Laithiangtho (Kaatap Late 1-2)

1. Jerusalem kipawlpui ngeite in ama ___ in ngal in pang uh hi. 
a. leeheak
b. eang
c. zothaw

2. TOPA in Jerusalem banghang ngimh thuak sak ziam? 
a. It lei lamh 
b. Akhialna tam mama
c. Kii huai sa

3. Jeruslam lampuite sia savaite ii mai ah ___ taw kibang hi. 
a. lam amh sakhi
b. a ngal vawt nuam ngalh
c. sazuk ngilkial

4. Jeruslem ngallelna sia kuate in nuisan ziam? 
a. A veangte
b. Angalte
c. Mihing theampo

5. TOPA in Jerusalem khialnate ciamte aa, ___ hi. 
a. thupha pia kik
b. sawm khawm 
c. kam vai tha

6. Thiampite le lampuite sia koisungah thi siat ziam? 
a. Luphung tungah
b. Ngam sungah
c. An zong avakna

7. TOPA in Zion sia ___taw tuam cip hi.
a. khuazing 
b. kaang mei
c. a itna thiangtho

8. A thin uuk ni in  ___ nusia hi.
a. a tate 
b. a Biakinnpi 
c. itna theampo 

9. Jerusalem pasalhuaite sia lei ah bangbangh to ziam? 
a. Zukham in 
b. Mawmawt law liang a
c. Huthe ngawl

10. Ngilkial dangko in akuate kap ziam? 
a. Mihing theampo
b. Patangnote
c. Tanga patangte

11.Patangte koisungah dadam thi ziam?  
a. Lampi tungah
b. A nute kaang sungah
c. A inn mai ah

12. Kamsangte thupulaakna sia bangbangh dong in khial ziam?  
a. Pathian selno tu za dong
b. Baal nungzui tu za dong
c. Kisik kul ngawl tu dong



