Laithiangtho (Mark 7-8)

1. Matthew 7 sungah Jewte ngeina khat? 
a. Khutsilh tu
b. Sangaw Biakna
c. Sila taw kisai

2. Nungzuite tatzia taw kisai alungkim ngawl sia ___ hi.  
a. Zuducee
b. Thiampite
c. Phariseete

3. "hi mite in akam bek hi aa athinsung hi ngawl" aci kamsang sia? 
a. Jeremiah
b. Moses
c. Isaiah

4. A bang in hong niin sak ziam? 
a. Ngamtatna
b. Mittang
c. Ih sungpan pusuak sia

5. Jesu ii ui taw atengat nupinu ii tanu sia bangtat ziam? 
a. Phaknatna nei
b. Doaivei
c. Butthi thei

6. Bil sungah khutme thun aa, cilphii in pasal khat ii lei atham sak le ___ hi. 
a. khua hong mu
b. cidamna ngaa 
c. hong pau thei

7. Mi tulli in ni bangza sung Jesu taw om khawm ziam? 
a. Ni khat
b. Ni nii
c. Ni thum

8. Mi tulli ii neak tu anlum bangza om ziam? 
a. Nga
b. Luk
c. Sali

9. Akuate in nalamdang lakna ngen ziam? 
a. Mihongpi
b. Herod
c. Phariseete

10. Nungzuite in abang akicing in keng ngawl ziam? 
a. Puanvan
b. Olive thau
c. Anluum 

11. Bethsaida ii koisung ah mitawpa dam sak ziam? 
a. Khuasung
b. Synagauge
c. Khua puasang

12. ___ paina lampi ah Jesu in ama sia akua hongkici ziam ci'n dongh hi. 
a. Jerusalem
b. Bethsaida
c. Caesaria Philippi 





Mark 7
Pu le Pate ii Kihilna
(Matthew 15:1-9)
1Jerusalem pan hong pai Phariseete pawlkhat le Thukhaam hil syate pawlkhat sia, Jesu kiim ah kikhawm uh hi. 2Amate in nungzui pawlkhatte sia an a neak tu ciang ngeina bangin, khutthiang ngawl taw an ne mu uh hi— koibang ziam cile a mate in Phariseete hil bangin, a khut uh sil ngawl hi.

3(Phariseete le Jew te peuma in, amate ii khangluite hil, ngeina tatuamte sia nasia takin zui uh hi: a khut uh sia ahi tu bangin a sil bua uh le an ne ngawl uh hi; 4sumzuakna phual pan a kinga peuma, tui taw sil phot ngawlin ne ngawl hi. Hai, kuang le beal, taukuang le lupnate ahi tu bang a, silthiang natu ngeina dang tam mamate zui uh hi.)

5Tua ahikom Phariseete le Thukhaam hil syate in Jesu munah, “Banghangin na nungzuite in, khangluite hil ngeinate zui ngawlin, an a neak tu uh ciang a khut thiang ngawl taw anne ziam?” ci in dongh uh hi.

6Jesu in a zo kikna ah, “Isaiah in note thu a sonkholna sia bangza in maan ziam! A kihi sak minamte awng, ama in hi bangin at hi:

‘Pathian in, hi mite in
a kammal bek uh taw, kei zatakna hong pia uh hi,
ahihang a thinsung uh sia kei taw kikhuala uh hi. *
7Amate ii hong biakna sia kimanna om ngawl hi,
banghangziam cile amate in
mihingte vawttawm ngeinate sia
kei ii Thukhaam bangin hil uh hi!’ ci hi.
8“No in Pathian thupiakte vawkin mihingte ii hilnate na ni uh hi.”

