai
b. Jordan ngun
c. Galilee

Matthew 27
Jesu Pilate kungah Kipaipui
(Mark 15:1: Luke 23:1-2; John 18:28-32)
1Zingsang tuungin thiampi lian theampo le upate in Jesu sia a thalup natu vaihawm uh hi. 2Amate in ama sia thikkhau taw khi in, paipui a, Romete ii ngam uk mangpa Pilate kungah aap uh hi.

Judas Thina
(Sawltak 1:18-19)
3Ngual leeheakpa Judas in Jesu sia thidaan kipia tu hi, ci in a heak ciangin, ama kisiik kikin, a ngun dangka sawm thum teng thiampi liante, upate kungah paipui hi. * 4“Mihing mawna nei ngawl khat athi tu in, leeheak ka hikom ka maw zo hi!” ci hi.

Amate in, “Tua thu ko taw bang kisai nawn ziam? Tua thu sia nangma taw kisai bek hi!” ci in zo kik uh hi.

5Judas in a dangka teng Biakinn sungah vawk in nusia a, tua zawkciang ama pusuak in ama le ama awklum hi.

6Thiampi liante in dangka tangte tawmin, “Hisia in chisan ii manh hi a, ih Thukham in chisan manh sia Biakinn sumkholna ah khol tu khaam hi,” ci uh hi. 7Amate teng tua sum tungtaang ah thukimna a neizawk ciang, Bealseakpa ii Lo a kici sia, ngamdang mite thaan tu in, tua sum taw lei uh hi. 8Tua hu in tua lo sia “Chisan Lo” tu dong ma in kici hi.

9Tasia ciang kamsangpa Jeremiah ii sonkhol teng tangtung hi. “Amate in, Israel mite ii ama man tu a, a thukim uh ngun dangka sawm thum la in, * 10Topa ii keima hongsawl bangin bealseakpa ii lo sia lei uh hi.”

Pilate in Jesu Thu Dongh
(Mark 15:2-5; Luke 23:3-5; John 18:33-38)
11Jesu sia Romete ii ngam uk mangpa mai ah ding a, tua pa in, “Nang sia Jewte ii kumpipa na hi ziam?” ci in dongh hi.

“Nangma cibang ahi hi,” ci in Jesu in zo hi. 12Ahihang thiampi liante le upate ii mawsiatnate huvau sia bangma zona a nei bua hi.

13Tua ahiciang Pilate in, “Hi thute taw hong maw sak nate za ngawl ni ziam?” ci hi.

14Ahihang Jesu in kammal khat zongh a zo bua hi, tasia ciangin ngam uk mangpa in lamdang mama sa hi.

Jesu Thidaan Kipia
(Mark 15:6-15; Luke 23:13-25; John 18:39-19:16)
15Paisan Poai a tun simin, Romete ngam uk mangpa in mipite ii ngetna bangin, thongtaak khat veu suatak sak tu ngeina nei hi. 16Tua laitakin Jesus Barabbas a kici a minthang thongtaak pa khat om hi. 17Tua ahikom mipite hong kikhop ciang, Pilate in amate munah, “Jesus Barabbas hong tha leng deizaw nu ziam maw, Messiah a kici Jesu hong tha leng deizaw nu ziam?” ci in dongh hi. 18Jew mi thuneite in, Jesu eang ahikom ama khut sungah aap ahi hunlam sia ama in tel hi.

19Pilate sia thukhenna innsung a to laitakin a zi in kamtai sak a: “Mawna nei ngawl tuapa tungtaang ah kihel heak in. Tuzan in ama huvau ka mang sungah nasia takin thuak khi hi,” ci hi.

20Thiampi liante le upate in Pilate ii Barabbas suatak a piak natu le, Jesu a thalup tu a nget natu in mipite hol uh hi. 21Ahihang Pilate in mipite munah, “Hite nii sung pan koi sia hong tha leng na deizaw uh ziam?” ci in dongh hi.

“Barabbas,” ci in zo uh hi.

22“Tua ahile Messiah a kici Jesu sia bang law tu khi ziam?” ci in Pilate in dongh hi.

“Thinglamte tungah thatlum in,” ci tek uh hi.

23Ahizong Pilate in, “Ahihang ama in bang khialna vawt na ziam?” ci in dongh hi.

Tasia ciangin, amate in a aw neiza uh taw au in, “Thinglamte tungah thatlum in,” ci uh hi.

24Pilate in tu bang taw kinga zo ngawl tu hi ci a mu ciangin, ngamlumna piang thei tu hi, ci a mu manin tuidam tawm la in, mipite mai ah a khutsil a, “Hisia ii thina taw kisai kei hang hi ngawl hi! Hisia in noma ngamtatna hang ahi hi!” ci hi. *

25“Ama thina hangin thuak tu a om babang koma le ka suan ka paalte tungah hong tu tahen!” ci in mipibup in zo hi.

26Tua zawkciang Pilate in, amate dei bangin Barabbas tha hi; Jesu sia a vel sak zawkciang thinglamte tungah thalup tu in aap hi.

