Laithiangtho dokna (Thuhilsya 7-8)

1. ___ ah pai sia poai vawtna inn ah pai sangin pha zaw hi.
a. Biakpiakna
b. Khuangaina inn
c. Ngal kidona

2 ___ in heakna khang sak hi.
a. Hanciamna
b. Heena
c. Laisimna

3. Mihing ciim khat in bang thu ngaisun ziam?
a. Thupha taw kisai
b. Suanlepal thu
c. Thina thu

4. Pathian in lungdamna le ___ pia khawm hi.
a.  ngimna
b.  maipha ngaana
c.  tel tatuam

5. Khuapi uk mihing sawmte sangin ___ in na tam vawt zaw hi.
a. tonbawm sawm
b. ciimna
c. thungetna

6. Thina sangin a khaa zaw sia bang ziam?
a. Zukhamna
b. Tualthana
c. Numei

7. Kumpipa omna banghang pial tu ziam?
a. A uk po vawt thei
b. Hong that thei
c. Zaataak piakna

8. Na theampo sep tu hun om ahihang bang tawm lei ziam?
a. Aseam tu mihing
b. Ih Heakna
c. Kingin kholna

9. A ki pial thei ngawl ngal kisimna khat sia bang ziam?
a. Zinei/ pasal neina
b. Maizumna
c. Thina

10. Khutkhialna sia manlang in ___ om ngawl hi.
a. Ngaisutna
b. Daan
c. Diktatna

11. Khat vevei ___te in misiate ii thuak tu daante thuak hi.
a. mizawngte
b. thutangte
c. meingong tanga

12. Mihing ___te in he kisa tha tu hi.
a. mamaw
b. hanciam
c. ciimte





Thuhilsya 7
Nuntakna huvau Ngaisutna
1Min phatna sia a manham paaknamtui sangin pha zaw a, na thi ni sia na sua ni sangin pha zaw hi. *

2Khuangaina inn ah pai sia poai vawtna inn ah pai sangin pha zaw hi, banghangziam cile a nungta lai eite theampo thina in hong ngak nginge hi cisia hong phawk sak hi.

3Heena in nuina sang pha zaw a; na mai hong khing sak tha tu ahitazong, na heakna khang sak hi.

4Lungdamna thu a ngaisun tawntung mihing sia mihing mamaw ahi hi. Mihing ciim khat in thina thu ngaisun hi.

5Mihing nawmte ii pokna la hong sak sangin mihing ciimte ii hong teih sia pha zaw hi.

6Mihing mamaw khat a nui ciang, mei sungah lingkung hal puak vazak bang ahi hi. Bangma khiakna nei ngawl hi.

7A ciim khat in mihing khat papo a theam ciang a mamaw khat bangin ngamta suak hi. Sumnguk na ne le na ngamtatzia lal sak, na hi hi.

8Na khat papo ii a tawpna sia a kipatna sangin pha zaw hi. Thin sauna sia kiphatsakna sangin pha zaw hi.

9Na thin tomna uk in; dik sak ngawlna nei tu sia mawmawt huai hi. *

10“Oh! banghangin nidang in na theampo pha zaw ziam?” ci in dongh peuma heak in. Tua in pil thudok hi ngawl hi.

11Mihing nungta peuma sia a ciim tu kisamh a, tua in ngamh lua bangza in pha hi. 12Sum in hong thin nop sak bangin ciimna zongh in hong thin nuam sak hi. Ciimna in hong keamcing a, hi sia in heakna ii phattuamna ahi hi.

13Pathian ii sep sate ngaisun in. Pathian ii a koai sak sate akua in bangbangin maam thei tu ziam? 14Nang atu in nate a dik a pha in a pian ciang lungdam in a, ngimna hong pai ciang ciamtee lel in: Pathian in lungdamna le ngimna pia khawm a; a zawkciang bang piang tu ci, na he ngei bua hi.

15Ka nuntakna sia a luithathong hi a, ahizong ka nuntak sungin thu theampo ka mu zo hi. Mihing khat sia pha napi thi a, a dang khat sia, sia napi nungta hi. 16Tua ahikom pha lei heak in a, ciim lei heak in– banghangin nangma le nangma ki thatlum tu ni ziam? 17Ahizong ngilo lei heak in a, mamaw lei heak in– banghangin na hun a tun ma in thi tu ni ziam? 18Tua a leilam te ngeal pial in. Pathian na zakta le na maa vang tu hi.

19Khuapi uk mihing sawmte ii khuapi khat atu a vawt thei sangin ciimna in mihing khat atu tam vawt zaw hi.

20Leitung ah a maan bek seam tawntung in, khialna khat a vawt ngei ngawl kuama om ngawl hi.

21Mihingte ii thuson theampo ngai heak in– na naseampa ii hong sonsiatna za tha tu ni hi, 22Nangma zongh in midangte tamvei mama na sonsiat sia kihe nginge ni hi.

