Laithiangtho (Kaatap Late 4-5)

1. Zion ii tangvalnote ___bangin kivawt lel hi.
a. leibeal 
b. nganhing
c. puansia lomh

2. Nop sakna inn sung pan a khangte in koisung ah an zong ziam?
a. Niinbung sung
b. Lampi tungah
c. Ngalte antaakte

3. Ngal sungah athite sia akuate sang in hampha zaw ziam? 
a. Kumpi inn sung
b. A thi khakte
c. Ngilkialte

4. Akuate athi sak hu in siatna tawk uh ziam? 
a. Thiampite
b. Maw nei ngawlte
c. Kamsangte

5. A vak lampuite banghang kitham ngam ngawl ziam?
a. Chisan baang
b. Zaataak huai
c. A puan thiangtho

6. Zion in mawna thaman pia ahihang, Edom in ___ tu hi.
a. TOPA daan tawk
b. pia ngawl 
c. ki pum aap lel

7. Ngamdang mite sia koi sungah om ziam? 
a. Kumpi inn
b. A inn sungah
c. Mualtungah

8. Jerusalem siat zawk Egypt le Assyria ah bang hi in pai uh ziam? 
a. Ngaltaai
b. An zong
c. Sila in kikaai

9. Israelte in luangkham liang in bang zong ziam? 
a. An
b. Ngasa
c. Thumaan thutak

10. Lampuite bangbangh thalup sak ziam? 
a. Nguiawk sak
b. naam taw kiholh
c. Kibantan

11. Patangnote sia a thing puak uh khopin ___uh hi.
a. kap
b. hoi vatut 
c. puuk thisiat

12. Bang hang in khua pha tak mu thei ngawl uh ziam? 
a. A mittang pan saat thuak
b. A  thituite hangin 
c. A thazawm


Kaatap Late 4
Jerusalem khua A bo zawkciang
1Ih kham tee vakilte mualmang zo hi;
Biakinnpi sakna suangte lampi ah ki thethaang in om hi.
2Kham bangin ei atu a,
a manpha Zion ii tangvalnote
tu in leibeal thathongte bangin kivawt lel hi.
3Ngiapui ngangawn zongh in a note noai pia tu hi,
ahihang ka mite ahile
a tate tungah a tatsia kalauh vacim puite bang ahi hi.
4Amate in a nausente ngilkial dangtaak in thi sak hi;
patangte in an ngenin vak hi,
ahihang kuama in amate an pia ngawl tu hi.
5An limbel a ne ngei mihingte sia lampi ah anngawl in thi uh hi;
nop sakna inn sung pan a khangte in an zongin ninbung tok uh hi.
6Ka mite sia thakhat thu in Pathian khut sa a thuak
Sodom a teang mihingte sangin nasia zaw in daan kipia hi. *
7Ih kumpi tapate sitbaang ngawl,
vuuk bangin thiangtho,
thahat in taktai a ciidam siuseau tek hi.
8Tu in amate sia kuama heak ngawlin
lampi ah puk peakpuk uh a,
thi in a mai mual uh hi;
a vun uh thingko bangin
ko in a ngute tungah bel hi.
9Ngal sung a a thite sia neak tu an om ngawl a,
dadam in a thi, a thi khakte sangin phazaw lai hi.
10Ka mite tungah a tung tuasiatna sia cizat huai mama hi,
a nute in a tanote an in a neak tu in tui huan uh hi. *
11TOPA in a thin uuknate khe nawn ngawlin hong buak hi.
ama in mei taw Zion halin kaangtum sak hi.
12A kuama peuma, ngamdang a ukte ngangawn in
Jerusalem ii kongpi sungah ngalte tum thei tu ci in um ngawl uh hi.
13Ahihang hi bang thute piang hi,
banghangziam cile maw nei ngawl mihingte a thi sak hu in
a kamsangte maw a, a thiampite a khial uh hang ahi hi.
14Mittawte bangin a lampuite lampite ah vakvai uh a;
chisan baang ngawp ahikom kuama in amate tham ngam ngawl uh hi.
15Mihingte in amate oksan a,
“Tai vun! note kiihuai nu hi!
Kei hong thutha heak vun!” ci uh hi.
Tua ahikom amate ngam khat pan ngam khat ah pai kakoai a,
kuama in saang ngawl hi.
16TOPA in amate awlmawk nawn ngawl a, ama mama in amate thethaang hi.
Ama in ih thiampite le ih lampuite bangma in hong hen sak ngawl hi.
17Eite in hong pai ngawl tu bul huna lamen in
et zawk nawn ngawl tu dong khua ih e en hi.
Eite in piak tu nei ngawl ngam khat tung pan huna ih ngangak hi.
18Ngalte in eite hong encik a,
lampi liante ah vak zongh ih vak thei bua hi.
Ih ni te bo zo a, a tawpna hong theng zo hi.
19Muvanlaite van pan
suktun a hong len sang
a manlang zaw in
amate in ei hong delsuk hi.
Amate in mual tungah
ei hong sulzui a;
senneal ngamah muanmawk ngawlin
amate in ei hong man hi.
20Amate in ngalte khut sung pan
hong dal zo tu in ih muan,
ih nuntakna naak a hi,
TOPA ii teal sa kumpipa man uh hi.
21Nui vun, Edom le Uz mite awng;
na lungdam thei uh lai teng lungdam vun.
Na tuasiat natu uh zongh hong tung tu hi;
note zongh maizumna taw na pum nguakin na hoi vacit tu uh hi.
22Zion in a mawna thaman pia zo a,
TOPA in salin eite hong koi nawn ngawl tu hi.
Ahihang Edom awng, TOPA in nang daan hong pia tu hi,
ama in na ngamtat khialnate pholaak tu hi.


