Laithiangtho (Thuhilsya 3-4)

1. Na theampo in ___ hi.
a. akhiakna nei
b. Pathian vawtsa
c. hun nei tek

2. Akuana hun ciangtat ziam?
a. A hun
b. Na khat in
c. Pathian

3. Ama in abangthu acing in hong tel sak ngawl ziam?
a. Ama ii nasepte
b. Kiitna thu
c. Pathian vaangletna

4. Sep thaman taw ne in dawn in omna sia ___ hi.
a. mawmawtna
b. Pathian letsong
c. a lui thathong

5. Pathian ii ___sia ama ih zatak natu ahi hi.
a. na a sep khat
b. itna
c. ngealnate

6. ___ thaa sia leinuai zuansuk ci'n ih tel thei tu ziam?
a. Doaite ii
b. Nganhing
c. Mihing ngilote

7. Akisiatvawtte bang hi ziam?
a. Lal
b. Hutkhiatna ngaa
c. Kap

8. Mihingte in banghang nasep hanciam ziam?
a. Thinnopna atu
b. Hau nuam
c. A inn paamte eang

9. Khut nii taw komlaak sang in bang ih nei sia pha zaw ziam?
a. Thinnopna tawmno
b. Lulumh leang
c. Thungaisun

10. Mihing nii pha le bang hi thei tu ziam?
a. Kihau tu
b. Kizen zaw in naseam
c. Kidem tu

11. Khauzam thum taw a kipheak khauzeen sia a ___ hi.
a. tat tu haksa
b. hoi bel
c. tak natu ol

12. Kumpipa thi zawkciang ama nasep sate hangin ___ngawl tu hi.
a. ki ciamte
b. a lungdam khat beak om
c. ki son sia

Thuhilsya 3
Na theampo in Hun nei tek
1Hi leitung ah a piang na theampo
Pathian see sa bangin piang hi.
2Ama in pian natu le thi natu hun,
suan tu hun le bawkeak tu hun,
3thalup tu hun le dam sak tu hun,
phelthap tu hun le sakto tu hun ciangtan hi.
4Ama in hee natu hun le lungdam natu hun,
mau tu hun le lap tu hun,
5ki it tu hun le ki etsat tu hun,
kinap tu hun le kinap ngawl tu hun, ciangtan hi.
6Ama in zon tu hun le bosua tu hun,
top tu hun le vawk tu hun,
7balthap tu hun le phaw tu hun
thim dide in om tu hun le pau tu hun ciangtan hi.
8Ama in it tu hun le etsat tu hun,
ngal kisim tu hun le kilem tu hun ciangtan hi.
9Ih sep ih vawtte theampo pan bang meetna nga hi ziam? 10Pathian in vanh ngitpi eite hong sot ka he hi. 11Ama in na theampo atu hun a lem tu in ciangtan hi. Ama in maisang hong pai tu thute heak nopna thin hong pia ahihang ama ii sep le vawtte a cingin hong tel sak ngei ngawl hi. 12Tua ahikom ih nuntak laiteng ih lungdam tu le ih sep thei bang a pha bel ih sep tu ahi hunlam ka he hi. 13Ih sep thaman taw ne in dawnin, ih nop sak tu ahi hi. Tasia in Pathian ii letsong ahi hi.

14Pathian ii sep theampo sia a tawntung atu ahi hunlam ka he hi. Bangma belap heak in a, bangma dawk kik heak in. Pathian ii na a sep khat sia ama ih zatak natu ahi hi. 15A piang na khat ahibale a piang tu na khat sia a piang ngei sa ahi hi. Pathian in na khat sia a kibangin piang sak kikik hi.

