Laithiangtho Kumpite Khatna 13-14

1. Jeroboam biaktau maiah adin akua in haamsan ziam?

a. Baal kamsang

b. Kamsang khat

c. Bethel kamasng

2. Jeroboam in ahaamsanpa akawk le bangtat ziam?

a. A kam im thei ngawl

b. A khut tak

c. Mi phak suak

3 Jeroboam a haamsanpa in Jeroboam taw ___ tu uk ngawl hi.

a. ki hau 

b. thu kikup

c. anneak khop

4. Bethel pan kamsang huaipa in Jeroboam ahaamsanpa ___ hi.

a. thatlumh

b. tei zazan

c. theam

5. Jeroboam ahaamsanpa bangba thi ziam?

a. Abijah in that

b. Tawpi in petlumh

c. Jeroboam in that sak

6. Jeroboam ii mawna sia ___ thiampi seam sak hi.

a. a uk theampo

b. Baal kamsangte

c. atapa

7. Jeroboam in azi kamsangpa kungah bangba pai sak ziam?

a. Kithoai sitset

b. A meal kiseal sak

c. Leilot tu in

8 Jeroboam milimte avawt hang inPathian___ hi.

a. in thatlumh

b. thin uuk

c. lungdam sak

9 Pathian in Jeroboam bangkua sung pan akua diksa ziam?

a. Ahijah

b. Shama

c. Abijah

10. Jeroboam in ___sung kumpipa in maang hi.

a. 22

b. 30

c. 40

11. Rehoboam Judahte kumpipa a sua lai in akum ___ pha hi.

a. 11

b. 41

c. 15

12. Rehoboam maan zawk kum nga ciang akua ii sim thuak ziam?

a. Syriate

b. Amonte

c. Egyptte

Kumpite Khatna 13

1TOPA ii sawlna taw Judah panin kamsang khat Bethel ah hong pai a, sangaw biakpiakna pia tu in Jeroboam biaktau mai ah hong din laitak hong theng hi. 2 TOPA ii sawlna zui in kamsangpa in biaktau sia haamsan hi: “Aw biaktau, biaktau awng, hisia TOPA ii pauna hi: David ii baangkua sungah Josiah a kici nausen khat hong piang tu hi. Ama in doaibiate ii biaktau tungah sangaw biakpiakna a vawt thiampite nang tungah that tu a, mihing ngute nang tungah hal tu hi,” ci hi. * 3Taciang kamsang pa in a ci lai na pan, “Hi biaktau sia cimhtham tu a, a tungah vutte kithe zau tu hi. Tasia ciang nang in kei sia Pathian in kei tungtawn a hong pau hi ci in na he tu hi,” ci hi.

4Kumpipa Jeroboam in hi thu a zaakciang ama kawkin thupia hi: “Pasal zia sia man vun!” Thakhat thu in kumpipa ii baan sia hong zaw a, dok kik thei nawn ngawl hi. 5Biaktau sia cimhtham a, TOPA ii min taw kamsang pa ii sonkhol bangma in a tunga vutte hong kithezau hi. 6Kumpipa Jeroboam in kamsangpa munah, “Ka khut hong dam sak natu in TOPA na Pathian tungah nong hesuak na in thu hong nget sak tan!” ci hi.

Kamsang pa in TOPA tungah thu a nget le kumpipa ii baan sia dam hi. 7Tasia ciang kumpipa in, kamsangpa munah, “Kei taw cia khawm tawng, bang khat po ne tawng. Na sep sa te hu in thaman hong pia tu khi hi,” ci hi.

8Kamsangpa in, “Na hauna a lang keak nong pia hial tu ahizong nang taw ton in pai khawm ngawl tu khi hi, ahibale zong nang taw bangma ne ngawl dawn ngawl tu khi hi,” ci hi. 9“TOPA in bangma ne ngawl dawn ngawl tu in thu hong pia a, kong paina lampi tawnin cia kik ngawl tu in hong sawl hi,” ci hi. 10Tua ahikom ama in a paina lampi pan cia kik ngawlin lampi dang khat tawn hi.

Bethel pan Kamsang Huaipa

11Tua hun laitakin Bethel ah kamsang pasal huai khat om hi. A tapate hong cia a Judah pan a kamsang khat ii ngamtatna teng le kumpipa Jeroboam tungah a pauna teng a pa munah son hi. 12“A paikhiat ciangin koisung tawn ziam?” ci in kamsang huaipa in dongh hi. Amate in lampi lak a, 13taciang ama in a laa kungh thua sak hi. Amate in a sawl bang a vawt zawk uh ciang ama laa tungah to in pai a, 14Judah panin kamsang pa ii nung pan a zui le oak thingkung nuai khat ah to hi. “Nang Judah pan a kamsangpa sia na hi ziam?” ci in dongh hi.

“Hi khi hi,” ci in pasalpa in zo hi.

15Ama in, “Inn ah cia tawng, kei taw an nekhawm tawng,” ci hi.

