Laithiangtho Jeremiah 33-34

1. TOPA in a ki iimcip thu lamdang le thu tumdangte ___ tu ci hi. 
a. kong son
b. kong mu sak
c. na phawk kik

2. A mite ii ___ hu in TOPA in khuapi nungngat  hi.
a. vaihawm khial
b. kidem
c. ngamtat phat ngawl

3. Leitung mite in, Jerusalem taw kisai thu azak ciang ___ tu hi. 
a. lamdangsa
b. lau in liing
c. a nuiza

4. ___ khuapi sia ‘TOPA, Eite Kingupna’ kici tu hi. 
a. Tyre
b. Sidom
c. Jerusalem

5. Levi ahi ngawl akua ii suanlepalte thiampi in pung tu ziam? 
a. David
b. Jeremiah
c. Nuainen thuakte

6. TOPA in David taw avawt thuciamna sia ___ hi. 
a. iimcip tu
b. ka mangil zo ci
c. len nginge

7 . Kua ii maan sung Nebuchadnezzar in Judah sim ziam?
a. Rehoboam
b. Zedekiah
c. Uzziah

8. Akua sia thin nuam tak in thi ziam? 
a. Jeremiah
b. Ngualhuu nuamte
c. Zedekiah 

9. Salte suataak zo napi sal in akaai kik kumpi sia? 
a. Zedekiah
b. Saul
c. Hezekiah

10. Hebrewte sia kum bangza dong sal suak thei ziam? 
a. Kumh sali
b. Kumh sawm
c. Kumh luk

11. Banghang khuiphel niii kilaklaw pai ziam?  
a. Doaibiakna
b. TOPA taw kiciamna 
c. Ngalzaw lim lakna

12. Jeremiah 34 ah Judah khuapite sia ___ suak sak tu ci hi. 
a. lopa hinna ngam
b. ngaltaaina mun
c. kongaw ngam




Jeremiah 33
Lametna Kamciam Dang
1Kumpi innhuang sungah thongtaak in ka om laitak in TOPA ii thupuak sia ka kung hong theng kik hi. 2Leitung a bitphua, a vawt le a omna munah a koi TOPA in keima hong paupui hi. A min TOPA a kici ama in, 3“Nong sam uhle kong zo tu hi; na heak ngei ngawl lai a ki iimcip thu lamdang le thu tumdangte kong son tu hi. 4Keima, TOPA, Israel ii Pathian in, Jerusalem innte le Judah ngam kumpi inn sia ngalte in kiim uum a, a sim hu in cimhtham tu hi ka ci hi. 5Mihing kimkhatte in Babylonte do tu uh hi, amate in ka thin uuk ka thangsiatna taw ka velvawk mithi luangte taw in innte dim sak tu uh hi. A mite ii ngamtat phat ngawl hu in hi khuapi ka nungngat zo hi. 6Ahihang hi khuapi le a mite a ci ka dam sak kik tu hi, ciidamna amate ka pia kik tu hi. Amate a kicing thin nopna le thin muanna ka lak tu hi. 7Judah mite le Israel mite ka nuamsa sak tu a, nidang a om ngei bangin ka pua kik tu hi. 8Keima tungah hong vawt khialnate panin ka thiansua tu a, amate ii khialnate le hong langpan nate ka mai sak tu hi. 9Jerusalem sia kei atu in lungdamna, pokna le kisuantaakna ii kipatna hi tu a; leitung ah minam om theampo in, Jerusalem atu a thupha ka vawtnate le hi khuapi atu a nopsakna hauna ka piakna thute a zaak uh ciang, lau in liing tu uh hi,” ci hi.

