Mark 3-4

Mark 3
Khutlang khat A zaw Pasal khat
(Matthew 12:9-14; Luke 6:6-11)
1Tua zawkciang Jesu in Jewte synagogue ah pai a, tua munah khutlang khat a zaw pasal khat om hi. 2Jesu ngamtat khial tu a encik mihing pawlkhat tua munah om ahikom Sabbath ni in, Jesu in ciina dam sak ziam, a dam sak bua ziam, ci in nasia takin cing uh hi. 3Jesu in pasalpa munah, “Hi sung mai sangah hong pai tan,” ci hi. 4Tua zawkciang mipite munah, “Ih Thukhaam in Sabbath ni in, bangteng sep tu hong oai ziam? Ngual hu tu ziam maw ngual liamsua tu ziam? Mihing khat nuntakna hun tu ziam lal sak tu ziam?,” ci in dongh hi.

Ahihang amate sia kam khat zongh a pau bua uh hi. 5A kiimkot a et ciangin, Jesu sia amate tungah thin uuk hi, ahizong hesuak huai sa si hi, banghangziam cile amate a thin uh pui mama a, a ngaisutna uh khial mama si hi. Tua zawkciang pasalpa munah, “Na khut vaan in,” ci hi. Ama in a khut vaan a, a khut dam kik hi. 6Tua ahikom Phariseete sia synagogue nusia in thakhat in Herod ii mipawlte pawlkhat taw kisi uh a, Jesu thalup tu in, vaihawmna nei uh hi.

Tuili hui ah Mihon khat
7Jesu le a nungzuite Galilee tuili sangah pai uh a, mihonpi in zui hi. Amate sia Galilee, Judea, 8Jerusalem, Idumea ngam, Jordan ngun nisuana sang ngam, Tyre le Sidon khuapite kiim le paam ngamte panin hong pai hi. Hi mite theampo sia Jesu sep le vawt teng a zaak hu in, Jesu kungah hong pai uh hi. 9Mihon tam mama ahikom, ama a kinencip thak ngawl natu in nungzuite munah ngunkuang khat zongin sawl hi. * 10Ama in mihing tam mama dam sak hi, taciang natna nei peuma in ama tham tu in kiphulung ngawp uh hi. 11Thaa ngilo vei mihingte in a mu uh ciangin, amate mai ah puk in, ciik au uh a, “Nang sia Pathian Tapa ni hi” ci hi.

12Ama sia akua ahi hunlam kuama tungah a son ngawl natu in, thaa ngilote munah Jesu in nasia takin thupia hi.

Jesu in Nungzui Sawm le Niite Teal
(Matthew 10:1-4; Luke 6:12-16)
13Tua zawkciang Jesu in mualtung khat ah kaato in, ama dei teng a kungah samtuam hi. A kungah amate in zuan a, 14taciangin ama in sawm le nii tealin, sawltakte ci in min vaw hi. “Kei taw a omkhawm tu in, no teng hong teal zo khi hi, thuhil tu zongin kong pai sak tu a, 15doaite nawkeak natu thu na nei tu uh hi,” ci hi.

16Sawm le nii a teal teng sia hi teng ahi hi, Simon (Jesu in Peter ci in min a piak sia), 17Zebedee tapate unau James le John, (Jesu in min pia a, Boanerges ci, a khiakna, “Vanto mihingte”); 18Andrew, Philip, Bartholomew, Matthew, Thomas, Alphaeus ii tapa James, Thaddaeus, Minam itpa Simon, 19le Jesu a leeheakpa Judas Iscariot te ahi hi.

Jesu le Beelzebul
(Matthew 12:22-32; Luke 11:14-23; 12:10)
20Tua zawkciangin Jesu inn ah cia hi. Mipi hong kikhawm leleau ahikom Jesu le a nungzuite in anneak hun tu a nga bua uh hi. 21A innkuanpuite in a zaak uh ciangin ama keam tu in hong pai uh hi, banghangziam cile mihingte in, “Ama a thin am zo hi,” ci uh hi.

22Jerusalem pan hong pai thukhaam hil sya pawlkhatte in, “Ama sungah Beelzebul om hi!” ci uh hi. “Tasia doaite sung pan a lianbel sia hi, ama tungah doai nawkeak thei natu vaang a pia siapa hi,” ci uh hi. *

23Tua ahikom Jesu in amate sia a kungah samin, thusonteena taw a mate tungah son hi. “Satan in bangbangin Satan notkeak thei tu ziam? 24Ngam khat sia pawl tatuam in kikhen hen a, khat le khat kido le tua ngam sia tamtham tu hi. 25Innkuan khat sia pawl tatuam in kikhen in, pawlkhat le pawlkhat kido le tua innkuan sia kitamtham tu hi. 26Tua hi a Satan ngam sia pawltuam in kikhen le, kip ngei ngawl tu a, tamtham in bocip tu hi.