Ngalkapte in Jesu Nunau zazan
(Mark 15:16-20; John 19:2-3)
27Tua zawkciang Pilate ii ngalkapte in Jesu sia ngam uk mangpa inn ah paipui uh a, ngalkap honbup sia ama kim ah kikhawm hi. 28Amate in a puansilhte suukeak sak a, puantual san khat silh sak hi. 29Tua zawkciang lingngui taw kumpi lukhu khat vawt in a lu ah khu sak hi, taciangin ciangkang khat a khut ziatsang ah koi uh a; tua zawkciang a mai ah khupdin in nunau uh hi. “Jewte ii kumpipa a khansau tahen!” ci uh hi. 30Amate in ama cilphii in, a ciangkang sut kik a, a lutang saatna in nei uh hi. 31Amate in a ciammui vawt zazan zawk uh ciangin, a puantual sia suu sak kikin, ama ii a silh ngei teng silh sak kik hi. Tua zawkciang thinglamte tungah thatlum tu in paipui uh hi.

Jesu Thinglamte tungah Kithat
(Mark 15:21-32; Luke 23:26-43; John 19:17-27)
32Amate a pusua uh ciang, Cyrene mi Simon a kici khat taw kisi uh a, ngalkapte in zawthawk thu taw Jesu thinglamte pua sak uh hi. 33Amate in Golgotha a kici “Lungu Mun” theng uh hi. 34Tua munah amate in sapitzu le tuikha nam khat hel in, Jesu pia uh hi; ahihang ama in tepbek in a ne bua hi. *

35Amate in Jesu sia thinglamte tungah kil uh a, aisaanna taw in a puan teng hawm uh hi. * 36Tua zawkciang tua munah to in ama en uh hi. 37A lutung san ah ama kimaw sakna laimal teng taak uh hi. “Hisia in Jesu hi. Jewte Kumpipa hi,” ci in at uh hi. 38Tua zawkciang in phalakte nii zongh Jesu ziat sangah khat vei sangah khat khaikhawm uh hi.

39Tua mun kantan a hong pai mihingte in Jesu sia lupei in selno uh hi. * 40“Biakinn baltham in ni thum zawkciang a sa kik tu pa, Pathian Tapa na hile, nangma le nangma kihun in! Thinglamte tung pan hong tuaksuk tan,” ci uh hi. *

41Tabang tatak ma in thiampi liante, Thukham hil syate le upate in nunau uh hi. 42“Ngualdang sia hun zo ahihang ama le ama kihun thei ngawl hi. Ama sia Israelte Kumpipa hi ka na ngawl ziam! Thinglamte tung pan hong tuaksuk le, tasia ciang ama ki um tu hi! 43Ama in Pathian muang a, Pathian Tapa ka hi ci hi. Tua ahile Pathian in tu in hun nuam ziam en tawng!” ci uh hi. *

44Thinglamte tungah ama bangin a kikhai phalakte ngangawn in, ama sia tabang ma in selno uh hi.

Jesu ii Thina
(Mark 15:33-41; Luke 23:44-49; John 19:28-30)
45Nisun ciangin ngambup sia khuazing in sin cip a, nai thum sung khuazing hi. 46Nai thum saat tu bang ciangin Jesu in aw nging tatak taw, “Eli, Eli, Lema Sabachthani!” ci in au hi. A khiakna sia “Ka Pathian, Ka Pathian awng! Banghang hong nusia ni ziam?” a cina hi. *

47Tua munah a ding mihing pawlkhatte in za a, “Ama in Elijah sam hi!” ci uh hi. 48Amate sung pan khat tai in, sapitzu thuk sungah puansia pap in, ciangkang tungah sawm in a neak tu in, ama kam ah taa to hi. *

49Ahihang pawlkhatte in, “Ngak vun! Elijah in ama hun tu in hong pai ziam, en tawng!” ci uh hi.

50Taciang Jesu in a nging takin au kik a, taciang a hui tat hi.

51Taciangin Biakinn sungah kidalna puan a kikhai sia a lu pan a taw dong khen nii in kizensuk hi. Zinliing a suangpite kikhentham in, * 52thaante kihong in, Pathian ii mihing a thi sate tam ma kitho kik sak hi. 53Amate in thaan nusia in, Jesu ii thina pan a thaw kik zawkciang, Khuapi Thiangtho sungah tum uh a, tua munah mihing tam mama in amate mu uh hi.

54Ngalkapmangpa le Jesu a cing ngalkapte in zinliing le thupiang dang theampo a mu uh ciang, lau mama a, “Ama sia Pathian Tapa tatak hi!” ci uh hi.

55Galilee pan a zui, ama a hu numei tam mamate a khuala na ah ding in Jesu en uh hi. * 56Tuate sungah Mary Magdalene, James le Joseph nu Mary, Zebedee ii zi kihel hi.

