Laithiangtho Dokna (Psalm Late 135-136)

1. Psalm 135 ah TOPA in ama atu akua teal ziam?
a. Jacob
b. Messiah
c. Judah

2. TOPA in suangvalte atu bang vawt ziam?
a. Ni Tha le Aksi
b. Huivak
c. Khualeng

3. ___ ah na lamdangte sia kumpipa le upate dan piak natu hi.
a. Hi leitung
b. Na omna ngam
c. Egypt

4. Tawntung Pathian hi ci'n kuate in ciamte tu ziam?
a. Israel
b. Akhang Akhang In
c. Atate

5. Akuate in kam nei ahihang pau thei ngawl ci ziam?
a. Khamh Milimte
b. Doai biate
c. Baal milim

6. TOPA ii inn sia koi sung ki ci ziam?
a. Vantung
b. Kuama thet ngawlna
c. Jerusalem

Psalm 135

7. Psalm 136 sung akip  tawntung sia ___ hi.
a. A kamciam
b. Vaangletna
c. TOPA ITNA

8. TOPA bek ii avawt sia bang ziam?
a. Nitang
b. Na lamdang liante
c. Mihingte

9. Vantungte sia bang taw vawt ziam?
a. A Ciimna
b. Huivak
c. Vaangletna

10. TOPA in akuate that ziam?
a. Esau
b. Mihing ngilote
c. Thahat Kumpite

11. ___ ciangin ama in hong mangil ngawl hi
a. Zanhun
b. Khat nguak om
c. Ngal ih lel

12. Ama in ___ nei theampo an pia hi.
a. muanna a
b. nuntakna
c. upna

Psalm Late 135
Pokna La
1TOPA pok vun!
TOPA innsung
2ih Pathian Biakinn sungah a ding
TOPA naseamte awng, Ama min pok vun.
3TOPA pok vun, banghangziam cile ama pha hi;
ama min pokna la sa vun, banghangziam cile ama dik hi.
4Ama in ama atu in Jacob teal a,
ama aituam tu in Israelte teal hi.
5Ih TOPA lian hi ci in ka he hi,
pathian dangte theampo sangin lian zaw hi
6Vantung ah ahizong leitung ah ahizong,
tuipi sung le nuai a thukna ah ahizong ama uk po a vawt hi.
7Ama in leitung panin vuite meeikaaite hong puak hi;
ama in suangvalte atu in khualeng vawt a,
taciangin vuite sia a vanh kholna sung pan hong pusua hi.
8Egypt ngamah ama in mihing le nganhingte ii ta masa bel tek
a kibangin thatlum hi.
9Tua munah lim le na lamdang tam ma
kumpipa le a upate daan piak natu in vawt hi.
10Ama in ngam tatuam tam ma susia a,
a thahat kumpite thatlum hi.
11Tuate sungah Amor kumpipa Sihon, Bashan kumpipa Og, le
Canaan kumpite theampo kihel hi.
12Amate ii leitangh theampo
ama Israel mite pia hi.

13TOPA awng, nangma in a tawntung in Pathian hi ci in
hong kithang sak tu a, a khang a khangin nang hong ciamtee tu hi.
14TOPA in ama mihingte hung tu a;
a naseamte tungah hesuakna pia tu hi.
15Minam dangte pathiante in
mihingte ii khut taw a vawt, kham le ngunte ahi hi. *
16Amate in kam nei ahihang a pau thei bua hi,
taciangin mit nei ahihang a mu thei bua uh hi.
17Amate in bil nei ahihang khua a za thei bua uh hi;
amate sia hu zongh a sang thei bua uh hi.
18Tuate a vawtte le a muangte theampo sia
amate vawt sa milimte bang suak tahen!
19Israel mite awng, TOPA pok vun;
no Pathian thiampite awng, ama pok vun!
20TOPA pok vun, no Levi mite awng;
no ama a biate theampo awng, ama pok vun!
21TOPA sia Zion ah pok vun,
a inn ahi Jerusalem ah pok vun.
TOPA pok vun!

Psalm Late 136
Lungdam kona La
1TOPA tungah lungdam ko vun,
banghangziam cile ama pha hi;
ama itna a tawntung in kip hi. *
2Pathiante theampo sung pan a lianbel pa tungah lungdam ko vun,
ama hong itna a tawntung in kip hi.
3To theampo sung pan a thahat bel pa tungah lungdam ko vun,
ama itna a tawntung in kip hi.
4Ama bek in na lamdang lakna liante vawt hi;
ama itna a tawntung in kip hi.
5Ama ciimna taw vantungte vawt hi;
ama itna a tawntung in kip hi. *
6Ama in simlei sia tuithukna tungah sa hi;
ama itna a tawntungin kip hi. *
7Ama in ni le tha vawt hi;
ama itna a tawntungin kip hi. *
8Ni in sun hun a uk sak hi;
ama itna a tawntung in kip hi;
9tha le aksi in zan hun a uk sak hi;
ama itna a tawntung in kip hi.
10Ama in Egyptte ta upa belte that hi;
ama itna a tawntung in kip hi. *
11Ama in Israel mite Egypt ngam panin pusuapui hi;
ama itna a tawntung in kip hi; *
12a khut thakhona, a baan thahatna taw pusuapui hi;
ama itna a tawntung in kip hi.
13Ama in San Tuipi khen hi;
ama itna a tawntung in kip hi. *
14tua kantan in a mite lampui hi;
ama itna a tawntung in kip hi;
15ahihang Egypt kumpipa le a ngalkap honte tui ta sak hi;
ama itna a tawntung in kip hi.
16Ama in a mite senneal ngam kantan in lampui hi;
ama itna a tawntung in kip hi.
17Ama in a thahat kumpite that hi;
ama itna a tawntung in kip hi;
18Ama in kumpi minthangte thatlum hi;
ama itna a tawntung in kip hi.
19Amor kumpipa Sihon thatlum hi;
ama itna a tawntung in kip hi. *
20Bashan kumpipa Og thatlum hi, ama itna a tawntung in kip hi. *
21Amate ngam sia a mite piak sak hi;
ama itna a tawntung in kip hi.
22A naseam Israel tungah tua ngamte pia hi;
ama itna a tawntung in kip hi;
23Ngal ih lel ciangin ama in hong mangil ngawl hi;
ama itna a tawntung in kip hi.
24Ama in ih ngalte khut sungpan in hong suatak hi;
ama itna a tawntung in kip hi.
25Ama in nuntakna nei theampo an pia hi;
ama itna a tawntung in kip hi.
26Vantung a om Pathian tungah lungdam ko vun,
ama itna a tawntung in kip hi.


0 comments:

Post a Comment