Samuel Niina 23-24

Samuel Niina 23
David ii Kammal Khakbelte
1Jesse ii tapa, David sia Pathian ii mi thupi tu in a vawt, Jacob ii Pathian in kumpipa tu in a teal hi a, Israel mite atu in la hoi a phuakpa ahi hi. Hi teng sia David ii a khakbel a pau kammalte ahi hi.

2TOPA ii thaa in kei tungtawnin hong pau hi;
ama ii thu hong puak sia ka muk tungah om hi.
3Israelte ii Pathian in pau zo hi;
Israelte a dal pa in kei tungah hong ci hi:
“Thutang khenna taw a uk kumpipa,
Pathian ii thu ni in a uk pa sia,
4meeikaai om ngawl zing khuavak lai ah nitaang taw kibang hi,
ngua theau zawkciang lopate a tee sak vakil ni taw kibang hi.
5Ka suan ka paalte Pathian ii thupha a piak tu zia sia tabang ahi hi,
banghangziam cile ama in tawntung kiciamna taw kei hong kiciam pui hi,
a kipaltan ngawl tu thukimna,
a kikheal ngei ngawl tu kamciam piakna ahi hi.
Kei dei sia tuateng lian ahi hi,
tua in ka zawna hi tu hi,
Pathian in tangtung sak naksaal tu hi.
6Ahihang Pathian selte, a kivawk lingte taw kibang hi;
Tuate sia kuama in khut nguak taw tham thei ngawl hi.
7Thik vanhzak ahibale tei khat na zak kul a,
tasia ciang amate kaangtum tu hi.
David ii Ngalkap Minthangte
(1Khang tangthu 11:10-41)
8David ii a minthang ngalkapte sia hite ahi hi: a masa phitbel sia Tachemon pan Josheb Basshebeth hi a, ama sia “Thum teng” ii lampui pa ahi hi; ama in tei taw ngalte zaliat kisimna khat sungah thatlum siat hi.

9A minthang thum sung pan a niina sia Ahoh minam Dodo ii tapa Eleazor hi. Nikhat ni in ama le David in ngaldo tu a kikhawmtua Philistinete thato uh hi. Israelte nungkin a, 10ahihang ding topin a namsau tha thei nawn ngawl dongin sim ahikom a khutte kemkee liang hi. TOPA in tua ni in zawna lianpi nga hi. Ngal a kizaw zawkciang Israelte Eleazar kungah hong heak kikin a thite ii thikpuante suut uh hi.

11A minthang thum sungah a thumna sia Harar pan Agee ii tapa Shammah hi. Philistinete be lo khat omna Lehi ah hong kikhawmtua uh hi. Israelte Philistinete mai panin tai keak uh a, 12ahizong Shammah ahile lo sungah a dinmun nusia ngawlin hung hi; taciang Philistinete that hi. TOPA in tua ni in zawna nasia mama nga hi.

13Anlaak Poai hong kipat hun nai ciang, “sawmthumte” sung pan thum sia David ii omna Adullam leihawng sungah pai uh a, tua laitakin Philistinete sia Rephaim Kuam ah ngiaphual saat uh hi. 14Tua hun laitak in David sia ngal nanna tu in a ki uum mualno tung khat ah om a, Philistinete in Bethlehem khua lua uh hi. 15David in inn sang ngai in, “Bethlehem kongpi hui tuikhuk panin ka dawn tu tui, khat in hong paipui le paw uk na peu ingh!” ci hi. 16Ngalkap minthang thumte in Philistinete phual nawkkeak in pai uh a, tuikhuk pan tui tawm a laak zawkciang David kungah paipui uh hi. Ahihang David in a dawn nuam bua hi; tabang ahi luang in TOPA tungah piakkhiatna in lei ah sung a, 17taciang, “TOPA awng, Hi tui ka ne ngei batu hi! A nuntakna a khaam mite ii chi a ne taw ka kibang tu hi,” ci hi. Tua ahikom ama in tui a neak tu nial hi.

Ngalkap minthang thumte ii ngalhan nasep tabang ahi hi.

