Psalm Late 145-146

Psalm Late 145
Pokna La

1Na letna ka thang sak tu hi,
ka Pathian le ka kumpipa awng;
a tawntung pan a tawntung dong
lungdam kong ko tu hi.
2Nisim in nang tungah lungdam kong ko tu hi;
a tawntung pan a tawntung dong nang kong pok tu hi.
3TOPA sia lian ahikom,
nasia takin pok tu ahi hi; ama letna in tel zawk ahi bua hi.
4Na sep sa hu in khang khat panin
khang khat ah hong kipok tu hi;
amate in na ngamtatna liante thang sak tu hi.
5Amate in na vaangletna le na kumpizia son tu uh a,
na dianna lamdangte thuk takin ka ngai susun tu hi.
6Mihingte in na dianna lianpite son tu a,
na letna ka thang sak tu hi.
7Amate in na phatna theampo son tu a,
na thuthiamna la in sa tu uh hi.
8TOPA in ki itna le hesuakna nei a,
thin uuk hakin tatsat ngawl itna taw in kidim hi.
9Ama sia mihing theampo tungah pha in,
a vawt sa theampo tungah mulkimna nei hi.
10TOPA awng, na bitphua sa nuntakna nei theampo in nang hong pok tu a, na mihingte theampo in lungdam hong ko tu hi.

11Amate in na vaangletna le
na kumpi thahatnate thuson in nei tu a,
na thakho nate son tu uh hi,
12tasia ciang mihing theampo in na ngamtatna liante he tu a,
na ngam ukna sungah a tuanngen na kumpi za hong he tu hi.
13Na ukna a tawntungin kip a,
nang sia a tawntung in kumpipa na hi hi.
TOPA in a kamciamna tungah thumaan a,
a dianna sung theampo ah hesuak thei hi.

14Ama in ngim a ngate theampo hu a;
a puk sa theampo phongto hi.
15Nuntakna a nei theampo in lametna taw
nang hong mitsuan a, amate kisap ciangin an na pia hi.
16Amate a kikhom in na pia a,
kisapna theampo ah na lungkim sak hi.

17TOPA in ama sepna theampo sungah thutang a,
a dianna sung theampo ah hesuak thei hi.
18Ama a samte le thin tak taw a samte taw kinai in om hi.
19Ama a zaktate kisapna ama in pia a;
amate auna za in suatak hi.
20Ama a it theampo ama in a hung hi,
ahihang a ngilote susia tu hi.
21TOPA ka pok tawntung tu hi;
ama bitphua sa nuntakna nei theampo in
a min thiangtho a tawntungin pok tahen.

Psalm Late 146
Hunpa Pathian Pokna
1TOPA pok vun!
Ka tha awng, TOPA pok in!
2Ka nuntak lai theampo ama ka pok tu hi;
ka khan tawntung ka Pathian tungah la ka sa tu hi.
3Na muanna uh sia mihing lampuite tungah koi heak vun;
mihing kuama in no hong hun thei ngawl hi.
4Amate in a thi uh ciangin leivui ah a heak kik uh a;
tua ni ciangin amate tupna theampo bo hi.
5Jacob Pathian sia ama ii hupa in a neipa le
TOPA ama Pathian a, a muang pa in mi nuamsa ahi hi,
6ama sia van le lei le tuipi le
a sung a, a om theampo Bitphuapa ahi hi.
Ama in a kamciamte kholet tawntung hi; *
7Zawthawk a thuakte sangah pangin thukhen a,
a ngilkialte an pia hi.
TOPA in thongtaakte suatak hi,
8mittawte tungah khua muna pia hi.
Ama in a puk sate phongto hi;
a thutang ama mite it hi.
9Ih ngam sungah khual mi hong teangte ama in hung hi;
ama in meingongte le tangate hu hi,
ahihang a ngilote sia siatcip natu mun ah paipui hi.
10TOPA sia a tawntung kumpipa ahi hi.
Zion awng, na Pathian sia hun theampo ah maang tu hi.
TOPA pok vun!



0 comments:

Post a Comment