Laithiangtho (Kumhpite Khatna 7-8)

1. Solomon in akumpi inn, kumh bangza sung sa ziam? 
a. 3
b. 7
c. 13

2. Solomon thukuenna munh sia ___ zongh kici hi. 
a. Thukhen kongpi
b. Thiangtho munh
c. Kumpi tokhum khaan

3. Solomon ii sap Taungo taw nasep thiampa ii min? 
a. Huram
b. Husham
c. Hustan

4. Solomon ii taungo tuikuang sung tui gallon bangza ta ziam? 
a. 1,000
b. 10, 000
c. 12,000

5. Solomon maan lai thikseakna munh? 
a. Hebron
b. Benjamin ngam
c. Jordan kuam

6. Thiangtho bel munh ah khamh meivak khuam bangza om ziam? 
a. thum
b. sali
c. sawm

7. Bang tha in Thukham Thingkuang sia biakinnpi ah kikoi ziam? 
a. Tha Sali tha
b. Tha kua tha
c. Tha nga tha

8. Thingkuang bang ahi zawk biakinn sungah khuataang ziam? 
a. A puak laitak
b. Koi zawk
c. A puak sawm laitak

9. Solomon in bang maingat tu thupi sak ziam? 
a. Pathian
b. Jerusalem
c. Biakinnpi

10. TOPA in akua tungah Israelte sia ama ii mi ci ziam? 
a. Abraham
b. Solomon
c. Moses

11. Biakinn aapna avawt lai khui bangza taw sangaw bikana vawt ziam? 
a. 22,000
b. 12,000
c. 100,000

12. Biakinnpi aap lai nibangza poai khaam ziam? 
a. Ni thum
b. Ni Sali
c. Nipi nii

Kumpite Khatna 7
Solomon ii Kumpi Inn
1Solomon in a ten natu Kumpi inn sa sii hi, a man natu in kum sawm le kum thum hai hi. 2-3Lebanon Thingtang Khaan sia pi 150 sau a, pi 75 zai in, pi 45 saang hi. Cedar khuam sawm le nga veu ngual thum om hi, tuate tungah zawlliang kithung hi. Innciingdap sia cedar hi a, vanh senna khaante tung liap hi, tuate zongh khuam in nang hi. 4A pangte ngeal ah khelki ngual thum om hi. 5Tua a kongkha te le a khelkite sia kingh li nei veu hi a, taciang pang tunga khelki ngual thum teng sia ngual khat le ngual khat kimaingat hi.

6Khuampi te ii Khaan a kici sia pi 75 sau a, pi 45 zai hi. A tung panin kisiin a, khuam in nang hi.

7Kumpi tokhum khaan sia thukhenna khaan zongh kici a, Solomon in thu a khenna mun ahi hi, tua zongh suat panin tuukpite dong cedar thingpheakte taw kituam hi.

8Solomon ii tenna inn sia Thukhenna Khaan ii inn nung sangah inn dangte sak bangma in kisa hi. A zi Egypt Kumpipa ii tanu atu zongh tua taw kibangin inn sak sak hi. *

9Hi innte theampo, a leitual pi kihel in, phungkawng pan kipan bitha dong suang taw kivawt hi. A suangte sia a suangkhuk ah a pha tu a kidei cia kivawt a, a sung le a pua panghte sia thingatnaam taw kingiamh hi. 10A phungkawng tu sia suangtum liante suangkhuk ah kivawt a, pawlkhat sia pi sawm le pi nii hi a, pawl khat sia pi sawm le pi nga sau hi. 11Tuate ii tungah a pha cia tu a kidei za ki at sa suang pawl khat le cedar thingpim te taw kisa hi. 12Kumpi inn leitual, Biakinnpi leitual sungnung Biakinnpi tumna khaan sia ii pangte sia suang ngual thum simin cedar thingpim ngual khat veu kicial in kisa hi.

