Kumpite Khatna 3 - 4

1. Solomon in biakinn a sak ma in, akua atu inn sa masa ziam?
a. A zii atu
b. Ama atu
c. Biakinn sate atu

2. Biaktau minthang bel sia koisungah om ziam? 
a. Jerusalem
b. Sinai mual ah
c. Gibeon ah

3. Solomon in banghang ciimna ngen ziam?
a. Mihingte pil le uuk
b. A ngam zai sak nuam
c. Thutang uuk

4. Pathian le Solomon koisungah kipaupui ziam?
a. Zion mualvum
b. Amangn sung
c. Biakinnpi sung

5. Nausen phalbat natu namsau ala sia akua ziam?
a. Benaiah
b. Ngalkap khat
c. Solomon

6. Pathian in bangbangh thute khensat natu ciimna Solomon pia ziam?
a. Thuthuukte
b. Mipilte heak ngawlte
c. Thu Kituute

7. Solomon ii advisorpa Zabud sia akua ii tapa ziam?
a. Nathan
b. Abiathar
c. Zadok

8. Solomon maan sung Israelte in bang huan vawt ziam?
a. Olive
b. Maangtaang
c. Sapit

9. Solomon in ngamuk maangpi bangza koi ziam?
a. 3
b. 7
c. 12

10. Solomon ii maak bangza sia ngamkhen uk sungah kihel ziam?
a. 1
b. 2
c. 7

11. Solomon in paunak bangza phuak ziam?
a. 1000
b. 2000
c. 3000

12. Solomon in laa ngui bangza val phuak ziam?
a. Sawm
b. Za
c. Tul




Kumpite Khatna 3
Solomon in Ciim natu Thungen
(2Khang tangthu 1:3-12)
1Solomon in Egypt te taw ngal vai a kipawl natu Egypt Kumpipa tanu tenpui hi. Ama in tua a zi sia ama ii inn tu, Biakinnpi le Jerusalem khua uumna luphungte sak man dong David khuapi ah a teang tu in ciapui hi. 2TOPA atu in biakinnpi kisa ngawl lai hi, tua ahikom mipite in sangaw biakpiakna mun tatuam ah vawt uh hi. 3Solomon in TOPA it a, a pa David ii hil bangin ngamta hi, ahihang ama in ngannote ngo in biaktau tatuamte ah biakpiakna in nei hi.

4Khat vei, ama Gibeon ah pai in tua munah sangaw biakpiakna vawt hi, banghangziam cile tua mun ah biaktau minthang bel sia om hi. Ama in hun bo sa sungah tua munah meihal biakpiaknate a za a za in pia hi. 5Tua ni zan in TOPA sia a mang sungah hong kilaak a, ama thu dongh hi. “Bang kong piak tu na uuk bel ziam?” ci hi.

6Solomon in zo kik a, “Nang in ka pa David, na naseam pa sia itna lianpi na lak a, taciang ama pha in, thumaan in, nang taw kizopna sungah thutang in seam hi. Taciangin nangma in a kizom paisuakin itna kho na lakna in tapa khat na pia a, ama ii taangin tu ni in ngam a uk hi. 7Aw TOPA Pathian, keima sia ka khan moi mama in ki uk zia he ngawl ka hi hang, nangma in kei ka pa za nong laih sak zo hi. 8Hi sungah na teal sa nangma mite a kisim zo ngawlte sungah om khi hi. 9Tua ahikom na mihingte thutang taw ka uk thei natu le a pha le a sia ka khentel thei natu in ciimna hong pia tan. Tua ahibale bangbangin hi na mihon tam mama te uk thei tu khi ziam?” ci hi

10Solomon ii hisia a nget sia TOPA lungkim hi, 11tua ahikom ama munah, “Nangma atu in khan sauna ahizong, hauna ahizong, ahibale na ngalte thi natu ahizong, hong ngen ngawlin thutang takin uk thei natu ciimna hong ngen zaw na hikom, 12nong nget bangin ka vawt tu hi. Ciimna le heakna sia tu masia le tu zawkciang zong kuama ii nei ngei ngawl a kicingin hong pia tu khi hi. 13Nong nget ngawlte zong hong pia sii tu khi hi: na nuntak tawntung hauna le minphatna te sia kumpipa dang khat papo sangin tam zaw kong pia tu hi. 14Taciang na pa David ii vawt bangin kei thu nong ni a ka thukham le ka thupiakte na keamcing le khan sauna hong pia tu khi hi,” ci hi.

