Laithiangtho Dokna (Samuel Niina 17-18)

1. Banghun laitak Ahithophel in David del nuam ziam?
a. Nitak
b. Zingsang
c. Zankim

2. Hushai in David sia vom bangbangh ahite taw tengat ziam?
a. Vomtal
b. Vompui tano khuai
c. Vomno ngilkial

3. Akuana Israelte sia sennealza in tam ci ziam?
a. Joab
b. TOPA
c. Hushai

4. Absalom in akua ii ngaisutpiak sang zaw ziam?
a. Ahithophel
b. Hushai
c. Amasa

5. Kumpi inn sungah David ii thukan bangza om ziam?
a. 1
b. 2
c. 3

6. Ahithophel in bang ahi zawk ciang awk lum ziam?
a. A vai tatuam
b. An neak zawk
c. Na sia tatak akap zawk

7. David in Absalom asim tu ciang akua thu ni ziam?
a. Angalkapte
b. Ahithophel
c. Thiampi Zadok

8. David ngalkapte Absalom sim tu in koisung pan kuan ziam?
a. Jerusalem
b. Mahanaim
c. Sinai

9. Absalom nungzuite akoi sungah athi tam bel ziam?
a. Jordan ngun
b. Senneal ngam
c. Ephraim dui sungah

10. Absalom le David ii mite bangbangh kisi ziam?
a. Lozau sungah
b. Thakhat thu
c. Luamsung ah

11. Absalom thalup natu Joab in tei bangza la ziam?
a. 1
b. 2
c. 3

12. Absalom ii lutang bangtaw sin ziam?
a. Suangtum hon taw
b. Lei
c. Senneal

Samuel Niina 17
Hushai in Absalom Lampui khial
1Tua zawk a ngei ngawlin, Ahithophel in Absalom ii munah, “Pasal tulsawm le tulnii hong teal sak tan a, tu nitak in David ka na del tu hi. 2Ama a toi laitak le a thinkiam laitakin ka na sim tu hi. Ama sia hong lau tu a, a mite theampo zongh taikeak tu hi. Keima in kumpipa bekma ka that tu a, 3taciang a mite mo khat a pasal kung a zot kik bangin nangma kungah kong paipui tu hi. Na thalup nop sia mihing khat bekma hi; a dang teng lau om ngawl hi. 4Hi ngaisutna sia Absalom le Israel lampuite atu ngaisutna pha hi tuak sa uh hi.

5Absalom in “Tu in Hushai sam vun, ama in hi thu tungtaang ah bang ci nop a nei ziam ngai sin tawng,” ci hi. 6Hushai hong thet ciang, Absalom in ama mun ah, “Hi sia Ahithophel ii ngaisut hong piak teng hi; tasia ih ni tu ziam? Ih ni batu ahile ih ngamtat natu nangma hong son tan,” ci hi.

7Hushai in, “Ahithophel ii ngaisutna hong piak tutung sia pha ngawl hi. 8Na pa David le a mite sia ngalsim a taktai mama te hi a, vompui a no khuaite a kiitak huai za in kiitak huai hi. Na pa sia ngalvai heak sa tam mama a nei khat hi a, zanin a mite taw mun khat ah om ngei ngawl tu hi. 9Tu laitak lian bang ama sia lianghawng sung khat ziam a dang mun khat ziam ah om tu hi. David ii na mite a sim po ciang a kuama theampo tua thu za siatin, na mite ngal lel hi ci in au tu uh hi. 10Tawpi bangin launa a nei ngawl a hangsan belte ngawngawn lau tu hi, banghangziam cile Israel ngam a om a kuama po in na pa sia ngalkap lian khat hi a, a mite zongh ngalsim a hatte vive hi ci in he uh hi. 11Kei ngaisut kong piak nopna pan tuipi hui a senneal za in a tam Israelte, ngam mong khat pan mong khat dong khawmtua in a, taciangin ngalphual ah nangma mama in lampui in kuan in. 12David a omna po ah ih mu tu a, taciang ama ii bang piang ziam ci in a phaw maa in ih sim tu hi. Ama ahizong a mite ahizong a suakta om ngawl tu hi. 13Ama in khuapi sung tu in a nungkin le zong, ih mite in khauzeen la in, a khuapi mama a nuai sang kuam sungah ih kaisuk tu hi. Tua mual tungah suangtum khat dongin kikhe ngawl tu hi,” ci hi.

