Laithiangtho (Kumpite Khatna 5-6)

1 David lawm pa sia koisia ziam? 
a. Edom kumpipa
b. Tyre Kumpipa
c. Assyria kumpipa

2. Biakinnpi atu cederte koisung pan ziam? 
a. Jordan ngun pan
b. Lebanon
c. Sinai mual

3. Kuate thingphuk dan thiam ziam? 
a. Israel-te
b. Moab-te
c. Tyre -te

4. Biakinnpi atu Taakthingte akua ii sik ziam? 
a. Tyre -te
b. Solomon
c. Nigeriate

5. Biakinnpi sak natu thingphukte akua in vak ziam? 
a. Tyre kumpipa
b. Solomon
c. Nigeriate

6. Biakinnpi phungkawng suangtumte koisung pan ziam? 
a. Babylon
b. Syria
c. Byblos khuapi

Kumpite Khatna 5-6
7. Israelte ii Egypt a nusiat kum bangza zawk biakinn sak kipan ziam? 
a. 480 
b. 500
c. 700

8. Biakinn sia sauna, zaina le a saanna? 
a. 120, 90, 70
b. 90,30,45
c. 70, 70, 70

9. Athiangtho bel mun sia pi bangza sau ziam? 
a. 70
b. 45
c. 30

10. Biakinnpi sak tatak ciang ___ hi. 
a. Lawp peuma uh 
b. Thawmnging om ngawl
c. Ngam khangto 

11. Cherubim nii sia pi bangza sang ziam? 
a. Pi 7
b. Pi 15
c. Pi 18

12. Biakinn sak kum bangza hai ziam? 
a. 12
b. 3
c. 7







Kumpite Khatna 5
Biakinn Sa tu in Solomon Kithoai
(2Khang tangthu 2:1-18)
1Tyre te ii Kumpipa Hiram sia David ii ngualtam khat hi tawntung a, taciang Solomon in a pa David ii za laih hi ci in a zaak ciang tongciinte ama kungah pai sak hi. 2Solomon in Hiram tungah hi kamte thaak kik hi: 3“Na heak bangma ka pa David in a kiim a paam a ngalte taw kisim tawntung ahi hu in TOPA in a ngalte theampo tungah zawna a piak mateng ama in TOPA a Pathian a biak natu Biakinn a sa thei bua hi. 4Ahihang tu in TOPA ka Pathian in ka ngamngi dung theampo ah kilemna hong pia a, ngal nei nawn ngawl khi hi, taciang hong kisim tu zongh lau om ngawl hi. 5TOPA in ka pa David munah, ‘Nang zawkciang kumpi ka sua sak tu na tapa in kei atu Biakinnpi hong sak sak tu hi,’ ci in kamciam pia hi. Taciang tu in TOPA ka Pathian a kibiak natu biakinnpi sak tu ka khensat zo hi. * 6Tua ahikom Lebanon ah cedar kungte phuk tu in na mite na pai sak in. Keima ii mite zongh amate taw diangkhawm tu a, taciang nangma ii khensat babang thaman pia tu khi hi. Na heak bangma, ka mihingte sia thingphu dan na mite thiam bangin thiam ngawl hi,” ci hi.

7Solomon ii kam thaakte a saan ciang Hiram sia lungkim mama a, hi bangin ci hi. “Ngamlian tasia uk tu David a laih tu tapa ciim khat a piak hu in TOPA tu ni in pok vun!” ci hi. 8Tua zawkciang Hiram in Solomon munah hi teng kam thaak hi. “Na kam hong thaak nga khi hi, taciang nong nget bangin seam tu kithoai zo khi hi. cedar thing le taakthing teng hong sik tu khi hi. 9Ka mihingte in thingluangte Lebanon panin tuipi dong hong paipui tu a, tuate sawmkhawm in phong in ka vawt sak zawkciang nangma tealna tuipi vaal mun khat ah hong taisuk sak tu khi hi. Tua munah ka mite in phel in, taciang na mite in tavuan la tu hi. Nangma sang pan sia ka mite nguai an nong piak sak tu ka dei hi.”

10Tua ahikom Hiram in Solomon sia cedar luang le taak luang a dei za sik hi, 11taciang, Solomon in Hiram sia kumsim in zungtaang kuang 100,000 le olive thau thiang gallon 110,000 sik hi.

12TOPA in a kamciam lenin Solomon sia ciimna pia hi. Hiram le Solomon kilaklaw ah kilemna om hi, taciang amate ngeal sia khat le khat ki hu natu thukimna lai vawt hi.

13Kumpipa Solomon in Israel ngam bup panin thaman piak ngawl kuli 30,000 khon hi, 14taciang Adoniram sia tuate uk tu in koi hi. Ama in tua mite pawl khat ciang mihing 10,000 veu a om pawl thum in khen a, Lebanon ah thakhat veu diangin, a ngam uh ah tha nii veu diang sak hi.. * 15Solomon in mual tung suangkhuk ah a diang tu mihing 80,000 nei hi, tua suangte a pua tu mihing 70,000 hi a, 16ama in tuate ii nasep a vil tu in mihing 3300 koi hi. 17Solomon ii thupiakna taw Biakinnpi phungkawng atu suangtum lian a hoi to sak hi. 18Solomon le Hiram ii naseamte in Byblos khuapi pan suangtum le thingte Biakinnpi atu in pua pha hi.

