Laithiangtho Dokna (Samuel Niina 19 - 20)

1. David hangin ngalkapte Khuapi sungah bangba cia ziam?
a. Thim takin
b. Khuangai
c. Maitai

2. Absalom thi zawk David sia akua in tei ziam?
a. Joab
b. Shimei
c. Sheba

3. Joab luang in Israelte ngalkapmang tu akua kise ziam?
a. Abishai
b. Asahi
c. Amasa

4. David muak tu in Benjaminte bangza kuan ziam?
a. Tul thum
b. Tulkhat
c. Tul nga

5. Akua in Shimei sia thatlumh nuam ziam?
a. Abishai
b. Asahi
c. Amasa

6. Akua in atapa sia David tungah aap ziam?
a. Barzillai
b. Asahi
c. Amasa

7. David alangpan Sheba sia bang nam pan ziam?
a. Judah
b. Dan
c. Benjamin

8. Akua in kumpipa ii ciam hun lap ngawl ziam?
a. Abishai
b. Amasa
c. Joab

9. Sheba in bangbangh khuapi angaa tu David in lau ziam?
a. A ki uum khuapi no
b. Ahoi mama
c. Mihing tambel

10. Sheba koisung khua ah kibu ziam?
a. Abel Beth Macaah
b. Hebron
c. Gath

11. Sheba sia akua ii vaihawmna taw thalup thuak ziam?
a. Joab
b. Abishai
c. Numei Khat

12. ___ sia zawthawk thu taw a kisawl naseam te uk hi.
a.  Jehoiada
b. Adoniram
c. Sheva


Samuel Niina 19
Joab in David Teih
1Kumpipa David sia Absalom hu in kakap in mamau hi ci in Joab tungah kison hi. 2Tabangin ngal zawna lungdamna sia David ii a ngalkapte atu David ii a tapa atu a mamau hu in heena hong suak hi. 3Ngalphual panin a tai a maizum ngalkapte bangin, amate sia khuapi sungah thim takin hong tum uh hi. 4Kumpipa in a maitang siinin nging takin kap hi, “Aw ka tapa! Ka tapa Absalom! Absalom ka tapa!” ci in kap hi.

5Joab in kumpipa ii inn ah pai in ama ii munah, “Tuni in nang le na tapate na tanute, na zite le na zinote nuntakna hong huu na mihingte maimawl sak ni hi. 6Nang hong langpan teng na it a, nang hong panpui teng na ensan hi. Na uliante le na mite sia bangma in heang ngawl na hi sia kitel thiang sak ni hi. Absalom nungta zaw hen a, ko teng theampo thi zaw le ung na lungdam zaw phial tu in hong mu khi hi. 7Tu in pai tan a, na mite lungmuang sak kik tan. TOPA min lo in ka kiciamna pan, tabangin nong ngamta bale zingsang ciangin amate sung pan khat zongh kikhe ngawlin nang taw omkhawm nawn ngawl tu hi. Tasia in na khan tawntung sungah tuasiatna nasia bel na thuak hi tu hi,” ci hi. 8Tasia ciang kumpipa dingto a, pai in khuapi kongpi nai ah to hi. A mite in ama sia tua munah om ci in a zaak uh ciangin ama ii kiim ah hong kikhawm uh hi.

David Jerusalem zuan kik
Tua sungin Israelte theampo tai in amate inn tek zuan uh hi. 9Ngam buppi sungah amate le amate kihau tu hong kipan uh hi. “Kumpipa David in ih ngalte mun panin hong suatak hi,” khat le khat kici uh hi. “Ama in Philistinete kung panin hong hunkhia a, ahihang ama tu in Absalom kung pan tai in ngam hong nusia hi. 10Absalom sia ih kumpipa tu in sathau ih noai hi, ahihang ama ngalphual ah kithat hi. Tua ahile banghang in khat po in Kumpipa David hong ciapui kik ngawl ziam?” ci uh hi.

11Israelte ii pauna teng David kungah kison hi. Tua ahikom thiampi Zadok le Abiatharte Judah lampuite dongh tu in sam sak hi. “Kumpipa a kumpi tenna inn sungah a cia kik natu a hu te sung pan banghangin note a khakbel hi nu ziam? 12No sia ka bete nu hi, ka chi le ka sa nu hi; banghangin ka cia kik natu hong hu khakbel te hi nu ziam? ci in dongh hi. 13David in Amasa tungah hi bangin ci sak sii hi, “Nang ka be pa ni hi. Tu pan kipan sia Joab ii sep ka ngalkap honpite ukpipa in hong koi khi hi. Tabangin kong koi bale Pathian in hong vaatlum tahen!” ci hi. 14David ii kammalte in Judah mite theampo ii panpuina a cingin hong piang sak a, amate in ama le a uliante hong heak kik natu kam thaak hi.