14Absalom le Israelte theampo in, “Hushai ii ngaisut piakna sia Ahithophel aa sangin phazaw hi,” ci uh hi. Absalom ii lelna hong tun natu in Ahithophel ii ngaisut pha sia a kinit ngawl natu in TOPA in khensat zo hi.

David Thu Kipuak a Suakta
15Tua zawkciang Hushai in thiampite Zadok le Abiathar te munah, Absalom tungah ama in bang ngaisutna teng pia a, Ahithophel in bang ngaisutna teng pia ziam ci in son hi. 16Hushai in belap a, “Tu in manlang vun! David kam thaak vun, ngun kantanna dui sungah zanin om heak hen, Jordan ngun thakhat in kanin hile ama le a mite kiman in kithat ngawl tu hi,” ci sak hi.

17Abiathar ii tapa Jonathan le Zadok ii tapa Ahimaazte in Jerusalem khua hui Enrogel cik panin ngak uh hi, banghangziam cile amate in khuapi sung a tum uh a kimu sak ngam bua uh hi. Naseam numei khat in hun maanmaan in bang thu veu om ziam ci in amate tungah son a, amate in Kumpipa David kungah pai in tua thute son uh hi. 18Ahihang nikhat ni ciangin patang khat in amate mu hi, taciang ama in Absalom munah son hi; tua ahikom amate in manlang takin tai a Bahurim a kici pasal khat ii inn ah buu uh hi. Ama in a inn hui ah tuikhuk khat nei a, tua ii sungah tuaksuk hi. 19Pasal pa ii zi in sitna khat taw siinin, antang pawl khat a tungah poai a, kuama in bangma a lamdang a mu bua uh hi. 20Absalom ii uliante hong pai a, taciang numeinu munah, “Ahimaaz le Jonathan koi sungah om ziam?” ci in dongh hi.

“Amate ngun kanin pai zo hi,” numeinu in ci hi.

Pasalte in tuate ngeal zong ahihang mu zo ngawl a, Jerusalem ah heak kik uh hi. 21Amate ii pai zawkciang Ahimaaz le Jonathan te tuikhuk sung pan pusuak uh a, pai in David tungah thu ko hi. Ahithophel in amate lang khat panin bangteng ngeal ziam ci in amate in David son hi, “Manlang vun a, ngun kantan vun,” ci uh hi. 22David le a mite in Jordan ngun kan tu in hong kipan uh a, taciang khuavak hun sia in amate theampo ngal a kaa siat zo uh hi.

23Ahithophel in ama ii ngaisut piaknate kizui ngawl hi ci in a mu ciangin, ama in a laa sia a kungh thua in ama ii khuapi ah cia kik hi. Ama ii vai tatuamte ahi tu bangin a vawt siat zawkciang ama le ama awklum hi. Ama sia a innkuan ii thaan ah kiphum hi.

24Absalom le Israelte ii Jordan ngun a kantan hunin, David sia Mahanaim khuapino theng zo hi. 25(Absalom in Joab taangin Ishmael mi Jether ii tapa Amasa sia ngalkap honbup ukpipa in koi hi. Tua pa ii nu sia Abigail hi a, Joab ii nu Zaruiah ii suapuinu le Nahash ii tanu ahi hi.) 26Absalom le a mite in Gilead ngamah ngiaphual saat uh hi.

27David sia Mahanaim hong thet ciang Ammon ngam Rabbah khuapi panin Nahash ii tapa Shobi, Lodebar pan Ammiel ii tapa Machir le Gilead ngam Rogelim pan Barzillai te in muak uh hi. 28-29Amate in meekuang, tungbealte, zanpuan le an zongh David le a mite atu in hong puak hi; zungtaang, mangtaang, anvui, antang kan, benaang, be, khuaitui, thawbat tangh, noaidiat le tu pawlkhat hong puak uh hi. Amate in David le a mite sia dui sungah ngilkial dangtaak in, toi in om tu ci in he uh hi.

