Laithiangtho (Psalm Late 141-142)

Psalm Late 141
Nitak Thungetna

1Nang kong sam hi, TOPA awng, tu in hong hu tan!
Kong sam ciangin hong ngai tan.
2Ka thu hong ngetnate sia
ngim namtui bangin hong saang tan a,
ka lapto ka khutte sia nitak sangaw piakna bangin hong saang tan. *
3TOPA awng, ka kam ah a cing tu khat hong koi tan a,
ka muk ah ngalvil khat hong koi sak tan.
4A maan ngawl nate uukna le,
mihing khansiate ngitlo nate pop nopna pan hong keamcing tan.
Amate ii poai khamna sungah ka kihel ngei batu hi.
5Mihing pha khat in dikna taw hong tei in daan zongh hong pia tahen,
ahihang mihing ngilote ii pokna ka saang ngei batu hi,
banghangziam cile
amate ngamtat siatnate langpang in thu ka ngen tawntung hi.
6Amate a ukte sia
suangliang tung panin a kilotsuk tak ciang
mihingte in ka kammal sia maan hi ci in a saang tu uh hi.
7Kiphaltham in a bebek in
a ki ektham thing bangin amate ii ngute sia
thaan kiil ah kithethaang tu hi.
8Ahihang nang kong muang tawntung hi,
Vaanglianpipa TOPA awng.
Nong dalna kong zong tu hi. Hong thi sak heak in!
9Amate ii hong siana thaangte panin kei hong dal tan a,
ngitlona a vawtte khauthaang panin hong hung tan.
10Kei bangma tat ngawlin ka pai lai takin,
a ngilote sia amate ii thaang sungah taaksuk tahen.





Psalm Late 142
Hu ngetna Thungetna *

1Hu ngenin TOPA ka sam a; ama ka maangkaa hi,
2Ka lungkim ngawlnate ama munah ka puak hi;
ka ngim ngana theampo ama ka son hi.
3A cimaw hi zo ing ci tu in ka kithoai ciang,
ama in ka ngamtat tu hong he sak hi.
Ka lampi totna ah
ka ngalte in kei atu thaang khat hong sia ku zo hi.
4Ka kung ka et ciangin
kei hong hu tu kuama ka mu bua hi, kuama hong dal tu a om bua hi.
Kuama in kei hong thinbot bua hi.
5TOPA awng, nang tungah
hu ngenin kong au hi;
nang TOPA in kei hong dalpa na hi hi.
Hi nuntakna sungah ka kitaangsap theampo nangma na hi hi.
6Hu ngen a, kong auna hong ngai tan,
banghangziam cile ka thin kiamcip zo hi.
Ka ngalte kung panin hong hun tan;
amate sia kei atu in hat lei hi.
7Ka thin ngimna pan suatakna hong pia tan,
tasia ciang na mihingte kikhopna sungah
kei tungah, nong phatnate hangin nang kong pok tu hi.

0 comments:

Post a Comment