Laithiangtho (Ezekiel 1-2)

1 Ezekiel in koi sung a teang lai in, TOPA pulaakna mu ziam?  
a. Jerusalem
b. Babylon Chebar ngunhui
c. Jordan ngun hui

2 Mukholna sung nganhing bangza mu ziam? 
a. Lii
b. Sali
c. Kua

3. Nganhing khat sim in maitang bangza nei ziam? 
a. thum
b. Lii
c. khat

4 Nganhingte i peang ah bang om ziam? 
a. Thiik
b. Tau 
c. Leangmui

5. Nganhingte ii lutung san ah sia bang taw kibang ziam? 
a. Thikzum
b. Bealpeu 
c. Keal lutang

6 Nganhingte a len tawlnga in athakhup ahihang koisung aw nging ziam? 
a. Bealpeu taw akibang sia 
b. Nganhing kampan
c. Vantung pan

7. Pathian in Ezekiel apaupui tu ciang ___ hi. 
a. bok sak
b. ding sak
c. khupdin

8. Ezekiel aphong sia kua ziam? 
a. A zi
b. ama le ama
c. Pathian Thaa

9. Pathian ii Ezekiel sia bang ci ziam? 
a. "Mihing ngilopa"
b. "A thi thei mihing awng"
c.  "Kong it ka tapa awng"

10. Topa in Ezekiel tungah akuatena ama ledo ci ziam? 
a. A mi Israelte 
b. Moabte
c. Egyptte

11. Laizial aphal sia akua ziam? 
a. Ezekiel
b. Khut Khat
c. Thiampipa

12. Bang ii tungah khuangaina kaana te ki at ziam? 
a. Pang tungah
b. Inn khuvum tungah
c. Laizial

Ezekiel 1
Pathian Tokhum
1Kum sawmthum kum a tha li na a ni nga ni in Babylon ngam Chebar ngunhui ah keima Buzi ii tapa thiampi Ezekiel in Judah mi saltangte taw ka teang khawm hi. Vantung kihong a, taciang mu kholna taw Pathian ka mu hi. * ( 2 Tua hun sia Jehoaiachin Kumpipa sal in a ki paipui zawk a kum nga kum ahi hi.) * 3Chebar Ngunhui tua Babylonia ngamah, TOPA hong paupuina ka za a, taciang ama ii vaangletna ka phawk hi. 4Khua ka dakto le saksang pan vuipi suangval hong va ka mu hi. Meeikaai lian pui khat sung pan khualeng hong tee vazua a, a kiimkot van taang hi. Khualeng tee vazalna munah taungo bang khat taang hi. 5Suangval laizang ah mihing pianzia lim bangin nganhing nungta li ka mu hi, * 6ahihang tuate khat simin maitang li le tha li tek nei uh hi. 7A peangte mam a, amate in khuital peangcin bang nei uh hi. Tuate sia taungo nawt thiang bang keakin tee uh hi. 8Maitang li le tha te bek dom ngawlin, amate in, a tha khat tek ii nuai ah mihing khut li tek nei uh hi. 9Nganhingte khat simin, a tha uh nii tek phalin, a thakhui dawn te kipha sakin, kingh li nei suak uh hi. Amate a kikhin uh ciangin, a pumpi uh kiheak ngawlin a vekpi in kikhin uh hi.

10A nungta nganhing khat sim in a kibang ngawl maitang nam li tek nei uh hi; tuate sia a maisang ah mihing maitang, a ziat sangah tawpi maitang , a vei sangah khuital maitang, a nung sangah muvanlai maitang ahi uh hi. * 11Nganhing khat sim ii thakhui niite kilaamto a, a hui ah nganhing dang khat ii thakhui dawnte taw kisi sak hi, taciang amate ii tha a omlai nii tek sia a pum tung tek ah zep uh hi. 12Nganhing li te in, mun khat tek nga ahikomin, lu heak kul ngawlin a uuk na po ah a vekpi in pai thei uh hi.

13Nganhingte sungah meisip kuang bang khat om a, tua meikuang sia a tawntungin kikhin hi. Tua meikuang sia lengkeak in khua leng sak hi. * 14Tua nganhingte sia khualeng manlang za in nung le mai ah tai uh hi.

