Laithiangtho (Jeremiah 41-42)

Jeremiah 41
1Tua kum a tha sali tha in, kumpi innkuan sung pan innkuanpui khat ahi, kumpipa khutnuai ah upa lianbelte sung pan upa lianbel khat ahi, Elishama ii tupa le Nethaniah ii tapa, Ishmael sia mihing sawm taw ngam ukpa Gedaliah taw kimu tu in Mizpah ah pai uh hi. Amate mun khat ah an a neakkhop hon tek lai takin, * 2Ishmael le ama taw kithawl mihing sawmte in a namsau uh dokin Gedaliah thatlum uh hi. 3Ishmael in Mizpah khua Gedaliah kungah a om Israel mite theampo le Babylonia ngalkap tua munah a omte zongh thatlum hi.

4A zing ciang, Gedaliah a ki thalupna thu kuama heak ma in, 5Shechem, Shiloh le Samaria panin mihing sawmliat hong theng uh hi. Amate in a khamul uh meetin a puan uh eaukeak in, amate le amate kisun ngawp uh hi. Amate in Biakinn ah piak tu in antang le paaknamtui keng uh hi. 6Ishmael sia amate muak tu in Mizpah panin kap kakawm in pai hi. Amate kung a thet ciang Ishmael in, “Gedaliah en tu in hong tum ka ve vun,” ci hi. 7Khuapi sung a tum po uh ciang, Ishmael le a mite in amate thatin a luang uh tuikhuk khat sungah vawk uh hi.


8Ahihang amate ii pawlsung panin mihing sawm in Ishmael tungah, “Ko hong that heak in! Zungtaang, mangtaang, olive thau le khuaitui lo lai ah phual ku nei khu hi,” ci hi. Tua ahikom Ishmael in amate that ngawl hi. 9Ishmael ii thalup mihingte ii luangte a vawkna tuikhuk sia Israel Kumpipa Baasha ii Asa Kumpipa a sim lai a Asa Kumpipa ii taw tuikhuk lian khat ahi hi. Ishmael in tua tuikhuk sia mithi luang taw dim sak hi. 10Taciang Ishmael in Babylon ngalkapte a uk ngalkapmaang pa Nebuzaradan ii Gedeliah ii kep tu in a koi kumpipa ii tanute le Mizpah khua ah a omlai mihonte theampo thongtaak sak hi. Ishmael in amate thongtaak sak a, taciang Ammon ngamsang zuanin paipui hi.

11Johanan le ama taw a omkhawm ngalkap uliante theampo in Ishmael ii tatsiatna thu za uh hi. 12Tasia ciang amate in a mihingte uh taw ama del uh a Gideon tuili lian hui ah pha uh hi. 13Ishmael ii mat thongtaakte in Johanan le ama taw hong paikhawm ngalkap lampui uliante a mu uh ciang a lungdam in, 14amate kung zuanin tai uh hi. 15Ahihang Ishmael le a mihing liatte sia Johanan khutsung panin suakta in, Ammon ngam ah ngelku uh hi.

16Taciang Ishmael in Gedaliah a thalup zawkciang Mizpah pan a, thongtaak a a mat ngalkapte, numeite patangte le kumpi inn sung a cilnge sa naseamte sia Johanan le ama taw a om ngalkap lampui uliante in uk uh hi. 17-18Babylonia kumpipa ii ngam uk in a koi Gedaliah sia Ishmael in thalup sak ahikom amate in Babylonian te kiita uh hi. Tua ahikom amate sia Babylonian te taw a kipeal thei natu in Egypt ngamah tai uh hi. Lampi ah amate sia Bethlehem khua hui Chimham ah tawlnga uh hi.

Jeremiah 42
Mipite in Amate atu Thunget sak tu in Jeremiah Sawl
1Taciang ngalkap lampui uliante theampo le Kareah ii tapa Johanan le Hoshaiah ii tapa Azariah le mihonte a lian a no ka kungah hong pai uh a, 2“Kong nget uh sia hong vawt sak tan! TOPA ka Pathian uh tungah kote atu in thu hong nget sak tan. A nungta lai kote theampo atu in thu hong nget sak tan. Khatvei lai in mihing tam mama ka hi uh hang tu in nangma nong mu bangin mihing tawmno bek ma ka taanglai uh hi. 3Ka pai natu uh lampi le ka sep tu uh nate TOPA ka Pathian uh in ko hong lak natu in thu hong nget sak tan,” hong ci uh hi.

