Laithiangtho Kumpite Khatna 11-12

1. Israelte in ngamdangmite taw kiteang le ___ hi. 
a. pathian dang zong
b. milim vawt papai
c. ngamdang ah zuan uh

2. Solomon in kumhpi bangza  ii tanute  tenpui ziam? 
a. Za khat
b. Za sali
c. Tul khat

3. Topa Solomon tungah bangza vei kilangh ziam? 
a. Thum vei
b. Sali vei
c. Nii vei

4. Joab in Edom ah ___ theampo thatlum ngei hi. 
a. milim bia
b. pasal min piang 
c. mihing 

5 Akua Egypt ngamah suutpom in om ngei ziam? 
a. Moab kumpi Hadad
b. Palestine kumhpia
c. Kamsang Nabad

6 Topa in akua sia Israel nam sawmte uk tu in se ziam? 
a. Rehoboam
b. Jeroboam 
c. Sheloam

7. Israel saksang mite akua in lampui ziam?
a. Nadab
b. Rehoboam
c. Jeroboam

8 Saksangte ii dokna sia Rehoboam in nibangza hun ngen ziam? 
a. Ni khat
b. Ni thum
c. Ni sali

9. Rehoboam in Israelte kung palai seam tu akua sawl ziam? 
a. Adoniram
b. Ahijah
c. Nadab

10. Kua kumpi hong sep ciang Israel le Judah ci'n khen ni kisua ziam? 
a. Jehoboam
b. Rehoboam
c. Solomon

11. Israel a uk Jeroboam in koisungah kulh taw um in teang ziam? 
a. Bethel
b. Jerusalem
c. Shechem

12. Jeroboam in Israelte atu poaipi sia bangni in vawt ziam? 
a. Tha sali tha ni ngani
b. Thaliat tha ni sawmlengani
c. Tha thum tha ni kua ni



Kumpite Khatna 11
Solomon in Pathian Nungngat  
1Solomon in ngamdang numeite tam ma dei hi. Egypt kumpipa ii tanu ngawl zongh a dang a tenpuite sia Hit, Moab, Ammon, Edom le Sidon pan numeite ahi hi. * 2TOPA in Israelte sia hi mite taw a kiten ngawl natu thupia hi, banghangziam cile tabang a tenpui uh ciang Israel mite in TOPA tungah thumaanna pia ngawlin pathian dang tungah panpuina a piak tu hang ahi hi. * 3Solomon in kumpipate tanute zasali tenpui a, zino zathum nei hi. Amate in Solomon sia Pathian kung panin kihei khia sak hi, 4taciang a khanhaam hun hong thet ciangin amate in ama sia ngamdangte pathiante bia sak hi. Ama in TOPA a Pathian tungah thumaan ngawl a, a pa David ii thumaan bangza in maan ngawl hi. 5Ama in Sidonte ii pathian nu Astarte bia hi, taciang Ammonte ii a thasiat huai Molech bia hi. 6A pa David bang hi ngawlin ama in TOPA tungah khialin a tungah thumaan ngawl hi. 7Jerusalem nisuana sang mual tungah Chemosh biak natu mun khat vawt hi, tasia Moabte ii a thasiat huai pathian ahi hi, taciang Ammon te ii a thasiat huai pathian Molech biakna tu mun vawt hi. 8A ngamdang zite ii biakpiak natu mun, ngim namtui a hal natu le sangaw biakpiakna amate pathian tek tungah a nei thei natu in biakna munte vawt sak hi.

9-10TOPA Israelte ii Pathian in nii vei to Solomon tungah kilaak in, ngamdangte pathian a biak ngawl natu thu pia hi kale Solomon in TOPA thu ni ngawlin kihei khia hi. Tua ahikom TOPA sia Solomon tungah thin uuk a, 11ama tungah, “Nang in kei taw na kiciamna palsat kaltang a, ka thupiak hong ni ngawl na hikom na kumpi ngam sia kong laak sak tu a, na khut nuai uliante khat kong piak sak tu hi, ci in kiciamna kong pia hi. * 12Ahihang na pa David ii hu in hi sia na nuntak sungin ka vawt batu a, na tapa ii uk hun sungin piang tu hi. 13Taciang kumpi ngambup ka la batu hi; tua taangin ama sia ka naseam pa David hu in minam khat ka nusiat tu a, taciang Jerusalem khuapi sia keima atu ka teal sa ahikom tua khuapi hu in tabang ka vawt tu hi,” ci hi.