Jesu Kivuina
(Mark 15:42-47; Luke 23:50-56; John 19:38-42)
57Nitak ciangin, Arimathea panin sumhau khat hong theng hi. Amin Joseph hi a, ama zongh Jesu ii nungzui khat ahi hi. 58Ama in Pilate omna ah pai in Jesu luang ngen hi. Pilate in Jesu luang sia Joseph piak natu in thupia hi. 59Tua ahikom Joseph in la a, puankaangneal thak taw a tun zawkciang, 60ama ii thaankuul sungah koi hi. Tua thaankuul sia suangpi a khuak thak ahi hi. Tua zawkciang, ama in suangtumpui khat thaan kuavang mai ah liik in a kha zawkciang cia hi. 61Mary Magdalene le Mary dang khat sia thaan maingat in to uh hi.

Thaancing Ngalkapte
62A khuavak ni sia Sabbath ni hi a, thiampi liante le Phariseete in Pilate taw kimu uh a, 63“Topa awng, mihing leeilot pa in a nuntak lai in, ‘Ni thum zawkciang, nuntakna sungah hong kithokik sak tu hi,’ a ci ngei sia ka phawk uh hi. * 64A nungzuite hong pai in, a luang ngu a, mihingte munah thina pan tho kik sak zo hi a ci thei ngawl natu in, a ni thum ni ciang dong thaan sia pha takpi a kicin natu in thupia in. Leeilot thu a nungkhak zaw sia in, amasa sia sangin sia seseam zaw tu hi,” ci uh hi.

65Pilate in, “Ngalkap pawlkhat la vun a, thaan sia a cinthiam thei za in cing sak tavun,” ci hi.

66Tua ahikom amate pai in, thaan kongvang sia a bit thei natu in, suang tungah tepteena khen in ngalkapte ii cin tu in nusia uh hi.

Matthew 28
Thaw kikna
(Mark 16:1-10; Luke 24:1-12; John 20:1-10)
1Sabbath zawkciang, Nipi ni khua hong vak ciangin, Mary Magdalene le Mary dangkhat thaan vil tu in pai uh hi. 2Thakhat in zin nasia takin liing hi. Topa vantung lalang khat van pan hong tuaksuk a, thaan kong huhna suangtum liikkeak in a tungah to hi. 3Ama meal sia khualeng taw kibangin, a puansilh sia vuuk bangin paak hi. 4A cingte lau mama ahikom, liingin mithi sate taw kibang uh hi.

5Vantung lalang in numeite paupui hi. “Lau heak vun. Thinglamte tungah a kithat Jesu sia zong nu hi ci in kong he hi. 6Ama in hi sungah om ngawl hi! Ama hong son sa bangma in ki tho kik sak zo hi. Hi sungah hong pai tavun a, a lupna hong en tavun. 7Tu in manlang pai tavun a, a nungzuite munah, ‘Ama sia thina panin ki tho kik sak zo a, tu in ama in note mai Galilee ah pai tu hi; tua munah ama na mu tu uh hi!’ ci tavun. Kong son sate ciamtee tavun,” ci hi.

8Tua ahikom amate in, thaan sia manlang takin nusia a, lau kawm si lungdamna taw kidim si in, nungzuite kungah thupuak tu in tai uh hi.

9Thakhat in Jesu in amate taw kisi a,“Thin nopna na nga tavun,” ci hi. Amate in ama kungah hong neak uh a, a peang koai in bia uh hi. 10“Lau heak vun. Pai tavun a, ka suapuite munah, Galilee ah pai tu in sawl tavun, tua munah amate in kei hong mu tu hi.” Jesu in ci hi.

Thaancing Ngalkapte Thukona
11Numeite sia amate pai natu ah a pai laanin, thaancing ngalkapte pawlkhat khuapi sungah heak kikin, thiampi liante tungah thupiang theampo ko uh hi. 12Thiampi liante in upate taw kisi in, kikupna khat nei uh hi. A ngalkapte sia sum tam mama taw suu uh a, 13taciangin, “Zan ka mut laanin nungzuite hong pai a, a luang hong ngu hi, na ci tu uh hi. 14Taciangin ngam uk mangpa in hi thu a za le note mawna a hi ngawl hunlam ka na son tu uh hi, bangma thin ngim natu om ngawl hi,” ci uh hi.

15Ngalkapte in sum la in, a kisawl na bangin vawt uh hi. Tuahi a, tua thupuakna sia tuni dong Jewte sungah kizel hi.

Jesu A Nungzuite Munah Kilak
(Mark 16:14-18; Luke 24:36-49; John 20:19-23; Sawltak 1:6-8)
16Nungzui sawm le khatte in Galilee ngam mual tungah Jesu sawl bangin pai uh hi. * 17Ama a mu ciangin, pawlkhat in um tak ngawl ahitazong, amate in bia uh hi. 18Jesu in amate kungnai neakin, “Vantung le leitung ah thunei theina theampo a vekpi in kei hong kipia zo hi. 19Tua ahiciang pai tavun, mun theampo ah mihing namcin theampo ka nungzui suaksak tavun: Pa, Tapa le Tha Thiangtho min taw tui na phum tavun, * 20taciang ka thu piakte theampo a zui natu hil tavun. Taciang hun bo dongin note taw kong omkhawm tawntung tu hi,” ci hi.


0 comments:

Post a Comment