4Keima in, “Tua ahile pha hi. Nong nget uh bangin TOPA ih Pathian tungah thu ka ngen tu a, ama ii hong ci babang kong son tu hi. Bangma kong iim batu hi,” ci in ka zo kik hi.

5Taciang amate in keima tungah, “Ko atu a TOPA ih Pathian ii nangma tungah hong piak thupiakte theampo ka ni bua uh le TOPA sia ko hong langpan thumaan le thutak tetti hi tahen. 6Dik ka sa uh zong dik ka sa bua uh zong ama tungah thunget sak tu a, kong sawl uh TOPA ih Pathian ii thu ka ni tu uh hi. Ama thu ka ni uh le ka mai uh vang tu hi,” hong ci uh hi.

Jeremiah ii Thungetna TOPA ii Zona.
7Ni sawm zawkciang TOPA in kei hong paupui hi; 8tua ahikom keima in Johanan sia ama taw a omkhawm ngalkap lampui uliante theampo le mihing dangte taw ka sam khawm hi. 9Keima in amate tungah, “A kungah hesuak ngen tu a, nong sawl na pa ahi TOPA Israel ii Pathian in, 10‘Hi ngamah na teang suak nuam uh le, kong susia batu a, kong laamto tu hi; kong phut tu a kong phaikeak batu hi. Siatna kong thet sak manin ka khuangai hi. 11Babylonia kumpipa kiita nawn heak vun. Noma kong ompui a, ama khut sung panin kong suatak tu hi. 12Keima in a hesuak thei pa ka hi manin, ama in no tungah hesuak theina ka nei sak tu a, na ngam le na khua uh ah hong cia sak kik tu hi. Keima, TOPA in ka ci zo hi,’ hong ci hi.

13-15“Ahihang Judah ngam sungah a taanglai note in TOPA na Pathian thu na nial batu uh a, hi ngamah ten tu na nial batu uh hi. Noma in, ‘Hi ngawl hi, ngal do nawn ngawl natu mun, ngalsim tu kisamna aw zaak nawn ngawlna mun, ngilkial ngawlna mun ahi, Egypt ngamah pai in ka teang tu uh hi.’ na ci batu uh hi. Hi bangin na ci uhle Vaanglianbelpa TOPA, Israel ii Pathian in , ‘Egypt ah pai in ten tu na tum tatak uh le, 16na kiitak uh ngal in no hong pha tu a, na kitaak uh kialpi in na nung uh pan hong del in tualai mun, Egypt ah na thi tu uh hi. 17Egypt ngamah tai a, ten tatak tu a sawm mihingte theampo sia ngal taw ahibale kialpi taw ahibale natna taw in thi tu uh hi. Khat zongh nungta ngawl tu a, amate tungah ka thet sak tu tuasiatna sia khat zongin peal thei ngawl tu hi,’ ci hi.

18“TOPA, Israel, ii Pathian in, ‘Ka thin uukna le ka thin sona Jerusalem khua mite tungah a kibuak bangma in, Egypt ngam ah na pai uhle ka thin sona sia note tungah hong kibuak tu hi. Midangte ii hong muna ah a cizathuai na suak tu uh hi; Mite in note ciammuina in hong nei tu a na min uh sia hamsiatna in zang tu uh hi. Hi mun sia na mu kik ngei nawn batu uh hi,’ ci hi,” ka ci hi.

19Ta ciang ka zomto lai a, “TOPA in Judah ngamah a taang lai note Egypt ngam ah na pai ngawl natu in hong son zo hi. Tua ahikom tu in na kidop natu in kong hil khol zo hi, 20na pai uh ahile thi thei natu dongin khialna vawt na hi tu uh hi. Noma atu in TOPA ih Pathian tungah thunget sak tu in nong sawl uh a, ama ii hong thupiak theampo seam tu uh in kamciam nong pia uh hi. 21Tu in no tungah kong son zo hi, ahihang TOPA ih Pathian in no tungah son tu a hong sawlte theampo na ni bua uh hi. 22Tua ahikom, hi thu ciamtee vun; na pai nopna uh le na ten nopna uh ngamah ngal taw ahibale ngilkialna taw, ahi bale natna taw in na thi tu uh hi,” ci in ka son hi.





0 comments:

Post a Comment