Kaatap Late 1
1Khatvei lai in mihing taw a kidim
Jerusalem khuapi bangza in ngamkhing ziam,
Leitung ii khatvei a upat ngei ama sia tu in meingong nu khat bang ahi hi;
khuapi teng po pan a tuanngen bel sia sal dinmun ah taaksuk zo hi.
2Zan thapai in ama kap a; thitui a biangkho ah luang suk vahii hi.
A lawm a ngual masa te khat zongh ama heeneam tu kikhe ngawl hi,
A kipawlpuite in ama leeheak in, tu in a ngalin pang tek ta uh hi.
3Judah ii mite sia a cimaw inn pan zawthawk thu taw a kihawlkeak salte ahi uh hi.
Ngamdang ah amate sal in om a, a mun, a ngam ci tu nei ngawl uh hi–
Ngalte in kiim uum a suatak natu lampi bing hi.
4Ni thiangtho nite ah biakna pia tu in, Biakinn ah kuama hong pai ngawl hi.
Tua mun ah lasa ngaknute in vawtsiatna thuak a, a thiampite thuum vangum thei bek hi.
Khuapi kongpite hawm a, Zion in ngim thuak hi.
5A ngalte in ama zo a, amate khutnuai ah koi hi.
A khialna tam mamate hangin TOPA in ama ngim thuak sak hi;
A tate kipummat in saltang tu in kipaipui hi.
6Jerusalem phatna sia maaimang siat zo hi.
A lampuite sia sazuk ngilkial a zawngkhal,
Savaite mai ah a tai ciang a thabo vadilte bang ahi hi.
7Tu in a ngamkhing, a siacip sa Jerusalem khua in nidang a phat hun nung phaw kik hi.
A ngalte khut sung a thet ciang a hu tu kuama om ngawl hi.
A ngal lelna sia a ngalte in nuisan uh hi.
8A minphatna teng bo a, a nguaktang in om in ngual zawnsak thuak hi.
Ama tau in maizum in a mai seal hi.
Jerusalem in lipkhaphuai mawna taw ama le ama kinin sak hi.
9A thiantho ngawlna ol tak kimu a, ahizong ama thuak natute ama in awlmawk ngawl hi.
Ama ngallelna nasia leilam a kuama in ama heeneam thei ngawl hi.
A ngalte in zothal a, ama in TOPA tungah hesuak ngen in kap hi.
10Ngalte in a sumngum theampo suttol hi.
TOPA ii Gentilete pai tu a khaamna mun Biakinnpi sung mama ah a ngalte a tum uh ama in mu hi.
11A mite in bang khatpo neak tu a zon uh ciang tau vangui uh hi; Amate in a nuntak thei natu in a sumngumte an taw theak uh hi.
“Kei hong en ka ven, TOPA awng, ka ngim nga zia hong mu tan,” ci in khua mite au vadel hi.
12“Kei hong en ka ven!” ci in ama kantan in a pai theampo tungah ko hi.
“Kei thuak bangin kuama in na thuak ngei ngawl hi. TOPA in a thin uuk laitak hong thuak sak sia na lalawm hi.
13“Ama in tung sang pan meikuang hong khiaksuk a tua meikuang in ka sung hong kaang hi.
Ama in kei thaang hong sia a, lei ah hong sial hi.
Taciang ama in hong taisan a,
a thuak tan tu in hong nusia hi.
14“Ama in ka khialna theampo ciamtee a, a vekpi in sawm khawm hi;
Tuate ka ngawng kiim ah hong aw sak a, a ngitna thuak la in ka thazawm hi.
Topa in ka ngalte khut sungah hong aap a bangma ka law zo bua hi.
15“Topa in ka ngalkap thahatbelte theampo nuisan lel a;
Ama in ka tangvalte laltham sak tu in ngalkap honkhat puak hi.
Sapit ngoaina sungah sapit ngate kingoai thap bangin ka mite ama in sucip hi.
16“Tua hu in ka mittangte thitui taw kidim hi.
Kuama in hong heeneam thei ngawl a, kuama in hong hanthawn thei ngawl hi.
Ngalte in hong zothal a, ka mite in bangma nei nawn ngawl uh hi.
17“Ka khutte zan ka leng kuama in hong hu ngawl hi.
Mun theampo pan kei hong sim tu ngalte TOPA in sam zo hi.
Amate in a kiihuai nate bangin kei hong vawt hi.
18“Ahihang TOPA sia thutang hi a, keima in a thu ni ngawl ka hi zaw hi.
Hong ngai tavun, mun theampo a om mite awng; a na thuak a ka om hong en tavun.
Ka ngaknute le ka tangvalte sia sal in kipaipui siat zo hi.
19“Ka pawlpui te ka sam a, ahihang amate in hong hu nuam ngawl hi.
Thiampite le lampuite sia khuapi lampite ah a nuntak natu an zongin a vana ah thi siat uh hi.
20“TOPA awng, na ka sak nate, ka thin bot vangui nate hong en tan!
Ka mawnate hangin khuangai in ka thin tamtham hi.
Lampite ah tualthana om a, innsung ngangawn ah thina theng hi.
21“Ka tau nate hong ngai tan, hong heeneam tu kuama om ngawl hi.
Lalcipna nong thuak sak manin ka ngalte lungdam uh hi.
Nong kamciam ni hong tung sak tan a, keima thuak bangin ka ngalte in thuak sak in.
22“Amate ngitlo nate theampo hu in amate ningkhiin in,
Ka mawnate hu in daan nong piak bangma in amate daan pia in.
Thasiatna taw ka tau a, ka thin ka lung na hi,” ci hi.

