Laithiangtho (Kumhpite Niina 3-4)

1. Moab kumhpipa Mesha in bang khawi ziam? 
a. Tuu
b. Khui
c. Laa le keal

2. Israel, Judah le Edomte in banghang in Moab sim sawm ziam? 
a. Amate thato
b. Ngii kitu
c. Israel langpan

3. Elisha in akua taw kipe-aw nuam ngawl ziam? 
a. Judah kumhpipa
b. Israel kumhpipa
c. Amon kumhpipa

4. Bangbangh ahi ciang Elisha ii sungah TOPA thahatna tum ziam? 
a. Meihal biakna vawt ciang
b. Thu anget ciang
c. Tumnging atum ciang

5. Moabte in tuitungah nitang sia bangba mu ziam? 
a. Chisan
b. Khualeng
c. Meikuang

6. Israelte in Moabte ii ___ sia suangtum taw asiat natu vawt hi.
a. Milim biaktaute
b. kumpi innte
c. leitang pha lote

7. Pasal thi meingongnu in aleibat lo zo bua le bang ahi kul tu ziam? 
a. A innkuan sila suak
b. Atapate sila suak
c. Ama thalup thuak tu

8. Thambeal sungah sathau athun laitak ___ hi. 
a. khuavak taang
b. pau ngawl in om uh
c. Kongkha khaak uh

9. Elisha zin ado tawntung te atu TOPA in bang pia ziam? 
a. Tapa khat
b. Ngan hau sak 
c. Neilelamh pia thua

10. Elisha sia koisungah om ziam? 
a. Olive mual
b. Zion mual
c. Camel Mualvum

11. Kamsang te in satui sungah ___ ahel uh le ngu suak hi. 
a. uum ngui
b. uum nga le lopa
c. ngasa nam khat

12. Elisha ii kamsang bangza taw om khawm ziam? 
a. 400
b. 700
c. 100


Kumpite Niina 3
Israelte le Moabte Ngal kidona
1Judah ah Kumpipa Jehoshaphat a maan zawk a kum sawmliat laitakin, Ahab ii tapa Joram sia Israelte kumpipa suak a, taciang ama in Samaria panin kum sawm le kum nii sung maang hi. 2Ama sia TOPA tungah mawna vawt a, ahizong a pa le a nu Jezebel za in sia ngawl hi; ama in a pa ii vawt Baal biak natu milim sia baltham hi. 3Ahizong, ama mai ah a maang Nabat ii tapa, Kumpipa Jeroboam bangma in Israel mawna sungah lampui a, kheal nuam ngawl hi.



4Moab te Kumpipa Mesha in tuu khoai a, kumsim in ama in Israel kumpipa tungah tuunu 100,000 le tuumul 100,000 ii mul teng shia in pia hi. 5Ahihang Ahab a thi ciang Kumpipa Mesha in Israelte langpan in tualngal tho hi. 6Thakhat thu in Kumpipa Joram in Samaria nusia in a ngalkapte khawmtua hi. 7Ama in Judah ah Kumpipa Jehoshaphat tungah kam thaak a: “Moab kumpipa in kei langpan in ngal hong tho hi; ama sim tu in kei nong pawm tu ziam?” ci in dongh hi.

“Hong pawm tu khi hi,” Kumpipa Jehoshaphat in zo hi. “Keima le a mite le ka siphute, na dei babangin zeak in. 8Ama ih sim natu koisung lampi tawn tu hi ziam?” ci hi.

“Edom duisung kantan in a pai lamsau sia ih tawn tu hi,” ci in Joram in zo hi.

9Tua ahikom Kumpipa Joram, Judah le Edom te kumpipate dingkhia uh hi. Ni sali a pai zawk uh ciang a tui neak tu uh bo a, mihing atu ahizong, vanh pua ngannote atu ahizong bangma om nawn ngawl hi. 10“Man sa hi hing!” Kumpipa Jehoshaphat in ci hi. “TOPA in ei teng thum sia Moab kumpipa ii a uukpo hong vawt tu in hong koi hi!” ci hi.

11Kumpipa Jehoshaphat in, “Ama tungtawn in TOPA ih dok thei tu hi sungah kamsang khat om ngawl ziam?” ci hi.

Kumpipa Joram ii ngalkapte sung ulian khat in zo a, “Shaphat ii tapa Elisha hi sungah om hi. Ama sia Elijah ii khut dawn pa ahi hi,” ci hi.

12“Ama sia kamsang maan khat hi,” Kumpipa Jehoshaphat in ci hi. Tua ahikom kumpipate thum sia Elisha kungah pai uh hi.

