Laithiangtho Dokna (Zechariah 11-12)

Zechariah 11-12

1. Lebanon ah bang kung po ziam? 
a. Olive
b. Maangtaang
c. Ceder

2. Jordan ngunhui, ___ tenna duithuk sia ki laltham sak zo hi.
a. ngamdangmite
b. tawpite
c. ngam vakhute

3. Kuate in leitung zantham sak tu ziam? 
a. Ngamukte
b. Ismeal suante
c. Vantung lalangte

4. Zechariah tungah tuu cin natu ciangkang bagza kipia ziam? 
a. Nii
b. Thum
c. Khat

5. Zechariah in tuucinman nguntang bangza ngaa ziam? 
a. 10
b. 30
c. 70

6. Zechariah in angaa sumte koisungah koi ziam? 
a. A inn
b. Kumpi inn
c. Biakinn sum kholna 

7. TOPA in Zechariah tungah Jerusalem sia bangtaw kibang ci ziam? 
a. Ngamamh sakhi
b. Ngasa vakthaap
c. Zuhai

8. Jerusalem sia banghun ciang suangtum bang in kivawt tu ziam?
a. Muanmawk ngawl ciang
b. Akiuumci ciang
c. A kiniamkhiat uh ciang

9. Jerusalem asimte ii siphute bangtat tu ziam? 
a. A mittaw tu
b. Lau in tai
c. Pulthi siat

10. David ii suanlepalte sia Pathian ahi bua le ___te in lampuitu hi. 
a. Vantung lalang
b. Doaimangpa
c. Baal nungzuite

11. Kuate in hesuaktheina le thunget hatna thaa taw kidim tu ziam? 
a. Israelte
b. Jerusalem om midangte
c. Judah suante

12. Pasalte in bangbangh mau tu ziam? 
a. Aw nging thei za taw
b. Khanghamte kaikhawm 

c. Numeite taw kihel ngawl 



Zechariah 11
A khansia Ngam Ukte Taakna
1Lebanon awng,
mei in na cedar thingkungte a kaktum thei natu in
na kongkhate hongin.
2Cypress thingkungte awng, kap in mau vun—
cedar thingte puk zo hi;
tua thingkung minthangte kilaltham sak siat zo hi:
Bashan limthingte awng, kapin mau vun—
taamthing ziingte kiphuk siat zo hi.
3Ngam ukte khuangai in kap hi;
amate minthanna bo zo hi;
Tawpite hawk ngai vun;
Jordan ngunhui, amate tenna duithuk sia ki laltham sak zo hi.
Tuucing Niite
4TOPA ka Pathian in kei tungah, “Ngaw tu a kikoi tuu honte cing in. 5Tua tuute sia a tote in that ahihang a thatte daan kipia ngawl hi. Amate in a sa uh zuakin, ‘TOPA pok vun! Ei hau zo hing!’ ci uh hi. A tuucingte ngangawn in hesuakna nei ngawl uh hi,” hong ci hi.

6 TOPA in, “Leitung ah kuama hesuak nawn ngawl tu khi hi. A ukte khut sungah mihingte theampo sia keima mama in ka koi tu hi. Hi ngam ukte in leitung zaantham sak tu a, amate thahatna panin tua leitung ka suatak batu hi,” ci hi.

7Tuu a lei, a zuakte in kei hong cial a, kei sia a kingo tu tuute a cingpa ka suak hi. Ciangkang nii ka la a, khat sia “Maipha piakna” ka ci a, khat sia ‘Ki pumkhatna’ ka ci hi. Taciang tuuhonte ka cing hi. 8. Kei hong ensan tuucing dang thumte tungah ka thin a sau zo bua hi, amate teng sia tha khat sungin ka tawp sak hi. 9Tua zawkciang tuuhonte tungah, “Note ii tuucing pa hi nawn ngawl tu khi hi. A thi tu teng thi vun a, a kilal sak tu teng laltum hen. A taanglai teng in amate khat le khat kisucip ta uh hen,” ka ci hi. 10Tua zawkciang ‘Maipha piakna’ a kici ciangkang la in, TOPA ii minam theampo taw a vawt thuciamna phiatna tu in tua ciangkang ka thiaktan hi. 11Tua ahikom tua thuciamna sia, tua ni in kiphiat hi, tuu a zuak le a leite in kei hong en nginge a, ka sep ka vawtte tungtawn in TOPA in thuson hi ci in amate in he uh hi. * 12Amate tungah, “Na uuk takpi uhle ka sep thamanh hong pia tavun. Na uuk takpi bua uhle noma tang vun,” ka ci hi. Tua ahikom amate in ka thamanh tu in nguntang sawm thum hong pia hi. *

13TOPA in, keima tungah “Tua sumte Biakinn sum kholna ah koi tan hong ci hi. Tua ahikom kei taw kiphu a, tam a sak mama uh sum sawm thum la in Biakinn sum kholna ah ka koi hi. 14Tua zawkciang ‘Ki pumkhatna’ a kici ciangkang niina sia ka thiaktan a, Judahte le Israelte ki pumkhatna kitamtham hi.

