Laithiangtho (Kumhpi Khatna 9-10)


1. Solomon in a inn le biakinn kumh bangza sung sa ziam?
a. 20
b. 13
c. 25

2. Solomon ii innsakna ah akua in huu ziam?
a. Moab kumhpi
b. Sheba kumhpi
c. Tyre kumpi

3. Solomon in akua khuapino kul pia ziam?
a. Sheba kumhpi
b. Tyre kumpi Hiram
c. Egypt kumhpi

4. Biakinn sakna ah naseamte sia ___te hi.
a. Sum taw lei silate
b. Ngamdang mite
c. Thaman piak ngawl kuli

5. Solomon innsakna sung ah ulian bangza kihel ziam?
a. 550
b. 600
c. 680

6. Solomon in kum khat bangza vei biakpiakna nei ziam?
a. Sali vei
b. Nga vei
c. Thum vei

7. Sheba kumpinu bang hi tu in Solomon taw kimu nuam ziam?
a. A hilna ngai tu
b. Ze-et tu
c. Asakna innte mu nuam

8. Sheba in akuate hampha ci ziam?
a. Solomon
b. Solomon ii tate
c. Solomon ii zite

9. Solomon in Sheba tung pan anasia bel ___ ngaa hi.
a. hel namtui
b. khamh ton 25
c. siphu kop tulval

10. Kum simin Solomon in kham ton bangza ngaa ziam?
a. Ton sawmnga
b. Ton Sawmthum
c. Ton kullenga

11. Solomon uk hun sung bang sia suang za in tam ziam?
a. Thik
b. Ngun
c. Khamh

12. Solomon ngalleang khat nguntang bangza taw zuak ziam?
a. 300
b. 450
c. 600

Kumhpi khatna 9-10



Kumpite Khatna 9
Pathian sia Solomon tungah Kilaak kik
(2Khang tangthu 7:11-22)
1Solomon Kumpipa in Biakinnpi le kumpi inn le a dang a sak nop teng a sak zawkciang, 2Gibeon ah a kilaak bangin TOPA sia ama ii tungah kilaak kik hi. * 3TOPA in ama munah, “Na thungetna hong za khi hi. A tawntung in kei hong kibiak natu na sak, hi Biakinnpi thiansua khi hi. Ka encik tu a ka keamcing tawntung tu hi. 4Thumaanna le phinciingna taw keima na, na pa David ii sep bangin seamin, taciang ka thukham na ni a, kong thupiak theampo na vawt le, 5na pa David tungah kamciam ka piak, Israel sia ama ii suan le paalte in uk tawntung tu hi, ka ci sia ka kholet hi. * 6Ahihang nangma na hi zong, na suan na paalte ahizong in kei nong zui uh na kheal uh a, ka thukhamte le ka thupiaknate ni ngawlin pathian dangte na bia uh le, 7tasia ciang ka mihing Israelte sia ka piak sa ngam panin ka heam tu hi. Kei hong kibiak natu in ka thiansua hi Biakinnpi zongh ka nusia tu hi. Mun theampo pan mihingte in Israel sia nunau tu a, simmaw tu hi. 8Hi Biakinnpi sia zanciim in kisengneng tu a, a kuama po kantan in a paite liinglawng tu uh a lamdang sa tu uh hi. ‘Banghangin TOPA in hi ngam le hi Biakinnpi tungah hi bangin ngamta ziam?’ ci in kidongh tu uh hi. * 9Mihingte in zo kik tu a, ‘Banghangziam cile Egypt ngam panin a pute a pusua Pathian sia nusia uh hi. Pathian dangte tungah kinga a, bia uh ahikom TOPA in hi tuasiatna amate tungah tung sak hi,’ ” ci tu hi.

Hiram taw Solomon ii Thukimna
(2Khang tangthu 8:1-2)
10Biakinnpi le ama tenna kumpi inn te a sak natu kum kul sung hai hi. 11Tyre a Hiram in hi na sepna atu a kisamh cedar thing ahizong, taakthing ahizong, kham ahizong, sik siat hi. Inn sak a kiman zawkciang Solomon in Hiram sia Galilee ngamkhen sungah khuapino kul pia hi. 12Hiram in pai in a vil ciangin tua khuapinote dei ngawl hi. 13Tua ahikom ama in Solomon munah, “Tua ahile, suapui awng, kei nong piak khuapino teng hi teng ahi ziam!” ci hi. Hi sia hu in tua sung ngam sia Cabul kici hi. 14Hiram in Solomon kham toai tul le ton nga dektak pia hi.

