Laithiangtho dokna (Jeremiah 31-32)

1. Israelte atawlngah nop ciang TOPA ___ ah kilangh tu hi.
a. Moriah
b. ngualzawna sung
c. A khualana

2. TOPA in akua sia atapa lianbel ci ziam?
a. Reubin
b. Judah
c. Ephraim

3. Koi sung mual ah Isralte lungdamko laa sa uh ziam?
a. Moiah
b. Zion
c. Calvary

4. Ramah khua awnging sia bang aw ziam?
a. Kaana aw
b. Lungdamna aw
c. Ngualzawna aw

5. Banghun zawk ‘Lum in ka mu a, ka khanlaw a nuam hi,’ ci tu uh ziam?
a. Sun nisat hun zawk
b. Phalbi hun bo ciang
c. A toi thai uh ciang

6. TOPA in athukhamte koisungah at tu ziam?
a. Suangpheak tungah
b. Sahun tungah
c. A lungtang tungah

7. Akua in Jeremiah thong tak sak ziam?
a. Hezekiah
b. Zedekiah
c. Nebuchadnezzar

8. Jeremiah in Hanmel ii lo bangza pia ziam?
a. Nguntang 17
b. Nguntang 30
c. Nguntang 70

9. Lo leina thu thukimna lai sia koisungah kikoi tu ziam?
a. Biakinn
b. Kumpi inn
c. Leibeal

10. Baal milim le zu sunna ___ ahikom Pathian thinuk hi.
a. a inn sung ah koi
b. a inn mai ah koi
c. inn khuvum ah koi

11. A tapa le a tanute ___ tungah a biakpiak na in zangh hi.
a. Ashuriah pathian
b. Molech pathian
c. Rumiah pathian

12. Siatna atun sak banghma a kamciamsa ___ tu ci hi.
a. apha nate ka pia
b. natna ka pia
c. maizumna ka pia


Jeremiah 31
Israelte ii Inn ah A Cia kikna
1TOPA in ci hi, “Israel minamte theampo ii Pathian ka hi hun hong theng tu a, amate in ka mihingte hi tu uh hi. 2Thina pan a suakta tua mihingte senneal ngam sungah ka hesuakna ka lak hi. Israel mite a tawlngak nop uh ciang, 3A khualana pan amate kungah ka kilangh hi. Israel mite awng, no kong it tawntung a, tua ahikom kong it tawntungna kong lak tan tu hi. 4Khatvei ma kong pua kik tu hi. Khatvei ma na thikdaakkualte na la kik tu uh a, lungdam in na laam tu uh hi. 5Khatvei ma Samaria mual tungah sapit huan na vawt kik tu uh a, tua sapit huan a vawtte in Sapit huan pan a piangte ne tu uh hi. 6Hi hi, ngalvilte in Ephraim mualtung panin, ‘Zion ah ih TOPA Pathian kungah paito ka tawng’ ci in au in a sam tu hun hong theng tu hi.”