15Taciang TOPA in keima tungah “Khatvei ma tuucingpa heang leleau in a, tu tung sia a mannung ngawl tuucingpa heang in. 16Ka tuuhonte en tu in tuucing khat ka koi hi, ahihang ama in lalna a thuak tu tuute le huu ngawl; a bote le zong ngawl, a liamte le bawl ngawl, a ciidamte zongh anvaak ngawl hi. Tabang a sep tu luangin ama in tuu a thaubelte ii sa ne in a peangcinte balkeak hi. 17Tua a mannung ngawl tuucingpa a lal hi zo hi! Ama in a tuuhonte nusia zo hi. Ama thahatna sia ngalte in lalcip sak tu hi. A baan ngawtaak tu a, a ziatsang mit taw tu hi,” hong ci hi.

Zechariah 12
Mai sangah Jerusalem Kitat natu
1Hi thu sia Israel taw kisai van a phal, lei a bitphua, mihingte nuntakna a pia TOPA tung pan hong pai ahi hi. Ama in 2“Jerusalem sia zu hai khat bangin ka vawt hi, a kiimkot a ngam tatuamte in ne tu a, zu kham bangin hoi vatut tu uh hi. Amate in Jerusalem a uumci uh ciangin, Judah khuapi dangte zongh ki uumci tu hi. 3Ahihang tua hun hong thet ciang, Jerusalem sia suangtum ngitpui khat bangin ka vawt tu a, laamto tu a kipan ngam papo liam tu hi. Leitung bup ngamte kipawlin ama sim tu uh hi. 4Tua hun ciang a siphute theampo ka lau sak tu a, a tung tote ka mawmaw sak tu hi. Judah mite ka keamcing tu a, ahihang a ngalte ii siphute a mit ka taw sak tu hi. 5Taciang Judah be le phungte in amate le amate tungah, ‘Vaanglianbelpa TOPA in Jerusalem ah a teang a mite thahatna pia hi’ ci tu uh hi.

6“Tua hun ciang Judah be le phungte taamthing sungah ahibale, thaw an a min lo sung a meikuang bangin ka vawt tu hi- amate in a kiimkot ngamte laltham sak tu uh hi. Jerusalem mite khuapi sungah ngammuang in om tu uh hi.

7“Keima, TOPA in Judah ngalkapte zawna ka pia masa tu hi, tua hile David suan le paalte le Jerusalem mite ii a nga tu upatna sia a dang Judah mite nga tu upatna sangin lian zaw ngawl tu hi. 8Tua hun ciang TOPA in Jerusalem a teangte dal tu a, amate sungah a zawngkhal belte ngangawn David bangin hat tu uh hi. David suan le paalte in amate sia TOPA ii vantung lalang bang ahizong Pathian mama bang ahizong lampui tu uh hi. 9Tua hun ciang Jerusalem sim tu a kipan ngam theampo ka laltham sak tu hi.

10“Keima in David suan le paalte le Jerusalem a teang midangte sia hesuak theina thaa le thunget hatna thaa taw ka dim tu hi. Amate in nam taw a tupluppa en tu uh a, amate in tapa khat bek a nei a thisua sia a kaa bangin kap tu uh hi. Amate in a tapaciil a khuaisuate bangin kapin nasia tak mau tu uh hi. * 11Tua laitakin Jerusalem ah heena kaana sia Megiddo zaangtam a Hadad-rimmon atu heena le kaana za in nasia tu hi. * 12-14Ngamsung innkuan simin mau in om tu uh a, tuate sia David suante innkuan, Nathan suante innkuan, Levi suante innkuan, Shimei suante innkuan, a dang innkuante hi tu uh hi. Ngamsung innkuan simin mau tek tu uh a, pasalte sia numeite taw kihel ngawlin a tuamin mau tu uh hi.

0 comments:

Post a Comment