Laithiangtho Dokna (Samuel Niina 21-22)


1. David ii maan sungin kum thum sitset ___ hi.
a. kialpi tung
b. ngaltai
c. nguazu

2. Saul in Gibeon mite banghang mon nuam ziam?
a. Ngilo sa
b. Israelte atu alawp man
c. Milim bia

3. Gibeonte in akuate mihing sali ngen ziam?
a. Moabte
b. Philestinete
c. Saul ii innkuanpui

4. Sun in vacim, zan in ngamsa te na akuate ii luang nai neak ziam?
a. Syriate
b. Amasa le lawmte
c. Saul ii innkuanpui

5. Jonathan ii ngu sia banghang Gilboa pan Gilead theng thei ziam?
a. kingen kik
b. ki lei
c. Kinguu

6. Thatang lianpa khut sungpan David ahunkhia sia kua ziam?
a. Amasa
b. Joab
c. Abishai

7. Samuel 22na sia David ii  ___ laa hi.
a. Ngalzawna
b. Lungdamkona
c. Thupha vawtna

8. Ama in molngolte kung panin kei hong ___ hi.
a. cia pui
b. dalin hong hung
c. seal cip

9. Banghang leitung sia liing ziam?
a. Satan nasepna hang
b. Leitung mite sia lei
c. Pathian thinuk hang

10. TOPA in angilote ___ hi.
a. ngilo sak lel
b. it vave
c. ngal vawt

11. David peang sia bangbangh hi ziam?
a. mul tam
b. ngungeak 3 om
c. sazuk peang

12. TOPA in David sia bang hi dan sin sak ziam?
a. Ngan cin dan
b. Kitek tu dan
c. Ngal kisim dan

Samuel Niina 21
Saul ii Suan le Paalte Kithatlum
1David ii maan sungin kum thum sitset kialpi tung hi. Tua ahikom David in TOPA munah hi thu dongh a, taciang TOPA in, “Saul le a baangkua in tualtha mawna vawt hi; ama in Gibeon mite thatlum hi.” 2(Gibeon mite sia Israel mi hi ngawl a, amate Amor mi pawl khat hi, Israelte in hut tu dal tu in kamciam a piak sa hi napi, Israel mite le Judah mite atu a lawp manin Saul in tuate suk cimit tu in hanciam hi.) * 3Tua ahikom David in Gibeon mite sam a, “No atu bang hong vawt sak thei tu khi ziam?” TOPA ii a mite thupha hong piak natu in no tungah tatkhialna hong kivawt te hong lul kik nuam khi hi,” ci hi.

4Amate in, “Saul le a baangkua taw ka kihauna uh sia ngun le kham taw thu kisaatsat thei ngawl bek dom ngawlin Israel mite khat zongh thatlum nuam ngawl khu hi,” ci uh hi.

“Tua ahile no atu bang hong vawt sak thei tu in nong um uh ziam?” ci in David in dongh hi.

5Amate in, “Saul in ko sia hong maaimot nuam a, Israel ngamsung koima ah khat zongh a nungta in ka om ngawl natu in vawt hi. 6Tua ahikom Saul ii suan le paal pasal sali hong aap tavun, TOPA ii kumpipa tu a teal Saul ii khuapi Gibeoh ah amate TOPA mai ah ka awk sak tu uh hi ci in zo uh hi.

“Hong aap tu khi hi,” kumpipa in ci hi.

7Ahihang Jonathan taw a thiangtho kiciamna a vawt hu in, Saul ii tupa, Jonathan ii tapa, Mephibosheth sia David in khoaikhe hi. * 8Ahihang ama in Aiah ii tanu Rizpah ii Saul taw a hin tapate nii Armoni le Mephibosheth la hi; ama in Saul ii tanu Merah le Meholah pan Barzillai ii tapa Adriel taw a hin tapa nga teng zongh la hi. * 9David in amate Gibeon te tungah aap a, tuate in TOPA mai mual tungah awklum sak uh hi— taciang a sali bup in thi khawm uh hi. Tua hun sia tuk bo kuan hi a, mangtaang at kipat sawngin tabangin kithat uh hi.

10Taciangin Saul ii zino Aiah tanu Rizpah in mithiluangte ii kisialna suangpi tungah khau-ip buk vawtin anlaak kipat pan kipan tangngam ngua zuk dong ama tua munah om hi. Sun in ama in mithiluangte pan vacimte hung a, zanin ngamsa te panin dal hi.

