Laithiangtho Jeremiah 37-38

1. Nebuchadnezzar in akua Judah kumhpi in koi ziam?
a. Joiachin
b. Jehoiakim
c. Zedekiah

2. Zedekiah in Zephaniahte bang sawl ziam?
a. Mipi kaikhawm sak
b. Babylonte kung pai sak
c. Topa tungah thunget tu

3. Babylonte in Jerusalem asim laitak banghang nungkiin kik ziam?
a. Egyptte hongkuan
b. Pathian vaang kilangh
c. Judah le Israel kipawl

4. Jeremiah Jerusalem pan Benjamin ngamah bang hi sawm ziam?
a. Tai sawm
b. A lua tu telte laa
c. Pathian thu hil sawm

5. Jeremiah banghang thong kitaak sak ziam?
a. A thusua man ngawl ci
b. Doai kamsang kici
c. Babylonte kung taisawm kisa

6. Jeremiah sia koisungah thongtaak ziam?
a. Kumpi inn
b. Jerusalem thongpi
c. Jonathan ii inn thong

7. Uliante ii thinuk Jeremiah ii kammal sia bang ziam?
a. Babylon  bealte suakta tu
b. Ui ngilo awng
c. Milim bia te awng

8. A khuate in Jeremiah sia thi sak nuam hamtang ziam?
a. Kumpipa
b. Uliante
c. Kamsangte

9. Uliante in Jeremiah sia banglaw ziam?
a. Meitaw haal sawm
b. Tawpi khuk sung khia
c. Tuikhuk sung khia

10. Jeremiah ___ thuak laitak kumpipa Benjamin kongpi ah pai hi.
a. vel
b. thusit
c. Tuikhuk sung khia a

11. Kumpi Zedekiah in Jeremiah koisungah sam in thudongh ziam?
a. Biakinn kongkha
b. Kumpi inn
c. Benjamin kongpi

12. Zedekiah in Babylonte khut nuai tum tu ahi zong ___te kiita hi.
a. Babylonte
b. A tum masa Judahte
c. A kamsangte kam



Jeremiah 37
Jeremiah tungah Zedekiah ii Hesuak ngetna
1Babylon Kumpipa Nebuchadnezzar in Josiah ii tapa Zedekiah sia Jehoiakim ii tapa Jehoiachin taangin Judah ngam kumpi in koi hi. * 2Ahihang Zedekiah le ama khutnuai ah uliante ahizong, mihonte ahizongin TOPA ii ka tungah hong son thute mang nuam ngawl uh hi.

3Ka minam uh luangin TOPA ka Pathian uh tungah thungen tu hong sawl tu in Zedekiah Kumpipa in Shelemiah ii tapa Jehucal le Maaseiah ii tapa thiampi Zephaniahte hong pai sak hi. 4Tua lai hunin thong sungah kei hong kikhum ngawl lai a, mihonpite sungah ka vak kakoai thei lai hi. 5Babylon ngalkapte in Jerusalem kiim uum zo uh hi, ahihang Egypt ngalkapte in Egypt ngamngi kantan zo hi ci thu amate a zaak uh ciang amate nungkin kik uh hi.

6Taciang TOPA, Israel ii Pathian in, 7Zedekiah tungah son tu in hi bangin keima hong sawl hi, “Egypt ngalkapte sia nangma hong hu tu in hong pai a, ahihang a ngam uh ah heak kik tu uh hi. 8Tasia ciang Babylonia te hong pai kik tu uh a, Jerusalem khuapi simin, la in, mei taw haltum tu uh hi. 9Babylonia te hong pai kik nawn ngawl tu hi ci a na ngaisut thak ngawl natu khat le khat na kitheam ngawl natu, Keima, TOPA in thu kong hil khol hi, banghangziam cile amate hong pai nanak tu hi. 10Babylonia ngalkapte a buppi na zo zong a liamte bek taanglai a, puanbuk sungah lum ahi hial uh zong, tuate ma hong thoto veve tu a, hi khuapi haltum tu uh hi,” hong ci hi.

Jeremiah Kiman in Thong kitaak sak
11Egypt ngalkapte hong nai hu in Babylonian ngalkapte Jerusalem pan nungkin uh hi. 12Ka innkuan neisate sung pan ka lua tu ka telte la tu in Jerusalem khua panin dingin Benjamin ngamah ka pai hi. 13Ahihang Benjamin Kongpi ka thet ciang tua lai ah kongpi cing ngalkapte a uk bu pa, Shelemiah ii tapa Hananiah ii tupa Irijah in ka pai tu hong khaam a, “Babylon mite kungah taiku tu sawm hi ngawl ni ziam?” hong ci hi.