Kaatap Late 2
TOPA ii Jerusalem Daan A piakna
1TOPA in a thin uukna taw Zion sia khuazing taw tuam cip hi.
A vantung hoina te ama in zancip sak zo hi.
A thin uuk ni in a Biakinnpi ngangawn nusia hi.
2TOPA in Judah ngam khuano theampo hesuakna om ngawlin laltham sak a,
Ngam dalna kulhpite baltham hi.
Ama in kumpi ngam le a ukte maizum pia hi.
3Ama in a thin so in Israelte thahatna saat tham hi.
Ngalte hong sim ciang ama in hong hu nuam ngawl hi.
Kaangmei bangin ama in ei hong zaap keak a, na theampo laltham sak hi.
4Eite sia ngal bang phetin a thaltangte taw hong tuung hi;
Ih lungdamna le ih kisak pui thei te theampo ama in thatlum hi.
Hi lai Jerusalem ah ama thin uukna meikuang ih thuak hi.
5TOPA in ngal khat bangin Israel sucip hi.
Ama in a kulhte le kumpi innte a zancip sa in nusia hi.
Ama in Judah mite tungah a bo thei ngawl heena tung sak hi.
6Ama in ama ih biakna mun Biakinnpi sia a bebekin sutham hi.
Ama in ni thiangthote le Sabbath nite bo sak hi.
Kumpipa le thiampipa in ama thin uukna a kibangin thuak khawm uh hi.
7TOPA in a biaktau nial a, a thiangtho a Biakinnpi taisan hi.
Ama in Biakinn pangte sia ngalte in baltham sak hi.
Khatvei lai in lungdamna taw ih biakna munah amate ngal zo in au uh hi.
8Zion khuapi luphungte a cipthap tu sia TOPA in ciangtan zo hi.
A vekpi a sia siat tu in ama in see zo hi.
Tu in tausaangte le luphungte zancip dipdeap hi.
9Kongpite sia leivum suangvum sungah kivuhcip a,
a zawlte a bebek in kivaat tham zo hi.
Kumpipa le uliante tu in sal in om hi.
Thukham kihil nawn ngawlin,
kamsangte in mu kholna TOPA tung pan nga ngawl hi.
10Jerusalem ii pasal huaite sia huthe ngawlin lei ah to nilneal uh hi.
A lu tungah leivui kithe in khau-ip puan silh uh hi.
Ngaknu note lei ah a lu kun uh hi.
11Ka ka kaana in ka mitte paat zo a,
ka thin sia nat tawpin na hi.
Ka mite lalthapna hangin hee in ka vul ngawp hi.
Patangnote le nausente khuapi lampite ah butthi uh hi.
12Ngilkial dangtaak in amate in a nute kaa uh hi.
Amate sia a liamte bang phetin lampi ah puk uh a,
Taciang a nute ii kaang sungah dadam in thi uh hi.
13Jerusalem awng,
kong it Jerusalem awng,
bang kong ci thei tu ziam?
Bangbangin nang hong heeneam thei tu khi ziam?
Kuama in hi bang peuma in thuak ngei ngawl hi.
Na tuasiatna sia tuipi bangin mong nei ngawl a,
bangma muanmawk tu om ngawl hi.
14Na kamsangte in
leeilot thu ngawl po nang tungah son tu nei ngawl hi.
Amate thuhilna in
na mawna pholaak ngei ngawl ahikom nang hong theam ahi hi.
Amate in na kisii kik tu
a kul ngawl tu dongin nang khua hong ngaisun sak hi.
15Khuapi kantan in a pai
mihingte in nangma hong zawnsak et uh hi.
Amate in Jerusalem ii zanthapna sia a lu uh thingin nuisan uh hi:
“Hisia tua khuapi hoi sia ma hi kana ziam?
Hi sia leitung bup ii kiphatsak pui sia hi ka na ziam?” ci uh hi.
16Na ngalte theampo in hong selno in etsatna taw nang hong salh uh hi.
Amate mukmen in zawnsak kam taw,
“Khuapi laltham sak zo hing!
hi sia ih nga laak bel ni hi!” ci uh hi.
17TOPA in hong tawnna teng a khak belin tung sak hi.
Ama in eite hun saupi lai a
kidop natu hong hil sa bangin hesuakna mama om ngawlin
hong laltham sak hi.
Ama in ih ngalte in ngalzo sak a, ih ngal lel hu in amate lungdam sak hi.
18Jerusalem awng, na luphungte in TOPA tungah ko tahen!
Na thituite a sun a zan in nguntui bangin luang sak in;
heena le khuangaina taw nangma le nangma kivulcip sak in!
19Zan khua teak TOPA tungah ko tu in tho thithe in!
Na thin na lung theampo a mai ah lui in a,
ama tungah- lampi kingh sim ah pukhong in a thi tu
na patangte atu in hesuak ngen in.
20En in, TOPA awng, ngimna na thuak sak mihingte en in!
Nupite in a it a tate ii sa ne uh hi!
Thiampite le kamsangte sia Biakinnpi sung mama ah kithatlum hi!
21A moi a haam a kibangin lampi ah thi uh hi.
Ngalte in ngaknu le tangval teng namsau taw thatlum uh hi.
Na thin uuk ni in hesuak ngawlin amate na thatlum hi.
22Nangma in kei hong lauthawng sak tu in
ka ngalte sia poai siim tu bangin na sam a,
amate in kei hong uumci uh hi.
Taciang tua na thin uuk ni in kuama suakta zo ngawl hi.
Amate in itna taw ka vak ka taa ka tanote suamlum uh hi.

0 comments:

Post a Comment