Laithiangtho Dokna (Kumpite Niina 1-2)

1. Ahab thi zawk Israelte akuate in ngal vawt ziam?
a. Moab
b. Amon
c. Assyria

2. Israelte kumpi akua sia inntungpan taak ngei ziam?
a. Zedekiah
b. Ahaziah
c. Ahab

3. Inntungpan taak adam ngawl kumpipa in akua thudok sawm ziam?
a. Ashuriah
b. Baalzebub
c. Zebeluun

4. Elijah ii puan sia bang ziam?
a. Nailon
b. Puantual kang
c. Nganhing phaw

5. Kumpipa ii asawl mihingte bangbangh thi ziam?
a. Van meikuang in hal
b. Aluvai
c. Tawpi in petlumh

6. Elijah in bangza vei akisapna ciang sang pheang ziam?
a. Nii vei
b. Thum vei
c. Khat vei

7. Elisha in bang taw kisai thu son nuam ngawl ziam?
a. Ahab kumhpi
b. Elijah van ka tu vai
c. Jezebeel

8. ___  khen nii kisua natu Elijah in saat hi.
a. Santuipi
b. Banlakung
c. Jordan

9. Elisha in bang dei huu Elijah nung zui ziam?
a. Vaangletna asee nii
b. A puantual
c. A ciangkhut

10. Bang in Elijah sia sumpei bangh kato pui ziam?
a. Vuiva
b. Meikuang siphu leang
c. Siphu leang

11. Jerecho khua tui in bang piang sak thei ziam?
a. Cina dam sak
b. Nau tolh sak
c. Mitmangn sak

12. Elijah van akato nathu kamsang 50 in ___ hi.
a. telthiang pai uh
b. lungdam uh
c. umh tatak ngawl

Kumpite Niina 1
Elijah le Kumpipa Ahaziah
1Israelte ii Kumpipa Ahab thi zawkciang Moab ngamte in Israelte langpan in tualngal tho uh hi.

2Israelte ii Kumpipa Ahaziah sia ama ii Samaria ah a kumpi inn thaam tung panin taak a, nasia takin liam hi. Tua ahikom ama in Philistine te khuapi Ekron ah kamtai pai sak a, ama ii a dam kik tu le a dam nawn ngawl tu Philistine te pathian Baalzebub dongh sak hi. 3Ahihang TOPA ii vantung lalang khat Tishbe pan kamsang Elijah sawl a, Kumpipa Ahaziah ii kamtaite taw kisi tu in pai a, thu dongh tu in sawl hi. “Banghangin Ekronte pathian Baalzebub thu dongh tu nu ziam? 4Israel ngamah pathian om ngawl hi ci in ngaisun nu ziam?” TOPA in ci hi, ‘Na liamna pan dam kik ngawl tu ni hi; thi tu ni hi,’ ” ci hi.

Elijah in TOPA thupiak bangin ngamta a, 5taciang kamtaite kumpipa kungah heak kik uh hi. “Banghangin hong heak kik nu ziam?” ci in ama in dongh hi.

6Amate in zo a, “Pasal khat taw ka kisi uh a, ama in heak kik in TOPA ii nang tungah, ‘Banghangin Ekronte pathian Baalzebub kungah kamtaite pai sak ni ziam? Israel ngam ah pathian om ngawl hi tu na up hu ahi ziam? Na liamna pan dam kik ngawl tu ni hi, thi tu ni hi.’ ” hong cina teng sonin hong sawl hi.

7Kumpipa in, “Pasal pa sia bangbang pian ahi ziam?” ci in dongh hi.

8Ama in nganhing phaw taw a kivawt puantual khat silh a, taciang savun kawngkhau taw kisawm hi,” ci in amate in zo kik hi. *

“Ama Elijah hi,” kumpi pa in ci hi.

9Tua zawkciang ama in ulian khat le pasal sawmnga sia Elijah sam tu in pai sak hi. A ulian pa in ama sia mualno tung khat ah to in mu a, ama ii munah, “Pathian ii mihingpa awng, kumpipa in nong paisuk natu thu hong pia hi,” ci hi.