7TOPA in ci hi,
“Minamte sung panin a lianbel,
Israel atu in lungdam in la sa vun
Pokna la sa vun, ‘TOPA in a mite ngum zo a;
A taanglaite theampo suatak zo hi,’ ci vun.
8Keima in amate saksang pan ka paipui tu a,
leimong pan ka kaikhawm tu hi.
Mittaw peangbaite, numei naupaaite le
nausuak dektakte zongh amate taw hong pai tu uh hi,
Amate sia minam lian khatin hong heak kik tu uh hi.
9Ka mite kap kawmin hong heak kik tu uh hi.
Thungen kawmin amate ka heak kikpui tu hi.
Tui omna lui ah amate ka paipui tu a,
lamnuam totpui in amate lutu ngawl tu uh hi.
Keima in Israelte ii pa khat bang ka hi a,
Ephraim sia ka tapa lian bel ahi hi”.
10TOPA in ci hi,
“Minamte awng, hong ngai tavun a,
ka kammalte a khuala na tuipi hui ah taangko vun.
Ka mite ka thethaang hi,
ahihang in amate ka kaikhawm tu a,
tuucing pa in a tuuhon a kep bangin ka keam tu hi.
11Israel mite ka suatak zo a,
a thahat minam khat ii khutsung panin ka ngum zo hi.
12Amate hong pai in Zion mual tungah lungdam in la sa tu uh a,
ka letsongte taw lungkim tu uh hi–
Ka letsongte sia antang, zu, olive thau, tuu le khuite ahi hi.
Amate sia pha tak a, tui a kibuak husuan khat taw kibang tu a,
amate in a kisap theampo nei tu uh hi.
13Taciang ngaknute laam tu uh a, lungdam tu uh hi,
taciang pasal, khangmoi, khanghaam a thin uh nuam tu uh hi.
Amate ka heeneam tu a, a kaana te thin nopna,
a khuangai nate lungdamna ka suak sak tu hi.
14Thiampite anlim bel taw ka vaak tu a,
ka mite ii a taangsap theampo ka pia tu hi.
Keima, TOPA in ka ci zo hi.”
Israel tungah TOPA ii Hesuakna
15TOPA in ci hi,
“Ramah khua ah aw khat ki za a,
thin nat tatakna taw kaana aw ahi hi.
Rachel sia a tate atu in kap hi;
a tate om nawn ngawl a, ama sia heenep tu uuk ngawl hi. *
16Kap nawn heak in a, na thituite nawl in.
Na tate atu in na sep theampo
thaman nga ngawlin na om batu hi;
amate sia ngalte ii ngam panin hong heak kik tu uh hi.
17Na mai sang atu in lametna om hi;
na tate inn hong zuan kik tu uh hi.
Keima, TOPA in ka ci zo hi.
18“Israel mite khuangai in a mau ka za hi,
‘TOPA awng, ko sia a kizual ngawl nganhing khat bang ka hi uh hi,
ahihang thu ni tu in kote nong hil hi.
Ko hong ciapui kik tan;
na kungah hong cia tu in kithoai khu hi,
TOPA kote Pathian awng.
19Nangma kung pan mundang ah ka pial uh hi,
ahihang kong heak kik pai nuam uh hi.
Daan nong piak zawkciangin khuangai in ka kun uh hi.
Ka nolai a khialna ka vawt uh hu in
maizum minpaan in ka om uh hi’.
20“Israel awng, nang sia
ka it bel ka tapa na hi a, ka it bel ka ta na hi hi.
Na min ka law simin itna taw kong phawk hi.
Nangma kong ngaisun tawntung a; kong hesuak tu hi.
21Lampi ah lamlaknate phutin lampi ciamtee in;
na kipatna lampi zong kik in.
Hong heak kik tavun, Israel mite awng,
na nusiat uh khuate ah hong cia kik tavun.
22Bangtan vei haisaang tu nu ziam? upna nei ngawl mihingte awng?
A thak le a tumdang na pawlkhat ka bitphua zo a,
numei khat in pasal khat a kep bangin tumdang hi”.
Pathian Mihingte ii Maisang Nop sak natu
23Vaanglianbelpa TOPA Israel ii Pathian in ci hi, “Mihingte a ngam ka piak kik ciang, Judah ngamsung le a khuapite sungah amate in hi bangin khatvei,

‘TOPA in Jerusalem mual thiangtho,
ama tenna mun thiangtho sia, thupha pia tahen’ ci kik tu uh hi.
24Judah ngamsung le a khuapite theampo ah mihingte teang tu uh a, lothote, tuucingte, a tuuhonte taw om tu uh hi. 25A ngim mihingte a toi ka thai sak tu a, ngilkial a, a tha zawmte theampo an ka vaak tu hi. 26Tasia ciang mihingte in, ‘Lum in ka mu a, ka khanlaw a nuam hi,’ ci tu uh hi.