15Hong cia kik lamin kumpipa sia Judah mite in Jordan Ngun ah muak uh a, amate kumpipa ngun a kan dong a cing tu in Gilgal ah hong pai ahi uh hi. 16Tua hun sung ma in, Bahurim pan Gera ii tapa, Benjaminte Shimei zongh Kumpipa David taw kisi tu in manlang in hong pai hi. * 17Ama in Benjamin namte tulkhat keng hi. Taciang Ziba, Saul ii innkuante naseampa a tapa sawm le nga le a naseam kul taw hong pai uh a, kumpipa ii thet maa in Jordan hong theng hi. 18Kumpipa le a pawlte ngun a kan laitak a cing tu in amate ngun hong kan uh hi, taciang kumpipa ii dei babangin a seam tu in kinging uh hi.

Shimei tungah David in Cikna pia
Kumpipa in ngun kantan tu in a kithoai laitak Shimei hong pai in kumpipa ii mai ah hong kilei see suk a, 19“Kumpipa awng, Jerusalem na nusiat ni in nang tungah kong ngamtat khialna teng hong mai sak tan. Kei tungah thinngil laingil hong nei heak in a, zongh mangil in. 20Keima mawna vawt zo ka hi hunlam keima le keima in he khi hi, topa awng, taciang tua hu ma in saksang minamte sung panin a masa phitbel in kumpipa taw kisi tu in hong pai khi hi,” ci hi.

21Zeruiah ii tapa Abishai hong pau a, “Shimei sia thalup tu hi, banghangziam cile TOPA ii kumpipa tu in a teal pa haamsiat hi,” ci hi.

22Ahizong David in Abishai le a suapuipa Joab ii munah, “No ngaisutna akua in hong ngen ziam? Ngimna hong pia nuamin kipan nu ziam? Tu in kei Israel ii kumpipa hi zo khi hi, taciang tu ni in Israelte kuama ki thi sak ngawl tu hi,” ci hi. 23Taciang Shimei munah, “Nang sia hong ki thi sak ngawl tu hi ci in kamciam hong pia khi hi,” ci hi.

Mephibosheth tungah David in Cikna Lak
24Tua zawkciang Saul ii tupa Mephibosheth sia David taw kisi tu in hong pai hi. Kumpipa zawna taw Jerusalem ah hong cia kik mateng ama in a peang le sil ngawl, a khamul le meet ngawl, a puan le sawp ngawlin omcip hi. * 25Kumpipa taw kimu tu in Jerusalem pan Mephibosheth hong thet ciangin, kumpipa in ama munah, “Mephibosheth awng nang kei taw hong pai khawm ngawl ni hi. Banghangziam?” ci in dongh hi.

26Ama in zo a, “Na heak sa bangma, Kumpipa awng, kei sia koncip khi hi. Ka naseam pa munah ka laa a kungh hong thua sak tan, kumpipa taw tonkhawm nuam khi hi, ka ci hang ama in hong leeheak hi. 27Ama in kei huvau leeilot thu Kumpipa tungah hong son hi, ahihang nang sia Pathian ii vantung lalang taw na kibang hi, tua ahikom maan na sak bel bangin ngamta in. 28Ka pa ii innkuanpuite theampo kumpipa ii na thisak sia ahi tu ma hi, ahihang Kumpipa in kei na sabuai ah an neak thei natu thu hong pia ni hi. Kumpipa tung pan hamphatna dang kong nget thathua lai natu bangma thu om ngawl hi,” ci hi.

29Kumpipa in, “Bangma son thua kul nawn bo. Nang le Ziba in Saul ii ngamh teng na hawm natu khensat zo khi hi,” ci in zo hi.

30“Ziba in tang siat tahen, Kumpipa ciidam in inn nong cia kik sia kei atu pha zo hi,” Mephibosheth in ci hi.

