Laithiangtho (Malchi 1-2)

1. Israel mite tungah a son tu ___ in thu pia hi.
a. Malachi
b. Babylon kumhpipa
c. TOPA

2. TOPA in a mite tungah, “___” ci hi.
a. Kidawm vun
b. No kong it tawntung hi
c. Kisikkik mameang vun

3. TOPA in akuate ii khuapi suhthap sak ziam?
a. Edomte
b. Moabte
c. Babylonte

4 TOPA in biaktau vai taw kisai akuate tei ziam?
a. Thiampite
b. Thukhamhilsyate
c. kamsangte

5. TOPA ii maaktaak mama thu sia bang ziam?
a. Israelte paktat
b. Biaktau thupi sak ngawl
c. Kiphasak lei

6. TOPA in amaleama sia bang kici ziam?
a. Hong it bel khat
b. Simlei abitphua
c. Kumpi lian khat

7. TOPA in thiampite mai koi sungah kong taat tu ci ziam?
a. Senneal sung
b. Khuapi lungphung taw
c. Ngan eakte sung

8. Vaanglianbelpa TOPA kamtaite sia ___ hi.
a. Kamsangte
b. Thiampite
c. Vantung mite

9. Amate in Pathian ii a it ___ uh hi.
a. Biakinn nin sak
b. Mihingte that
c. ngawlte zong

10. ___ tungah na kamciam na paltan heak in.
a. Na zi
b. Na lawmte
c. Na Pathian

11. TOPA in amate ii biakpiakna asaan ngawl ciang ___ uh hi.
a. thinuk
b. kap a mau
c. thinnopna zong

12. Na kampauna uh taw ___na toi sak uh hi.
a. noma le noma
b. mihingte
c. TOPA


1Hisia in Malachi ii Israel mite tungah a son tu TOPA ii a piak thu ahi hi.

TOPA ii Israelte A itna
2TOPA in a mite tungah, “No kong it tawntung hi,” ci hi. *

Ahihang amate in zo kik a, “Kote nong itna bangbangin hong lak na ni ziam?” ci uh hi. *

TOPA in zo kik a, “Esau le Jacob sia unau laipee ahihang Jacob le a suan a paalte ka it a, 3taciang Esau le a suan a paalte ka ensan hi. Esau ii mualtung ngamte ka sutham a, a leitangh sia ngamsate atu in ki nusiat hi,” ci hi.

4Esau suan le paal Edomte in “Ka khuapite uh hong suksiat sak hi, ahihang tuate ka sa kik tu uh hi,” a ci le TOPA in “Sa kik ma hen ka baltham kik tu hi,” ci in a zo kik tu hi. Mihingte in amate tungah “Ngitlo khan siatna ngam le TOPA ii a tawntung a thin uukna ngam” ci tu uh hi.

5Israel mite in hite a mittang uh taw mu tu a, taciang “Israel ngam pua sia ngangawn ah TOPA sia thahat hi,” ci tu uh hi.

TOPA in Thiampite Teih
6Vaanglianbelpa TOPA in thiampite tungah, “Tapa khat in a pa thasia a, innteang khat in a topa zakta hi. Keima in na pa uh ka hi a,— banghangin hong upat ngawl nu ziam? Keima in na TOPA khi hi, banghang hong zakta ngawl nu ziam? No in kei hong zawngsak napi in, ‘Bangbangin hong zawngsak khu ziam?’ na ci lai uh hi. 7Bangbangziam cile hi bang hi– ka biaktau tungah a mannung ngawl ante nong pia uh hi. Tua zawkciang note in, “Bangbangin hong zakta ngawl khu ziam, ci in nong dongh uh hi. Hong son tong ka biaktau na zawnsakna uh le bangma in na thu sim ngawlna uh taw nong zatak ngawlna uh kilangh hi. 8A mittaw, a nangh, a peangbai, ngannote taw sangaw biakpiakna nong nei uh ciang, tabangte sia bangma phamaw sa ngawl, na hi uh ziam? Ngam ukpa tungah tabang ngannote pia ka sin vun. Note tungah ama lungkim in maipha hong pia tu ziam?” *

9Tu in no thiampite awng, ko tungah Pathian hong dik natu in ngen sin vun. Ama in na thungetna hong zo ngawl tu a, tua in noma mawna hang hi tu hi. 10Vaanglianbelpa TOPA in, “Ka biaktau tungah a mannung ngawl meite na hal thei ngawl natu in note khat po in Biakinn kongkhate khak le ka oai hi. No tungah ka lungkim ngawl a; kei kung nong paipuina biakpiaknate kong saang batu hi. 11Leimong khat pan mong khat a om mihingte in kei hong upat uh hi. Mun theampo ah amate in ngim namtui hong hal a, taciang a saan thamman sangaw biakpiaknate hong pia hi. Amate theampo in kei hong upat uh hi. 12Ahizong note in keima biaktau sia bangma manh nei ngawlin na son uh a, tua biaktau tungah na piak uh ante thupi ngaisut ngawl na hi uh ciangin, keima hong zawngsak na hi uh hi. 13“Hite bangza in cimtaak huai ziam! ci in nong mukmen uh hi. Nong biakpiak natu in na nguk uh ngannote tua ahibale a peangbai, a nanghnote nong paipui uh hi. Note tung pan tabangte hong saang tu in hong um nu ziam? 14A nganhon sung pan a limci khat keima tungah piak tu in hong kamciam napi, hong theam in a mannung ngawl nganno khat kei tungah sangaw biakpiakna in hong piapa in haamsiatna thuak tahen! Banghangziam cile kei sia kumpi lian khat ka hi a, ngam theampo pan mihingte in kei hong kiita uh hi,” ci hi.