27“Keima, TOPA in Israel le Judah ngam sia mihingte le nganhingte taw ka dimh sak tu hun hong theng tu hi, ka ci hi. 28Kidawm takin amate ka lokkeak, ka kaikeak, ka lotthal, ka suksiat le ka lal sak lai bangma in kidawm takin amate ka suan kik tu a ka sa kik tu hi. 29Tua hun hong thet ciang, mihingte in,

‘A nu le a pate in sapit nga thuk ne a,
a hihang a tate uh ii ha khim hi,’ ci nawn ngawl tu uh hi. *
30Tabang hi zaw ngawlin, Sapit nga thuk a ne papo a hakhim tu a; a kuama po ama ii mawna hangin thi tu hi”. *
31TOPA in ci hi, “Irael mite le Judah mite taw thuciamna thak khat ka vawt tu hun hong theng tu hi. * 32Tua thuciamna sia a pu a pate a khut uh pan kai in Egypt ngam pan ka pusua pui lai a, a pu a pate taw ka vawt uh thuciamna lui taw kibang ngawl tu hi. Keima in amate ii a pasal bang hi napi ing amate in tua thuciamna zui ngawl uh hi. 33Israel mite taw ka vawt tu thuciamna thak sia hi bang hi tu hi. Amate sung sangah ka thukham ka koi tu a, a lungtang tungah tuate ka at tu hi. Keima in amate ii Pathian ka hi tu a, amate sia ka mihingte hi tu uh hi. * 34TOPA a heak natu uh in amate kuama in a ngam mipuite thu hil ngawl tu hi, banghangziam cile a nobel pan a lianbel dongin kei hong he siat tu uh hi. Keima in amate ii a khialnate ka mai sak tu a, a khialnate ka ciamtee nawn batu hi. Keima, TOPA in ka ci zo hi”. *

35TOPA in sunin khuavak taang sak tu in ni hong pia a,
zan in a taang tu in tha le aksite hong pia hi.
Ama in tuipi kihual sakin hawk sak hi;
ama ii min sia Vaanglianbelpa TOPA ahi hi.
36Khuahun paizia a kip lai theampo in,
Israel sia minam khat in om tu hi ci in, kamciam pia hi.
37Vantung a kitee thei ciang le
leinuai a om leitaw dopphate a ki et thei ni khat ni ciang sia
amate ii khialna a vawtnate theampo hu in
ama in Israel mite nial pheang tu hi.
TOPA in ci zo hi.
38TOPA in ci hi, “Khuapi kingh Kongpi ii nitumna sangah a om Hananel Tausaang panin kipan Jerusalem khua buppi sia keima ii khuapi in a kisak kik tu hun hong theng tu hi. 39Taciang ngamngi sia tua mun panin nitumna sang Gareb mual dong le Goah kiimkot teng hi tu hi. 40Mithi phumna le ninteak kholna kuam buppi, le Kidron lui tungah lote theampo nisuana sangah om Siphu Kongpi ciang dong, keima a tu in mun thiangtho hi tu hi. Khuapi sia kipheltham kisusia kik ngei nawn ngawl tu hi”.

Jeremiah 32
Jeremiah in Lo khat Lei
1TOPA in Zedekiah ii Judah kumpi a sua zawk kum sawm a cin kum, Kumpi Nebuchadnezzar zongh Babylonia kumpi a sua zawk kum sawm le kum liat a cin kum in kei hong paupui hi. * 2Tua hunin Babylonia kumpipa ii ngalkapte in Jerusalem sim a, kumpipa innhuang sungah kei hong khacip hi. 3Zedekiah Kumpipa in kei sia tua mun a om thong sungah hong khum a, TOPA ii son bang a ka son hu in kei hong mawsiat hi, TOPA sonna pan, “Babylonia kumpipa in hi khuapi ka la sak tu a, 4Zedekiah Kumpipa suakta ngawl tu hi. Ama sia Babylonia kumpipa khut sungah ki aap tu a, ama taw maitang kimu in thuson tu hi. 5Zedekiah sia Babylonia ah ki paipui tu a, ama ka vil mateng tua munah om zii tu hi. Babylonia te a do hial zongin, zo ngawl tu hi. Keima, TOPA in ka ci zo hi”.