David in Barzillai tungah Cikna Lak
31Gilead pan Barzillai zong kumpipa ii Jordan a kan ciang a cing tu in Rogelim pan hong paisuk hi. * 32Barzillai sia kum sawmliat a pha pasal huai mama khat ahi hi. Ama hau mama a, kumpipa Mahanaim ah a taam sung ama in an veu pia hi. 33Kumpipa in ama tungah, “Kei taw Jerusalem ah ih pai khawm tu a, keima in nang kong en tu hi,” ci hi.

34Ahihang Barzillai in, “Kei sia ngei nungta nawn ngawl tu khi hi, banghangin kumpipa taw Jerusalem ah pai tu khi ziam? 35Kei kum sawmliat pha zo a, bangma in nop sak hong pia nawn ngawl hi. Ka neak ka dawnte ii limna le he nawn ngawl, la sa te ii aw le za thei nawn ngawl khi hi. Kumpipa atu vanh ngitpui khat suak thong tu khi hi. 36Tabang tel manpha a saang tu in kiphu nawn ngawl khi hi. Tua ahikom Jordan ngal tawm khawng dong hong pai lai bek tu khi hi. 37Taciang hong cia sak tan a, ka nute ka pate ii thaan hui ka inn ah thi ka tong. Hi munah ka tapa Chimham om hi, ama in nangma na hong sep sak tu hi; ama nangma paipui in, Kumpipa awng, ama atu pha na sak bel bangin ama tungah vawt tan,” ci hi.

38Kumpipa in zo a, “Ama paipui tu khi hi, taciang vawt a nong sawl babangin ama tungah ka na vawt tu hi. Taciang nong nget papo nang atu in hong vawt sak tu khi hi,” ci hi. 39Tua zawkciang David le a mite in Jordan ngun kan uh hi. Ama in Barzillai namh a, thupha pia in, taciang Barzillai inn ah cia kik hi.

Judah le Israel in Kumpipa vai Kam kinial
40Judah mi theampo le Israel mi a lang ii cinna nuai ah kumpipa in ngun a kan zawkciang, ama Gilgal ah pai in Chimham sia ama taw paikhawm hi. 41Taciang Israelte a om theampo in kumpipa kungah pai in, ama munah, “Kumpipa awng, ka suapui uh ahi Judah mite in, nang hong la in, na innkuanpuite le na mite taw Jordan na kan uh dong hong cin natu bang thu nei kisa ziam?” ci in dongh uh hi.

42Judah mite in “Tabang ka ngamtat uh banghangziam cile kumpipa sia koma mi khat hi. Tua ahikom banghangin hi sia hu in thin uuk thei nu ziam? Ama in ka an neak tu uh lah hong lei sak bo, a dang zongh bangma piak hong nei ngawl hi,” ci in zo uh hi.

43Israelte in zo uh a, “Ama sia noma mi hi kale David tungtaang ah no sangin ko in see sawm bang a tam zaw in thu nei khu hi. Banghangin hong no mu nu ziam? Kumpipa ciapui kik natu kam a nging phit sak sia koma khu hi, mangil heak vun,” ci uh hi.

Ahihang Judah mite sia Israel mite sangin kam ham zawkna taw a dei uh hong ngen uh hi.



Samuel Niina 20
Sheba ii Tualngal Thawna
1Gilgal ah Benjamin mi Bikri ii tapa Sheba a kici mihing mannung ngawl khat om hi. Ama in lemle tumin au a, “David taak hen! Ei ama zui ngawl tu hi hing. Israel pasalte awng inn ah cia tawng,” ci hi. * 2Tua ahikom Israelte in David nusia in Sheba zui uh a, ahihang Judah mite sia David tungah hong thumaan top in, Jordan pan Jerusalem ah David zui uh hi.

3Jerusalem khua a kumpi inn ah David hong thet ciangin kumpi inn keam tu in a nusiat zino sawm teng la in, a cingte ii khut nuai ah koi hi. Amate ii sapna babangin sik hi, ahihang amate taw nu le pa omkhopna vawt ngawl hi. A nuntak tawntung khumcip in meingong bangin koi hi. *