18Joab ii suapuipa Abishai (a nu sia Zeruiah hi) sia “A minthang Sawmthumte” ii lampui ahi hi. Ama in tei taw a ngalte zathum do a, that siat hi, tabangin ama sawmthumte sungah minthang hi. 19Ama sia “Sawmthumte” sungah a minthangbel hi a, amate ii lampui hong suak hi, ahihang “Thumte” za in minthang ngawl hi.

20Kabzeel pan Jehoiada ii tapa Benaiah sia ngalkap minthang dang khat hi; ama in ngalhan nasep tam ma nei a, tua sung pan Moab ngalhang te nii a thalup kihel hi. Vuuk taak ni khat ama in dumkhuk sungah tuaksuk in tawpi khat thatlum hi. 21Ama in a thatang lian mama Egyptte tei toai khat that hi. Benaiah in molpum taw Egypt pa sim a, Egypt pa ii tei sut in tua taw that hi. 22“Sawmthumte” sungah khat ahi Benaiah ii ngalhan nasep te tabang ahi hi.. 23Ama sia “Sawmthum” sung panin a minthang a, ahihang “Thumte” za in minthang zo ngawl hi. David in ama a cingte ukpipa in koi hi.

24-39“Sawm Thumte” sungah a kihel dang teng sia:

Joab ii suapui Asahel,
Bethlehem pan Dodo ii tapa Elhanan,
Harod pan Shammah le Elika
Pelet pan Helez
Tekoa pan Ikkesh ii tapa Ira
Anathoth pan Abiezer
Hushah pan Mebunnai
Ahoh pan Zalmon
Netophah pan Maharai
Natophah pan Baanah ii tapa Heleb
Benjamin ngam Gibeah pan Ribai ii tapa Ittai
Pirathon pan Benaiah
Gaash ngamnai kuam sung pan Hiddai
Arabah pan Abialbon
Bahurim pan Azmaveth
Shaalbon pan Eliahba
Jashen ii tapate
Jonathan
Harar pan Shammah
Harar pan Sharar ii tapa Ahiam
Maacah pan Ahasbai ii tapa Eliphelet
Gilo pan Ahithophel ii tapa Eliam
Carmel pan Hezro
Arab pan Paarai
Zobah pan Nathan ii tapa Igal
Gad pan Bani
Ammon pan Zelek
Beeroth pan Nahavai Joab ii ngalhiam puapa
Jattir pan Ira le Gareb
Hit pan Uriah, ahi uh hi.
A vekpi in ngalkap minthang sawmthum le sali pha hi.


Samuel Niina 24
David in Mimal simna Vawt
(1Khang tangthu 21:1-27)
1TOPA sia Israelte ii tungah khatvei ma thin uuk kik a, amate tungah David in ngim pia sak hi. TOPA in ama mun ah, “Pai tan a, Israelte le Judahte mimal phaza sim tan,” ci hi. 2Tua ahikom David in ngalkap honte ukpipa Joab mun ah thu pia hi: “Na uliante taw Israelte minam theampo sung ngam ii mong lang khat pan lang khat dong pai tan a, mimalte sim tavun. Bangza tak pha ziam he nuam khi hi,” ci hi.

3Ahihang Joab in kumpipa zo kik a, “Kumpipa awng, TOPA na Pathian in Israel mite tu a sangin a zaa zakhat a tamzaw in hong piang sak tahen a, taciang tabang a pian dong nangma in hong mu sak lai tahen. Ahihang, kumpipa awng banghang hisia vawt nuam ni ziam?” ci hi. 4Ahihang kumpipa in Joab le a uliante in a thu ni sak a; amate in kumpipa nusia in Israel mite mi phaza sim tu in pai uh hi.

5Amate in Jordan ngun kantan in, Gad ngamkuam ii zanglai a Aroer khuapi ii thang sangah ngiaphual saat uh hi. Tua mun panin amate in saksang Jazer ah, 6tua mun pan Hit te ngamkhen sung Gilead le Kadesh ah pai uh hi. Tua zawkciang amate in Dan ah pai in, Dan pan nitumna sangah Sidon zuan uh hi. 7Tua mun pan amate kulh taw a ki uum Tyre khuapi, Hiv le Canaante khuapi theampo, a khakbel in Beersheba, Judahte ngamkhen thang sangah pai uh hi. 8Tabangin a ngamsung buppi ah a khualhaw zawk uh, tha kua le ni kul zawkciang amate Jerusalem ah hong heak kik uh hi. 9Amate in, kumpipa tungah, Israel ngamah ngalhiam toai thei pasal a vekpi 800,000 om in, Judah ngamah 500,000 om hi, ci in son uh hi.