Huram ii Nasep
13Solomon in, taungo taw nasep a thiam Tyre khua ah a teang, khutthiamna a nei Huram a kici pasal khat sam hi. 14A nungta nawn ngawl a pa sia Tyre pan hi a, ama zongh taungo taw nasep a thiam khat ahi hi; a nu sia Naphtali pan ahi hi. Huram sia a ciim, khutthiam nasep a seam ngei sa ahi hi. Ama in taungo taw na seam tu in Solomon Kumpipa ii samna saang hi.

Taungo Khuam Ngual Niite
(2Khang tangthu 3:15-17)
15Huram in taungo khuam nii sung hi, khat simin pi 27 sau a, a kiimkot sia pi 18 khawng pha hi, tuate sia biakinnpi inn tumna mun ah koi hi. 16Ama in khuampite ii tung khu natu in taungo pi 7 le lang a sau zongh vawt sii hi.. 17Khuamte ii a dawn sia thikkhau kipheakte ii lim le 18taungo taw a kivawt talee nga ngual nii zongh sung hi.

19A tung a sitna sia unok kung bangin kivawt a, pi 6 sau a, 20tuate sia a pumin a kivawt a sitna thikkhau hual ii tungsia ah kikoi hi. Talee nga pum zanii ii lim sia ngual nii in a sitna kiim ah kivawt hi.

21Huram in hi taungo khuamte nii sia Biakinn tumna mai ah koi hi; thangsang a sia Jachin ci a, saksang a sia Boaz kici hi. Unok bangin a kivawt taungo sitna te sia khuamte ii dawn ah koi hi. 22Unok paak taw kibang taungo khuamlu zepnate sia tua khuam tungah kinga hi.

Tabangin taungo khuamte tungah nasepna kiman hi.

Taungo Tuikuang
(2Khang tangthu 4:2-5)
23Huram in tuikholna sia a beam in vawt hi, pi 7 le lang thuk a, a kuang mai sia pi 15 ahi hi, a kiimkot sia pi 45 ahi hi. 24Tuikholna ii a ngong kiil kiim ah tau uum nga lim ngual nii in a tui kholna taw cipin taungo taw kisung hi. 25Tuikholna sia pua sang a ngaa khuital lim sawm le nii te ii nungzaang ah to sak hi, thum sim in mun khat sang tek ngaa hi. 26Tuikholna ii saanna sia letmat 3 saa hi. A ngong sia hai ii ngong taw kibang a, a pua sangah paal in, unok paak bangin vawt hi. Tuikholna in gallon 10,000 bang taa hi.

Taungo leangte
27Huram in taungo taw leang sawm vawt hi; khat simin pi 6 sau in, pi 6 zai a, pi 4 le a lang saang hi. 28Tuate sia taungo pheak kingh li nei taw kivawt a, a kiim pan a mung taw ki uum in, 29tawpi lim, khuital lim le cherubim lim taw tua taupheakte kizeam hi; a uumna mungte a tungnung sia le a nuai nung sia ah tawpi le khuital lim om a, a kimeak limte kivawt hi. 30Leang khat ii sim in tau mui li veu kithua in, tau zawl tungah kibul hi. A leang ii kingh li simin kuangpui nanna tau taw a kivawt khuamno om a, tuate sia a kimeak limte taw kizeam hi. 31Kuangpui ngak natu a tungah a beam valh pui khat om hi. Ama in leang tungah letmat 18 dok to a, leang sungah letmat 7 tum suk hi. Ama ii kiim ah thing ngelh kivawt hi. 32A leangmuite sia letmat 25 saang hi, amate sia taungo pheakte ii nuai sia ah om a, a leang zawl te a leang inn taw sa khat in kivawt hi. 33Leangmuite sia ngalleang te ii mui taw kibang hi; a mui zawl, a mui kiil le a muipei letna khuamno te le a mui zawl tumna bu sia taungo vive ahi hi. 34Leang khat ii sim ii a kingh a nuai ah nanna te zongh leang taw sa khat ma ahi hi. 35Letmat 9 a beak taungo kual khat leang tungah om hi; tua ii nanna le taungo daalpheakte sia leang taw sa khat ahi hi. 36A nanna le taungo daalpheakte sia cherubim, tawpite le palm thingkung te ii lim taw kizeamin, lim a kimeakte taw a awngna theampo ah kizeam hi. 37Tua hi a hi bangin leangte kivawt hi; amate khat le khat kibang hi, a phak cia le a pianzia kibang kim hi.