27“Thahatpa, a kilekhen phot mateng kuama in a inn phuul zo ngawl tu hi. Tua zawkciang bekma phuul thei pheang hi.

28“A tatak ka ci ciang, mihingte sia a mawna uh le a pausiatnate pan kimai sak thei hi. 29Ahihang Thaa Thiangtho a sonsiate sia, kimai sak ngei ngawl tu hi, banghangziam cile ama in tawntung mawna vawt ahi hi,” Jesu in ci hi. * 30(Tabang a ci sia banghangziam cile mihing pawlkhat in, “Ama sia thaa ngilo vei hi,” a ci uh hang hi.)

Jesu ii Nu le A Suapuipate
(Matthew 12:46-50; Luke 8:19-21)
31Tua zawkciangin Jesu nu le a suapuipate hong theng hi. Amate in doipua ah dingin, ama taw kimu tu in sam sak hi. 32Mihon khat Jesu kiim ah a tote in, “En in, na nu le na suapuipate le na suapui numeite in innpua panin hong ngak a nangma taw kimu nuam hi,” ci uh hi.

33Jesu in, “Ka nu akua ziam? Ka suapui pate akua ziam?” ci hi. 34Ama in a kiim ah a to mihingte en in, “En vun! hite sia ka nu le ka suapuite ahi hi!

35“Pathian dei bang a ngamtate sia, ka suapuipa, ka suapuinu le ka nu ahi hi,” ci in zo kik hi.

Mark 4
Thaicii Poaipa Thusonteena
(Matthew 13:1-9; Luke 8:4-8)
1Jesu in Galilee tuili hui ah hilna nei tu in kipan kik hi. A kiim a mipite tam mama ahikom ama in ngunkuang sungah tuak in to hi. Tui tungah ngunkuang om a, mipite sia tuihui vaalbo ah ding uh hi. * 2Ama in thusonteena zanghin, thu tam mama hi bangin hil hi:

3“Ngai vun! khatvei lai in, pasal khat sia thaicii poai tu in kuan hi. 4Ama in lo sungah thaiciite a poai ciangin, pawlkhat sia lamzin hui ah taakin, vacimte in tawm khawng uh hi. 5Pawlkhat sia lei daina suang tungah taak hi. A lei thuk ngawl ahikom hai ngawlin, thaiciite poto hi. 6Taciang, ni hong sat ciangin, ankungnote kaanglum hi, a zung thuk ngawl ahikom ankungnote ko ngawtaak hi. 7Thaicii pawlkhat sia lingphung sungah taak a, tua lingte in khan nelhin deapcip hi, tua hu in a nga bua hi. 8Ahihang thaicii pawlkhat sia lei phana ah taak ahikom, a kung hong po a, khangin a nga hong nga hi, tua a nga pawlkhat in, a za sawm thum, a za sawm luk le a dangte in a za za khat dongin nga hi.”

9“Bil na nei uhle hi thu za tavun!” ci in Jesu in a thuson khup hi.

Thusontenate ii Deina
(Matthew 13:10-17; Luke 8:9-10)
10Jesu sia ama nguakin a om laitak nungzui sawm le niite le a thuson a za pawlkhatte sia ama kungah hong pai a, thusonteenate a sonthiang natu in, dongh uh hi. 11No tungah Pathian Ngam thukuu sia hong kipia zo hi,” ci in Jesu in zo kik hi.“Ahihang ngualdang a puasang a omte in, thusonteena taw veu in a za tu uh hi.

12“Tasia ciang:
‘Amate in e en ahihang amu batu hi;
ngangai tu ahihang a tel batu hi.
Banghangziam cile amate in
mu thei za thei thong le
Pathian kungah heak kik tu uh a,
taciang ama in amate sia a mawna mai sak tu hi.’ ” *
Jesu in Thaicii Poaipa Thusonteena Sonthiang
(Matthew 13:18-23; Luke 8:11-15)
13Taciang Jesu in, “Hi thusonteena tel ngawl nu ziam? Tua ahile thusonteena dangte koibang in tel tu nu ziam? 14Thaicii poaipa in Pathian kammalte poai hi. 15Mihing pawlkhatte sia lamhui ah a taak thaiciite taw kibang hi, a thu a zaak po ciangin, Satan hong pai in laak sak hi. 16Ngualdang pawlkhatte sia suang tungah a taak thaicii taw kibang hi. A thu a zaak po ciang lungdam takin saang hi. 17Ahihang a thu in a mate sungah thuk bunsuk ngawl ahikom, khua ngei a khom bua uh hi. Tua ahiciang tua thu hangin ngimna le vawtsiatna hong pai ciang, thakhat thu in amate in thasua uh hi. 18Ngualdang pawlkhatte sia lingphung sungah taak thaiciite taw kibang hi. Hite sia a thu a zate ahi hi. 19Ahihang nuntakna tu thin ngimna, hau nopna le a dang deinate in deapcip ahikom nga a nga thei bua uh hi. 20Ahihang mihing pawlkhatte sia lei phana a, a kipoai thaiciite bang ahi hi. Amate in a thu za a, saangin, a ngate nga uh hi, pawlkhat a za sawm thum, pawlkhat a za sawm luk, pawlkhat a za za khat dongin nga uh hi.