Solomon ii Ngalte
14Tua ahikom TOPA in Edom kumpi baangkua pan Hadad sia Solomon langpan sak hi. 15-16Hi hun ma pek in, David in Edom a zaw lai in, a ngalkap hon ukpipa Joab tua munah a thite ii luang phum tu in pai hi. Ama le a mite Edom ah tha luk taam uh hi, taciang tua hun sungin Edom mite pa a minpiang thatlum siat hi. 17Hadad le a pa ii naseam Edom mi pawl khat Egypt ngam ah suakta tu in a tai hi. (Tua hun lai in Hadad sia patangno khat hi pheang hi.) 18Amate in Midian nusia in Paran ah pai uh hi, tua munah mi pawlkhat in amate pawm hi. Tua zawkciang amate Egypt ngam ah pai uh a, kumpipa in Hadad sia leitangh pawlkhat le inn khat pia hi, taciang an zongh sik hi. 19Hadad in kumpipa ii ngualtam vawtna nga a, kumpipa in a nuphal nu, Kumpinu Tahpenes ii suapuinu sia Hadad ii zi tu in pia hi. 20Ama in Hadad taw tapa khat hing a, a min Genubath hi in, ama sia kumpinu in kumpi inn sungah khang sak a, kumpipa tapate taw teang khawm sak hi.

21David ii thina le ngalkap hon ukpi Joab ii thina thu Egypt ah Hadad in a zaak ciang Hadad in Kumpipa munah, “Ka ngam ah hong cia kik sak tan,” ci in ngen hi.

22Kumpi pa in, “Banghang in maw? Kong piak tu khat po kong piak ngawl om ziam? Tua hu in cia kik nuam ni ziam?” ci hi.

“Hong cia sak lel ka po in,” ci in Hadad kumpipa zo kik hi. Taciang a ngam ah ama cia kik hi.

Edom te ii kumpipa khat a hina taw ama sia Israelte atu a ngilo a khan sia ngal khat ahi hi.

23Pathian in Eliada ii tapa Rezon zongh Solomon a langpan tu in vawt hi. Rezon sia a topa Zobah Kumpipa Hadadezer kung pan tai a, 24taciang ama sia kuama thukham khut nuai ah a om ngawl pawlkhat ii lampui seam hi. (Hisia David ii Hadadezer a zawthal zawk, a kipawl pui Syriate a thalup siat zawkciang ahi hi.) Rezon le a mite Damascus ah pai in tua munah teang uh hi, tua munah a mite in ama sia Syria Kumpipa suak sak uh hi. 25Ama sia Solomon ii nuntak sung Israelte ii ngal ahi hi.

Jeroboam tungah Pathian ii Kamciam
26Solomon Kumpipa a langpan mihing khat sia Jeroboam hi a, Ephraim ngam Zeredah pan Nabat ii tapa hi. A nu sia meingong khat hi a Zeruah hi. 27Hisia tualngal thawna tangthu hi.

Solomon sia Jerusalem ii nisuana sangah lei dimh in, khuapi luphungte pua hi. 28Jeroboam sia a kiveakseak khangno khat hi ci in Solomon in a mu ciang Manasseh le Ephraim ngamkhen sung a thaman piak ngawl kulite uk tu in koi hi. 29Ni khat ni in Jeroboam sia Jerusalem pan khualhaw in a pai laitak kamsang pa Ahijah in Shiloh pan hong pai a, ngam taanzauna khat lampi tungah ama nguak taw kisi uh hi. 30Ahijah in a puantual thak khat a silh sia suutin, khen sawm le khen nii sua in leamtham hi, 31taciang, Jeroboam munah, “Puanbek sawm la in, banghangziam cile TOPA, Israelte ii Pathian in nang tungah hi bang hong ci hi, “Keima in Solomon khut sung pan kumpi ngam la tu khi hi, taciang nang sia minam sawm hong pia tu khi hi. 32Ka naseam pa David ii hu le Israel ngambup sung pan ka khuapi tu ka teal sa Jerusalem hu in, Solomon in nam khat bek keam lai tu hi. 33Hi bangin seam tu khi hi, banghangziam cile Solomon in kei hong nial in ngamdang te pathiante: Astarte, Sidonte pathian nu, Chemosh, Moab te ii pathian, Molech, Ammonte ii pathiante bia hi. Solomon in ka thu hong ni ngawl hi, ama in mawna vawt hi, a pa David ii a nit bangin ka thukhamte le ka thupiakte ni ngawl hi. 34Ahihang Solomon tung pan kumpi ngam bup la ngawl tu khi hi, a nuntak lai teng thu neina ka pia tu hi. Ka teal sa le ka thukham le ka thupiakte hong ni ka naseam pa David ii hu in hi bangin vawt tu khi hi. 35Solomon ii tapa tung pan kumpi ngam sia lakhia in minam sawmte nang hong pia tu khi hi, 36ahihang Solomon ii tapa in ngam khat ka keam sak tu hi, banghangziam cile ka naseam pa David ii suan le paalte khat in kei hong kibiakpiakna mun le ka teal sa khuapi Jerusalem panin a uk tawntung natu deina hi. 37Jeroboam awng, nang sia Israel kumpipa in hong vawt tu khi hi, taciang ngam na dei zaza tungah na uk tu hi. 38ka thu a cing takin nong ni a, ka thukham bangin na nungta a, taciang ka thupiak David ii hong nit bangin nong ni ahile nang taw kong omkhawm tawntung tu hi. Israelte kumpipa in kong vawt tu a taciang na suan le na paalte in nang zawkciang, David tungah ka vawt bangma, ukna nei tawntung tu hi. 39Solomon ii mawna hu in David ii suan le paalte daan ka pia tu hi, ahihang a tawntung hi ngawl tu hi,” ci hi.