16Ahihang Judah panin kamsangpa in zo kik a, “Nang taw cia khawmin nang zindona kei saang thei ngawl tu khi hi, 17banghangziam cile TOPA in bangma ka neak ka dawn ngawl natu thu hong pia a, ka paina lam tawn in cia kik ngawl natu thu hong pia hi,” ci hi.

18Tasia ciang Bethel pan kamsang huai pa in ama munah, “Kei zongh nangma bangma kamsang khat khi hi, taciang TOPA ii sawlna taw vantung lalang khat in nang sia inn ah ciapui in zindo in hong sawl hi,” ci hi. Ahihang kamsang huai pa sia leeilot thu son ahi hi.

19Tua ahikom Judah pan kamsangpa sia kamsang huaipa taw ciakhawm in ama taw an ne khawm hi. 20Sabuai ah an ne in a to laitak TOPA ii kammal sia kamsang huai pa tungah hong pai hi, 21taciang ama in Judah panin kamsang pa tungah au hi, “TOPA in ama ii thu ni ngawl ni hi, a thupiakte seam ngawl ni hi hong ci hi. 22Tua taangin na heak kik a, an ne ngawl a hong sawlna munah tumin an na ne hi. Hi sia hangin nang sia thalup na thuak tu a, na luang sia na innkuan thaan ah kivui ngawl tu hi.”

23Anneak zawkciang kamsang huai pa in Judah pan kamsang pa atu a laa kungh thua in, 24ama in laa tungah to in paikhia hi. Lampi tungah tawpi khat taw kisi a, ama tawpi in thatlum hi. A luang sia lampi tungah lum a, a laa le tawpite sia a luang hui ah ding uh hi. 25Mihing pawlkhat in tua mun hong kantan a, lampi tungah a luang mu uh hi, tawpi sia a kungah dingin a na om hi. Amate sia Bethel ah paisuak uh a, amate ii mu teng tua munah son hi.

26Kamsang huai pa in a zaak ciang, ama in, “Tasia TOPA ii thupiakna a ni ngawl kamsang pa hi! Tua ahikom TOPA in ama a lai tu le a that tu in tawpi pai sak hi, TOPA ama ii ka vawt tu a ci bangma in kivawt hi,” ci hi. 27Tasia zawkciang a tapate munah, “Ka laa kungh hong thua sak tavun,” ci hi. Amate in tabangin seam uh a, 28taciang ama laa tungah to in a pai le kamsang pa ii luang lampi ah lum in mu hi, laa le tawpi zongh a kungah dingkhawm nginge lai hi. Tawpi in mithi luang le ne ngawl a, laa zongh bangma law ngawl hi. 29Ama ii hu in a khuangai tu le a phum tu in kamsang huai pa in a luang hong phaam a Bethel ah ciapui hi. 30Ama in ama ii innkuan thaan ah phum a, taciang ama le a tapate in, “Aw ka suapui, ka suapui awng!” ci in ama hu in tau uh hi. 31A phum zawk uh ciang, kamsangpa in a tapate munah, “Ka thi ciangin hi thaan sungah ama ii luanghui ah hong phum tavun. 32TOPA ii thupiakna taw Bethel ah biaktau le Samaria khuapinote sungah a biakpiakna munte langpan in a pau teng sia tung takpi tu hi,” ci hi.

Jeroboam ii Lalna piang sak Mawna
33Israelte Kumpipa Jeroboam in ama ii khansiatnate kheal tuan ngawl a, ama ii sak biaktaute ah thiampi seam tu sia baangkua thathongte pan mi teal lai hi. A uuk theampo thiampi in ama in koi hi. 34Hi mawna in siatcipna le ama ii kinguizui kumpi ukna a bo cimitna suak hi.

Kumpite Khatna 14

Jeroboam ii Tapa Thina 
1Tua hun laitakin Kumpipa Jeroboam ii tapa Abijah a ciina hi. 2Jeroboam in a zi munah, “Nangma le nangma, kuama ii hong tel ngawl natu in kimealseal in, kei sia Israelte ii kumpipa suak tu ni hi, hong ci Shiloh a kamsangpa Ahijah kungah va pai tan. 3Anluum luum sawm le anluum thum pawlkhat le khuaitui thawl khat va keng tan. Ih tapa bang suak tu ziam ama ii munah dongh tan, ama in hong son tu hi,” ci hi.

4Tua ahikom ama Shiloh ah Ahijah ii inn ah pai hi. Khanhaamna in Ahijah sia a mittaw sak hi. 5A tapa ciina sia huvau dongh tu in Jeroboam ii zi sia nang kungah hong pai tu hi ci in TOPA in son zo hi. Taciang TOPA in Ahijah ii pau natu teng hil zo hi.