Solomon ii Zawthuana Thudangte
(2Khang tangthu 8:3-18)
15Kumpipa Solomon in Biakinnpi sak natu, kumpi inn sak natu le khuapi ii nisuana sang leite vuh tu, khuapi luphung ciang tu in, thaman piak ngawl kulite zangh hi. Amate in khuapite ahi Hazor, Megiddo, le Gezer te sak natu tuate ma zangh hi. 16(Egypt kumpipa in Gezer sim in suan a, a teang khua mite thatin, khuapi sia haltum hi. Tua zawkciang tua khuapi sia a tanu le Solomon hong kiten uh ciang mo thaakna letsong in pia hi. 17Taciang Solomon in sa kik hi.) Thaman piak ngawl a kulite ma zangh in Solomon in Beth Horon Nuainung sa kik hi. 18Baalath, Judah dui sungah a om Tamar, 19a anneak a vanh zakte kholna khuapite, a siphute le a ngalleangte kholna khuapite, Jerusalem ah a sak nop babang inn dangte le Lebanon le a uk sung mun dangte ah tua kulite zangh hi. 20-21Thaman piak ngawl kuli seam tu in Solomon in Israel mite ii ngam a suan lai in a thalup mong Canaan mite ii suan le paalte zangh uh hi. Hite sungah Amorte, Hitte, Perizzite, Hivte le Jebuste kihel uh a, tuate ii suan le paalte sia tu ni dong sila ahi uh hi. 22Solomon in Israelte sila in a khoai bua hi; amate in a ngalkap, ngalkap ulian, ngalkap uk le ngalleang ukte, le siphu ngalkap seam sak uh hi.

23Solomon ii a tatuam inn sakna ngealna sungah ulian 550 in thaman piak ngawl kulite uk uh hi.

24Solomon in a zi Egypt kumpipa tanu, ama atu a sak sak kumpi inn ah David khuapi pan a khiin zawkciang, khuapi ii nisuana sang lei teng vuh sak hi.

25Kum khat sung thumvei veu Solomon in meihal biakpiakna le kipawlkhop biakpiakna TOPA atu kivawt biaktau tungah pia hi. Ama in TOPA tungah ngim namtui halna zongh pia hi. Tabangin Biakinnpi sak kiman hi. *

26Aqaba Tuidok vaal ah a om Elath taw kinai, Edom leitangh tungah a om Eziongeber ah Solomon in teambaw hon khat vawt hi. 27Kumpipa Hiram in ama ii teambaw naseam a thiam sa pawlkhat Solomon mihingte taw seamkhawm tu in puak hi. 28Amate in Ophir ngam ah teambaw taw pai in kham ton sawm le ton luk bang Solomon kungah cia pui hi.

Kumpite Khatna 10
Sheba Kumpinu ii Hawna
(2Khang tangthu 9:1-12)
1Sheba kumpinu in Solomon ii minthanna za a, taciang ama in thudokna haksa pawlkhat taw ze-et tu in Jerusalem ah haw hi. 2Ama in a cingte honpui khat keng a, hel namtuite, suangmanpha le kham tam ma a pua kalauh te hong paipui hi. Ama le Solomon a kisik ciangin a ngaisut thei za taw thu doknate dongh hi. 3Solomon in zo siat hi; ama a tu zo mawk tu bangma om ngawl hi. 4Sheba kumpinu in Solomon ii ciimziate za a, kumpi inn a sakte mu hi. 5Kumpinu in kumpipa sabuai ah a kilui ante mu a, a uliante ii tenna innte, kumpi innsung naseamte ii nasep hawm zia le a puansilh uh te, poaipi khaam ciang naseamte ii ama an le tui a piak dan te pan kipan sangaw biakpiakna Biakinnpi sungah a kivawtte mu hi. Ama in hu sang la liangin lamdang sa hi. 6Ama in Kumpipa Solomon munah, “Ka ngam panin na ciimna huvau le nang thu kong zaakte maan siat hi! 7Ahihang hong pai a keima tatak ma in ka mu mateng ka um thei bua hi. Ahihang a lang zongh za ngawl lai hi nginge khi hi; na ciimna le na hauna te kei tungah hong kiko za sangin nasia zaw lai hi. 8Na zite bangza in hampha uh ziam! Na ciimna kammalte hong zaak tawntung thei natu na kung a om, na naseamte zongh kaampha mama hi! 9TOPA na Pathian pok tawng! Ama in nang Israel kumpipa in hong vawt ciang nang tungah ama bangza in lungkim ziam ci in hong lak hi. Ama in Israel hong itna a tawntung atu ahi hu in, ama in nang sia thukham le thutang khenna na kip sak thei natu in, amate kumpi tu in hong koi hi,” ci hi.