40Tua ahikom Solomon in Jeroboam thalup tu in hanciam ahihang Egypt ah kumpipa Shishak tu in tua munah Solomon ii thi dong om hi.

Solomon ii Thina
(2Khang tangthu 9:29-31)
41Na dang theampo Solomon ii sep le vawt te, a nuntak sung a sepna, a ciimnate theampo Solomon ii Tangthu sungah kikhum siat hi. 42Ama in Jerusalem pan Israel bup tungah kum sawmli kumpipa seam hi. 43Ama thi a, David ii khuapi sungah kiphum hi, taciang a tapa Rehoboam in ama ii kumpi za laih hi.


Kumpite Khatna 12
Saksang Minamte Tualngal tho
(2Khang tangthu 10:1-19)
1Rehoboam sia Hechem ah pai a, tua munah Israel saksang minamte in ama kumpi suak sak tu in kikhawm uh hi. 2Nebat ii tapa Jehoboam, Solomon Kumpipa khut sung pan suata tu in Egypt ngam ah a tai sia in hi thu a zaak ciang Egypt ngam panin ama cia kik hi. 3Saksang minamte in ama sam uh a, tua zawkciang amate theampo Rehoboam kungah pai in ama tungah, 4“Na pa Solomon in ko sia thuak hak takin hong uk a, vanhngit pi hong suan hi. Hi vanh ngitte nong zang sak a, nuntakna a ol zaw hiat tu in nong vawt le ko sia a thumaan na uk sung mite hi tu khu hi,” ci uh hi.

5“Ni thum zawkciang hong pai tavun, zona hong pia tu khi hi,” ci in ama in zo hi. Tua ahikom amate in nusia hi.

6Kumpipa Rehoboam in a pa Solomon tung a ngaisut pia uhaamte dongh hi. “Hi mite tungah bangbangin zo tu khi ziam?” ci in dongh hi.

7Amate in zo a, “Hi mite atu a pha in nasep sak nuam le amate ii hong ngetnate tungtaang ah hamphat pia in, tua hile amate in thumaan takin nang na hong sep sak tu hi,” ci hi.

8Ahihang ama in uhaamte ii ngaisut piakna sia melsia a, ama taw a khangkhawm ama ii ngaisut a pia tu in a koi khangmoite kungah pai hi. 9“Bangbangin ngamta leng ci in ngaisutna hong pia tu nu ziam? A vanhngit uh zang sak zaw tu in hong ngen mite tungah bangbangin ci tu khi ziam?” ci in a ma in dongh hi.

10Amate in zo kik a, “Amate tungah hi bangin ci in: ‘Ka khutme no bel sia ka pa kawng sangin lian zaw hi!’ 11Amate tungah ci tan, ‘Ka pa in no vanhngit hong suan hi; keima in tua vanhngitte sangin a ngit zaw lai tu in ka vawt tu hi. Ama in khauhual kibul ciang taw hong saat hi; kei ka hi le siphu saatna taw hong vel tu khi hi,” ci in sawl hi.