4Kumpipa in Amasa munah, “Judah mite khawmtua in, thai ciang amate taw hi munah hong theng kik tan,” ci hi. 5Amasa in khawmtua tu in pai hi, ahihang kumpipa hun ciam lapin a theng kik bua hi. 6Tua ahikom kumpipa in Abishai munah, “Absalom sangin Sheba in ngim hong pia zaw tu hi. Ka mite la in, ama del in, tua ahibale kulh taw a kiim uum khuapino khat po hong lua tu a, ei kung pan suakta tu hi,” ci hi. 7Tua ahikom Joab ii mihingte kumpi cingte le ngalkap dangte in Abishai taw Jerusalem nusia in Sheba del uh hi. 8Suangpi khat omna Gebeon ah a thet uh ciang Amasa taw kisi uh hi. Joab sia ngalsim tu in kinging a, a paai sungah a om namsau sia a kawng ah khii hi. Ama mai sangah hong pai ciangin a namsau hong taak hi. 9Joab in Amasa munah, “Bang hi ni ziam, ka ngualtam pa awng,” ci in, ama namh tu in a khut ziatsang taw a khamul zap sak hi. 10Amasa sia Joab ii a khut lang khat ah a toai namsau sia atu kidal ngawl ahikom Joab in a ngil panin nam taw sun a, a ngilzang teng lei ah hong keekeak hi. Ama thakhat in thi paih a Joab ii a vuak kik kul ngawl hi.

Taciang Joab le a suapui pa Abishai in Sheba del uh hi. 11Joab ii mihingte khat Amasa ii luang hui ah ding a, “Joab le David ii mi ahi theampo in Joab zui vun,” ci in au hi. 12Amasa ii luang chi taw a kidim sia lampi laizang ah liik hi. Joab ii mihing pa in, mihing theampo in tawlnga in en a mu ciang, ama in a luang sia lampi pan kai in lo sungah lawnin, puanvan taw siin hi. 13A luang lampi pan a kilaakkhiat zawkciang mihing simin Joab zui in Sheba del uh hi.

14Israel te theampo ii ngamkhennote theampo kantan in pai a, Abel Beth Macaah khuapi ah theng hi, taciang Bikri ii be le phungte hong kikhawm a, ama khuapi sungah zui uh hi. 15Joab ii mihingte in Sheba tua munah om hi ci in za uh ahikom amate pai in khuapi uumci uh hi. Luphung puanung sia ii pangh panin leivum ciangto a, a luphung nuai pan luphung a cip thei natu lei to hi. 16Tua khuapi sungah nupi ciim khat om a, tua nu in luphung panin au hi. “Na ngai vun! Na ngai vun! Joab hi sungah hong pai natu son vun; ama taw thu son nuam khi hi,” ci hi. 17Joab pai a, taciang numei in, “Nang Joab na hi ziam?” ci in dongh hi.

Ama in, “Hi hi keima khi hi,” ci in zo hi.
Tua nu in “Hong ngai tan, topa awng,” ci hi.
Ama in, “Hong ngai khi hi,” ci in zo hi.
18Numei in, “Nidang tawng lai in, ‘Abel khuapi ah pai tavun a, zo kikna tua mun pan la tavun kici a, tabangma in ki ngamta hi. 19Ka khuapi uh sia kilemna a ombel khuapi hi a, Israel ngam ah a thumaan bel zongh hi. Banghangin Pathian ii neisa sia zanciim sak nuam ni ziam?” ci in dongh hi.

20Joab in zo a, “Na khuapi sia bangma hunin zanciim sak ahibale susia nuam ngawl khi hi. 21Tabang sia ko ii ngealna hi ngawl hi. Ephraim mualtung ngam pan Bikri ii tapa Sheba a ci sia Kumpipa David langpan in tualngal tho hi. Hi mihing pa hong aap lete, na khuapi uh pan nungkin tu khu hi,” ci hi..

“A lutang luphung tungsia no kungah kong lawn tu hi,” ama in ci hi. 22Tua zawkciang ama in khuapi sung a mite kungah ama ii ngealna taw pai in, Sheba ii lutang tan in, luphung kaanin Joab ii kungah lawn uh hi. Ama in a mite khuapi pan a nungkin natu lemle tum a, amate inn ah cia kik uh hi. Taciang Joab Jerusalem kumpipa kungah heak kik hi.

David ii Uliante
23Joab sia Israel ngalkap hon ukpipa hi; Jehoiada ii tapa Benaiah sia David a cingte a ukpa hi a; 24Adoniram sia zawthawk thu taw a kisawl naseam te uk a, Ahilud ii tapa Jehoshaphat sia tepteena lai teng sai hi; 25Sheva sia kumpi zum thuzeakpa ahi hi; Zadok le Abiathar te sia thiampi te ahi uh hi, 26Jair khuapino pan Ira zongh David ii thiampi khat ahi hi.

0 comments:

Post a Comment