Malachi 2
1Vaanglianbelpa TOPA in thiampite tungah, “Hi thupiakna sia note atu hi: 2Na sep na vawtna taw keima nong upat vawt tu uh hi. Kong ci bangin nong ngai bua uh ahile no tungah haamsiatna kong tung sak tu hi. Na kivaak natu a, na saan uh vanhte tungah haamsiatna ka tung sak tu hi. A tatak in ci leang, tuate tungah, haamsiatna tung sak zo khi hi, banghangziam cile kong thupiakte no in na thupi sim bua uh hi. 3Na tate daan ka pia tu a, na sangaw biakpiakna nganhingte ii eak sungah na mai kong taat tu hi– taciang note eak kholna munah hong kipaipui tu hi. 4Taciang hi thupiakte kong piak hunlam na he tu a, tasia ciang Levi suan le paal thiampite taw ka kiciamna a peal nawn batu hi. *

5“Amate ii hong thasia natu in ka thuciamna sungah ka kamciam sa nuntakna le nopsaknate ka pia hi. Tua hunlai in amate in kei hong zakta a hong kiita hi. * 6Amate in a maante hil a, a maan ngawlte hil ngawl hi. Amate in kei taw hi vadiam in nungta uh a; amate in a maan teng bek seam ngawlin midang tam mamate siatna a vawt ngawl natu in hu uh hi. 7Pathian a maan a heak natu in hilna sia thiampite nasep ahi hi. Mihingte in amate kungah pai in ka deina sin tu uh hi, banghangziam cile amate sia Vaanglianbelpa TOPA ii kamtaite ahi uh hi.

8“Ahihang tu in no thiampite in lampi maan panin na pial zo uh hi. Na hilnate in mihing tam mamate khial sak hi. Note taw ka vawt thuciamte na paltan uh hi. 9Note in ka deina nong ni bua uh a, ka mite na hil uh ciang zong, khat le khat doidan na hi uh kom, keima in note sia Israel mite in kong zawngsak sak tu hi.

Mihingte Pathian tungah A Thumaan ngawlna
10Eite theampo in a kibang pa nei kana ngawl hi ziam? A kibang Pathian in eite theampo hong bitphua kana ngawl ziam? Tua ahile eite khat le khat kilaklaw ih kamciamte paltan a, ih pute taw Pathian ii a vawt thuciam sia zawngsak tu hi ziam? 11Judah mite in Pathian tungah a kamciamte paltan a Jerusalem le ngamsung bup ah a thasiat huai mama nate vawt uh hi. Amate in Pathian ii a it Biakinn nin sak uh hi. Ngamdang pathian a bia numeite, pate in tenpui uh hi. 12A kuama po hi bangin a ngamtate sia Israel huam mi pawlte sung pan TOPA in heam tahen a, Vaanglianbelpa TOPA tungah biakpiakna a paipui ei minamte sungah hong kihel kik nawn heak tahen.

13Na ngamtatna dang khat sia hi bang hi. Ama tungah na biakpiaknate hong saang nawn ngawl ahikom kap a mau in, TOPA biaktau sia na thitui taw na khuum sak uh hi. 14Banghangin hong kisaang nawn ngawl ziam ci in na dongh uh hi. Tua thu banghangziam cile na khanmoi lai a na tenpui na zi tungah na kamciamte na paltan sia ama in a heak hu ahi hi. Na zi sia na koppui hi a, a thumaan pasal ka hi tu hi ci in na kiten uh lai in Pathian mai ah kamciam na hihang ama tungah na kamciamte na paltan zo hi. 15Pathian in ama le nang sia pumkhat thinkhat tu in hong vawt hi kana ngawl ziam? Hi thu sungah ama ii tupna sia bang ziam? Pathian ii mihing tatak a suak tu in tate na nei natu ahi hi. Tua ahikom kuama in a zi tungah kamciam a piakte paltan heak hen. 16“Nupa kikhenna sia ngaimaw khi hi,” Israelte TOPA Pathian in ci hi. “Note khat po in a zi tungah tabang khansiatna a vawt ciang ngaimaw khi hi. Na zi tungah thumaan tu a, na kamciam na paltan ngawl natu in kidawm in.”

Thukhenna Ni hong Nai hi
17Na kampauna uh taw TOPA na toi sak uh hi. Ahihang, “Ama bangbangin toi sak khu ziam?” ci in na dongh uh hi. “Vaanglianbelpa TOPA in ngamtat siate pha sa hi, tabangte diksa takpi hi” ci nu hi. Tua ahibale, “A thutang a ih heen Pathian sia koi sungah om hi tu ziam?” ci in na dongh uh hi.


0 comments:

Post a Comment