Samuel Niina 18
Absalom Ngallel in Kithat
1David in a mite theampo khawmtua in, tulkhat pawl, zakhat pawl ci in khen a, a uk tu uliante koi hi. 2Taciang ama in tuate pawl thum in kuankhia sak a, Joab taw a suapuipa Abishai le Ittaite sia ngalkap pawl khat tek uk sak hi. Taciang kumpipa in, “Keima zongh no taw kuankhawm tu khi hi,” ci hi.

3“Ko taw hong kuankhawm ngawl tu ni hi. Ih ngalkapte a lang a tai zong, ahibale a lang khawng a kithat zong ih ngalte atu bangma kilamdan om ngawl tu hi; ahihang nang na hi le ko tulsawm taw na manh neina kikim hi. Hi lai khuapi sungah om ii huna hong thaak vakek lete pha zaw tu hi,” ci uh hi.

4“Pha na sak bel uh bangin ngamta tu khi hi,” kumpipa in ci hi. Tasia zawkciang a ngalkapte tulkhat pawl, zakhat pawl, a pawl a pawl in hong kuankhiat ciangin, David sia khuapi kongpi hui ah hong ding hi. 5Ama in Joab, Abshai le Ittaite munah thupia a, “Keima ii hu in, khangnopa Absalom bangma na law heak vun,” ci hi. Ngalkap mite theampo in zongh David ii hi thu uliante a piak sia za kim uh hi.

6David ii ngalkap honpite sia ngamsung tangciing in hong kuan uh a, Ephraim dui sungah Israelte sim uh hi. 7Israelte sia David ii mite in zo uh a, nasia lel mama uh a, tua ni in tulkul thi uh hi. 8Ngam sung bup ah kidona hong kilaw a, dui sungah a thi sia ngalphual ah a thi sangin tam zaw hi.

9Thakhat thu in Absalom in David ii mite taw kisi uh hi. Absalom sia laa tungah to a, a laa sia oak thingkung lian nuai khat ah a pai laitak, Absalom ii lutang thingbaak kawm ah awk hi. 10David ii mite khat in mu a, Joab ii tungah ko hi. “Topa awng, Absalom sia oak thingkung tung pan kaai in ka mu hi,” ci hi.

11Joab in, “Mu na hi le banghangin a mun ah thatlum ngawl ni ziam? Keima mama in ngun dangka sawm le kawngkhau khat hong pia zawsap tu khi hi,” ci hi.

12Ahihang ngalkappa in, “Ngun dangka tulkhat keak nong pia hial zong kumpi pa tapa ii tungah ka khutme no khat zongh laamto ngawl tu khi hi. Kumpipa in nang le Abishai le Ittai tungah thu hong piak sia za tek khu hi. Kumpipa in nang le Abishai le Ittai tungah, ‘Keima ii hu in khangno pa Absalom sia bangma na law heak vun’ ci in thu hong piak sia za tek khu hi. 13Ahihang kumpipa thupiak mang ngawlin Absalom that hi leng, kumpipa in za nanak tu hi, ama in zaak ngawl nei ngawl hi —- taciang nangma zongh in kei hong hung ngawl het tu ni hi,” ci hi.

14“Nang taw hun luithathong in bo sak nawn ba tong,” ci hi. Joab in tei thum la in a nungta lai in, oak thing tung pan a kikhai Absalom ii awm hol hi. 15Taciang Joab ii mite sawm in hong neak uh a, Absalom hong thatlum uh hi.

16Ngal kido tawlngak natu in Joab in lemle tum natu thu pia a, a ngalkapte Israelte a delna uh pan hong heak kik uh hi. 17Amate in Absalom ii luang la in duisung dum thuk khat sungah a lotsuk zawk uh ciang suangtum honpui khat taw siin uh hi. Israelte theampo taimang in a inn tek zuan uh hi.

18Absalom in a nuntak lai in Kumpipa Kuam a kicina munah ama atu in, a min kilaw natu tapa nei ngawl ahikom, khansuang khat ciang hi. Tua ahikom ama min ma phuakin, tu ni dong ciang Absalom ii Khan kici lai hi.