38Huram in leang khat atu khat veu kuangpui sawm vawt hi. Kuangpuite khat sim ii a kuangmai pi 6 veu zai hi, taciang kuang simin gallon 200 taa hi. * 39Ama in leang nga sia Biakinnpi ii thang sangah koi a, a om lai nga teng sia sak sangah koi hi; tuikholna sia nisuana thang sang kingh ah koi hi.

Biakinnpi Zepna Vanhte ii Sazian
(2Khang tangthu 4:11; 5:1)
40-45Huram in beal, leiluana kawpheakte, kuangte zongh vawt hi. Ama in Solomon Kumpipa atu in TOPA ii Biakinnpi atu a nasep man hi. Hi sia ama ii vawt teng ahi hi;

Khuam niite
Khuamdawn ah kuangno taw a kibang khuam lu sitna nii,
Khumte ii lu ah a kipheak thikkhau lim
Khuam lu zepna kiimkot ah 100 veu ngual nii in a kisuai, talee nga lim 400
Leang sawmte,
Kuangpui sawmte
Tuikholna
Tuikholna a pua khuital sawm le nii te ii lim
Bealte, kawpiate le kuangte
Biakinn vanh zak tu Huram in Solomon Kumpipa atu a vawtte sia a kinawt taungo taw kivawt hi. 46Kumpipa in tuate theampo sia Jordan Kuam Sukkoth le Zarethan kilaklaw ah thikseakna munah vawt sak hi. 47Solomon in hi taungo vanh te khai a tee bua hi, banghangziam ci le amate sia tam lei ahikom a ngitna kituat ngei ngawl hi.

48Solomon in Biakinnpi atu kham vanhte vawt sak hi: biaktau, Pathian piak tu anluum sabuai, * 49A Thiangtho Bel Mun ii mai a meivak khuam sawmte, nga sia sak sangah, nga sia thang sangah; paakte, mei-innte le taidepte; * 50haite, mei-inn mii na, kuangte, meikam kenna beal; A Thiangtho Bel Mun le Biakinnpi kongkhate ii pattaate. Hi nate theampo sia kham taw kivawt hi.

51Kumpipa Solomon in Biakinnpi tungtaang ah nasep tu teng a man ciangin a pa David ii TOPA tungah a aap sa teng sia, ngun kham le a dang nate sia vanh senna khaan sungah koi hi.

Kumpite Khatna 8
Thukham Thingkuang sia Biakinn ah Kipaipui
(2Khang tangthu 5:2- 6:2)
1Tua zawkciang Kumpipa Solomon in Israel ngam sung nam le, be le phungte ii lampuite sia David ii khuapi Zion panin Jerusalem Biakinnpi ah Thukham Thingkuang sia tua tu in ama kungah sam hi. * 2Amate in Ethanim tha, tha sali tha Buk Poai hunin hong kikhawmtua uh hi. * 3A lampuite theampo hong kikaikhop zawkciang, thiampite in Thukham Thingkuang hong laamto uh a, 4taciang Biakinnpi ah hong pua uh hi. Levi te le thiampite in TOPA ii ompuina Puanbuk le tua taw kisai vanhte zongh Biakinnpi ah paipui uh hi. 5Kumpipa Solomon le Israel mite theampo Thukham Thingkuang ii mai ah hong kikhawmtua uh a, khui le tuu tam mama sangaw biakpiakna in ngo uh hi— tam lei ahikom kisim zo ngawl hi. 6Tua zawkciang thiampite in Thukham Thingkuang sia Biakinnpi sungah hong tum pui uh a, cherubim te ii nuai A Thiangtho Bel Mun ah koi uh hi. 7A tha uh a kizaakte in thingkuang le a puakna molte siin uh hi. 8A Thiangtho Bel Mun ii mai san tak ah a dingte bek in tua molte ii mongte mu thei a, tua ngawl po in koima pan kimu thei ngawl hi. (Molpumte sia tu ni in tua munah om lai hi.) 9Thukham Thingkuang sungah, Egypt ngam panin Israel mihingte hong pusua lai in Sinai mual tungah TOPA in amate taw kiciamna a vawt lai in suangpheak nii Moses ii koite ngawl, na dang bangma om ngawl hi. *