23Hite theampo ahile ahi ngawl khentel tu in ka ciimna ka zangh hi. A ciim tu ma in khensatna ka nei hi, ahizong kei hi zawk hi ngawl hi. 24Nuntakna ii a khiakna akua in mu thei tu ziam? Tasia eite atu in thuk lei a, heak tu in haksa lei hi. 25Ahihang keima in pilna, thiamna heak natu in ka ki aap a, pilna mu in, thupiangte a hang ka heak natu, pil ngawlna na sia bangza in ngitlo huai a mawmawt huai ziam ci thu heakna tu in nasia takin ka hanciam hi.

26Thina sangin a khaa zaw khat ka mu hi– tua in numei ahi hi. Ama ii hong itna in thaang bang ahibale ngeen bangin nang hong man tu a, ama hong koaina in thikkhau khat bangin nang hong heencip tu hi. Pathian deina bangin a ngamta sia in tabang numei pial thei a, ahizong a khial sia, a thaang sungah awk hi. 27Hi hi, hi thute ii a khiakna ka zazon ciang tawtawm in ka mu hi. Thuthuk ngaisunpa in ci hi. 28A khiakna dang ka zon hangin ka mu bua hi. Tulkhat sungah ka zatak tu pasal khat ka mu thei hi, ahizong numei khat zongh ka mu bua hi. 29Hisia in ka sin theampo ahi hi: Pathian in eite a thumaan tu in hong vawt hi napi paulap tatuam zongin eima le eima ih kikai awk sak hi.


Thuhilsya 8
1Nate ii khiakna tatak sia mihing ciim khat bek in he hi. Ciimna in ama maitai sak a, a mai siatna teng bo sak hi.

Kumpipa Thu ni in
2Kumpipa ii ci bangin vawt in a, Pathian tungah kamciam pia memeang heak in. 3Kumpipa in a uk po vawt thei a, tua ahikom ama omna pial in; tabang a lauhuai munah om heak in. 4Kumpipa in a thu neina taw ngamta a, ama sepna sia kuama in thato thei ngawl hi. 5A thupiakte na nit lai tengin ngimna na thuak batu a, taciang mihing ciim khat in koibang le banghun ciang vawt tu ci sia he hi.

6Na theampo vawt natu a hun maan le sepzia maan om a, ahihang ih heak thu tawm lei hi! 7Bang hong piang tu cisia kuama in ih he bua a, ei hong son tu kuama om ngawl hi.

8Kuama in thina pial thei ngawl a, a thi tu ni khangkhan thei ngawl hi. Tua in ih pial thei ngawl ngal kisimna khat hi a, ih ngel ku thei bua hi.

Khansiate le Thutangte
9Hi leitung ah a kivawt sate ka ngaisut ciang hite theampo ka mu a, hi leitung ah mihing pawl khat in thahatna nei a, pawl khat te in tuate khutnuai ah thuak uh hi. 10Hi hi mi ngilo khansiate amate thaankuul sungah kiphum ka mu a, ahihang thaanmual pan a cia kik uh ciang a phum mihingte in amate ii khansiat a vawtna, khuapi sung mama ah amate pok uh hi. Tasia in a luithathong ahi hi.

11Banghangin mihingte in ol vazeang in khutkhial ziam? Banghangziam cile khut khialna sia man lalang in daan a kipiak ngawl hang ahi hi. 12Mihing khial khat in khut khialna zakhat vei vawt a, ahizong nungta veve hi. Oh, hi hi, amate kampau nate ka he a, “Pathian thu na ni uh le na theampo a pha in piang tu hi, 13ahizong mihing ngilote atu in phatna om ngawl tu hi. Amate ii nuntak hun sia nilim taw kibang a, Pathian thu ni ngawl ahikom amate khanthi tu hi,” ci hi. 14Ahihang hite nawnsan thu ahi hi. Leitung ah bang thu piang ziam ci sia en vun; khat vevei mihing thutangte in misiate ii thuak tu daante thuak a, misiate in thutangte min phatna tel nga hi. Hisia in a luithathong hi, ka ci hi.

15Tua ahikom mihing khat in a nuntak sungin nuam a sak tu ngawl a dang om ngawl ahikom anne, tuidawn in, a lungkim tu bek a hina ka he hi. Pathian in hi leitung ah nuntakna a piak hun sung teng, ama in a sep thaman nga thei tu hi bek hi.

16Ciim tu hanciam in hi leitung ah bang piang cisia ka tel ciangin sun zong zan zong mu ngawlin na om thei sia ka phawk hi, 17taciang Pathian in bang seam cisia ka tel zo bua hi. Bangza po na hanciam bel hang na tel zo ngei batu hi. Mihing ciimte in he kisa tha tu hi, ahihang amate he ngawl uh hi.

0 comments:

Post a Comment