13“Banghangin nang hong hu tu khi ziam?” Elisha in Israel kumpipa munah ci hi. “Na pa le na nu ii dok kamsangte dongh tu in pai tan,” ci hi.

“Hi ngawl hi,” ci in Joram in zo hi. “TOPA in kumpipa thum teng sia Moab kumpipa ii a uuk po hong law tu in hong koi hi,” ci hi.

14Elisha in zo a, “A na ka sep sak a nungta TOPA taw kiciam khi hi, na kipawl puipa Judah kumpipa Jehoshaphat ka zatak hang hi bale nang taw bangma kipee aw nuam ngawl khi hi. 15Tu in tumthei thiam khat hong sam tavun,” ci hi.

Tumthei thiampa in tengtong hong tum tak ciang TOPA ii thahatna Elisha tungah hong pai a, 16taciang, ama in, “Hi sia TOPA pauna hi: ‘Luamko dungah dum to vun. 17Vui ahizong ngua ahizong na mu mun uh a om ngawl hang, hi luam sia tui taw hong kidim tu a, taciang noma, na khuite uh le na vanh pua ngannote ii dawn tu kicing piikpeak in na nei tu uh hi,’ ” ci hi. 18Taciang Elisha in zomto a, “Hisia in TOPA atu a ol mama nasep hi a; Moabte tung zongh ah zawna hong pia tu hi. 19Noma in amate ii a hoi mama khuapi, kulh taw a kidal te na zo tu uh hi; amate ii thingnga kungte na phuktham tu uh a, a tuinaakte khaktan in, leipha a lote sia suangtum taw siinin na lalcip sak tu uh hi,” ci hi.

20A khuavak ni zing ciangin zingsang sangaw biakpiakna vawt hun laitakin, Edom sang pan tui hong luang a, leitangh te khuumin cing hi.

21Kumpi thum te in amate sim tu in hong pai hi ci in Moabte in a zaak uh ciang pa a minpiang ngalhiam toai thei theampo a moibel pan a haambel dong kisam uh a, ngamngi ah amate dinmun la sak uh hi. 22A zing ciang hong thaw tak ciang, tui tungah ni hong taang a, tui sia chi bang a san in kimu hi. 23“Chisan hi,” ci in amate in au uh hi. “Ih ngalte thum in amate le amate kido in kithat hi tu hi. A ngiaphual pai in phuul tawng,” ci uh hi.

24Ahihang amate ngiaphual hong thet uh ciang, Israelte in amate do in, amate not kik uh hi. Israelte in del tan a, Moabte that in, 25a khuapite laltham sak uh hi. Leipha lo khat po a kantan uh ciangin Israel misim in tua lo sungah suang lawn uh a, a lote suangtum taw a kisit dongin lawn uh hi; amate in ciktui naakte zongh hucip uh a, taciang thingnga kungte phuk uh hi. A khakbel ciangin a kumpi tona khuapi Kir Heres bek hong taanglai a, taciang suangtum lawnte in uumci in sim uh hi.

26Moab kumpipa in ama ngallelna a phaw tak ciang ama in namsau saat thiam mihing zasali tealin a ngalte kawm panin Syria kumpipa kungah suakta tu in hanciam a, ahihang tangtun ngawl hi. 27Tua ahikom ama in ama za laih tu a tapa upabel sia la in, khuapi luphung tungah Moab pathian tungah sangaw biakpiakna in pia hi. Israelte sia lau ngawp uh a, tua ahikom amate khuapi pan nungkin in amate ngamah cia kik uh hi.

-------------------------------------------------------------

Kumpite Niina 4
Elisha in Meingong Zawng khat Hu
1Kamsang pawl khat sung a kihel khat ii meingong nu sia Elisha kungah pai in, “Topa awng, ka pasal sia thi zo hi! Na heak bangma in ama sia Pathian kiita mihing khat hi, ahihang tu in ama ii lei a batna pasal khat hong pai a, ka pasal ii leiba taangin ka tate nii sia sila tu in la tu hong kithoai hi,” ci in son hi.

2“Nang atu bang hong law sak tu khi ziam?” ci in ama in dongh hi. “Inn ah bang nei ni ziam, hong son tan,” ci hi.

Ama in,“Olive thau thawl khat simngawl bangma dang nei mama ngawl khi hi,” ci hi.

3Elisha in, “Na innpaamte kungah pai tan a, thambeal a tam thei zaza na zawng tan,” ci in sawl hi. 4“Tua zawkciang nangma le na tapate inn sungah pai in, kongkha khak vun a, thambealte ii sungah sathau bungh tu in kipan tavun. Khat a dim simin a hui ah heam vun,” ci hi.