Leitungah Thumaan ngawlna
16Tua bek dom ngawlin hi leitungah thutang le thumaan om tu kilawm napi ngitlo khansiatnate na mu sia kei zongh ka mu hi. 17Keima le keima, “Pathian in mihing phate le mihing siate a kibangin thu khen tu hi, banghangziam cile na a kiseam theampo sia a hun a kiciangtan bangin piang tu hi,” ka kici hi. 18Eite nganhingte sangin ih phat zawk tuan ngawlna hong lak tu in Pathian in eite hong ze-et ci in ka khensat hi. 19A tawpna ah ih thuak tute in a kibangin mihing le nganhing hong ngak hi. Nganhing bangma in mihing zongh thi hi. Amate in a kibangin nuntakna hu nei hi. Mihing khat sia nganhing khat sangin pha zaw tuan ngawl hi, banghangziam cile amate atu in nuntakna in khiakna nei ngawl hi. 20Amate mun khat zuankhawm tu a, leivui suak tu uh hi. Amate leivui pan hong paikhawm uh a, leivui ah ciakhawm kik tu uh hi. 21Banghangin khat po in mihingte ii thaa sia tungsang zuanto a, nganhingte ii thaa ahile leinuai zuansuk hi, ci in tel thei tu ziam? 22Tua ahikom ih sep thei a pha bel sia ih sepsa tungah ih lungkim thei tu ahi sia ka phawk hi. Ih vawt thei dang bangma om ngawl hi. Ih thi zawkciang bang suak tu cisia ih heak thei natu lampi om ngawl hi.

Thuhilsya 4
1Taciang hi leitung ah a piang thumaan ngawlna theampo ka en kik hi. A kisiatvawtte kakap a, kuama in hu ngawl hi. Kuama in amate hu ngawl tu hi, banghangziam cile amate a siatvawtte in thahatna nei hi. 2A thi le a bo sate ka eang hi, a nungta laite sangin amate nuamsa zaw pek hi. 3Ahihang tuate sangin a hampha zaw laite sia hi leitung ah a piang thumaan ngawl a mu ngei ngawl, a piang ngawllaite ahi hi.

4Mihingte in ngual a zaw natu in banghangin nasia tak na seam ziam ci zongh ka tel zo hi, banghangziam cile a inn paamte a een hang ahi hi. Ahihang tasia in a luithathong ahi hi. Tasia in vuiva del taw kibang hi. 5Mihing khat pukthi liang dongin leekoai in a omcipna sia mawmawt vai hi, amate in ci hi. 6Tua zongh hi thei tha tu hi, ahihang vuiva man nuam a, khut nii taw komlaak tawntung sangin thin nopna taw, tawmno ih nei sia pha zaw hi.

7Nuntakna sungah luithathong ahi, thu dang khat zongh ka mu hi. 8Hi sungah ama nguakin a teang khat om hi. Ama in tapa le nei ngawl, suapui le nei ngawl hi kale ama sia na seam tawntung a, bangma hunin a hauna taw lungkim ngei ngawl hi. Ama le ama nop saknate nialin, akua atu in nasia takin na seam ziam? Tasia zongh luithathong hi a, taciang a ngim huai mama nuntakzia ahi hi.


9Khat sangin nii pha zaw hi, banghangziam cile amate ngeal in a kizen zaw in na seam khawm thei hi. 10Amate khat a puk le a dang khat in phongto thei hi. Ahihang khat nguak a om khat sia puk le manhsa hi lel hi, banghangziam cile kuama a hu tu om ngawl hi. 11Khua a sik le nii lumkhawm leang khualum thei hi, ahihang nang nguak bangbangin na khua lum sak thei tu ziam? 12Khat nguak ii lel tu kisimna sia nii in zo thei hi. Khauzam thum taw a kipheak khauzeen sia a tat tu haksa hi.

13-14Mihing khat sia zawnna panin a ngam ii kumpi suak tu in khangto thei a, ahibale thonginn pan kumpi tokhum dong kaato thei hi, ahizong a khan haam ciang ngual ii ngaisut pha piakte saan ngawl tu dongin a mamaw le, tua pa sangin khangmoi a zawng a pil khat pha zaw hi. 15Hi leitung ah a teang mihing theampo ka ngaisun a, amate sungah kumpipa ii dinmun a la tu khangmoi khat a om sia ka phawk hi. 16Kumpipa khat ii a uk mihingte sia kisim zo ngawl tha tu a, ama a thi zawkciang ama nasep sate hangin a lungdam khat beak om ngawl tu hi. Tasia in luithathong ahi hi. Tasia in vuiva del bang ahi hi.

0 comments:

Post a Comment