11David in Rizpah ii ngamtatna a zaak ciangin, 12ama pai in Saul le a tapa Jonathan ii ngu, Gilead ngam Jabesh panin la hi. (Amate in Beth Shan taang tualpi panin, Gilboa mualvum tung a Saul a kithalup zawkciang Philistine te ii a luang a khaina panin ngu uh hi.) * 13David in Saul le Jonathan ii ngu le a ki awklum sak pasal sali teng ii ngu khawmtua hi. 14Tua zawkciang amate in Saul le Jonathan ii ngute Benjamin ngamkhen sung, Zela khua Saul ii pa Kish ii thaan sungah phumin kumpipa sawl babangin ngamta uh hi. Tasia zawkciang Pathian in amate ii ngam atu a thungetna uh zo hi.

Philistine Thatanglian mamate taw Ngal kisimna
(1Khang tangthu 20:4-8)
15Philistinete le Israelte kilaklaw ah ngal kisimna khat om kik a, David le a mite kuankhia in Philistine te do uh hi. Kido hun sung khat ah David sia hong toi ta hi. 16Thatang lian mama Ishbibenob a kici khat, taungo taw a kivawt pound sali le lang a pha tei khat toai in, namsau thak khat kua a, David that thei tu in ki um hi. 17Ahihang Zeruiah ii tapa Abishai in David hu a, thatang lianpa sim in thatlum hi. Tua zawkciang David ii mite in David peuma amate taw ngalsim khawm tu in a kuan nawn ngawl natu kamciam vawt sak hi. “Nang sia Israelte ii lam etna ni hi, nang hong taan nuam ngawl khu hi,” ci uh hi. *

18Hisia zawkciang Gob ah Philistinete taw kidona khat hong om kik a, Hushah pan Sibbecai in Saph a kici thatang lian mama khat thatlum hi.

19Gob maa ah Philistine te taw kidona khat om a, Bethlehem pan Jair ii tapa Elhanan in Gath mi Goliath that hi, ama ii tei bul sia thiamtakte ii pumlawng cia saa hi.

20Taciang Gath ah ngal kidona dang khat om a, tua munah thatang lian mama ngal sim uuk mama khat om hi. Ama in a khutte ah khutme luk veve le a peangte ah peangme luk veve nei hi. 21Ama in Israelte nalh hi, taciang David ii suapuipa Shammah ii tapa Jonathan in ama thatlum hi.

22Hi mihing li teng sia thatang lian Gath ii suante vive hi a, David le a mite in thatlum uh hi.


Samuel Niina 22
David ii Ngalzawna La
(Psalm 18)
1TOPA in David sia Saul le a ngal dangte kung panin a hutkhiat ciangin David in TOPA tungah hi la sak hi.