10“Kei Pathian ii mihing ka hi le van panin meikuang paisuk tahen a, nang le na mihingte hong thatlum tahen,” ci hi. Thakhat thu in meikuang hong pai suk a, ulian pa le a mite thatlum siat hi. *

11Kumpipa in ulian dang khat le pasal sawmnga sawl kik a, amate paito in, Elijah ii munah, “Pathian ii mihingpa awng, kumpipa in thakhat in nong paisuk natu thu hong pia hi,” ci hi.

12“Kei, Pathian ii mihing ka hile, vantung panin meikuang hong paisuk tahen a, nang le na mihingte hong thatlum tahen,” ci in Elijah in zo hi. Thakhat thu in Pathian ii meikuang hong paisuk a ulian pa le a mite thatlum hi.

13Khatvei ma kumpipa in ulian khat le mihing sawmnga sawl hi. Ulian sia in mualno tungah kaato in, Elijah maiah khupdin in maangkaa hi. “Pathian mihingpa awng, kei le ka mite hong hesuak tan. Ka nuntakna uh hong khoaikhe tan! 14Ulian dangte nii le a mite sia vantung pan meikuang in thatlum siat hi; ahihang kei tungah hong hesuak tan!” ci hi.

15TOPA ii vantung lalang in Elijah munah, “Ama taw paisuk tan a, lau heak in,” ci hi. Tua ahikom Elijah sia ulianpa taw kumpipa ii kungah pai in, 16hi bangin ci hi, “TOPA in hi bangin ci hi, ‘Israel ngam ah pathian om ngawl bang keak in— Ekronte pathian kungah kamtai pai sakin Baalzebub tu in pai sak na hikom— dam kik ngawl tu ni hi; thi tu ni hi,’ ” ci in son hi.

17TOPA ii Elijah tungtawn a, a son bangin Ahaziah thi hi. Ahaziah in tapa nei ngawl hi, tua ahikom a suapuipa Joram in, a kumpiza laih a, tua lai tak sia Judahte kumpipa Jehoshaphat ii tapa Jehoram ii a maan zawk a kum nii na ahi hi.

18Kumpipa Ahaziah ii sep le vawt a dangte theampo sia Israelte Kumpite Tangthu sungah kikhum hi.


Kumpite Niina 2
Elijah Vantung ah Kila to
1Elijah sia suumpei taw TOPA ii vantung ah a laakto tu hun hong theng hi. Elijah le Elisha sia Gilgal panin hong dingkhia a, 2taciang, lampi tungah Elijah in Elisha tungah, “Tu in hi sungah na om in; TOPA in Bethel ah pai in hong sawl hi,” ci hi.

Ahihang Elisha in zo a, “A nungta TOPA tung le nang tungah ka thumaanna taw kamciam khi hi, hong nusia ngawl tu khi hi,” ci hi. Tua ahikom amate Bethel ah pai uh hi.

3Tua munah a teang kamsang pawlkhat te in Elisha kungah pai in, “Na topa sia tu ni in nang kung pan TOPA in la tu ahi hunlam na he ziam?” ci in dongh uh hi.

“Hi hi, he khi hi. Ahihang tua thu son ba tawng,” ci hi.

4Tua zawkciang Elijah in Elisha munah, “Tu in hi sungah na om in; TOPA in Jericho khua ah pai in hong sawl hi,” ci hi.

Ahihang Elisha in zo a, “A nungta TOPA tung le nang tungah ka thumaanna taw kamciam khi hi, nang hong nusia ngawl tu khi hi,” ci hi. Tua ahikom amate Jericho ah pai uh hi.

5Kamsang pawl khat tua munah a teang te in Elisha kungah pai in, ama dongh uh hi. “TOPA in na topa nang kung pan tu ni in la tu ahi na he ziam?”

“Hi hi, he khi hi. Ahihang tua thu son ba tawng,” Elisha in ci hi.

6Tasia zawkciang Elijah in Elisha munah, “Tu in hi sungah na om in. TOPA in kei Jordan Ngun ah pai tu in hong sawl hi,” ci hi.

