Laithiangtho Dokna (Zechariah 7-8)

1 Israelte bang tha in khua ngai sawm uh ziam? 

a. Tha 5

b. Tha 9

c. Tha 10

2. Kumh 70 sung bang tha athet uh ciang Israel khuangai uh ziam? 

a. Tha 3 le Tha 7

b. Tha 9 le Tha 7

c. Tha 5 le Tha 7

3. Bang ahi uh ciang amate lungkim natu bek seam uh ziam? 

a. A sum zon ciang

b. A neak adawn ciang

c. An a ciing uh ciang

4 TOPA in khat le khat dikna le ___ nei tu dei hi.

a. pokna

b. thumaanna

c. kihesuakna

5. ___ sonnate ngai nuam ngawl ahikom Pathian athinuk hi. 

a. Kamsangte tungtawn in

b. A

c. Jeremiah

6. Thu anget ciang Pathian in banghang zo ngawl ziam? 

a. Kingen tawntung ngawl

b. Thinsung tak hi ngawl

c. Apaupuina kingai ngawl

7. TOPA in banghang amite ahutukal ngakla ziam? 

a. Hesuakhuai sa

b. A it man

c. Kisiik kik

8. TOPA ii mual sia bang kici tu ziam? 

a. Minthang mual

b. Ngualzawna mual

c. Athiangtho mual

9. TOPA in ___ kheal kik ngawl hi.

a. asawm thu 

b. asonsa thu

c. asepsa thu

10. Tha li, tha nga, tha sali le tha sawm na ah bang hi uh ziam? 

a. Poai vawt

b. Kikaikhawm

c. Antang

11. Akuate Jerusalem ah thupha ngen tu in pai tu ziam? 

a. Saksangmite

b. Mihing hat mamate

c. Kiimlepaammite

12. Judah mi khat kungah ngamdangmi bangza pai tu ziam? 

a. Sali

b. Kua

c. Sawm

Zechariah 7
An tanna Maan ngawlte TOPA in Maw sak
1Darius sia ngam uk lianpa in a maan zawk a kum lina, Kislev a kici a tha kuana, a ni li ni in TOPA in kei tungah thu khat hong pia hi.

2Bethel mite in Sharezer le Regemmelech le a mite Vaanglianbelpa TOPA Biakinn ah TOPA thupha ngen tu le 3thiampite le kamsangte tungah hi thute dongh tu in pai sak uh a, “Biakinn kilal sak siat zo ahikom kum tam mama sung ka vawt sa uh bangin tha nga tha in antang in mau in om lai tu khu ziam?” ci uh hi.

4Hi thu sia TOPA ii kei tungah hong thupiak ahi hi. 5Ama in, “Ngamsung a mite le thiampite hi kum sawm sali sung tawntung in a tha nga na le a tha sali na ah khuangai in an a tan uh ciang kei hong upat ahi bua uh hi, ci in amate tungah son tan. 6Amate in a neak a dawn uh ciang amate lungkim natu bek a ne a dawn uh hi,” ci hi.

7Jerusalem khanto hun mihing taw a kidim lai, mihing tam mamate khuapi sung bek ah teang ngawlin thangsang ngam le nitumna sang mualpeangte zongh ah a ten hun lai pekin kamsang masate tungah thupiak sa ahi hi.

Thunit Ngawl hu in Sal Suana
8TOPA in Zechariah tungah hi thu puak hi: 9“Khua ngeipi lai in ka minamte munah hi thupiakna ka pia hi. ‘A maanin thukhen vun a, khat le khat dikna le kihesuakna nei tavun. 10No sungah hong teang ngamdang mite ahizong, a cimawte ahizong, meingong tangate zothaw ngawl tu nu hi. Khat le khat kisuksiat natu a nanam in sawm ngawl tu nu hi,’ ka mite tungah ka ci hi.

11“Ahihang ka minamte sia thinpui in hong ngai nuam ngawl uh hi. Amate in a thinsung kongkhate khakin, 12a lungtangte suangtum bangin sah sak uh hi. Khua ngeipi lai a kamsangte tungtawn a ka hil thute ngai nuam ngawl ahikom, ka thin uuk mama hi. 13Ka pau ciang hong ngaingawl uh ahikom, thu hong nget uh ciang ka zo bua hi. 14Amate ngamdang ah peam tu in, suangval vuipi seamkeak bangin ka bengkeak hi. Hi ngampha sia ngamkhing in ki nusia a, kuama a teang bua hi.