Kaatap Late 5
Hesuak natu Thungetna
1TOPA awng, ko tung a hong piang thute phawk in.
Kote hong en tan a, ka maizumna uh mu in.
2Kote neisa sia khualte khut sungah om a;
ngamdangte sia kote inn sungah teang hi.
3Kote pate sia ngalte in thatlum zo a,
tu in kote nute sia meingong suak uh hi.
4Kote dawn tu tuidamte manh piak kul a,
kote thu tu thingkangte lei kul hi.
5Kalauhte le laate bangin hong kihawl ngawp a,
toi mama hi kale ung hong tawlnga sak ngawl hi.
6Nuntak valiai natu an nga natu in
Egypt le Assyria ah an ngenin ka pai uh hi.
7Kote pute pate maw uh hi;
ahihang tu in amate om nawn ngawl a,
amate mawna hu in kote in ngimna ka thuak uh hi.
8Salte sangin a pha zaw tuan ngawl mihingte in kote hong uk a,
amate khutsung pan kuama in kote hong hun thei ngawl hi.
9Ngamsung theampo ah tualthatte vak kakoai a,
an ka zon uh ciang, luang ka khaam uh hi.
10Ngilkialna in kote ka ci uh hong suuk sak a,
kote vunte meikhuk bangin a sat dong ka thuak uh hi.
11Zion Mualtung mama ah kote zite hong buan sak uh a,
Judah ngam khuano sung theampo ah kote tanute
hong khialpui sak uh hi.
12Kote lampuite hong mat sakin ngui awk sak a;
kote pasal huaite hong zatak sak bua uh hi.
13Kote tangvalte sia sal bangin zawthawk thu taw an ngoai sak uh a; patangnote sia a thing puak uh khopin hoi vatut uh hi.
14Khanghaamte khuapi kongpi ah to nawn ngawl a,
khangmoite in la sa nawn ngawl uh hi.
15Kote lungdamna kote nuntakna pan tai siat zo a,
kote lapna teng sia khuangaina taw kilaih hi.
16Kote kisuantaak nate khat zongh taang nawn ngawl hi.
Kote ka khial uh a,
tu in a bo ka hi uh hi.
17Kote ka thin ka lung mama uh na a,
kote thituite hangin pha tak khua ka mu thei bua uh hi.
18Zion Mual sia ngamkhing ngamdai in kinusia ahikom
tua a kisia sa munte ah ngam uite vak hi.
19TOPA awng, ahihang nangma in,
a tawntung Kumpipa na hi a,
hun tawp dongin na uk tu hi.
20Banghangin tu tan vei kote hong nusia ni ziam?
Kote nong phawk kik ngei tu ziam?
21Na kung ah kote hong ciapui kik tan,
TOPA! awng kote hong ciapui kik tan!
Taanghlai kote minthanna teng hong pia kik tan!
22Tua ahibale kote a tawntung in hong nial tu ni ziam?
Na thin uukna in ciangtan nei ngawl ziam?

0 comments:

Post a Comment