2TOPA in kei hong dal pa hi;
ama sia ka kulh thakho ahi hi.
3Ka Pathian sia ka kidalna ahi hi,
taciangin ama hangin kei ka suakta hi.
Ama in lum bangin kei hong sung hi;
ama in kei hong hung a,
a suakta in kei hong keam hi.
Ama in ka hunpa hi;
Ama in molngolte kung panin kei hong dalin hong hung hi.
4TOPA ka biakpui a,
ama in ka ngalte kung panin hong suatak hi.
TOPA pok vun!
5Thina tuihual ka kiim theampo ah om a,
lalna tuihual in kei hong khuum hi.
6Thina ii lau huaina ka kiim ah hong om a,
taciang thaankuul in kei thaang hong sia hi.
7Ngim ka nga ciangin TOPA ka biakpui a;
ka Pathian munah hu ka ngen hi.
A biakinn sung pan ka aw hong za a;
hu ka ngetna aw ama in hong ngai hi.
8Taciang leitung sia liingin ngawk a;
van ii phungkawngte kivei in liing hi,
banghangziam cile Pathian a thin uuk hi!
9A naak hawng panin meikhu hong pusuak a,
a kam sung pan a kaangtum sak thei meikuang le meikam piang hi.
10Ama in vantung eaukeakin hong pai suk a,
a peang nuai ah meeikaai vom om hi.
11Ama in vantung cherub to in manlang takin leang a;
vuipi ii thakhui te tung pan khualhaw hi.
12Ama le ama khuazing taw kituam a;
tui taw kidim meeikaai saate in ama kiim uum hi;
13ama mai pan khualeng in meikam te kuang sak hi.
14Taciang TOPA in
vantung pan vanto bangin hong nging a,
Vaanglianbelpa Pathian ii aw kiza hi.
15Ama in a thaltangte kap a, a ngalte kithethaang hi;
khualeng kuang taw amate tai sak hi.
16TOPA in a ngalte a tei ciang le
a thin uukin hong hawksan ciangin,
Tuipi ii tawdap suat kihong a,
leitung ii phung kawng zongh kilawt hi
17TOPA in tungsang panin hong ban suk a, kei hong len hi;
ama in tuithukna panin kei hong dokkhia hi.
18A thahat ka ngalte kung pan hong hunkhia a
taciang kei hong ensan theampo te kung pan zongin—–
kei atu in amate hat lei uh hi.
19Ngim ka nga laitak, amate in kei hong sim a,
ahizong TOPA in kei hong dal hi.
20Ama in launa pan hong hu a;
dik hong sak hu in ama in kei hong hunkhia hi.
21A maanin ngamta ka hikom TOPA in kei, tel hong pia hi;
paubaang ngawl ka hikom ama in thupha hong pia hi.
22TOPA thukhamte ka ni a;
ka Pathian kung pan ka paikhia bua hi.
23Ama ii thukham theampo ka tang a;
a thupiakte ni ngawlin ka om bua hi.
24Ama in mawna taw kitong ka hi hong he a,
ahi ngawl ngamtatnate pan kikep hong he hi.
25A maanin ngamta ka hikom ama in tel hong pia hi,
banghangziam cile maw nei ngawl ka hi hong he hi.
26TOPA awng, nang tungah hong thumaante tungah na thumaan a,
a cialcing te tungah phatna taw na kicing hi.
27Nangma in a thiangtho te tungah na thiangtho a,
ahizong a ngilote na ngal vawt hi.
28A kiniamkhiakte na ngum a,
ahizong a kiphasakte na khiasuk hi.
29Nangma, TOPA, ka khuavak na hi hi;
ka khuazing na nilkhia hi.
30Ka ngalte ka sim natu in thatang nong pia a,
amate ii kinanna zawk natu in vaangletna nong pia hi.
31Hi Pathian—- bangza in ama ii nasepte cialcing a,
ama ii kammalte suan taak ziam!
Ama ii hong dalna a zong theampo atu in
ama in lum khat taw kibang hi.
32TOPA bekma Pathian hi a;
Pathian bekma ih kidalna ahi hi.
33Hi Pathian sia a kip ka buhna hi;
Ama in ka lampi ngammuang sak hi.
34Ama in ka peangte sazuk bangin liim takin suan sak a;
mual tungah ngammuang in hong koi hi. *
35Ama in ngal kisim hong sin sak a,
tasia ciang thalkawng a kho bel zongh ka zangh thei hi.
36Aw, TOPA nangma in nong dal a, nong hun hi;
nong hu na in keima hong thupi sak hi.
37Kimat natu panin nong keam a,
bangma hunin ka puk ngei bua hi.
38Ka ngalte ka del a ka zo hi;
amate ka lalcip sak mateng ka tawp bua hi.
39Amate ka vaat suk a, a thoto thei nawn bua uh hi;
amate ka mai ah ngallel in puk uh hi.
40Ngal do natu in thahatna nong pia a;
ka ngalte tungah zawna nong pia hi.
41Ka ngalte ka kung panin na tai sak a;
kei hong ensan te ka lalcip sak hi.
42Amate in hu na zong ka le kuama in hu ngawl hi;
amate in TOPA biakpui hi kale ama in zo ngawl hi.
43Amate ka ngoaicip a leivui bang suak uh hi;
lampi ah a om buan bangin amate ka siikcil hi.
44Tualngal kin ka mite kung pan nong hunkhia a
minamte tungah ka ukna nong kip sak hi;
ka heak ngei ngawl mihingte, tu in ka khutnuai mi suak uh hi.
45Ngamdang mite ka mai ah hong kun a;
amate in ka kammal a zaak ciang hong ni hi.
46Amate a thin letna uh taanin,
a kulhte sung pan liing vadil in hong pai uh hi.
47TOPA nungta hi, Ka kidalna pa pok vun!
Kei hong hunkhia a thahat Pathian ii letna taangko vun.
48Ama in ka ngalte tungah zawna kei hong pia hi,
minamte ka khutnuai ah ama in huthe ngam ngawlin koi a;
49ka ngalte kung pan kei hong dal hi.
Aw TOPA, ka ngalte tungah zawna kei nong pia a,
molngolte mun panin nong dal hi.
50Tua ahi ciang minamte sungah nang kong pok a,
na tungah pokna late kong sak hi. *
51Pathian in a kumpipa tungah zawna lian pia hi;
ama in a teal sa sia ii tungah itna kip lak a,
David le a suan a paalte tungah a tawntung in lak hi.

0 comments:

Post a Comment