Zechariah 8
Jerusalem Pua kik natu TOPA Kamciam
1Vaanglianbelpa TOPA in Zechariah tungah hi thu puak hi. 2“A mite ka it lei lalawm manin Jerusalem ka hu tu kal ka ngakla hi. Tua itna in a ngalte tungah hong thin uuk sak hi. 3Ka khuapi thiangtho Jerusalem ah ka cia kik tu a, tua lai ah ka teang tu hi. Tua khuapi sia a citak khuapi kici tu a, Vaanglianbelpa TOPA mual sia a thiangtho mual kici tu hi. 4Khatvei ma, nupi huai pasal huaite, huai leilam kisa in sin ciangkhut khunin a vakte sia khuapi lampi ah to kik tu uh hi. 5Taciang lampi liante sia a kimai numeino patangno taw kidim kik tu hi.

6“Tu in a om lai minamte atu in hi thu suak thei ngawl tu bang hi kale kei atu in a suakmaw bangma om ngawl hi. 7Ka minamte a kipaipuina ngamte pan ka suatak tu a, 8Jerusalem ah teang tu in nisuana le nitumna panin amate ka khawmtua kik tu hi. Taciang amate sia ka minamte hi tu a, keima in amate thumaan le thutang taw a uk a Pathian ka hi tu hi.

9“Hangsan vun! Ka Biakinn sa kik tu in, a tawdap a kipha laihun a kamsangpa pau kammal teng ma, tu in na za uh hi. 10Tua hun ma in kuama in mihing ahizong nganhing ahizong tha cial zo ngawl a, a ngalte kung pan kuama suakta ngawl hi. Mihingte khat le khat ka kilangpan sak hi. 11Ahihang tu in, hi minamte sung pan a nungta laite sia nidang a te taw ka kibang sak bua hi. 12Amate in ngammuang takin lo ante ciing tu hi. A sapit nguite hong nga tu hi. Leitangh in ante piang sak tu a, ngua tam mama hong zu tu hi. Hi thuphate theampo a suakta lai ka ngam mite tungah ka pia tu hi. 13Judah le Israel mite awng, hun bo sa sungah ngamdang mite in, a kihaamsiat uh ciangin ‘Judah le Israel mite ngim thuak bangin thuak tavun’ khat le khat kici uh hi. Ahihang note kong hun tu a, taciang tua ngamdang mite khat le khat in, ‘Judah le Israelte tungah a tung thuphate tung tahen!’ kici tu uh hi. Tua ahikom hangsan vun a, lauheak vun,” ci hi.

14Vaanglianbel TOPA in, “Na pute na pate ii hong thin uuk sak ciang, amate lalcip sak tu ka sawm a, ka thin kheal kik ngawlin ka tup bangin ka seam suak hi. 15Ahihang tu in Jerusalem le Judah minamte thupha piak ka sawm hi. Tua ahikom lau heak vun. 16Nasep tu hi teng ahi hi. Khat le khat thumaan son vun. Thukhen zumah kilemna a om thei natu in thu tang takin khen vun. * 17Khat le khat kinat sak tu tum heak vun. Kiciamna taw leeilot tetti pang heak vun. Leeilotna, a maan ngawl thukhenna le ngoltolnate ka ngaimaw hi,” ci hi.

18Vaanglianbelpa TOPA in Zechariah tungah hi thu puak hi. 19“Tha li, tha nga, tha sali le tha sawm na ah antan nate sia Judahte atu in lungdam thinnop poai khaamna suak tu hi. Thu tak le kilemna dei tavun” ci hi.

20Vaanglianbelpa TOPA in, “Khuapi tam mamate panin mihingte Jerusalem ah a pai tu hun hong theng tu hi. 21Khuapi khat pan hong pai mihingte in khuapi dang pan hong pai mihingte tungah ‘Ko Vaanglianbelpa TOPA bia tu le ama thupha ngen tu in pai tu khu hi. Ko taw paikhawm tawng,’ ci tu uh hi. 22Mihing tam mama le minam a hat mamate sia Vaanglianbelpa TOPA bia tu le ama thupha ngen tu in Jerusalem ah pai tu uh hi. 23Tua hun ciang, ngamdang mi sawm sia Judah mi khat kungah, hong pai tu a, ‘Pathian sia note taw om hi ci in za ka hi uh ciang mailam nuntakna tu vaihawmna sungah kong kihel nuam uh hi,” ci tu uh hi.