10Thiampite Biakinnpi hong nusiat tu ciang thakhat thu in tua Biakinnpi sia meeikaai taw kidim in, 11TOPA ii ompuina hu in khuataang ziazua taw hong kidim a, amate in a tavuante uh seam tu in pai kik thei nawn ngawl hi. * 12Tua zawkciang Solomon in thungen hi:

“Nang, TOPA in van ah ni na koi hi,
hi napi meeikaai sung le khuazing sungah om tu na teal hi. *
13Tu in a tuanngen biakinn khat kong sak sak zo hi,
a tawntungin na ten natu mun ahi hi.”
Solomon ii Mihonpi tungah A Pauna
(2Khang tangthu 6:3-11)
14Mipite tua munah a din uh ciangin Kumpipa Solomon in amate maingat tu in kihei a, taciang ama in mipite atu in Pathian ii thupha nget sak hi. 15Ama in, “Israelte ii TOPA Pathian pok vun! Ama in ka pa David tungah a kamciam kholet a, 16‘Egypt ngam panin ka mite ka paipui hun pan kipan, Israel ngam bup sungah kei hong kibiak natu biakinnpi sak natu khuapi dang ka teal bua hi. Ahihang, ka mihingte uk tu in David nang kong teal hi,’ ” ci hi. *

17Taciang Solomon in a kampau zom a, “Ka pa David in Israelte ii TOPA Pathian a biak natu biakinnpi khat sak tu ngeal hi, * 18ahihang TOPA in ama munah, ‘Kei atu biakinnpi na sak nop sia maan ni hi, 19ahihang nang in na sa ngei batu hi. Na tapa, nangma ii tapa in ka biakinn hong sak sak tu hi,’ *

20“Tu in TOPA in a kamciam kholet hi. Israel kumpi tu in ka pa za ka laih hi, taciang Israelte ii TOPA Pathian atu in Biakinnpi ka sak sak hi. 21Egypt ngam panin ih pute a pusua pui lai in TOPA in ih pute taw kiciamna thukham suangpheak nii a om Thukham Thingkuang sia koi natu mun zongh ka vawt sak hi,” ci hi.

Solomon ii Thungetna
(2Khang tangthu 6:12-42)
22Taciang mipite ii omna biaktau mai ah Solomon dingin, a khut laamin, 23thu ngen hi, “Israel ii TOPA Pathian awng, tungsang vantung ah ahizong, nuaisang lei tungah ahizong nang taw a kibang kuama om ngawl hi! Na mite taw na kiciamna na kholet a, taciang amate in thin theampo taw na thu hong nit ciangin na itna amate tungah na lak hi. 24Ka pa David tungah na kamciamte zongh na kholet hi; tu ni in na kammalte theampo tangtung zo hi. 25Taciang tu in Israel ii TOPA Pathian awng, ka pa tungah kamciam na vawt dang khat sia, ama ii na thu hong nit bangin amate in kidopna taw hong ni po le, na suan na paalte sung pan khat in Israelte ii kumpi in maang tawntung tu hi, na ci sia zongh nong tangtun sak natu thu kong ngen hi. * 26Tua ahikom tu in Israel ii Pathian awng, na naseam pa ka pa David tungah kamciam na piakte theampo zongh tangtung sak in.