9“Noma ii kihilna te na kholet thei natu in Pathian thukhaamte na nial zia uh na thiam uh hi. 10Bang ci nuam khi ziam cile Moses in ‘Na nu le na pa thasia vun,’ taciang, ‘A kuama po a nu a pa a haamsiat sia thina thuak tahen,’ ci hi. * 11Ahihang no hilna ah nu le pa hu thei natu na khat papo sia, ‘Hi sia Corban,’ hi, (Pathian atu a kipia sa hi) ci po le, 12nu le pa a hu ngawl hangin, phamaw ngawl hi, ci nu hi. 13Hi bang kihilnate khat tung pan khat na kipiak sawn uh ciang Pathian kammal a mel suak nu hi. Hi thu taw a kibang na ngamtatna dang uh zongh tam mama omlai hi,” ci hi.

Mihing khat A Nin sak Nate
(Matthew 15:10-20)
14Jesu in mihonpite khatvei ma sam kikin, na vekpi in hong ngai tavun a, tel vun. 15A pua sang pan hong tum nate bangma in, mihing khat sia zeksa taw kisai in nin sak ngawl hi. A sung pan hong pusuak tosia in mihing khat nin sak hi zaw hi, 16Bil a neite in za tavun” ci hi.

17Ama sia mihonpite nusia in, inn sungah a tum ciang, a nungzuite in, hi paunak hong hil tan ci uh hi. 18“No sia ngualdangte sangin cimzaw tuan ngawl nu hi. Tel ngawl nu ziam? A pua sang pan hong tum suk na khat papo in mihing khat sia nin sak ngawl hi, 19banghangziam cile a thin sungah tum ngawl in, a ngilpi um sungah a tum zawkciang a pua sangah pusuak hi,” Jesu in ci hi. (Hi bang a ci ciang Jesu in, an a minpiang sia neak tuak hi, ci ahi hi.)

20Taciang ama in a ci lai na pan, “A sung sang pan hong pusuakte in mihing khat nin sak hi. 21Banghangziam cile mihing khat ii a sung, a thinsung panin ngaisutna pha ngawl piang a, tuate in paktatna, kisutolna, kithalupna, 22nupa kipalngulna, duhopna, ngamtat siatna tatuam; kitheamna, maizum mawkna, ki-enna, kingen siatna, kiphatsakna, le mawmawtna— 23hi siatnate theampo sia mihing khat ii sung pan hong pai nate hi a, tabangte in amate nin sak ahi hi,” ci hi.

Nupi Khat ii Upna
(Matthew 15:21-28)
24Tua zawkciangin Jesu sia Tyre khuapi hui ngamkhen ah pai tu in ding hi. Inn khat sungah tum a, tua munah ama a om hunlam kuama heak tu oai ngawl ahihang a bucip zo bua hi. 25A tanu thaa ngilo vei nupi khat in, Jesu thu za ahikom thakhat in hong pai a, a peang ah bok hi. 26Nupinu sia Gentile mi hi a, Syria ngam Phoenicia ngam sung pan a piang ahi hi. Ama in a tanu sungah a om doai a nawkeak sak natu in Jesu munah ngen hi. 27Ahihang Jesu in, “Tanote vaak masa phot tawng, tuate anneak laak sakin, ui piak sak tu kilawm ngawl hi,” ci hi.

28“Topa awng, tano teng anneak mongte sabuai nuai pan ui ngangawn in ne hi,” nupinu in ci hi.

29Tua ahikom Jesu in, “Tabangin nong zona hangin, va cia tan, doai sia na tanu sung pan pusuak zo hi cisia na mu tu hi!” ci hi.

30Nupinu a inn ah cia a, a tanu lupna tungah a lum hi, ama sung pan doai sia pusuak takpi zo hi.

Jesu in Nangong, A pau thei ngawl khat Dam sak
31Jesu in Tyre kiim le paam teng nusia in Sidon kantan in Galilee ah pai a, Khuapi Sawm ii ngamkhente tawn hi. 32Mihing pawlkhat in pasal nangong a pau thei ngawl khat hong paipui a, ama tungah Jesu ii a khut a ngak tu ngen uh hi. 33Tua ahikom Jesu in ama nguakin mihonpite kung pan a khuala thithimna ah samtuam a, pasalpa ii bil sungah a khutme thun in, cilphii in pasalpa ii leei tham sak hi. 34Tua zawkciang Jesu in, van ento in, nasia takin a tau zawkciang, “Ephphata,” “Kihong in!” ci hi.