10Ama in Solomon kumpipa sia letsong hong paipui teng pia hi, kham ton nga dektak, hel namtuite le suangmanpha tam mama pia hi. Tua hel namtuite sia vanh a saan ngei theampo sung pan a nasia bel ahi hi. *

11(Hiram ii teambaw Ophir panin kham hong ciapui te in juniper thing le suangmanpha zongh hong ciapui hi. 12Solomon in tua thingte sia Biakinnpi le kumpi inn te ah dal in vawt a, taciang tum thei lamsang tengtong le liamlo vawtna in nei hi. Tuate sia Israel ngam sungah a ki ciapui juniper thingte hi a, a phabel hi; hibangte bangma hunin kimu kik ngei nawn ngawl hi.)

13Kumpipa Solomon in Kumpinu Sheba sia kipiak ngei letsongte vaalin a nget theampo pia hi. Tua zawkciang ama le a lalangte sia Sheba ngam ah cia uh hi.

Solomon Kumpipa ii Hauna
(2Khang tangthu 9:13-29)
14Kum simin Solomon Kumpipa in kham ton kul le ton nga vaal nga hi, 15tua tungsia ah sumvawtte ii shia piakte, sumzuak sumleina tung pan a meet, le Arab kumpi tatuamte ii piak shia, Israel ngamkhen ukpipate ii piak shia te saang hi.

16Solomon in lum a lian zanii vawt sak a, kham pound sawm le pound nga taw zeam sak hi. 17Ama in lum a no zaw zathum zongh vawt sak a, kham pound li dektak taw veu zeam sak hi. Ama in hi lumte sia Lebanon Thingtang Khaan ah koi hi.

18Ama in kumpipa tokhum lian khat zongh vawt sak hi. Tua tokhum khen khat sia saiha taw tuam a, a taanglai mun dang teng kham phabel taw tuam hi. 19-20Kumpipa tokhum in a tona thet to natu keallei dawl luk nei hi, keallei dawl khat ii mongsim in tawpi lim khat veu kivawt a, tawpi lim sawm le nii om hi. Kumpi tokhum ii nung sangah khuital lu ii lim om a, a khutngakna sia hui ah tawpi lim khat veve kivawt hi. Kumpi ngam koima ah hi bang kumpi tokhum om ngei ngawl hi.

21Solomon ii dawnna haite kham taw kivawt hi, taciang Lebanon Thingtang Khaanpi sung a, ankuang ankeau theampo sia kham tatak taw kivawt hi. Solomon hun lai in ngun sia na manpha in kingaisun ngawl ahikom ngun peuma kihel ngawl hi. 22Ama in tuipi sung pai teambaw hon khat nei a, Hiram ii teambaw te taw kithawl sak hi. Kum thum simin tua teambawte hong heak kik uh a, kham, ngun, saiha, zawng le mei nei ngawl zawng puite hong ciapui hi.

23Solomon Kumpipa sia kumpi dang khat papo sangin hau zawin ciim zaw hi, taciang 24leitung bup in Pathian ii ama a piak ciimna kammalte ngai tu in hong pai nuam uh hi. 25Hong pai peuma in ama letsong veu pia uh a, ngun taw a kivawt na, kham, puantualte, ngalhiam, hel namtuite, siphu, laate ahi hi. Kum khat zawk kum khat tabangin kipia hi.

26Solomon in ngalleang tul le zali, ngalsim siphu tulsawm le tulnii nei hi. Tuate pawlkhat Jerusalem ah koi a, a dang teng khuapi dang ah koi kakoai hi. * 27Ama ii uk hun sung ngun sia Jerusalem khua sungah suang za in tam a, cedar sia sycamore thing thathong za in Judah mualpeang ah tam hi. * 28Kumpipa ii taang mite in Musri le Cilicia pan siphute ngamdang a puak tute tungah thu nei uh hi, * 29taciang ngalleangte sia Egypt pan ngamdang a puak tu zongh sai uh hi. Amate in Hit mite ii kumpipate le Syria kumpipate, siphu le ngalleangte sik uh hi, ngalleang khat nguntang 600 taw zuak uh a, siphu khat nguntang 150 taw zuak uh hi.

0 comments:

Post a Comment