10Ahihang David in mimal sim sazian a laak sak zawkciang a thin hong nuam ngawl a, TOPA munah hi bangin ci hi. “Hi nasep ka sep sia maw mama khi hi. Nong hesuakna in hong mai sak tan, mawmawt nasep seam hi thong khi hi,” ci hi.

11-12TOPA in David ii kamsang Gad munah, “David son tan, ama ii teal tu thu nam thum pia khi hi. Ama ii teal po vawt tu khi hi,” ci sak hi. A khuavak ni zing David ii thaw zawkciang, 13Gad ama ii kungah pai in, TOPA ii a sawl teng son hi, taciang dongh hi. “Koisia teal tu ni ziam? Na ngam sungah kum thum kialpi tung zaw tu maw, na ngalte mai pan tha thum sung tai zaw tu ni ziam, tua ahibale ni thum sung na ngam sungah pulpi tung sak nuam zaw ni ziam? Tu in ngaisun tan, TOPA munah ka puak kik tu na zona hong za sak tan,” ci hi.

14David in zo kik a, “A lung man huai mama dinmun ah om khi hi! Hi kale mihingte ii daan hong piak tu uuk ngawl khi hi. TOPA mama sia kei daan hong pia tu pa hi hen, banghangziam cile ama sia hesuakna taw kidim hi,” ci hi. 15Tua ahikom tua ni zing pan kipan ama ii teal hun a ci dong TOPA in Israel tungah pul natna tung sak hi. Ngam mong khat pan mong khat dong Israel mi tul sawmsali thi uh hi. 16TOPA ii vantung lalang in Jerusalem laltham sak tu in a kipat ciangin TOPA in mihingte daan a piak huvau a thin kheal kikin, amate a that vantung lalang munah, “Tawp in! Pha zo!” ci hi. Vantung lalang sia Jebus mi Araunah ii ancilna munah hong theng hi.

17David in a mite a that vantung lalang mu a, TOPA munah, “A maw sia keima khi hi, a pha ngawl a ngamta sia keima khi hi. Hi a khuangai huai mihingte in bang vawt thong na ziam? Kei le ka innkuante daan nong piak tu hi zaw khu hi,” ci hi.

18Tua ni ma in Gad sia David kungah hong pai a, “Araunah ii ancilna munah pai tan a, tua munah biaktau khat TOPA atu sa tan,” ci hi. 19David in TOPA ii thupiak ni in Gad ii sawl bangin pai hi. 20Araunah in a etsuk le kumpipa le a uliante ama kungah hong pai a mu hi. Ama in David ii mai lei ah kisepsuk in, 21dongh hi, “Kumpipa awng, banghangin hi sungah hong om ni ziam?” ci hi.

David, “Na ancilna mun lei tu le, pul natna a thai natu TOPA atu biaktau khat sa tu in hong pai khi hi,” ci in zo hi.

22“La in, kumpipa awng, taciang TOPA tungah na uuk babangin pia in. Hi munah biaktau tungah na hal tu khuital te om hi, taciang hi munah ah khuite ii kanhak le ancilna thingpheakte om hi, mei thu tu in zangh in,” Araunah in ci hi. 23Araunah in kumpipa tungah a vekpi in pia siat hi taciang ama munah, “TOPA na Pathian in na piakkhiatna hong saang tahen,” ci hi.

24Ahihang kumpipa in zo a, “Hi ngawl hi. Tuate ii manh hong pia tu khi hi. Ka TOPA tungah keima ii bangma a manh ka piak ngawl nate sangaw biakpiakna in nei ngawl tu khi hi,” ci hi. Ama in khuitalte le ancilna thingpheakte manh tu nguntang sawmnga pia hi. 25Tua zawkciang ama in TOPA tungah biaktau sa in, meihal biakpiakna le kipawlkhop biakpiakna pia hi. TOPA in a thungetna saang a, Israel ngam ah pul natna kamh hi.

0 comments:

Post a Comment