Laithiangtho (Kumhpite Niina 7-8)

1. Miphak bangza pha ziam? 
a. 3
b. 2
c. 4

2. Syriate ngaisutna ah Israelte in Egypt le akuate cial sa ziam? 
a. Etheopia
b. Moab
c. Hit

3. Miphakte in Syriate ataaina thu kua kungah hesak masa ziam? 
a. Kumpipa
b. Kopi cingte
c. Meingongnu

4. Syriate taai nathu sia ngalte in leheak hi tuh a umhpa sia akua ziam? 
a. Kumpipa 
b. Ngalkapmangpa
c. Kumpi lai-atpa

5. Syriate in angiaphual nusiatna thu koisung dong kantel uh ziam? 
a. Jordan ngun dong
b. Sinai mualdong
c. Camel mual dong

6. Kumpipa in ama acingpa sia bang seam sak ziam? 
a. Lai-atpi 
b. Kongpi cing 
c. Ngalkapmang

7 Shunem nupinu in kialpi pial in koisungah taai ziam?  
a. Egypt
b. Moab
c. Philistia

8. Syria kumpi Benhadad in bang taw kisai thu Elisha dongh ziam? 
a. Ngaldo vai
b. Kialpi vai
c. Thi le hin thu

9. Elisha in ___ thu mukholna nei in Hazael maitang salh hi. 
a. a thina tu 
b. cizaat huai tualthat tu
c. milim biakna

10. Syria kumpipa Benhadad athat sia akua ziam? 
a. Hazael
b. Ahab
c. Joram

11. Topa in Judah sia banghang susia nuam ngawl ziam? 
a. David taw kiciam
b. Abraham
c. Jacob

12. Kumpi Ahaziah le Kumpi Joram kipawl khawm in ____ do uh hi. 
a. Moab
b. Syriate
c. Egypt


Kumpite Niina 7
1Elisha in zo a, “TOPA ii pauna ngai in! Zing ciang tu hunin Samaria ngam sungah a phabel zungtaang pound sawm ciang ahibale mangtaang pound kul ciang nguntang khat taw lei thei tu nu hi,” ci hi.
2Kumpipa a cing tuam pa in, “Tabang piang thei ngawl tu hi— TOPA in thakhat thu in antang hong puak hial zong piang thei ngawl tu hi,” ci hi.
Elisha in, “Tabang a pian sia mu tu ni hi, ahihang nang in tuate na ne batu hi,” ci in zo hi.
Syria Ngalkapte Dingkhia
3A phaak pasal li sia Samaria kongpi pua sangah om uh hi, taciang amate khat le khat hi bangin kipaupui uh hi, “Banghangin hi sungah ih thi dong ngak tu hi ziam? 4Khuapi sungah tum tu le lui thathong hi, banghangziam cile, tua munah ih pukthi tu hi; ahihang hi sungah om leang zong ih thi veve tu hi. Tua ahikom Syriate ii ngiaphual sungah tum ka tawng; a sia bel amate ii hong vawt thei sia hong thatlum tu hi, ahizong ih nuntakna hong kikhoaikhe tha tu hi,” ci uh hi. 5Tua ahikom khuangial tu a kithoai ciang, amate in Syriate ii ngiaphual ah pai uh hi, ahihang tua mun a thet uh ciangin, tua munah kuama a na om bua hi. 6TOPA in Syriate ii zaakna ah ngalkap hon lianpi le siphu te le ngalleangte ngin za sak a, taciang Israel kumpipa in Hit te le Egyptte ngal cialin, amate sim sak hi ci in Syriate in ngaisun uh hi. 7Tua ahikom tua nitak in Syriate in amate nuntakna kihuk natu in taikeak uh a, a puanbukte, siphute, le laate nusia uh in a ngiaphual sia a om babangin nusia uh hi.
8Pasal phaak li teng in ngiaphual kiil a thet uh ciang, puanbuk khat ii sungah tum uh a, tua munah a mu po ne in dawn uh hi, ngun, kham le puansilh a mu po zongh zamh uh hi, taciang amate pusuak in phual uh hi; tua zawkciang amate hong heak kik a, puanbuk dang khat ah tum in a ngamtat ngei uh bangin taa uh hi. 9Ahihang amate khat le khat hi bangin kici uh hi, “Hi bangin ih ngamtat tu hi ngawl hi! Eima in thuthang pha nei a ciang, eima bek ii ih kep tu hi ngawl hi. Tua thu son tu zingsang dong ih ngak le daan hong kipia nanak tu hi. Thakhat in pai in, kumpipa ii uliante munah ko tawng,” ci uh hi. 10Tua ahikom amate sia Syriate ii ngiaphual nusia in Samaria ah a heak kik zawkciang, kongpi cingte munah oksan uh a, “Ko teng Syriate ii ngiaphual ah ka pai uh le kuama mu ka nei bua uh a, a pau a haam zongh za ngawl khu hi; a siphute le a laate zongh a khau uh kisuut ngawl hi; taciang puanbukte zongh Syriate ii nusiat bang linlian in om hi,” ci uh hi.
11Kongpi cingte in tua thu taangko uh a, kumpi inn sung dongin hong kiko uh hi. 12Zan lai ma hi napi kumpipa hong tho a, a uliante munah hi bangin ci hi. “Syriate ii ngealna bang ziam ci in hong son tu khi hi! Amate in hi sungah kialpi a tun sia he hi, tua ahikom amate in ngiaphual nusia in ngam sungah a buh tu in pai hi. Amate in ei sia khuapi nusia in pai tu a, an zong tu in hong um hi, tasia ciang amate in ei sia hong hing mat tu a, khuapi hong suan tu hi,” ci hi.
13Ama uliante khat in,“Khuapi sung a mihingte sia bangbang po ahizong a thi sa te taw kibang in a lal hi zo hi hing. Tua ahikom a thi mong siphu nga teng taw pasal pawl khat pai sakin, bang thu om ziam kan sak tawng,” ci hi. 14Amate in pasal pawl khat teal in, kumpipa in ngalleang nii taw pai sak a, Syria ngalkapte bang tat ziam ci in dawp tu in thupia hi. 15Pasalte Jordan ngun dong pai uh a, taciang lampi dungah puan le vanh Syria ngalkapte ii a tai kawmin a nusiatte mu uh hi. Tua zawkciang amate hong heak kik uh a, kumpipa tungah thu ko uh hi. 16Samaria mite Syriate ngiaphual phuul tu in hong kiphul ngawpin del uh hi. Taciangin TOPA ii ci sa bangma in a pha bel zungtaangte pound sawm ciang tua ahibale mangtaang pound kul ciangin nguntang khat taw kizuak hi.
17Israel kumpipa in ama a cing tuam ulian pa sia khuapi kong cing tu in koi hi. Tua ulian pa sia mipite in siiklum hi, kumpipa in ama taw kimu in a pai laitak Elisha ii son khol bangin thi hi. 18Elisha in kumpipa munah a zing ciang tua hunin a phabel zungtaangte pound sawm ahibale mangtaang pound kul sia nguntang khat taw kizuak tu hi’ a ci lai in, 19tua ulian pa in zo a, “Tabang piang thei ngawl tu hi— TOPA in thakhat thu in antang hong puak hial zong piang thei ngawl tu hi,” ci hi. Taciang Elisha in zo a, “A pian mu tu ni hi, ahihang nang in na ne batu hi,” na ci hi. 20Tasia bang tatak in ama ii tungah piang a— ama thi in, khuapi kongpi ah mihonpite in ama siikcil hi.