Absalom ii Thina David munah Kison
19Tasia ciang Zadok ii tapa Ahimaaz in Joab ii munah, “TOPA in a ngalte khut sung pan ama hunkhia hi ci in thuthang pha kumpipa tungah son tu in hong tai sak tan,” ci hi.

20“Hi bo, tu ni in thupha bangma puak ngawl tu ni hi, nidang khat papo ciang na uuk le hi thei hi, ahihang tuni in puak ngawl tu ni hi, banghangziam ci le kumpipa ii tapa thi hi,” Joab in ci hi. 21Tua zawkciang Ethiopia te a sila pa ii tungah, “Pai in, na mu teng kumpipa tungah son tan,” ci hi. Sila pa zongh kunin, tua zawkciang tai paih hi.

22Ahimaaz in, “Bang thu po piang kale awlmaw bong; kei zongh thuthang hong puak sak po tan,” ci veve hi.

Joab in, “Ka tapa awng, bang tu ci kenkon ni ziam? Letsong zongh nga beak ngawl tu ni hi,” ci hi.

23“Bang po a piang zong pai tu khi hi,” Ahimaaz in ci hi.

Tua zawkciang Joab in, “Tua ahile pai tan,” ci hi. Ahimaaz zongh lamdungah hong taisuk a, Jordan Kuam kantan in, silapa tawmvei zawkciang hong suangkhial hi;

24David sia khuapi kongpi puanung le sungnung kilaklaw ah to hi. Ngal vilpa sia khuapi uumna luphung tungah kaato a, kongpi ii innkhum tungah ding hi; ama in khua a et le pasal khat ama nguakin hong tai mu hi. 25Ama in ensuk a kumpipa munah son hi, taciang kumpipa in, “Ama nguak ahile thuthang pha hong puak hi tu hi,” ci hi. A tai pa sia hong nai va-ial hi.

26Taciang ngalvil pa in pasal dang khat ma ama nguakin hong tai mu leleau a, kongkhapi cing pa oksan hi. “En in! Zia sungah pasal dang khat ma hong tai hi,” ci hi.

Kumpipa in, “Hisia zongh in thupha hong puak hi” ci hi.

27Ngalvil pa in, “A masa in hong tai sia Ahimaaz ii tai bangin tai hi,” ci hi.

“Ama sia mihing pha khat hi,” kumpipa in ci a, “Taciang ama zongh in thupha hong puak hi,” kumpipa in ci hi.

28Ahimaaz in kumpipa nuksetna kam taw au in ama ii mai lei ah kisep suk hi, taciang, “TOPA na Pathian pok tawng, ama in na lang pan a tual ngal hong tho tute ii tungah zawna hong pia zo hi, Kumpipa awng!” ci hi.

29“Khangmoi Absalom suakta ziam?” ci in kumpipa in dongh hi.

Ahimaaz in zo kik a, “Topa awng, a ulian pa Joab in kei hong sam ciang a buai lialua khat ka mu a, bangziam ci in ka son thei bua hi,” ci hi.

30“Tua munah ding in,” kumpipa in ci a, taciang ama tua munah ding hi.

31Taciang Ethiopia silapa hong theng a, kumpipa munah, “Kumpipa atu thupha khat hong puak khi hi, Kumpipa awng! Tuni in TOPA in nang hong langpan tualngal te theampo tungah zawna hong pia zo hi,” ci hi.

32“Absalom khangnopa suak ta ziam?” ci in kumpipa in dongh hi.

Sila pa in zo a, “Ama ii thuak teng sia na ngalte theampo in zongh thuak hen a, taciang nang langpan tualngal hong tho theampo in zongh thuak le ka oai hi,” ci hi.

33Kumpipa sia khuangai cip hi. Kongpi tung khaan sungah kaato in kap hi. A pai kawmin hi bangin au hi. “Aw, ka tapa! Ka tapa Absalom! Absalom ka ta! Nang thi luangin kei thi zaw leng maw! Ka tapa! Absalom ka tapa!” ci hi.

0 comments:

Post a Comment