10TOPA in, “Mihingte in hi mun sia, mihing zongh nganhing zongh ii ten ngawlna kongaw ngam taw kibang hi ci uh hi. Amate cibang hi peu hi; Judah khuate le Jerusalem khua lampite awngthong a; tua munah mihing zongh nganhing zongh teang ngawl hi. Ahihang hi munte ah, 11lungdamna, nopsakna le mopoai lungdam a auna awte na za kik tu uh hi. Mihingte in ka Biakinn ah lungdam ko biakpiakna pia in la a sak na za tu uh hi; amate in, *

‘Vaanglianbelpa TOPA tungah lungdam ko vun,
banghangziam cile ama pha a,
ama hong itna kip tawntung hi,’ ci tu uh hi.
Hi ngambup sia ni dang bangma in ka nuamsa sak kik tu hi. Keima TOPA in ka ci zo hi,,” ci hi. 12Vaanglianbelpa TOPA in, “Mihing nganhing teang ngawl a kongaw ngam bang ahi, hi ngam sungah nganno thana tu mun om kik tu a, tua munah tuucingte in a tuu uh cing tu uh hi. 13Mual tungah khuapite, mualnuai, Judah ngam thangsang, Benjamin ngam sung, Jerusalem kiim a khuate le Judah ngam sung khuapite ah, tuucingte in a tuute uh khatvei a phak za sim kik tu uh hi. Keima, TOPA in ka ci zo hi,” ci hi.

14TOPA in, “Israel le Judah mite tungah kamciam ka vawt sia, ka tangtun sak tu hun hong theng tu hi. * 15Tua hun ciang David ii suan le paal sung pan thumaan thutang khat kumpi in ka teal tu hi. Tua kumpipa in ngam sung theampo ah thudik le thutang in naseam tu hi. 16Judah mite le Jerusalem mite sia kisuatak tu a, thin muangin teang tu uh hi. Tua khuapi sia ‘TOPA, Eite Kingupna’ kici tu hi. 17Keima, TOPA in, Israel kumpi tu in David suan le paal ahi tawntung tu le, * 18Levi minam sung pan meihal biakpiaknate, antang taw biakpiakna le biakpiakna dadangte piakna ah ka na a seam tu in, thiampite om tawntung tu hi ci sia kong kamciam hi,” ci hi. *

19TOPA in keima tungah, 20“Amate ii hun tek valian ah hong pai tawntung thei natu in sun hun taw thuciamna zan hun taw thuciamna ka vawt zo hi; tua ahi ciang tua thuciamna kiphel tan thei nawn ngawl hi. 21Tasia bangma in ka naseam David taw, a suan a paal sung panin kumpi tu khat a nei tawntung natu in thuciamna khat ka vawt zo hi; Levi minamte sung pan a thiampite taw zonghin, ka na hong sep sak tawntung natu in kiciamna khat ka vawt zo hi; tua thuciamnate kiphel tan thei nawn ngawl hi. 22Van ah aksite le tuipi vaal ah sennealte a kisim zawk ngawl bangma in amate sim zawk ngawl ahi natu in Keima in ka naseampa David ii suan le paalte le Levi minam sung panin thiampite ka pung sak tu hi,” hong ci hi.

23TOPA in keima tungah, 24“Ka teal sa innkuan nii, Israel le Judah keima in nusia zo hi ci a mihingte ii a son uh sia na phawk ziam? Tua ahikom amate in ka mite zawngsak in minam khat in ngaisun nawn ngawl uh hi. 25Ahihang Keima, TOPA in, sun le zan taw thuciamna khat ka vawt zo a, leitung le vantung a uk thukhamte ka vawt zo hi. 26Hi nate ka vawt takpi bangma in, Jacob ii suan le paalte le ka naseam David taw ka vawt thuciamna sia ka len nginge tu hi. Abraham, Isaac le Jacob ii suan le paalte a uk tu in David ii suan le paalte khat ka teal tu hi. Ka mihingte ka hesuak tu a, amate ka nuamsa sak kik tu hi,” hong ci hi.

Jeremiah 34
Zedekiah atu Thupuak
1Babylonia Kumpipa Nebuchadnezzar le a ngalkapte le a khutnuai ah a om minam theampote ii ngalkapte in hu a Jerusalem le a naina a om khuapite a sim uh lai in TOPA in keima hong paupui hi. * 2TOPA Israel ii Pathian in Judah Kumpipa Zedekiah kungah pai in hi bangin son tan, “Keima, TOPA in hi khuapi sia Babylonia kumpipa khut sungah ka aap tu a, ama in haltham tu hi. 3Na suakta batu hi; hong kiman tu a, ama tungah hong ki aap tu hi. Nangma in ama taw maitang kisi in na kipaupui tu uh hi, taciang Babylonia khua ah na pai tu hi. 4Zedekiah awng, nangma taw kisai thu kong son sia ngai in. Nang sia ngal sungah hong kithatlum ngawl tu hi. Thin nuam takin na thi tu hi. 5Nangma mai ah kumpite ahi, na pu na pate a kiphum uhciang mihingte ii ngim namtui a hal bangma amate in nang atu in ngim namtui hal tu uh hi. Amate in, ‘Ih kumpipa thi zo thong ee!’ ci in nang hong kaa tu uh hi,. Keima, TOPA in ka ci zo hi” ci in keima hong sawl hi.