Kumpite Niina 8
Shunem pan Nupi nu Heak kik
1Tu in Elisha in Shunem ah a teang nupinu, a tapa a thi sa a thaw kik sak sia munah, TOPA in kum sali sung a ngei tu kialpi khat a ngam sungah tung sak tu ahikom, ama sia leidang khat ah, a innkuanpuite taw a ten natu in son hi. * 2Ama in a sawlna mangin a innkuanpuite taw Philistia ah kum sali sung teang hi.
3Kum sali bo zawkciang ama hong heak kik a, kumpipa ii munah a inn le a leitangh te ama tungah a kipiak kik natu ngen hi. 4Ama in kumpipa sia Elisha ii naseampa Gehazi taw kipaupui in om mu hi; kumpipa in Elisha ii a lamdang nasepte he nuam hi. 5Gehazi in Elisha ii mihing khat a thaw sak kikna thu a sason lai tak tua nu in kumpipa tungah ngetna nei hi. Gehazi in, “Kumpipa awng, hi sungah ih son nupi sia le Elisha ii a thaw kik sak a tapa om hi,” ci in son hi. 6Kumpipa ii dokna te a zona in Gehazi ii son teng sia maan hi ci in nupi nu in son hi, tasia ciang kumpipa in a uliante khat samin, ama ii neisa teng theampo a piak kik natu le kum sali a om ngawl sung theampo a, a lo sung pan a piang ante theampo ii manh a piak kik tu in thu pia hi.