6TOPA in kei hong sonna panin, 7Ka pano Shallum ii tapa, Hanamel ka kungah hong pai tu a, Benjamin ngamsung Anathoth khua ah a lo sia hong lei tan, banghangziam cile a lei thei tu sung panin ka kinai pui bel ka mealheak nangma na om hi; ci in hong ngen tu hi, hong ci hi. 8Tasia ciang, TOPA ii ci bangma in, Hanamel sia ka omna zum huang sung, ka kungah hong pai in tua lo lei tu in kei hong sawl hi. Tua ahikom TOPA in keima tungah hong son tatak zo hi ci sia ka he hi. 9Hanamel tung panin tua lo ka lei a, ama atu in sum ka toaitee hi; a manh sia nguntang sawm le sali tung hi. 10Thukimna lai vawtin letmat ka thu a, thu hong heak pui tu in tetti sam in, toaiteena taw sum ka toaitee hi. 11Lo kileina lai nii ka vawt hi. Khat sia tazeik kitum ngawl a, a dang khat sia tazeik kitum hi. Keima kungah a nii ma in ka la a, 12Mahseiah ii tupa Neriah ii tapa Baruch tungah tua laite ka pia hi. Tua thukimna laite sia Hanamel le lo kilei thukimna lai a kivawt lai a, a thu hong heakpui tu letmat a thu tettite le zum huang sungah a to mihingte mai ah Baruch tungah ka pia hi. 13Amate theampo mai ah keima in Baruch tungah ka ci hi, 14“Vaanglianbelpa TOPA Israel ii Pathian in, hi thukimna laite tazeik kitum sia hi kale a kitum ngawl sia hi kale a nii in la tu a, khua ngei a kikhom thei tu in leibeal sungah koi tu in nang thu hong pia zo hi. 15Vaanglianbelpa TOPA, Israel ii Pathian in, hi ngam sungah a om innte lote le sapit huante kilei kik tu hi, ci hi”.

Jeremiah ii Thungetna
16Lo kileina lai sia Baruch tungah ka piak zawkciang thu ka ngen a, 17“Vaanglianpipa TOPA awng, nangma in leitung le vantung sia na vaangletna le na thahatna taw na vawt a; nang atu in a haksa lei bangma om ngawl hi. 18Tul tam mamate tungah tawntung itna na lak zo a, ahihang a nu a pate ii khialnate hu in mihingte daan na pia si hi. Nangma in a lian le a vaang nei Pathian na hi a, Vaanglianbelpa TOPA na hi hi. 19Nang in ngaisutna pha na nei a, naliante na vawt hi, mihingte ii a vawt theampo na mu a, amate ii sepna taw kizui in thaman na pia hi. 20Nidang lai in Egypt ngamah na lamdang le a tumdang nate na lak a, tu ciang dongin Israel mite sung hi kale minam dangte theampo sungah hi kale na lak lai hi. Tua hu in mun theampo ah na minthang hi. 21Ih ngalte a patau sak na lamdang le a tumdang nate lakna taw in Egypt ngam panin Israel na mite na paipui natu in na vaangletna le na thahatna na zangh hi. 22A pu a pate tungah na kamciam sa bangma in, hi ngampha le leipha ngam sia amate na pia hi. 23Ahihang amate in hi ngam hong theng a, ngam a lua uh ciangin na thupiak ni ngawl uh a, na thuhilna bangin ngamta ngawl uh hi; vawt tu a na thupiakte bang mama vawt ngawl uh hi. Tasia hu in hi lalcipna theampo amate tungah na theng sak hi.

24“Babylonia te in khuapi a laak natu in khuapi kiimkot ah leivum ciangin sim uh hi. Ngal, kialpi le natna in hi khuapi sia amate ii khutsung theng sak hi. Na son sate theampo a tangtun na mu thei hi. 25Ahihang, khuapi sia Babylonia te in a la tu hi zo napi tettite mai ah lo lei tu a, thu hong pia sia Vaanglianpipa TOPA nang mama na hi veve hi,” ka ci hi.