5Tua ahikom nupi nu in a tapate taw inn sungah tumin, baangkua a kha zawkciang olive thau a om thawlno sia panin a tapate ii hong ciapui thambealte sungah sathau sung suk hi. 6Amate in thambealte a dip siat zawk uh ciang nupi nu in a dang a om lai ziam ci in dongh hi. “Tasia a khakbel hi,” a tapate khat in ci hi. Tasia ciang olive thau a luan hong tawp hi. 7Ama in kamsangpa Elisha kungah pai kikin, tua pa in ama munah, “Olive thaute zuak tavun a, na leiba theampo lo tavun, taciang a sum a khom hong vaal tu a, nang le na tapate in tua taw na nungta tu uh hi,” ci hi.

Elisha le Shunem pan Nupi Hau Khat
8Nikhat ni in Elisha sia Shunem khua ah haw hi, tua munah nupi hau khat om hi. Ama in kamsang pa sia an ne tu in sam a, tua panin kipan Shunem ah a pai simin nupi ii inn ah an ne hi. 9Ama in a pasal munah, “Hi sungah hong pai tawntung pasal sia mi thiangtho khat hi vangiat tu hi ci in ka he hi. 10Innkhum tungah khaanno khat vawt tawng, lupna khat, sabuai khat, tokhum khat le mei-inn khat tua khaan sungah ih koi tu hi, taciang ama hong haw simin tua munah om thei tu hi,” ci hi.

11Ni khat ni ciang Elisha sia Shunem ah hong heak kik a, toitang tu in a khaan ah kaato hi. 12Ama in a naseampa Gehazi munah, nupinu samin sawl hi. Ama hong pai ciang, 13ama in Gehazi munah, “Ei ii ih kitaangsap teng hong sik natu hong ngim law hu in ama atu bang vawt sak tu khi ziam dongh in. Kumpipa tungah ahizong ngalkap ukpipa tungah ahizong kammal khat po son sak thei tu khi ziam?” ci hi.

“Hi sungah ka mite kawmah ka kisap theampo nei khi zam,” ci hi.

14Elisha in Gehazi munah, “Tua ahile ama atu bang vawt sak thei tu khi ziam?” ci dongh hi.

Ama in zo a, “Ama in tapa nei ngawl a, a pasal le huai zo meak hi,” ci hi.

15“Ama hi sungah hong pai natu son in,” Elisha in thupia hi. Ama hong pai a, baangkua ah hong ding hi, 16taciang Elisha in ama munah, “Mai ciang hi hun hong thet ciangin tapa khat na khut sungah toai tu ni hi,” ci hi.

Ama in “Aw! nong hesuakna in leeilot thu hong son heak in. Nang sia Pathian mihing ni hi,” ci hi. *

17Ahihang Elisha ii ci bangin mai kum tua hun khawng tu ciangin ama in tapa khat hing hi.

18Tuazawk kum tawmvei ciang anlaak hun laitakin, patangno sia zing khat a pa taw a pua ah hong pai hi, a pa sia lo sungah an late taw ding hi. 19Thakhat in patangno sia hong au a, “Ka lutang na hi! Ka lutang na hi!” ci hi.

A pa in, “Patangno sia a nu kungah na puak tan,” ci in naseamte khat sawl hi. 20Naseam pa in patangno sia a nu kungah puak kik a, a nu in ni sun dong a kaang sungah toai a, tua hun ciang a ta thi hi. 21Ama in patangno sia Elisha ii khaan ah kaato pui in lupna tungah sialin nusia a, a nung pan kongkha khak hi. 22Taciang ama in a pasal samin, ama munah, “Naseamte khat hi sungah laa taw hong pai sak tan. Kamsang pa Elisha kungah ka pai kul tu hi. A manlang thei belin hong heak kik tu khi hi,” ci hi.

23“Banghang tu ni na pai kul tu ziam? Tu ni sia Sabbath le hi ngawl Thathak Poai ni le hi ngawl hi,” a pasal in ci hi.

Ama in, “Pha maw bo,” ci in zo hi.

24Taciang ama in laa a kungh thua sakin, naseam pa thupia hi. “Laa sia a manlang thei za in pai sak in, keima kong sawl ngawl po hai sak heak in,” ci hi. 25Tabangin ama ding khia in Elisha ii omna Carmel Mualvum ah pai hi.

Ama ii hong pai sia Elisha in a khuala thithim na pan mu a, a naseampa Gehazi munah, “En in, zia sungah Shunem pan nupinu hong pai hi! 26Manlang in pai tan a, ama ahizong a pasal ahizong a tapa ahizong na theampo a kimang thei ziam, dawp tan,” ci hi.