14“Tabang hi ngawl hi! tai sawm ngawl khi hi,” ci in ka zo hi. Ahihang Irijah in ka thuson hong ngai bua hi. Ama in kei hong manin uliante kungah hong paipui zaw sap hi. 15Amate ka tungah thin uuk mama in hong saatin zum thuzeakpi pa Jonathan ii inn, thonginn a a kivawt inn sia sungah hong khum in taw hong kalhcip uh hi. 16Leinuai khan khat sungah kei hong kikhum a, tua munah khua ngei hial ma hong kikoi hi.

17Tua zawkciang Zedekiah Kumpipa in keima hong sam a, kumpi inn sungah ama in, “TOPA kung panin bang thu hong pai ziam?” ci in kei thu hong dongh tuam hi.

“Thu om hi” ci in ka zo a, “Nang sia Babylon kumpipa khut sungah hong ki aap tu hi,” ci in ka belap hi. 18Taciang keima in, “Thong sungah nong khum natu in nangma tungah ahizong, na khutnuai uliante tungah ahizong, hi mipite tungah ahizong bang khialna vawt khi ziam? 19Babylon kumpipa in nang le hi ngam hong sim ngawl tu hi ci a, nang tungah hong son, na kamsangte bang tat ziam? 20Tu in Kumpipa awng, ka thu son nong ngai natu le kong nget sia nong vawt sak natu in hesuak kong ngen hi. Nong hesuakna in Jonathan ii innsung thong ah hong puak kik heak in. Nong puak kik ahile, tua munah thi takpi tu khi hi,” ci in ka dongh hi.

21Tua ahikom Zedekiah Kumpipa in kumpi inncingte omna khan sungah kei hong kikhum natu in thu hong pia hi. Tua munah ka om a, khua sungah anluum a bo siat dong ni simin anluum lum khat veu anluum vawtna panin kei hong kipia hi.

Jeremiah 38
Tuikhuk Kang sa khat sungah Jeremiah
1Mattan ii tapa Shephatiah, Pashhur ii tapa Gedaliah, Shelemiah ii tapa Jehucal, le Malchiah ii tapa Pashhurte in mipite tungah, 2TOPA in, “Khuapi sungah a om suak peuma ngal taw ahibale kialpi taw, ahibale natna taw in thi tu uh hi. Ahihang pusuak in Babylonian te khut sungah a tum papo kithatlum ngawl tu a; ama in a nuntakna beak peuma suatak tu hi, ci hi,” ci a ka son sia za uh hi. 3TOPA in, “Keima in hi khuapi sia Babylon ngalkapte khut sungah ka pia tu a, amate in la tu uh hi, ci hi,” ci in amate tungah ka son si hi.

4Taciang uliante kumpipa kungah pai in, “Hisia pa ki thi sak hamtang tu hi. Hi bang a, a pau hu in khuapi sungah om ngalkapte le khuapi sungah a taanglai midangte theampo sia thin kiam sak uh hi. Ama in mihingte hu tu hanciam ngawl hi; amate na sak nuam bek hi,” ci uh hi.

5Zedekiah Kumpipa in, “Tua ahile pha hi. Na vawt nop bangpo in ama vawt vun; hong khak thei ngawl khi hi,” ci in zo hi. 6Taciang amate in kei hong paipui a kumpi innhuang sungah a om Kumpipa Tapa Malchaiah ii tuikhuk sungah khau taw in hong khiasuk uh hi. Tuikhuk sungah tui om ngawl a, buan bek om in, tua buan sungah ka tumsuk hi.