15Solomon hong khanglo a, Pathian in a mang sungah ama paupui hi ci in phawk hi. Tua zawkciang ama Jerusalem ah pai in Thukham Thingkuang mai ah meihal biakpiakna le kipawlkhop biakpiakna TOPA tungah vawt hi. Tua zawkciangin a uliante theampo atu an neak poai khat vawt hi.

Solomon in Thuhaksa khat khen
16Nikhat ni in pumpi zuak numei nii Kumpipa Solomon mai ah amate thu in ding uh hi. 17Khat sia in, “Kumpipa awng, hi numei le kei inn khat sungah teang khawm khu hi, taciang keima in ama om sung ma in ka inn ah nausen no khat ka hing hi. 18Ka nau a sua zawk ni nii ciang ama zongh in nau pano khat hing hi. Koma nii bekma tua inn sungah teang a, kuama dang om ngawl hi. 19Taciang zan khat ciangin ama in a nau tungah hong kilumliik tha in, a nau dellum hi. 20Ama in zan in tho a, ka mut laanin ka tapa sia ka pangh panin la a, ama lupna ah paipui hi; tua zawkciang ama in nausen thi sa sia kei lupna ah hong koi hi. 21A khuavak ni zingsang ka khanlaw ciangin ka nau noai pia tu ka hi le a thi sa ahi hunlam ka mu hi. Nausen pha takin ka etcian ciang kei ii ta hi ngawl hi ci in ka mu hi,” ci hi.

22Ahihang numei dang khat sia in, “Hi ngawl hi! Nau thi sa sia nang aa hi a, a nungta sia kei aa hi,” ci hi.

Numei a pau masa sia in, “Hi ngawl hi! Nau a thi sia nang aa hi a, a nungta sia keima aa hi,” ci kik hi.

Tabangin Kumpipa mai ah kinial uh hi.

23Tua zawkciang Kumpipa Solomon in, “Na nii uh ma in, nau a nungta sia kei aa hi ci in a thi sa sia ama aa hi ci nu hi,” ci hi. 24Ama in namsau khat la sakin, hong paipui zawkciang, 25ama in, “Nau a nungta sia phalbat vun a, numeite a lang veve hawm sak vun,” ci hi.

26A nu tatak sia a tapa a itna taw kidim ahikom kumpipa munah, “Kumpipa awng, nau sia that heak in. Ama pia in!” ci hi.

Ahihang numei dang khat sia in, “Ko khat zongh hong pia heak in; khen nii sua in,” ci hi.

27Tua zawkciang Solomon in, “Nau sia that heak in! Numei a pau masa sia pia vun, ama sia a nu tatak hi,” ci hi.

28Israel mipite in Solomon ii thu khenna a zaak uh ciang ama zatakna nasia nei uh hi, banghangziam cile Pathian in ama sia thu kituu te tang takin khen thei natu Pathian in ciimna pia hi, ci in he uh hi.

Kumpite Khatna 4
Solomon ii Uliante
1Solomon sia Israel ngam bup ii kumpipa hi a, 2taciang hite sia a uliante ahi uh hi.
Thiampi: Zadok ii tapa Azariah
3Zum thuzeakpite: Shisha tapate Elihoreph le Ahijah
Thu ciamtee pipa: Ahilud tapa Jehoshaphat
4Ngalkap mang: Jehoiada tapa Benaiah
Thiampi: Zadok le Abiathar
5Ngam khen khat ukpi pa: Nathan tapa Azariah
Kumpite ngaisutna a pia pa: Nathan tapa thiampi Zabud
6Kumpi innsung naseamte lampuipa: Ahishar
Thaman piak ngawl kulite a ukpa: Abda ii tapa Adoniram sia,
7Solomon in Israel ngam sungah ngamkhen uk maangpi sawm le nii koi hi. Amate in a uk sung ngam tek panin kumpipa le a baangkua ii kumkhat bup a neak tu sia mihing khat sim in tha sim a baanin kilaih in pia sak hi. 8Tua upa sawm le niite le amate ii ukna ngamkhente sia hi bang hi:


Benhur: Ephraim mualtung ngam teng

9Bendeker: Makaz, Shaalbim, Beth Shemesh, Elon le Beth Hanan khuapite
10Benhesed: Arubboth le Socoh khuapite le Hepher ngam theampo
11Solomon tanu Taphath ii pasal Benabinadab: Dor ngam theampo
12Ahilud tapa Baana: Taanach le Megiddo khuapite le Jezreel khua thangsang, Beth Shean le Zarethan khuahui ah a om ngam theampo, Abel Meholah le Jokmeam khua dong
13Bengeber: Gilead ngam Ramoth khua le Manasseh ii suan le paal khat ahi Jair be le phungte ii neisa Gilead ah khuanote le Bashan pan Argob ngam, a vekpi in khuapi lian sawmluk, luphung taw a ki uum, le kongpi taungo taw kikalh te a
14Iddo tapa Ahinadab: Mahanaim ngam
15Solomon ii tanu dang khat Basemath a tenpui pa Ahimaaz Naphtali ngam
16Hushai tapa Baana: Asher ngam le Bealoth khua
17Puruah tapa Jehoshaphat: Issachar ngam
18Ela tapa Shimei: Benjamin ngam
19Uri tapa Geber: Amor kumpipa Sihon le Bashan kumpi Og ii a ukna ngam Gilead ngam
Hi ngam uk sawm le niite ii tungsia ah ngambup uk menzi khat zongh om hi.

Solomon ii maan sung Khantona
20Judah le Israel ngam sung a mite sia tuipi vaal a sentang za in tam hi; amate in ne a, dawn in, lungdam uh hi. 21Solomon ii kumpi ngam sia Euphrates Ngun ii huam, Philistia le Egypt te ngamngi dong ahi hi. Amate in shia pia uh a, ama ii nuntak sung tawntung a khut nuai ah om uh hi. *

22Solomon ii nisim a tulmawk ante sia, zungtaang vui neal kuang 150, anvui ham kuang 300, 23sazuk, saza, sanang le ak te a kisim ngawl, inn ah a kivaak khui 10, lo sung kitha khui 20, tuu 100 te ahi uh hi.

24Solomon in Euphrates Ngun ii nitumna sang ngam theampo, Tipshah khua Euphrates ngun hui ah, taciang nitumna sang Gaza dong uk hi. Taciang Ephrates ii nitumna sang kumpipate theampo sia ama ii khutnuai ahi hi, taciang ngamngi kizawng a omte theampo taw kilem uh hi. 25Ama ii nuntak lai tengin Judah le Israelte sia ngam muang in om uh a, innkuan simin a sapit huante le a thei kungte taw nuamsa uh hi.

26Solomon in ngalsimna siphuleang atu siphu khawk tul sawmli nei a, siphu ngalkap tulsawm le tulnii nei hi. * 27Ngam uk maangpi sawm le niite in Solomon le ama ii kumpi inn sungah an ne theampo atu tha sim kum khat ai atu a baan in kilaih in an pia uh hi; amate in a kisamh theampo a tawntungin puak uh hi. 28Maangpi khat ii simin, a kisamh babang taangpi le taangphawte, ngalsimna siphute le naseam siphute an tu sik uh hi.

29Pathian in Solomon sia a tuampian ciimna le mukhol theina, a kitee thei ngawl heak theina te pia hi. 30Solomon sia Nisuana sang a miciimte ahibale Egypt mi ciimte sangin ciim zaw hi. 31Ama sia mihing a minpiang a ciimbel ahi hi: Ezrah mi Ethan sangin ciim zaw a, Haman, Calcol le Darda, Mahol ii tate sangin ciimzaw hi, ama ii minthanna sia kiim le paam ngamte dongin kizel hi. * 32Ama in paunak tulthum phuak a, la zongh ngui tul vaal phuak hi. * 33Ama in thingkung le lopate thu sonin nei a, Lebanon a cedar te le pang tung a po hyssop te thu; taciang ama in ngamsate, vacimte, awmtaal nganhingte le ngasate thu son hi. 34Leitung bup a kumpite in a ciimna uh za a, tua ciimnate a ngai tu in thataak pai sak tek uh hi.

0 comments:

Post a Comment