Ahihang Elisha in, “A nungta TOPA tung le nang tungah ka thumaanna taw kamciam khi hi, nang hong nusia ngawl tu khi hi,” ci hi. Tua ahikom amate paisuak a, 7kamsangte sung pan sawmnga in amate Jordan dong zui uh hi. Elijah le Elisha te sia ngun ah hong tawlnga uh a, a kamsang sawmnga teng sia tawm a kikhuala na ah ding uh hi. 8Taciang Elijah in a puantual suutin, a zial zawkciang tui saatna in nei hi; tui hong kikhen a, taciang ama le Elisha in a lang khat ah leiko tung tawnin hong kantan uh hi. 9Tua munah, Elijah in Elisha munah, “Kei hong kilaak maa in nang atu bang kong vawt sak tu uuk ni ziam hong son tan,” ci hi.

“Nang kong zop thei natu in na vaangletna tel ka saan tu za ( a see nii ) hong nga sak tan,” ci hi. *

10“Tasia piak tu a haksa mama ngetna hi,” Elijah in ci hi. “Ahihang nang kung panin kei hong kilaak nong mu a, ahile tua ngetna sia na nga tu hi; nong mu bale na nga batu hi,” ci hi.

11Amate lam a pai kawmin thu son uh hi; taciang thakhat thu in meikuang siphute ii kai meikuang ngalleang khat amate nii kilaklaw ah hong pai a, Elijah sia vantung ah suumpei in kaato pui hi. 12Elisha in mu a, Elijah oksan hi, “Ka pa, ka pa! Israel a dal a thahat pa! Nang pai zo hi teh!” ci hi. Taciang ama in Elijah mu kik nawn ngawl hi.

Khuangai in Elisha in a puan tual khen nii in baltham hi. * 13Taciang ama ii kungah a taaksuk Elijah ii puantual sia tawm in Jordan ngun vaal ah pai in ding hi. 14Ama in nguntui sia Elijah ii puantual taw vaat a, “Elijah ii Pathian TOPA a koi sungah om ziam?” ci hi. Taciang ama in tui sia a vaat kik le, a tui kikhen a, taciang ngun langkhat ah pai hi. 15Jericho pan kamsang sawmnga teng in ama mu a, “Elijah ii vaangletna Elisha tungah om hi!” ci uh hi. Amate pai in ama taw kisi uh a, ama ii mai ah kun uh hi, 16taciang, “Hi sungah a thahat tingtengh sawmnga om khu hi. Na topa zongh tu in hong pai sak tan. TOPA ii thaa in ama sia mualtung khat po ziam, luamkawm sung khatpo ziam ah koi hi tha tu hi,” ci uh hi.

“Hi bo. Pai ngawl het tu nu hi,” ci in Elisha in zo hi.

17Ahihang amate a thukim dadong a nget uh ciang pai sak hi. Sawmnga teng in mun saang mun niamna ah Elijah sia ni thum sung zong ahihang mu ngawl uh hi. 18Taciang amate Elisha kungah hong heak kik uh a, ama in Jericho ah amate ngakin na om a, “Pai heak vun hong ci hi ngawl khi ziam?” ci hi.

Elisha ii Lamdang Laknate
19Jericho panin pasal pawl khat Elisha kungah pai a, “Na heak bangma, topa awng, hisia in khuapi pha khat hi, ahihang a tui pha ngawl a, nau tol sak thei hi,” ci uh hi.

20“Kuang thak khat sungah ci tawm hong paipui tavun,” ci in thu pia hi. Amate in ama kungah paipui uh hi, 21taciang ama in cik ah pai in, tui sungah a ci lawn a, hi bangin ci hi. “Hisia TOPA ii kammal hi, ‘Tui hisia a thiangtho a, ka vawt hi, ama in thina ahizong, nautolna ahizong piang sak nawn ngawl tu hi,’ ” ci hi. 22Taciang tua tui Elisha ii son bangma in tua hun pan kipan thiangtho hi.

23Elisha in Jericho nusia in Bethel ah a pai le, patang pawlkhat khuapi no khat panin hong pusuak uh a, ama ciammuina in nei uh hi. “Hi sung pan tai in, lukok pa awng,” ci in oksan uh hi.

24Elijah hong kingeilee a, amate salh in, TOPA min taw haamsiat hi. Tua zawkciang vom a nu nii thingtang sung pan hong pai in, patangte sung pan sawmli le nii laitham uh hi.

25Elisha Carmel Mualvum ah kaato a, tua zawkciang Samaria ah heak kik hi.