Laithiangtho Dokna (Solomon Laate 1-2)

1. Lasa ngaknu sia acii ___ hi. 
a. ngo
b. san le ngo thua
c. vom

2. Lasa ngaknu sia nisa thuak ahikom ___ hi 
a. toi lei in kap
b. a thinuk tawntung
c. aci vom

3. Ngaknu nu ii ngawngah bang kibaang ziam? 
a. Suangmanpha
b. A sam
c. Khamkhii

4. Ngaknu in bang ngan cing ziam? 
a. Tuu
b. Keal
c. Khui

5 Ngaknu ii awm ah tangvalpa alup ciang bang ngim nam ziam? 
a. Sarpha
b. Myrrh
c. Khuaulsa

6. A kuana lopa hingte sia ih lupna ci ziam? 
a. Ngaknu
b. Tangval
c. Alawmte

7. Alawmnu sia lingkawm ah po ___ taw kibang hi. 
a. lopa
b. olive kungno
c. unok paak

8 Alawmpa sia thingtang sung ___ taw kibang hi.
a. ngulno
b. pak palh
c. apple

9. Kuate in a ki-itna pheltan tu ngaknu in lau ziam? 
a. A lawmte
b. Jerusalem numeite
c. A suapui pasalte

10. Tangvalpa sia alawmnu kungah bangba pai ziam? 
a. taai
b. pai hithiat
c. siphu ngalleang taw

11. Paakte banghun ciang palh ziam? 
a. Khuakhal ciang
b. Phalbi bo 
c. Khuatuuk sung

12. Sapitte sia bang in lalcip sak thei ziam? 
a. Ngia
b. Lungno
c. A kungdangte in deap



Solomon Late 1
1Solomon ii phua la a pha bel teng 

La A ngui Khatna
Ngaknu ii sak
2Na muk taw nong namh a,
nong itna in zu sangin thum zaw hi.
3Na pum tungah a namtui na khat om a,
na min in tasia ma phawlo hi.
Nang hong it thei ngawl numei om ngawl hi.
4Hong pui tan a, ih tai tu hi;
ka kumpipa hong hi tan a, na innkhan sungah hong paipui tan.
Ih lungdam khawm tu a, nasia tak dawn khawmin,
ki itna sungah suakta takin ih omkhawm tu hi.
Numei theampo ii nang hong it sia lamdang ngawl hi!
5Jerusalem numeite awng,
kei ka ci vom hi,
ahihang ka meal pha hi.
Kedar a senneal ngam tuipuanbuk bangin
vom ka leng Solomon ii kumpi inn sungah puankhaite bangin ka mealpha hi.
6Ka ciivom hu in, hong nomu heak vun,
banghangziam cile nisa ka thuak hang ahi hi.
Ka suapui pate in kei tungah hong thin uuk ahikom
sapit huan sungah na hong seam sak hi.
Keima le keima ka kipua tu hun ka nga bua hi.
7Kong it ka lawm awng kei hong son tan,
na ngannote koi sungah na tha tu ziam?
Sunkim nisa ciang koi sungah tawlnga tu ni ziam?
Tuucing dangte ii tuuhon kawm ah banghang kong zon kul tu ni ziam?

Tangval ii sak
8Numei sung pan a it huai bel awng,
a mun he ngawl ni ziam?
Pai in tuuhonte zui tan;
na kealte atu in
tuucingte ii buk hui ah
lo hingna mun zong tan.
9Kong it ngaino awng, Pharaoh ii ngalleang a kai siphutalte
a thin tho sak siphupui bangin pasalte thin na tho sak hi.
10Na sam sia na biangkho tungah hoi niingniang a
na ngawng kiim ah suang manphate bangin kibaang hi.
11Ahihang nang atu in khamkhi ngui khat ih vawt tu a
ngun kizepna taw ih zeam tu hi.

Ngaknu ii sak
12Ka kumpipa sia a lupna tungah lum a,
ka paaknamtui ngim kizel hi.
13Ka lawmpa ka awm tungah hong lup ciang
myrrh ngim namtui nam hi.
14Ka lawmpa sia Engedi sapit huante sungah a palh
duisung paakte bang ahi hi.

Tangval ii sak
15Kong it ka lawm awng bangza in na mealpha ziam;
na mittangte bangza in it huai vakil ziam?

Ngaknu ii sak
16Kong it bel awng, na etlawm mama a,
nong lungkim sak mama hi!
Lopa hingte ih lupna hi tu a;
17Cedar thingte sia
ih inn thulnuai hi a,
cypress kungte ih innciing dap hi tu hi.

Solomon Late 2
1Keima in Sharon ah ngampaak khat ka hi lel a,
mualkuam ah unok paak khat ka hi lel hi.
Tangval ii sak
2Ling kawm a unok paak khat bangin
numeite sungah ka lawmnu om hi.

Ngaknu ii sak
3Ka it bel ka lawmpa sia tangval dangte taw teengat ciang
thingtang sungah apple kung khat taw kibang hi.
Ama limnuai ah ka to nuam a,
a nga sia thum ka sa hi.
4Ama in a an neakna innpi sungah
kei hong paipui a, itna mai taw hong en hi.
5Lungzuang duangvul ka hikom
sapit nga kote taw ka tha hong dim sak tan a,
apple nga taw hong thak sua tan!
6A baan veisang hong kham sak a
a ziatsang khut taw hong koai hi.
7Jerusalem numeite awng, ka ki itna nong pheltan ngawl natu in
a zuanngang sazukte le sazate min lo in kei hong kamciam tavun.

La a ngui Niina
Ngaknu ii sak
8Ka it ka lawmpa ii aw ka za hi.
Ama sia mual tungah tai kawmin hong pai a,
mualbawk note kantan in ka kung hong zuan hi.
9Ka it ka lawmpa sia saza khat bang, sazuk moi khat bang ahi hi.
Ama sia ka innpang kungah ding hi.
Ama in kongkha pan puankhaite pailet in innsung sang hong en hi.
10Ka it ka lawmpa in kei hong paupui hi.

Tangval ii sak
Ka it ka lawm awng, hong pai tan,
ka lawmnu awng hong pai tan.
11Phalbi bo zo a, nguatui kang zo hi;
12ngam sungah paakte palh hi.
Hi hun sia la sak hun hi a,
lo sungah vakhute kuul kiza hi.
13Theite min tu kipan a,
sapit paak ngim namtui zongh kiza zo hi.
Tua ahiciang hong pai tan, ka it ka lawm awng;
Ka lawmnu awng hong pai tan.
14Nang sia suanghawng kawmah a buu vakhu khat bang na hi hi.
A ngaibaang na meal hong mu sak tan a,
a lungzuan huai na aw hong za sak tan.
15Ih sapit nguite paak zo ahikom ngia honte ii
a lalcip sak ma in ngiano honte man in.

Ngaknu ii sak
16Ka lawmpa sia keima aa hi a, keima in ama aa ka hi hi.
Ama in a nganhonte unok paak sungah,
17zinghui a vak vahiau ma le khuavak mahiat dong cing hi.
Ka lawmpa awng, Bether mual lian tungah a om
saza khat le sazuk moi khat bangin hong heak kik tan.

0 comments:

Post a Comment