7Ahitazong, kumpipa inn sungah naseam ulian, Ethiopian mi cilnge sa Ebedmelech in amate ii tuikhuk sungah hong khiak thu za hi. Tua laitakin kumpipa sia Benjamin Kongpi ah thukhen a, a to laitak ahi hi. 8Tua ahikom Ebemelech sia tua munah pai in kumpipa tungah, 9“Kumpipa awng, hi mihingte khial hi. Amate in Jeremiah sia tuikhuk sungah khia uh a, tua munah ngilkial in thi tu hi, banghangziam cile khua sungah an om nawn ngawl hi,” ci hi. 10Taciang kumpipa in, Ebedmelech sia ama taw mihing thum pai khawm sakin, ka thi ma in kei sia tuikhuk sung pan hong laak kik natu in, thupia hi. 11Tua hikom Ebedmelech sia mihingte taw kumpipa innsung vanh kholna khan ah pai in puansia pawlkhat la in, keima omna tuikhuk sungah khau taw hong khiaksuk hi. 12Khau in ka baan hong nat sak ngawl natu in ama in ka leenuai ah puansia dapin hong sawl hi. Hong sawl bangin ka vawt a, 13tasia ciang amate in tuikhuk sung panin kei hong kaito in hong pusua hi. Tua zawkciang kumpi innhuang sungah kei hong kikoi hi.

Zedekiah in Jeremiah ii Ngaisut piakna Ngen
14Khatvei lai in Zedekiah Kumpipa in Biakinn tumna kongkha a thumna ah hong sam a, ama in “Thu khat kong dongh tu a, thumaan hong son lete ka oai hi,” hong ci hi.

15Keima in, “Thumaan hong son leng, nong that tu a, ngaisutna hong pia leng la, nong ngai batu hi,” ci in ka zo hi. 16Tasia ciang Zedekiah Kumpipa in, “Nang kong that batu a, nang hong that nuam mihingte khut sungah kong aap batu hi ci in eite nuntakna hong pia Pathian, a nungta Pathian min taw ka kiciam hi,” ci in hong kamciam ku hi.

17Tasia ciang Zedekiah Kumpipa tungah Vaanglianbelpa TOPA Israel ii Pathian in, “Babylonia kumpipa ii uliante khutnuai ah na tum le, na nuntakna hong ki khoaikhe tu a, hi khuapi kihaltum ngawl tu hi. Nangma le na innkuanpuite na suakta tu uh hi. 18Ahihang na tum bua uh le, hi khuapi sia Babylonian te khut sungah ki aap tu a, amate in haltum in amate ii khutsung panin na suakta batu hi,” ci hi ci in ka son hi.

19Ahihang kumpipa in, “Babylonian te kungah a tai ih ngam mite ka kiita hi. Amate ii khut sungah kei hong ki aap tu a, kei hong vawtsia tu hi,” ci in zo hi.

20Keima in, “Nang sia amate khut sungah hong ki aap ngawl tu hi. TOPA ii thu na nit natu in hesuak kong ngen hi; tua hile na theampo nang atu in pha tu a, na nuntakna hong kihu tu hi. 21Ahihang a khut nuai ah na tum nuam bale bang hong piang tu ci sia TOPA in ka mu kholna sungah hong lak zo hi. 22Tua ka mu kholna sungah Judah kumpipa inn sungah a ki nusia numeite theampo Babylonia kumpipa ii khutnuai naseam uliante ii kungah kipaipui ka mu hi. Amate a pai kawmin, a thusonte ngai vun;

‘Kumpipa ii lawm phabelte in ama lampui khial a,
amate in ama zothaw hi.
Tu in ama peangte buan sungah tumsuk zo a,
ama lawmte in nusia zo uh hi,’ ci uh hi.” ka ci hi.
23Tasia ciang keima in, “Na zite uh le na tate theampo uh sia Babylonian te kungah ki paipui tu a, nang zongh na suakta batu hi. Nang sia Babylonia kumpipa in salin hong kai tu a, hi khuapi sia mei taw ki haltum tu hi,” ci in ka belap hi.

24Zedekiah in, hi ih kipaupuina thute kuama in he sak heak in, tua hile na nuntakna lauhuai ngawl tu hi. 25Nang taw ka thuson sia uliante in hong za thong le, amate hong pai in bang son nu ziam ci in nang hong dongh tu uh hi. A vekpi in amate na son le kong that batu uh hi ci in amate in hong kamciam tu uh hi. 26Thong sungah a thi tu in hong puak kik ngawl natu in ka ngen hi ci bek po in, ” ci in zo kik hi. 27Tasia ciang uliante theampo hong pai in kei thu hong dongh a, kumpipa hong sawl bang tatak ma in amate tungah ka son hi. Amate ii vawt thei tu bangma dang om ngawl hi, banghangziam cile ka ki paupuina uh sia kuama in hong ngai ku ngawl hi. 28Jerusalem khua a kilaak ni dong kumpi innhuang sungah kei hong kikoi hi. *

0 comments:

Post a Comment