6Taciang hi thu sia Jerusalem khua ah om Zedekiah Kumpipa kungah ka puak hi. 7Tua laitak hun sia Babylon kumpipa ii ngalkapte in tua khuapi a sim laitak ahi hi. Ngalkapte in Judah ngam sungah a taanglai kulh taw ki uum khuapi dang ahi Lachish le Azekiah zongh sim uh hi.



Salte Theamna
8-9Zedekiah Kumpipa le Jerusalem mite in, pa ahizong numei ahizong Hebrew a mipui salte tha in, kuama in Israel a mipuite salin a nei nawn ngawl natu in thukimna khat vawt uh hi. 10Mipite le a lampui uliante in a salte a suatak tu uh le sal a, a kai kik nawn ngawl natu thukim uh hi. Amate in a salte suatak uh hi. 11Ahihang nungsang ciang amate in a thin uh kheal kikin, la kik uh a, sal ma in kai kik uh hi. 12Taciang TOPA 13Israelte Pathian in, mipite tungah thuson tu in keima hong sawl na pan in, “Keima in na pu na pate uh a saltanna Egypt ngam pan ka suatak lai in amate taw thuciamna khat ka vawt hi. 14Hebrew sal khat papo in kum luk sung na na uh hong sep sak zawkciang a kum salina sungah ama na suatak tu uh hi ci in amate tungah ka son hi. Ahihang na pu na pate in ka thu hong nadon bua uh a ka sawl bang hong mang bua uh hi. * 15Tunung hiat ma in na thin uh na kheal uh a, nong lungkim sak uh hi. Na vekpi ma in Israel na mipuite sia suatak sak tu na thukim uh a, keima hong kibiakna Biakinn sung keima mai ah thuciamna khat na vawt uh hi. 16Ahihang na thin uh na kheal leleau uh a, ka min nong dai sak uh hi. Amate ii uukna bang a na suaktak sak sa uh salte note theampo in na la kik uh a, salin na kai kik uh hi. 17Tua ahikom Keima, TOPA in ka thu nong ni bua uh hi kong ci hi; Na Israel mipuite suatakna na pia bua uh hi. Tua ahile pha mama hi, suatakna kong pia tu hi. Tua suatakna sia ngal, natna le kialpi taw thina hi tu hi. No tungah kong vawtna taw leitung mite theampo ka lau sak tu hi. 18-19Judahte le Jerusalem uliante, kumpi inn sungah uliante taw, thiampite, le lampuite theampo in, amate ii tum nii a sua khuital khat ii phel niite kilaklaw ah lampaina taw in keima taw thuciamna khat vawt uh hi. Ahihang amate in tua thuciamna palsat in thuciamna sung thu omte mang ngawl uh hi. Tua ahikom amate ii khuital tung a vawt bangin tua mihingte tungah ka vawt tu hi. 20Amate sia amate a thatlum nuam a ngalte ii khut sungah ka aap tu a, a luangte sia vacimte le ngamsate in ne tu uh hi. 21Judah ngam Zedekiah Kumpipa le a uliante zongh amate a thatlum nuamte ii khut sungah ka aap tu hi. Amate sia noma hong simna pan a tawlnga Babylon ngalkapte khut sungah ka aap tu hi. 22Keima in thu ka pia tu a, hi khuapi ah amate hong heak kik tu uh hi. Amate in tua khuapi sim in, la in, mei taw haltham tu hi. Keima in Judah ngam khuapite sia kuama ii ten ngawlna kongaw ngam khat bang ka suak sak tu hi. Keima, TOPA in ka ci zo hi,” hong ci hi.

0 comments:

Post a Comment