15Nganhing lite ka et ciangin nganhing khat ii pangh ah leangmui khat tek, leangmui li te in, lei pha in, ka mu hi. * 16Tua leangmui lite khat le khat kibang uh hi; tuate khat simin suangmanpha bang keakin tee hi. Taciang leangmuite khat simin, a sungah leangmui dang khat tang takin a kikimin, kiheang hi. 17Tabangin leangmuite sia a ukna sang papo ah pai thei uh hi. 18Tua leangmuite ii kiilte sia mittang te taw kituam uh hi. * 19Nganhingte a kikhin simin leangte taw kikhin khawm a, nganhingte lei panin a kikhaanto ciangin, leangmuite zongh a kikhaangto uh hi. 20Nganhingte sia amate ukna po ah pai uh a, leangmuite zongh a nganhingte bang tatak ma in pai uh hi, banghangziam cile nganhingte in leangmuite uk uh hi. 21Tua ahikom nganhingte a tuk sim le a tawlngak simin le lei panin a kikhaangto simin leangmuite zongh in tabang tatak ma in zui uh hi.

22Tua nganhingte ii lu tung san ah a tee vazal palaang taw a kivawt bealpeu a ki khumsin a, a kikoi taw a kibang khat om hi. 23Tua ii nuai ah nganhingte dingin, khat simin a thate nii phal to a, a hui a om sia ii thadawn taw kipha sak a, a omlai tha niite taw a pumpi seal hi. 24A len uh ciang a tha kizapte ii aw ka za hi; tua aw sia tuipi hawk bang hi in, ngalkap hon lampai bang, Vaanglianbelpa Pathian ii aw bang ahi hi. A len uh a tawp ciang, amate in a tha uh khup uh hi. 25Ahihang amate lu tungah a om a khuplam a, a kikoi bealpeu taw a kibang sia panin, aw nging khat kiza veve hi.

26Tua ii tungah Sapphire suangmanpha taw a kivawt kumpi tokhum taw a kibang khat om a, tua tokhum tungah mihing taw a kibang lim khat to hi. * 27Tua lim sia meikhuk laizang ah a om tau bangin taang hi. Tua in a kiim a paam theampo nasia takin taangsak hi. * 28Tua ii sungah sangun meal namcin om hi. Tasia in TOPA ii omna a kilangh sak khuataang ziazua sia ahi hi.

Pathian in Kamsang khat tu in Ezekiel Sam
Hisia ka mu ciangin lei ah ka mailam in ka puksuk hi. Taciang aw

Ezekiel 2
1khat ka za a, “A thi thei mihing awng, hong paupui nuam khi hi, ding to in,” hong ci hi. 2Tua aw ii a pau laitakin Pathian ii thaa ka sungah hong tum a, ka peang taw dingto tu in, hong phong hi; taciang tua aw in a kizomin, 3“A thi thei mihing awng, Israel mihingte kungah kong puak tu hi. Amate in hong lee do in, a pu a pate bangma in hong lee do lai uh hi. 4Amate a thin uh pui in kei hong zakta bua uh hi. Tua ahikom keima Vaanglianpipa TOPA in amate tungah ka cinopte son tu in nang kong sawl hi. 5Tua tualngalte in nang thu hong ngai uh zong hong ngai bua uh zong, amate kawm ah kamsang khat om ci sia he tu uh hi.


6“Ahihang a thi thei mihing awng, amate ahizong, amate hong ci papo ahizong, na kiita ba het tu hi. Amate in nang hong zawngsak tu a, hong nalh tu hi; aikam hon kawm a ten bang hi tu hi. Tabang ahihang tua tualngalte ahizong, amate ih hong cite ahizong na kiita bua veve tu uh hi. 7Amate in hong ngai kale hong ngai bua kale son tu a kong sawl babang na son tu hi. Amate sia bangbangh tualngalte ziam cisia ciamtee tan.

8“A thi thei mihing awng, kong sonte hong ngai tan. Amate bangin tualngal in tho heak in. Na kam kaa in a, kong piak tu sia ne in,” a ci sia ka za hi. 9Khut khat kei sang hong kithaak ka mu a, laizial khat a toai hi. 10Tua khut in tua laizial sia phalin, taciang a lang le a lang ah lai ki at ka mu hi. Khuangai a kaana te le mauna tau nate a na ki at hi. *

0 comments:

Post a Comment