26Taciang TOPA in keima tungah, 27“Keima in TOPA ka hi a, minamte theampo ii Pathian ka hi hi. Kei atu in a haksa lei bangma om ngawl hi. 28Hi khuapi sia Babylonia Kumpipa Nebuchadnezzar le a ngalkapte khut sungah ka pia tu a, amate in la in, * 29mei taw hal tu uh hi. A innkhum tung a Baal atu ngim namtui a halna le a dang pathian te atu zu a sunna mun ahi kei hong thin uuk sak innte taw a vekpi in amate in halcip tu hi. 30Amate tangthu a kipat pan kipanin Israel mite le Judah mite in ka thin hong nuam sak ngawl a, amate ii sepna vawtna hangin ka thin hong uuk sak hi. 31Hi khua mite in tua khuapi a sak ni pan kipan ka thin hong uuk sak a hong thangsia sak hi. Tua khua sia suksiat tu in ka khensat zo hi, 32banghangziam cile Judah mite le Jerusalem khua mite in a kumpite le a lampuite, a thiampite le a kamsangte uh taw a sia a vawt uh hang ahi hi. 33Amate in kei hong nungngat uh a, hil tawntung hi napi ing, hong ngai nuam ngawlin hong mang nuam ngawl uh hi. 34Kei hong biak natu a, a kisa Biakinn sungah amate in a kiihuai milimte ngangawn koi uh a, Biakinn nin sak uh hi. * 35A tapa le a tanute Molech pathian tungah a biakpiak natu in amate in Hinnom Kuam ah Baal pathian biakna biaktaute vawt uh hi. Hi bang a vawt tu sia amate tungah thu ka pia bua hi. Tabang nate a vawt tu uh le Judah mite a khial sak tu uh sia ka ngaisun tha ngei bua hi,” hong ci hi. *

Lametna Kamciam
36TOPA Israel ii Pathian in kei tungah, “Jeremiah awng, mipite in, ngal kidona, kialpi le natna in hi khuapi sia Babylonia Kumpipa khut sungah theng sak tu hi ci uh hi. Tu in kong son tu thudang sia ngai in. 37Ka thin uuk, ka thin sona taw in ka thethaangna ngamte theampo pan mihingte ka kaikhawm tu hi; hi munah ka ciapui kik tu a, thinmuang in hi munah ka teang sak tu hi. 38Tua zawkciang amate in ka mite hi tu a, Keima in amate ii Pathian ka hi tu hi. 39A nuntakna uh ah tupna khat bek ka pia tu hi: tua tupna sia amate ii phat natu le a suan le a paalte ii phat natu in, a tawntung Keima hong upat tu tupna ahi hi. 40Amate taw a tawntung atu in thuciamna khat ka vawt tu hi. Amate atu in na pha ka vawtte ka tawlnga ngei batu a, keima kung pan a puapial ngei ngawl natu in a thinsung theampo taw keima hong kiitak natu in ka vawt tu hi. 41Amate atu a na phate vawtna sungah nuam ka sa tu a, hi ngamah a tawntung in amate ka teang sak tu hi.

42“Hi mihingte tungah hi siatna ka thet sak bangma in ka kamciam sa a phate theampo amate tungah ka tung sak tu hi. 43Mihingte in, hi ngam sia mihing hi kale nganhing hi kale ii ten ngawlna senneal ngam bang hi tu a, tua ngam sia Babylonia te khut sungah kipia tu hi, ci uh hi. Ahihang hi ngam sungah a om lote khat vei kilei kik tu hi. 44Mihingte in tua lote lei in lo kileina lai tungah min thu, tazeik tum tu a, tetti nei tu uh hi. Hi thu sia Benjamin ngam, Jerusalem kiim ah khuanote, Judah ngam khuapite le mualtung ngamah khuapite mualpeang ngamte le Judah thangsang ngamte ah piang tu hi. Keima in mihingte a ngam ah ka teang sak kik tu hi. Keima, TOPA in ka ci zo hi”.

0 comments:

Post a Comment