27“Ahihang, Aw Pathian awng, nang leitung ah teang thei takpi tu ni ziam? Vantung theampo zongh nang hong huam tu in lian tham ngawl hi, tua ahikom hi Biakinnpi kei sak sia lian khom thong tu ziam? * 28TOPA ka Pathian awng, kei sia na naseam pa khi hi. Ka thungetna hong za tan a, tu ni a kong ngetnate hong pia tan. 29Hi Biakinnpi sia nang hong kibiak natu in na teal sa hi mun sia a sun a zan in na cing in. Hi Biakinnpi sang nga in thu kong nget ciangin hong za tan. * 30Kei ii thungetna le na mite ii thungetna te hi mun maingat in hong nget ciang hong za tan. Vantung na inn sung panin hong za tan a, hong mai sak tan.

31“Mihing khat sia midang khat tungah khial hi ci in a kimawsiat ciangin, a khial ngawlna a kilangh natu in kiciamna nei tu in hi sung Biakinnpi biaktau ah a kipaipui ciang, 32Aw TOPA, vantung panin na ngai in a, na naseamte tungah thu hong khen tan. A maw sia tungah a kiphu bangin thukhenna na vawt in a, daan na pia in, a maw ngawlte na tha in.

33“Na mihing Israelte sia nangma tungah hong khial hu in a ngalte in zo a, taciang amate in nang sang hong heak in, kiniamkhiakin maw mai sakna hong ngen le, 34vantung panin na ngai in. Na mite ii khialnate mai sak in a, taciang a pute tungah na piak sa leitangh ah na ciapui kik in.

35Na mite in a khial uh hu in nguatuite na khaam le, taciang amate kisiik in hi Biakinnpi sung nga in kiniamkhiakin thu hong ngen le, 36vantung panin na ngai in. Kumpipate le Israel mite ii mawna na mai sak in a, a maan a ngamtat natu amate na hil in. Taciang Aw TOPA, na mite ii a tawntung a neisa tu in na piak hi na leitangh tungah nguatui na puak suk in.

37“Ngam sungah kialpi tungin, ahibale pulpi tungin, ahibale ankungte vuisa in hallum in, ahibale khaumaw hon in a lal sak ciang, tua ahibale na mite a ngalte in a sim ciangin, tua ahibalaile amate sungah natna satna a om ciang, 38amate ii thungetna na ngai in. Israel na mite khat papo in thin tak taw heena lakin, hi Biakinnpi sangah a khut uh zan in thu hong ngen le, 39ama te ii thungetna na za in. Vantung na inn sung panin amate na ngai in a, na mai sak in, na hu in. Nangma bekma in mihingte ii thinsung khuangaisutna te he ni hi. Misim in ama taw a kiphu bangin a tungah na seam in, 40tasia ciangin a pute tungah na piak sa leitangh tungah amate in teangin na thu hong ni tu hi.

41-42“A khuala a om ngam dang mi khat in na minthanna za in, na mite atu na lianpi na sepna za in, hi Biakinn ah hong pai in thu hong ngen ahile, 43a thu ngetna na ngai in. Vantung na tenna pan na za in a, vawt sak tu in hong nget teng na vawt sak in, tua hile leitung mite theampo te in Israel na mite ii hong heak bangin hong he tu uh a, na thu hong ni tu uh hi. Tasia ciang amate in hi Biakinnpi nang atu ka sak sia nang biak natu hi ta a, ci in he tu uh hi.

44“A ngalte uh taw kido tu in kuankhia in na sawl ciang na mite in nang tungah thu hong ngen a, koi sung po ah a om zong na teal sa hi khuapi le hi Biakinnpi nang atu ka sak sia sang hong nga in nang tungah thu hong ngen a ahile, 45amate ii thungetna na ngai in vantung panin na za in a, zawna na pia in.