Jeroboam ii zi hong thet ciangin, ama sia ngualdang khat bangin kivawt hi. 6Ahihang ama baangkua sung sangah hong tum Ahijah in a zaakciang, “Hong tum tan, Jeroboam ii zi na hi sia hong he khi hi. Midang khat bangin banghangin kithoai ni ziam? Nang atu thupha ngawl kong son tu nei khi hi. 7Pai in a Jeroboam munah Israelte ii Pathian TOPA in ama tungah hi bangin ci hi: ‘Ka mite sung pan nang kong teal a, ka mi Israel te uk tu in kong koi hi. 8David ii suan le paalte khut sung panin kumpi ngam ka lakhia a, nang kong pia hi. Ahihang nang sia ka naseam pa David bang na hi bua hi, ama sia kei tungah a khawng a kheakin hong thumaan a, ka thupiakte ni in, ka thukim teng bek seam hi. 9Nang in na mai a ngam uk te sangin mawna lianzaw na vawt hi. Nang in kei nong nial a, taciang ka thin uuk natu in biak milimte vawtin thik biak milimte na biak tu in na vawt hi. 10Hi sia hu in na kumpi khang zui in tuasiatna kong tung sak tu a, taciang na suan na paal sung panin pa a minpiang a moi a haam a kibangin ka thatlum siat tu hi. Na baangkua kong heam tu a, eak bangin kiphiat keak tu hi. * 11Khuapi sungah a thi na innkuanpuite sia ui in ne tu a, ngam taanzauna a thite sia vaciik in ne tu hi. Keima, TOPA in pau zo khi hi,’ ” ci in son tan.

12Taciang Ahijah in Jeroboam ii zi tungah a ci lai na pan, “Tu in inn ah cia tan. Khuapi sung na tum po ciangin na tapa thi tu hi. 13Israel bup in ama atu khuangaina lakin phum tu hi. Jeroboam baangkua sungah ama bek ma pha takin kivui tu hi, banghangziam cile ama bekma Israelte ii Pathian TOPA ii dik sak om hi. 14TOPA in Israel tungah kumpi khat koi tu a, ama in Jeroboam ii khang zui kumpi za sia bo sak tu hi. 15TOPA in Israel daan pia tu hi, taciang ama sia lui sung a pumpate bangin ngawk tu hi. A pute tungah a piak sa hi leitangh phate tung panin ama in Israel sia zunglok tu a, Euphrates Ngun kal in thethaang tu hi, banghangziam cile amate in Asherah pathian numei sia ii lim a vawt hu in ama a thin uuk sak hi. 16TOPA in Israel taisan tu hi banghangziam cile Jeroboam in mawna vawt a, Israel mite mawna sungah lampui hi.”

17Jeroboam ii zi sia Tirzah ah cia kik hi. A inn sung a tum bek lian ciangin a tapa thi hi. 18Israel mipite ama atu khuangai in phum uh a, a naseam pa kamsangpa Ahijah tungah TOPA ii sonkhol bangma ahi hi.

Jeroboam ii Thina
19Jeroboam ii sep le vawt theampo, a ngal dona ahizong a uk zia ahizong Israel Kumpipate ii Tangthu bu sungah kikhum hi. 20Jeroboam in kum kul le kum nii sung kumpipa in maang hi. Ama thi in kiphum a, a tapa Nadab in a kumpi za laih hi.

Judah ii Kumpi Rehoboam
(2Khang tangthu 11:5-12:15)
21Solomon ii tapa Rehoboam sia Judahte kumpipa a sua lai in, ama ii kum sia kum sawmli le kum khat pha hi, taciangin ama in, Israel ngam bup sungah ama a kibiak natu TOPA ii teal sa khuapi Jerusalem ah kum sawm le kum sali zawkciang kumpi in om hi. Rehoboam ii nu sia Ammon panin Naamah ahi hi.

22Judah ngam ah mite in TOPA tungah mawna vawt a, a pute theampo ii vawt sangin a tamzaw in ama thin uuk natu vawt uh hi. 23Amate in pathian theamte biak natu in biakna munte vawtin, suangkhuamte phutin, mualtung le thinglimte ah Asherah biak natu limte vawt uh hi. * 24A sia bel sia tua doai biakna munte ah numeite le pasalte sia pumpi zuakin om uh hi. Israel mite ii ngam sungah mainawt in a pai uh lai in TOPA ii a nawk keak mite ii a maizum huai ngamtatnate Judah mite in ngamtatna in nei uh hi. *

25Rehoboam ii maan zawk a kum ngana ciangin Egypt Kumpipa Shishak in Jerusalem khuapi sim hi. * 26Ama in biakinnpi sung le kumpi innsung a sumngumte la siat hi, tuate sungah Solomon ii vawt sa kham lumte zongh kihel hi. * 27Tuate taangin Kumpipa Rehoboam in taungo taw a kivawt lumte vawt a, kumpi inn kongkha cing ulian pa tungah tuate kepcing tu in aap hi. 28Kumpipa Biakinnpi ah a pai simin a cingte in tua lumte paipui in, taciang a cingte omna khaan ah ciapui kik uh hi.

29Kumpipa Rehoboam ii sep le vawt dangte theampo sia Judah Kumpite Tangthu bu sungah kikhum hi. 30Hi hunte theampo sungah Rehoboam le Jeroboam sia a kipee tan in khat le khat kido uh hi. 31Rehoboam thi a, David khuapi ah kiphum in, a tapa Abijah sia ama laih kumpipa suak hi.