Kuang taw A Kikhup Mei-inn
(Luke 8:16-18)
21Jesu in, “Mihing khat papo in mei-inn hong sungtan pui in kuang nuai ah ahibale lupna nuai ah koi ngei ka na ziam? Mei vakna khuam tungah koi hi ngawl ziam? * 22A kisealcip thute peuma a kipualaak tu a, a kisiin theampo kihongkeak tu hi. * 23Bil na nei uh le za tavun!” ci in zomto hi.

24Jesu in, “Na zaak uh sia pha takin ngai vun! Ngual tung a na zaak thukhenna sia Pathian in no tungah thukhenna in hong zangh tu hi— a nasia seseam in hong zangh zaw lai tu hi. * 25Na pawlkhat a nei sia tungah kipia thua tu hi, bangma a nei ngawl sia tung pan tawmbek a nei sun teng zongh kilaak sak tu hi,” ci hi. *

Thaicii Pote Thusonteena
26Jesu in a ci lai na panin, “Pathian Ngam sia hi bang ahi hi. Pasal khat in ama lo sungah thaicii poai hi. 27Ama sia zanin mu a, sunin diang hi, tua laan theampo in thaicii hong po a hong khang hi. Ahihang bangbangin piang ziam ci in a he bua hi. 28Leitangh mama in ankungnote po sakin, nga sak hi, a masa bel in a kung moi suakin ngap hong toai a, a khakbel in a ngapte sungah a tang a dim in om hi. 29An a ngau ciangin a kungte sia mihingte in a phiau attan uh hi, banghangziam cile anlaak hun hong theng ahi hi. *

Ankamcii Thusonteena
(Matthew 13:31-32; 34; Luke 13:18-19)
30“Pathian Ngam sia bang taw kibang ih ci tu ziam?” ci in Jesu in dongh hi. “Bang thusonteena taw son tu hi ziam? 31Tasia hi bang hi. Pasal khat in ankamcii, leitung a thaicii a nobel sia la in leisung tu hi. 32Tawmvei zawkciang poto a, ankungte sung pan a lianbel hong suak hi. A baakte zongh lian mama ahikom vacimte hong pai in, a lim sungah bu vawt uh hi,” ci hi.

33Jesu in mihingte munah hi thu hil a, hi bang thusonteena dang tam mama zongh zangh hi, amate ii tel thei zaza son hi. 34Amate tungah thusonteena ngawl taw thuson nuam ngawl a, ahihang a nungzuite bek a om ciang, amate munah a vekpi in sonthiang hi.

Jesu in Vuipi suangval Thim sak
(Matthew 8:23-27; Luke 8:22-25)
35Tua nitak in Jesu in a nungzuite munah, “Tuili langkhat ah pai tawng,” ci hi. 36Tua ahiciang amate in mipite sia tua munah nusia hi, A nungzuite zongh ngunkuang sungah tuaksuk uh a, Jesu sia tua sungah na to zo hi, taciang amate in ama ngunkuang taw paipui uh hi. Tua munah ngunkuang dang zongh om hi. 37Thakhat thu in vui va a, tuihual sia ngunkuang sungah kisep suk hi, tasia ciangin ngunkuang sung tui dim dektak hi. 38Jesu sia ngunkuang nungsang ah lukham khat khamin mu hi. Nungzuite in phong a, “Syapa awng, thilum siat dek ih hi sia pha maw sa ngawl ni ziam?” ci uh hi.

39Jesu tho a, vuipi tung thu pia a, “Thim vun,” ci hi, tuihual tungah “Kilok heak vun!” ci hi. Vuipi thim in nasia tak dai dide hi. 40Jesu in nungzuite munah, “Banghangin lau nu ziam? Upna nei nawn ngawl nu ziam?” ci hi.

41Ahihang amate lau mama uh a, “Hisia pa sia a bang mihing hi thong ziam? Vuipi le tuihualte ngawngawn in a thu ni hi!” khat le khat kici uh hi.

0 comments:

Post a Comment