Nupinu in Gehazi munah na theampo pha hi ci hi, 27ahihang Elisha kung a thet ciang a mai ah kun sukin a peangte pom hi. Gehazi in ama sawn tu in kithoai ahihang Elisha in, “Koi po in. Ama nasia takin a thin kiam ahi hunlam mu ngawl ni ziam? Taciang TOPA in a bang thu ci in kei hong son ngawl het hi,” ci hi.

28Numei nu in ama tungah, “Topa awng, tapa khat nang tungah hong ngen kana khi ziam? Lametna saangpi ka nei thaak tu in hong hi heak in hong ci hi ka na ngawl khi ziam?” ci hi.

29Elisha sia Gehazi sangah kiheakin, ama munah, “Manlang in! Ka ciangkhut la in pai tan. Lampi ah na kisik pui papo paupui tu in tawlnga heak in, taciang khat po in hong paupui le zong ama na zo kik natu hun bo sak heak in. A inn ah tangtan in pai tan a, patangno sia tungah ka ciangkhut na nga tan,” ci hi.

30Numei nu in Elisha munah, “A nungta TOPA tung le nang tungah ka thumaanna taw hong kiciam khi hi, nang hong nusia ngawl tu khi hi!” ci hi. Tua ahikom amate in hong heak kik khawm uh hi. 31Gehazi sia Elisha ii mai ah paikhol in, a ciangkhut sia patangno ii tungah nga in om ahihang bangma a nging le om ngawl, nuntakna lim a kimu le a om bua hi. Tua ahikom ama Elisha kungah hong heak kik a, taciang hi bangin ci hi. “Patangno sia khanglo ngawl hi.”

32Elisha hong thet ciangin, ama innkhan sungah hong tum a, patangno a lupna tungah a thi sa in om mu hi. 33Ama in kongkha khak in TOPA tungah thu ngen hi. 34Tua zawkciang ama in patangno tungah boksuk a, a kam le a kam, a mit le a mit, a khut le a khut a kisi tu in bok suk hi. Tabangin patangno ii tungah kizan in a bawsuk ciang patangno ii cii lum tu in hong kipan hi. * 35Elisha hong tho a, khaan sung tengah hong vak in, tua zawkciang pai kik a, patangno ii tungah khatvei ma hong kizan kik hi. Patangno sia sali vei hetchia lo a, tua zawkciang a mit hak hi. 36Elisha in Gehazi sam a, patangno sia ii nu samin sawl hi. Ama hong sungtan ciang ama ii munah, “Hi sungah, na tapa!” ci hi. 37Ama Elisha ii peangah kisep suk a, a mai lei pha sak hi; tua zawkciang ama in a tapa la in paisan hi.

Na Lamdang Lakna A dang Niite
38Khatvei ngam buppi sungah kialpi a tun khat lai in Elisha sia Gilgal ah heak kik hi. Ama in kamsangte pawlkhat a hil laitakin, a naseampa sawlin bealpui khat mei tungah suangin satui huanin sawl hi. 39A naseamte khat lo sungah pai in lopa pawl khat la in pai hi. Ama in uum ngui khat mu a, uum nga a puak zawk za lo in ciapui hi. Ama in tuate ciapui in bang ziam ci in he ngawl bul a zen zawkciang satui sungah tha hi. 40A mihingte atu satui sia bungh in ne sak tu in ahi ciang, amate in tep a, Elisha munah satui sia “Ngu kisaw hi!” ci uh a, tabangin a ne bua uh hi. 41Elisha in anvui pawlkhat ngenin beal sungah tha hi, taciangin ama in, “Amate neak tu satui pawlkhat buh thua lai vun,” ci hi. Tua zawkciang satui sia bangma siat huai nawn ngawl hi.

42Hun dang khat ma ah, Baal Shalishah panin pasal khat hong pai a, tua kum an kila masa bel mangtaang taw a kivawt anluum luum kul le vaimim ngap kibal thak pawlkhat hong paipui hi. Elisha in a naseam pa munah tua kamsangte, tuate taw vaakin sawl a, 43ahihang naseampa in zo kik in, “Mihing zakhat atu hi teng kikhom tu in um ni ziam?” ci hi.

Elisha in zo a, “An neak tu in amate pia in, banghangziam cile ama in ne tu a, a neak vaal zongh om tu hi, Topa in ci hi,” ci in zo hi. 44Tua ahikom a naseam pa in an lui a, taciang TOPA ii ci bangma in, amate theampo in ne a, a vaal zongh pawlkhat om hi.

0 comments:

Post a Comment