Elisha le Syriate Kumpipa Benhadad
7Syriate ii Kumpipa Benhadad ii ciinat hun khat laitakin Elisha sia Damascus khua ah pai hi. Elisha tua munah om ci in kumpipa tungah a kison ciang, 8ama in a uliante khat Hazael munah, “Kamsangpa letsong khat na puak tan a, kei ka ciidam kik tu ziam, dam nawn ngawl tu khi ziam TOPA hong dok sak tahen,” ci hi. 9Tua ahikom Hazael ii kalauh sawmli ii puak khop Damascus pan a piang vanh phabel teng taw Elisha ii kungah pai hi. Hazael in ama taw a kimu ciang ama in, “Na naseampa Kumpipa Benhadad in nang kungah pai in hong sawl a, ama ii natna sia dam kik tu ziam dam nawn ngawl tu ziam ci in hong dongh sak hi,” ci hi.
10Elisha in zo a, “TOPA in ama thi tu hi ci in hong lak hi; ahihang ama ii kungah pai tan a, ama dam kik tu hi na ci tan,” ci hi. 11Tasia zawkciang Elisha in a lau huai mama mai puak taw Hazael ii mai nopmawk dong a maitang salh hi. Thakhat thu in Elisha a thitui luang hi. 12Hazael in, “Banghangin kap ni ziam, topa awng,” ci in dongh hi.


“Israel mite tungah a lipkhap huai mama na ngamtat tu teng hu hi,” ci in zo kik hi. Nangma in a kulhpite na haltum tu a, a khangmoite a phabel teng na thatlum tu a, patangnote na vaatlum tu hi, naungil omte ii ngil na khuakeak tu hi,” Elisha in ci hi.
13“Banghangin taza ta in vaanglian thei tu khi ziam kei sia bangma ka hi bua hi,” Hazael in ci hi.
“TOPA in hong son zo hi, nang sia Syriate ii kumpipa na suak tu hi,” ci in Elisha in zo hi. *
14Hazael sia Benhadad kungah heak kikin, ama in, “Elisha in bang hong ci ziam?” ci in dongh hi.
“Ama in nang sia dam kik tatak tu ni hi, hong ci hi,” Hazael in ci hi. 15Ahihang a khuavak ni ciang Hazael in puanvan khat tui sungah pap a, tasia taw kumpipa ii nuntakna sumit hi.
Taciang Hazael in Syria Kumpipa Benhadad ii za laih hi.

Judah Kumpipa Jehoram
(2Khang tangthu 21:1-20 )
16Israelte ii Kumpipa Ahab ii tapa Joram ii maan zawk a kum ngana ciang Judahte Kumpipa Jehoshaphat ii tapa Jehoram sia kumpipa hong suak a, 17ama ii kum, kum sawmthum le nii pha a, taciang ama in Jerusalem panin kum liat sung uk hi. 18A zi sia Ahab ii tanu hi a, taciang Ahab ii innkuante bangma in ama in Israel kumpipa ii khansiat teng maa zui hi. Ama in TOPA tungah maw hi, 19ahihang TOPA in Judah sia a susia nuam bua hi, banghangziam cile ama in a naseam pa David munah kiciamna pia zo a, a suan a paalte in a kizom suakin uk tu hi ci hi. *
20Jehoram ii maan sungin Edomte in Judahte langpan in tualngal tho uh a, amate le amate a ki uk kumpi ngam hong suak hi. * 21Tua ahikom Jehoram in ama ii ngalleang theampo taw Zair ah kuan a, tua munah Edom ngalkap honte in amate uumci uh hi. Zan lai in ama le a ngalleang ukte in a kikiim uumna phultham thei in, suakta uh a, a ngalkapte sia amate inn tek ah kithethaang uh hi. 22Edom sia tua hun pan kipan Judahte khutnuai pan amate le amate a ki uk suak hi. Hi hun sung ma in Libna khuapi in tual ngal tho hi.
23Jehoram ii a sep a vawt dangte theampo Judah Kumpite ii Tangthu sungah kiciamte hi. 24Jehoram thi a, David khuapi sung kumpite thaan ah kiphum in, a tapa Ahaziah in a kumpi za lua hi.

Judah Kumpipa Ahaziah
(2Khang tangthu 22:1-6)
25Israelte ii Kumpipa Ahab ii tapa Joram a maan zawk kum sawm le kum nii na ciang Jehoram ii tapa Ahaziah sia Judahte ii Kumpipa suak hi, 26ama ii pian kum sia kum kul le kum nii hi a, ama in Jerusalem panin kum khat sung uk hi. A nu sia Athalia hi a, Kumpipa Ahab ii tanu, Israel Kumpipa Omri ii tunu hi. 27Ahaziah sia a zi hangin Ahab ii mealheak khat a sua bangin, Ahab ii innkuanpuite bangma in ama in TOPA tungah maw hi.
28Kumpipa Ahaziah in Israelte Kumpipa Joram taw kipawl khawm in Syriate ii Kumpipa Hazael do uh hi. Ngalkap honte sia Gilead ngam Ramoth ah hong kisii uh a, Joram sia ngalphual ah liam hi. 29Ama in Jezreel Khuapi ah a liamna pan a dam kik tu ngakin heak kik hi, taciang Ahaziah in tua munah pai in ve hi.

0 comments:

Post a Comment