35Thakhat in pasalpa in khuaza thei a, a pau mawkna teng kila keak hi, bangma haksatna ngimna om tuan ngawlin, pau tu in kithoai hi. 36Taciangin mipite munah hi thu kuama tungah a son ngawl natu in, thupia hi; ahihang ama in thupia va-ial mipite in son va-ial uh hi. 37A za theampo in lamdang sa uh hi. “Na theampo bangza in vawt thiam ziam! Ama in nangongte ngangawn khua za sak thei a, a ngoaite dongin pau sak thei hi,” ci uh hi.

Mark 8
Jesu in Mihing Tul Li Anvaak
(Matthew 15:32-39)
1Khua ngei ngawlin mihon dang khat hong kikhawm hi. Tua mihingte sia anneak tu bangma a nei nawn ngawl uh ciangin, Jesu in a nungzuite a kungah sam a, 2“Hi mite khuangai huai ka sa hi, banghangziam cile amate in ni thum tawntung kei taw hong om khawm a, tu in bangma neak tu nei nawn ngawl hi. 3An ne ngawlin cia sak leang, lamkaal ah pukhong siat tu hi, banghangziam cile pawlkhatte a khuala pek pan hong pai ahi hi,” ci hi.

4A nungzuite in, “Hi sung senneal ngamah koisung panin, mihing hi za ii anneak tu mu tu hi ziam?” ci uh hi.

5“Anluum bangza nei nu ziam?” ci in Jesu in dongh hi.

“Luum sali” ci in zo hi.

6Ama in mihonte lei ah to sakin sawl hi. Tua zawkciang ama in anluum sali teng la in, Pathian tung lungdam ko in, balnen a, nungzuite ii mihonte a hawm sak tu in pia hi; tabang ma in nungzuite in hawm uh hi. 7Amate in ngasano pawlkhat zongh nei uh hi. Jesu in hite atu lungdamko in, nungzuite munah hite zongh hawm in sawl hi. 8-9Mihing sim in ne uh a, kham tek uh hi— mihing anne sia tul li bang pha hi. Tua zawkciangin nungzuite in, a khawn zawk ngawl uh an, khum sali seng uh hi. Jesu in mipite cia sak a, 10thakhat thu in nungzuite taw ngunkuang sung zuanin Dalmanutha ngamah pai uh hi.

Phariseete in Na lamdang Lakna Ngen
(Matthew 16:1-4)
11Phariseete pawlkhat Jesu kungah pai a, ama taw kam kinial uh hi. Amate in ama sia thaangsia bangin sia nuam hi, tua ahikom Pathian lungkimpuina a omle a om ngawl a tel nopna in, na lamdang lakna khat ngen uh hi. * 12Ahihang Jesu in tau in, “Banghangin tu lai mihingte in na lamdang lakna veu hong ngen ziam? Hong pia ngawl tu khi hi kong ci hi! Hi mihingte tungah tabang laknate kipia ngawl tu hi!” *

13Amate nusia in ama ngunkuang sung zuan kik a, tuili langkhat ah pai tu in kipan hi.

Phariseete le Herod ii Tol
(Matthew 16:5-12)
14Nungzuite in anluum a kicing a ken tu in, mangil a ngunkuang sungah luum khat bek nei hi. 15“Kidawm vun a, Phariseete le Herod ii tol panin, kidal tavun,” Jesu in ci hi. *

16Amate sung teng tua thu kikum uh a: “Hi bang a hong ci sia anluum ih nei ngawl hang a, hong ci hi vak,” ci uh hi.

17Jesu in amate kikup tuamna teng sia tel paih ahikom, “Banghangin anluum nei ngawl huvau kikum nu ziam? Tel ngawl lai, he ngawl lai nu ziam? Na thin uh kiphel ngawl het ziam? 18Mit nei napi— mu thei ngawl nu ziam? Bil nei napi— za thei ngawl nu ziam? Ciamtee nawn ngawl nu ziam? * 19anluum nga taw mihing tul nga ka vaak lai in, a khawn laak uh bangza seng kana nu ziam?” ci hi.

