Laithiangtho Dokna (Solomonlaate 3-4)

1 Ngaknu in alawmpa koisungah zong ziam?
a. Kumpi inn sung
b. Ngam sung
c. Khuapi sung

2. Ngaknu in kuate adok zawk ciang alawmpa mu ziam?
a. Ngalvilte
b. Alawmte
c. A nu

3. Akua ii inn sung athetpui dong alawmpa lencip ziam?
a. A pa inn
b. A nu inn
c. A pathian inn

4. Solomon acing ngalkap bangza pha ziam?
a. 50
b. 70
c. 60

5. Solomon ii tokhum sia bang taw kivawt ziam?
a. Khamh
b. Ngun
c. Thing

6 Solomon in alungdamni, azi nei ni bang lukhu khu ziam?
a. A nu ii piak lukhu
b. Apa ii piak lukhu
c. A lawmnu piak lukhu

7. Solomon lawmnu ii sam sia bang taw kibang ziam?
a. Siphu hon
b. Keal hon
c. Tuiteau tuak

8. Solomon lawmnu ii ha sia ___ bangh ahi hi.
a. Paak
b. Vut
c. mulmet tawm tuu

9. Solomon lawmnu ii muk sia bangbangh hi ziam?
a. Paak
b. Dialkhailh
c. Puansan khaupheang

10. Solomon lawmnu ii ngawng sia bang taw kibang ziam?
a.  Tausang
b. Saza
c. Mualbo

11. A lawmnu ii puan sia koisung paaknamtui bangh in nam ziam?
a. Hebron
b. Lebanon
c. Moab

12. Akua in saksang vui,thangsang vuite phongh ziam?
a. Mipilte
b. Tangval
c. Ngalknu



Solomon Late 3
1Ka lupna tungah ka lum a zan simin,
ka it ka lawmpa ka mang in ka manh hi.
Ama ka zong a, ahihang ka mu zo bua hi.
2Khuapi sungah ka vavak a,
a lamliante le a lamzinte kantan in,
ka it ka lawmpa ka zong hi,
ahizong ka mu zo bua hi.
3Khuapi a cing ngalvilte in kei hong mu hi.
Amate tungah
“Ka lawmpa na mu uh ziam?”
ci in ka dongh hi.
4Amate ka nusiat po ciang ka lawm pa ka mu hi.
Ama ka lencip a, ka nu ii inn sung ka suana innkhan sung
ka thet pui dong ama ka thasua bua hi.
5Jerusalem numeite awng,
ko ii ki itna nong pheltan ngawl natu in,
a zuanngang sazukte le sazate min lo in
kei hong kamciam tavun.
La A ngui Thumna
Ngaknu ii sak
6Senneal ngam pan meikhu khuam khat bang,
ngim namtui le sum vawtte ii zuak paaknamtui bang,
myrrh thingnaai namtui taw hong pai sia a bang ziam?
7Solomon kumpipa a kumpi tokhum tungah to in, kizawng in hong pai hi.
Israel ngam a ngalkap pha bel sawmlukte in cing uh hi.
8Amate theampo namsau zak thiam tek hi.
Amate sia ngalsim a thiam ngiingeei sa ngalkap luite ahi uh hi.
Zanin a sim a om le a do tu in amate namsau khat tek toai uh hi.
9Solomon Kumpipa sia a pha bel thing taw a kivawt
kumpi tokhum tungah to in, kizawng hi.
10A khuamte sia ngun taw kizeam a;
a tungah kham taw a kizeam puan kikoi hi.
A tophate sia
Jerusalem numeite ii itna takpi taw a taa puan sannum taw kituam hi.
11Zion numeite awng hong pai tavun a Solomon Kumpipa en vun.
Ama in a zi nei ni, a lungdam ni le
a thinnop ni in a nu ii a lu tungah a khuh sak
kumpi lukhu sia khu hi.


Solomon Late 4
Tangval ii sak
1Kong it ka lawmnu awng, na meal pha lalawm hi!
Na mai sealna dial ii nungah a it huai na mittangte tee vaset hi.
Na sam sia Gilead mualpangh suk a, keal hon tai bangin kithing hi.
2Na hate sia a mul a kimeet tawm,
a kisil thiang tuute bangin paak hi.
Khat beak zongh kisam peal ngawlin kikim diimdiam hi.
3Na mukte puansan khaupheang khat bang hi a;
na pau ciang bangza in etlawm ziam?
Na biangte sia na kisealna dial nungah san sitset hi.
4Na ngawng sia ngalhangte zak lum tulkhat a kikhai zeizoina
ngil kilkel in a beam David ii tausaang taw kibang hi.
5Na noaite sia unok paak kawm ah an ne a,
a taa khawm saza, sazuk peangte bang ahi hi.
6Keima in zinghui a vak vahiau mateng le khuavak mahiat dong
myrrh thingnaai namtui mual,
ngim namtui mualtung ah ka om tu hi.
7Ka it ka lawmnu awng, na mealpha lalawm a;
Paubanna na nei bua hi!
8Ka zi awng, Lebanon mual panin kei hong zui tan,
Lebanon panin hong zui tan,
Tawpite le pawlbeamte tenna,
Amana Mualdawn,
Senir Mualdawn le
Hermon Mualdawn panin hong tuaksuk tan.
9Ka lawmnu le ka zi awng,
na mit ha zia le
na khi aw ziate in ka thin ka lung hong vut hi.
10Ka lawmnu le ka zi awng, nong itna in ka thin hong nuam sak hi.
Nong itna sia zu sangin thum zaw a,
na paaknamtui sia a dang hel namtuite sangin namtui zaw hi.
11Ka lawmnu awng, na muk sia khuaitui bangin thum a,
na leei sia kei atu in, khuinoai le khuaitui ahi hi.
Na puansilhte sia Lebanon ii paaknamtui namcinte nam hi.
12Ka lawmnu,
ka zi sia thuku huan,
a ki uumcip huan,
aituam tuinaak ahi hi.

13Tua munah thingkungte dawngin khang hi.
Amate sia talee kung bangin po a, nga pha belte nga hi.
Henna thingnamtui, nard thingnaai namtui,
saffron, calamus le cinnamon pan kipan
thing ngim namtuite kamh ngei ngawl hi.
14Tua munah a namtui bel myrrh le aloe te po hi.
15Lebanon Mualliante pan in luamtui a luang sukte le
ciktui te in tua huan tui kawt sakin lei zen sak hi.

Ngaknu ii sak
16Khanglo vun, Saksang vui, Thangsang vui awng,
ka huan sungah va vun; ngim namtui taw dim sak vun.
Ka it ka lawmpa sia ama ii huang sungah hong pai in
thingnga a lim bel teng ne tahen.

0 comments:

Post a Comment