12Ni thum zawkciang Jereboam le mipite theampo Kumpipa Rehoboam kungah ama ii sawl bangin hong heak kik uh hi. 13Kumpipa in uhaamte ii ngaisutna piakte melsia in mihingte tungah, 14khangmoite ii ngaisut piak bangin aw ham taw pau hi. Ama in, “Ka pa in vanhngit hong suan hi; tuate sangin a ngit zaw lai in ka vawt tu hi. Ama in khauhual kibul ciang taw hong saat hi; kei ka hile siphu velna taw kong vel tu hi,” ci hi. 15Shiloh panin kamsang Ahijah ii Nebat tapa Jeroboam tungah a son sa TOPA ii deina a tangtun natu tabangin pau ahi hi. Hisia hu in kumpipa in mipite bangma thudon ngawl hi.

16Mipite in kumpipa ii amate a thudon ngawl a mu ciangin amate au uh hi. “David le a innkuan te taak hen! Ei atu amate in bang hong vawt sak na ziam? Israel mite awng, cia tawng! Rehoboam in ama le ama kikeam tahen!” ci uh hi. *

Tua ahikom Israel mite tualngal tho a, 17Rehoboam sia Judah ngam khen sungah a teangte kumpipa tu in nusia uh hi.

18Tua zawkciang Kumpipa Rehoboam in thaman piak ngawl kulite a uk Adoniram samin Israelte kungah pai sak hi, ahihang amate in ama suang taw deanglum uh hi. Tasia ciang Rehoboam sia a ngalleang tungah manlang takin kaato a, Jerusalem khua ah suakta hi. 19Tua hun pan kipan Israel saksang kumpi ngamte sia David ii kinguizui kumpite tungah tualngal in om tan uh hi.

20Israel a mipite in Jeroboam Egypt pan hong cia kik zo ci in a zaak uh ciang, amate in mipite kikhopna khat ah sam uh a, Israelte kumpipa in koi uh hi. Judah namte bek David ii suan le paalte tungah thumaan uh hi.

Shemaiah ii Kamsaanna
(2Khang tangthu 11:1-4)
21Rehoboam Jerusalem khua a thet ciangin ama in Judah nam le Benjamin namte sung pan ngalkap phabel 180,000 sam hi. Ama in ngalsim in kuan a, saksang Israelte tungah a ukna thuan kik sawm hi. 22Ahihang Pathian in kamsang pa Shemaiah tungah, 23Rehoboam le Judah minamte le Benjamin namte hi thu puakin sawl hi. 24“Na suapui tiilteal ahi Israel mite sim heak vun. Na vekpi inn ah cia kik vun. Thu piang sa sia keima ii deina hi,” ci sak hi. Amate in TOPA ii thupiakna mangin inn ah cia kik uh hi.

Jeroboam Pathian kung pan kiheikhia
25Israelte kumpipa Jeroboam in Ephraim mualtung ngam ah Shechem sia kulh taw uumin tua munah tawmvei teang hi. Tua zawkciang ama in tua mun nusia in Penuel ah kulhte vawt hi. 26-27Ama le ama hi bangin kici hi, “Tu a thu omzia bang hile, Jerusalem khua ah TOPA atu sangaw biakpiakna tua mun Biakinnpi sungah vawt thong le, amate in a panpuina uh sia Judahte Kumpipa Rehoboam tungah khiin a; kei hong that tu hi.”

28Khua a ngai susut zawkciang ama in kham khuital nii vawtin mite tungah, “Biakpiakna vawt tu Jerusalem ah na pai zawk uh ngei zo hi. Israel mite awng, hi sungah Egypt pan a hong pusua na pathiante uh om hi!” ci hi. * 29Ama in a kham khuitalte khat Bethel ah koi a, khat sia Dan ah koi hi. 30Tabangin mipite in biakpiakna pia tu in Bethel le Dan ah a pai hu in mawna vawt uh hi. 31Jeroboam in mualdawn ah biakpiakna munte vawtin, Levi minam ahi ngawlte innkuante sung panin thiampite zongh teal hi.

Bethel ah Biakpiakna Kipuavawk
32Judah ngam a poaipite bangin Jeroboam in poaipi khat tha liat tha ni sawm le ni nga ni in phuan hi. Bethel biaktau tungah ama in a kham khuital a vawtte ah a seam tu in thiampite koi hi. 33Taciang tha liatna ni sawm le ni nga ni, ama ii see siat ni in, ama Bethel ah pai in sangaw biakpiaknate tau tungah, Israelte atu ama ii vawt tawm poai khaam sak hi.


0 comments:

Post a Comment