“Khum sawm le khum nii,” ci uh hi.

20“Taciang anluum sali taw mihing tul li ka vaak lai in a khawn laak uh khum bangza seng ka na nu ziam?” ci hi.

“Khum sali,” ci uh hi.

21“Tua hi napi tel ngawl lalai nu ziam?,” ci hi.

Bethsaida ah Jesu in Mittaw Pasal khat Dam sak
22Amate Bethsaida khua hong theng a, ama ii tham tu in mittaw pasal khat sia mihing pawlkhat in Jesu kungah hong paipui hi. 23Jesu in mittawpa ii khut pan len a, khua pua sangah paipui hi. Pasalpa mittang ah a cilphii zawkciang Jesu in ama tungah a khut nga a, “Mu thei na nei ziam,” ci in dongh hi.

24Pasalpa in khuadak a, “Mihingte mu thei khi hi, ahizong amate sia thingkung lampaite taw kibangin ka mu hi,” ci hi.

25Jesu in pasalpa mittang tungah a khut nga kik hi. Tasia ciang pasalpa in khua pha tatak a etle, a khua mu theina hong piang kik a, na theampo thiang takin mu thei hi. 26Jesu in a inn ah cia sak a, “Tua khuano sungah pai kik nawn heak in,” ci in thupia hi.

Peter in Jesu Thu Thiangson
(Matthew 16:13-20; Luke 9:18-21)
27Tua zawkciang Jesu le a nungzuite sia Caesaria Philippi khua hui khuanote ah pai uh hi. A pai kawmin, “Ngual in kei sia akua hi hong ci ziam,” ci in dongh hi.

28“Pawlkhat in Tuiphumpa John hi hong ci hi, a dangte in Elijah hi hong ci a, kamsang khat hi hong ci zongh om hi,” ci in zo kik uh hi. *

29“Note in kei sia akua hi nong ci uh ziam?” ci hi.

Peter in, “Nang sia Messiah ni hi,” ci hi. *

30Tasia ciang Jesu in thupia a, “Kei huvau kuama munah son heak vun,” ci hi.

Jesu in A Thuak natu le A Thi natu Sonkhol
(Matthew 16:21-28; Luke 9:22-27)
31Tua zawkciang Jesu in anungzuite hilna neitu in kipan hi. “Mihing Tapa in nasia takin thuak tu a, upate, thiampi liante le Thukham hil syate in nial tu uh hi. Ama thatlum tu a, ni thum zawkciang nuntakna sungah tho kik tu hi,” ci hi. 32Ama in hi thu sia amate tungah thiangson mama hi. Tua ahikom Peter in ama sia sam tuam in tei hi. 33Ahihang Jesu hong kingeilee a, a nungzuite en in, Peter tei hi. “Kei kung pan tai in Satan awng, na khua ngaisutna Pathian kung pan hong pai hi ngawlin, mihing sung pan hong pai ahi hi!” ci hi.

34Tua zawkciang Jesu in mihonte le a nungzuite ama kungah sam a, “Mihing khat po in kei hong zui nuam a ahile ama le ama kinial in, a thinglamte pua in hong zui tahen. * 35Banghangziam cile a nuntakna a hu nuam sia in taan tu hi; ahihang kei hang le Lungdamna thu hang a nuntakna a taan sia in ngup nga tu hi. * 36Mihing khat in simlei bup a nga hangin, a nuntakna a taan le meetna nei tu ziam? Meet ngawl tu hi! 37A nuntakna a nga kik natu in, a piak thei tu bangma om ngawl hi. 38Pathian he ngawl a, ngitlona hi khang hun sungah mihing khatpo in, kei le keima thu hangin, a mai a zum le, Mihing Tapa sia Pa ii vaangletna le a thiangtho vantung lalangte taw kithua in hong pai ciangin, Mihing Tapa zongh in tasia pa atu a maizum tu hi.

0 comments:

Post a Comment