Kumpite Khatna 6
Solomon in Biakinnpi Sa
1Israelte ii Egypt a nusiat zawk kum zali le kum sawmliat zawkciang, Solomon ii maan zawk kum lina, a tha niina Ziv tha sungah Solomon in Biakinnpi sa tu in kipan hi. 2A sungsang a sauna pi 90 pha a, pi 30 zai hi, taciang a saanna pi 45 ahi hi. 3A tumna khaan sia pi 15 thuk in, a zaina pi 30 hi a, biakinnpi zaina cia ma pha hi. 4Biakinnpi ii pangte sia a hawng veu om a, a pua sang toi zaw in a sung sang zaizaw hi. 5Biakinnpi ii pangh sang le a nung sangah inn pepna inndawl thum khat biakinn nealin sa a, dawl khat simin pi 7 le lang veu saang hi. 6A dawl nuainung bel a khaante sia pi 7 le lang veu zai a, a laizang dawl sia pi 9 zai in, taciang a tungnungbel dawl sia pi 10 le lang pha hi. Sualthal te sia pang sungah phum kul ngawl a, pang tungah ngak thei natu in biakinn pang sia dawl khat zawkciang dawl khat paa va-ial hi.

7Biakinnpi a sak tatak ciang sek, hei, le thik hiamte ii ngin a kizaak ngawl tu in, Biakinnpi sak natu suangtumte sia suangkhuk sungah zep sa in kikoi hi.

8Biakinnpi pepna inn ii a dawl nuai nungbel sia biak innpi ii thang sangah om a, tua mun panin a dawl niina le a thumna pai natu keallei kithung hi. 9Tabangin Solomon in Biakinnpi a sak man hi. Ama in innciingdap sia cedar thingpheakte le innsunte vawt hi. 10Dawl thum a pha inn pepna sia pi 7 le lang saang a, khaan simin Biakinnpi ii pang pua nung sia bealh in kisa a, a innpi taw cedar thingpimte taw kipee hi.

11TOPA in Solomon munah, 12“Ka thukhamte le ka thupiakna te na ni le na pa David tungah sep tu a ka kamciam teng hong seam tu khi hi. 13Tu a na sak hi Biakinnpi sung Israel ka mihingte sungah teang tu in kong om tu a, taciangin amate ka nusia ngei batu hi,” ci hi.

14Tabangin Solomon in Biakinnpi a sak man hi.

Biakinnpi Sungsang Zepna
(2Khang tangthu 3:8-14)
15Inn sung sang pangte sia suat pan kipan innciingdap te dong cedar thing pheakte taw kituam a, taciang a suatte sia taakthing kizangh hi. 16A sung sang inn khaan khat, “A thiangtho bel Mun” a kici sia Biakinnpi ii nung sangah kisa hi. Ama sia pi 30 sau a, cedar thingpheakte taw kidoi a, suat panin innciingdap dong kikhaktan hi. * 17A Thiangtho Bel Mun sia ii mai a innkhan sia pi 60 sau hi. 18Cedar thingpheak sia uum nga le paak limte khetkuak taw kizeam hi; a inn sungsangbup sia cedar thingpheak taw kituam a, tua hu in pangin a kiciang suangte kimu thei ngawl hi.

19Biakinnpi nung sangah innsungnung khaan khat kivawt a, tua mun sia TOPA ii Thukham Thingkuang a kikoi natu ahi hi. 20Hi inn sungsang khaan sia pi 30 sau a, pi 30 zai in, pi 30 saang a, a buppi in kham ciitak taw kituam hi. Biaktau sia cedar thing taw kituam hi. 21Biakinnpi ii sungsang sia kham taw kituam a, a doi sungnung sia a tumna khaamtan in kham kualpee khau kithung hi. 22Biakinnpi ii sungsang buppi kham taw kituam a, A Thiangtho Bel Mun aa biaktau sia zongh kham taw kituam hi. *

23Cherubim nii sia olive thing taw kivawt a, A Thiangtho Bel Mun ah kikoi a, amate ngeal pi 15 veve saang hi. 24-26Amate ngeal a letna le a lim a meal kibang hi. Khat ii sim in tha nii tek nei hi. Taciang a thate khat ciang pi 7 le lang sau hi, tua ahikom a tha dawn khat le khat kilaklaw pi 15 pha hi. 27Amate ngeal sia A Thiangtho Bel Mun ah a ki cial in kikoi a, a tha kiphalte dawn veve kipha in, a khaan zanglai santak ah kipha in, taciang a tha dangte nii in pang pha uh hi. 28Cherubimte a nii in kham taw kituam hi. *

29A innsungpi pangte le a sungnung khaante ii pangte sia a khetkuak cherubim te ii limte, palm thingkung limte le paak limte taw kizeam hi. 30A suatte a kilawm tiuteu in kham taw kidap hi.

31Olive thing taw a kivawt suakhak a kipee nii te sia A Thiangtho Bel Mun tumna ah kikoi hi; a kongvang ii laisaan a tung sia a lang le a lang pan suang a awn in kiciang a, a dawn zum hi. 32Kongkhate sia cherubim te, palm thingkung limte le paak limte taw kizeam in, kham taw kituam hi. 33Khaanpi sung tumna kongkha sia siik li nei in olive thing taw kivawt hi. 34Suakhak a kithep thei nii sia taakthing taw kivawt a, 35cherubim te, palm thingte lim le paak limte taw kizeam hi, tuate sia a saanna kikim in kham taw kituam hi.

36Leitual sung nung sia Biakinnpi ii mai ah kivawt a, pang taw ki uum in, suang ngual thum simin cedar thingpim ngual khat veu kiciang hi.

37Biakinnpi ii phungkawng sia Ziv a kici tha niina, Solomon ii maan zawk a kum lina ah kiciang hi. 38Bul tha a kici a tha liatna, Solomon ii maan zawk a kum sawm le kum khat ciangin, a kingeal bangin kiman thiangtho hi. A kisak natu Solomon atu kum sali hai hi.

0 comments:

Post a Comment