46“Na mite in khialna vawtin hong langpan ciang— khialna nei ngawl khat zongh om ngawl ahi ciang— na thin uukin, a ngalte in zo sak in ngamdang ah thongtaak tu in a paipui ciang bangza po in tua ngam sia a khuala ta zong, 47na mite ii thungetna ngai in. Tua ngam pan amate kisik kikin na tungah a phat ngawlna le a mawna pualaak in thu hong ngen le, amate thungetna na ngai in, Aw ka TOPA awng. 48Tua ngam ah amate in thin tak le a maan takin kisiik in, ka pute tungah na piak sa ahi, hi leitangh, na teal sa hi khuapi hi Biakinnpi nang atu ka sak sia maingat in thu hong ngen le, 49tasia ciang amate ii thungetna na ngai in. Vantung na inn sung panin amate thungetna na ngai in a, taciang amate tungah hesuakna na nei in. 50Amate ii mawna le tualngal a hong dinnate na mai sak in a, taciang a ngalte in amate sia hesuakna na nei sak in. 51Amate sia na mihingte hi a, meiphual lingh mama taw a kibang Egypt ngam pan na pusuak sak sa te hi.

52“Vaanglianpipa TOPA, na mihing Israelte le a kumpite tungah maipha na pia tawntung in, taciang amate ii thungetna na za in a, amate in hu ngen in hong sap ciangin a thungetna uh na za in. 53Ka pute uh Egypt pan na laakkhiat lai in Moses tungah na son sa bangma in mihing namte sung pan amate sia nangma mi tu in na teal sa ahi hi,” ci hi.

A khak bel Thungetna
54Thungetna teng TOPA tungah a vawt zawkciang khut laamin khupdin a, a om na biaktau panin Solomon hong dingto hi. 55Ama in tua munah a kikhawm mite theampo tungah Pathian ii thupha a piak natu awnging tak taw ngen hi. Ama in, 56“TOPA pok vun ama in a mite munah ngal kilemna kong pia tu hi ci in a ci bangin ngal kilemna hong pia hi. A naseam pa Moses tungtawn in kamciam ngo takin a piakte kho takin len hi. * 57TOPA ih Pathian sia ih pute taw a omkhop bangin ei taw zong hong omkhawm tahen; hong nusia ngei heak hen a, hong taisan heak hen; 58ama dei bangin ih nungtak thei natu le ih pute tungah a piak thukham le thupiakna te ih kepcing thei natu in, ama in ei ama ii thu a ni tu in hong vawt tahen. 59TOPA ih Pathian in ama tungah ngetna le thuumna ka vawtte a tawntungin hong teptee sak tahen. Israel mite le a kumpipate tungah nisimin a kitaangsap uh bangin ama in hong hesuak tawntung tahen. 60Taciang leitung minamte theampo in TOPA ama bek Pathian hi ci in he tu a— a dang Pathian om ngawl hi ci in he tu uh hi. 61No, ama ii mite in TOPA ih Pathian tungah thumaan tawntung vun a, a thukham le a thupiakte tu ni a na nit uh bangin ni tawntung tavun.”

Biakinn Aapna
(2Khang tangthu 7:4-10)
62Tua zawkciang Kumpipa Solomon le mipite in TOPA tungah sangaw biakpiakna vawt uh hi. 63Ama in khui 22,000 le tuu 120,000 sia kipawlkhop biakpiakna in pia hi. Tabangin kumpipa le a mite in Biakinnpi aapna vawt uh hi. 64Tua ni ma in ama in Biakinnpi mai leitual zanglai sia, thiansuana vawt hi, tua munah ama in sangaw biakpiakna haltumna te vawtin, antang biakpiakna le nganno thau te taw kipawlkhop biakpiakna vawt hi. Ama in hi bangin a vawt sia banghangziam cile taungo biaktau sia hi za ta biakpiakna atu in no leih hi.

65Tua mun Biakinnpi ah Solomon le mipite theampo in Buk Poai sia ni sali sung khaam uh hi. Tua munah Hamath Mualciangh tek pan le thangsang Egypt ngamngi pan hong pai a tam mama mihonpi khat kikhawmtua uh hi. 66A ni liat ni ciang Solomon in mipite cia sak hi. Amate in ama pokin a lung uh dam hi, banghangziam cile TOPA in a naseam pa David le a mi Israelte thuphate a piak hu ahi hi.

0 comments:

Post a Comment