Laithiangtho (Kumpite Niina 5-6)

1. Syria kumpipa in kua laithak at ziam?
a. Elisha
b. Israel kumpipa
c. Naaman

2. Syria kumpipa in bang adeina taw laithak at ziam?  
a. Naaman dam natu
b. Ulian ahina thu he le
c. Kumpi ahina thu deina

3. Namaan adam ciang ataksa sia bangbangh hi ziam? 
a. Vuuk bangh in ngo
b. San le ngo thua
c. Nausen taw Kibang

4. Naaman vante Elisha in asan ngawl ciang Naaman bang hi ziam?
a. Khuangai peuma
b. Thiampite aap
c. Leitangh puaksawm

5. Elisha naseampa in nguntang bangza Naaman tungpan ngen ziam? 
a. 500
b. 6000
c. 3000

6. Elisha in letsong taw kisai bang ci ziam? 
a. Kiihuai
b. San hun hi ngawl
c. Chisan vanh 

7. Elisha taw omkhawm kamsangte in bangthu lungkim ngawl ziam? 
a. Anneak tuidawn
b. A omna no lei sa
c. Naaman damhna vai

8. Tuisungtaak heitang ngaa kik natu Elisha in bang hi ziam? 
a. Thungen
b. Ciangkang tuisung lawn
c. A tui tham

9. Syriate in bang ahi ciang Elisha thungen aa amittaw sak ziam? 
a. Khuapi simsawm
b. Inn sung tumsawm
c. Sim akipat ciang

10. Mittaw Syria ngalkapte le akuate kikop in Syria ah cia sak ziam? 
a. Silate
b. Miphak pawlkhat
c. Mathuak Syria ngalkapte

11. Benhadad in Israel a uumci lai laa ii lutang khat sia ___ hi. 
a. luphung tung pan vawk
b. Israelte thak
c. sawmliat manh

12. Israel kumpipa khauip puan bangbangh silh ziam? 
a. A ek keak dong
b. A puan ii sungsangah
c. A lu pan apeangdong tuam

Kumpite Niina 5
Naaman Kidam sak
1Syriate ngalkap hon ukpipa Naaman sia Syria kumpipa in nasia takin zakta in upat vawt hi, banghangziam cile Naaman tungtawn in TOPA in Syria ngalkapte sia zawna pia hi. Ama sia ngalkap thupi khat hi, ahihang ama in a kiitak huai mama vun natna khat thuak hi. * 2Amate ii ngalnguk sim hun khat ah Syria ngalkapte in Israel taw kido na sungah Israel numeino khat ciapui uh a, tua nu sia Naaman zi ii naseamnu suak hi. 3Ni khat ni in ama in a tonu tungah, “Samaria a teang kamsangpa kungah ka topa pai le ka oai hi! Ama in a natna teng dam sak tu hi,” ci hi. 4Naaman in hi thu a zaak ciang ama kumpipa kungah pai in, numeino ii pauna teng son hi. 5Kumpipa in, “Israel kumpipa kungah pai tan a, hi ka laithak ama atu sia na keng tan,” ci hi.

Tua ahikom Naaman dingkhia in, nguntang tul sawmthum, khamtang tulluk, puansilh laih natu puanhoi sawm keng hi. 6Ama ii ken laithak sungah hi bang teng ki at hi: “Hi laithak in ka ulianpa Naaman kong heak sakna hi. A natna pan na dam sak natu ka dei hi.”

7Israel kumpipa in tua laithak a sim ciangin, thin nop ngawlna taw a puansilh teng laitham hi. “Banghangin Syria kumpipa in mihing hisia pa kei in dam sak thei tu in hong um ziam? Nuntakna le thina tungah vaang nei Pathian vei hong sa ziam? Ama in kei taw kihau nuam in hanciam ahi hunlam sia kician hi,” ci hi.

8Kamsangpa Elisha in bang thu piang ci in a zaak ciangin ama in kumpipa tungah kam thaak hi: “Banghang in na thin ngim ziam? A mihing pa keima kungah hong puak tan, Israel ngam sungah kamsang khat om nginge hi ci in lak tu khi hi,” ci hi.

9Tua ahikom Naaman in a siphu le a ngalleang taw pai in Elisha ii kongbiang ah ding hi. 10Elisha in a naseam khat sawl a, pai in a Jordan Ngun sungah sali vei kisil tahen, tua hile a natna theampo pan dam tu hi ci sak hi. 11Ahihang Naaman in thin so takin tua mun nusia a, “Kei ngaisutna pan ama in a no bel in hong pusuak in, a TOPA Pathian munah thu hong nget sak tu a, ka natna mun san te tungah a khut hong vaan tu a, hong dam sak tu in ka um hi! 12Tua ban ah Damasacus ah Abana ngun, Pharpar ngun te Israel ngam sungah ngun te saangin pha zaw ngawl ka na ziam? Tuate ii sungah kibual in ka dam lel batu ziam?” ci hi.

13A naseamte ama kungah pai in, “Topa awng, kamsangpa in a haksa vawt tu in hong sawl le zong vawt tu hi ngawl ni ziam? Tu in ama ci bangin bang hangin ngun sungah kibual in dam tu uk ngawl ni ziam?” ci hi. 14Tua ahikom Naaman sia Jordan ngun ah paisuk in, Elisha ii thupiak bangin ngun sungah ama le ama sali vei tui ki pap a, taciang ama dam thiang sitset hi. Ama ii sa sia hong sah in hong dam hi, nausente cii le sa bang ahi hi. 15Ama sia a mihingte theampo taw Elisha kungah hong heak kik a, “Tu in Israelte ii Pathian ngawl pathian dang om ngawl hi ci in ka he hi, topa awng, nong hesuakna in, kei tung pan letsong khat hong saang tan,” ci hi.

16Elisha in zo a, “A nungta TOPA ii a na ka sep sak sia taw kiciam khi hi, letsong bangma saang ngawl tu khi hi,” ci hi.

Naaman in a saan natu in kunh kenkon top ahihang ama in saang nuam ngawl hi. 17Tua ahikom Naaman in, “Ka letsong te hong saang ngawl tu na hile laa nii ii puak khop leitangh hong ciapui sak tan, banghangziam cile tu pan kipan TOPA tung sim ngawl pathian dangte tungah sangaw biakpiakna pia nawn ngawl tu khi hi. 18Tabangin hi leng, Rimmon biak innpi ah Syriate pathian biakpiakna vawt tu in Syria kumpipa ka zui ciang TOPA kei hong mai sak tu hi ci in ka um hi. TOPA in hong mai sak tatak tu hi,” ci hi.

19Elisha in, “Thin nuamin pai tan,” ci a, taciang Naaman dingkhia hi.

Ama in lam khuala a thet maa in, 20Elisha naseampa Gehazi in, ama le ama tungah hi bangin kici hi, “Ka topa in Naaman sia bangma pia sak ngawlin pai thong sak hi. Tua Syrian pa ii piak teng sia a saan tatak tu ahi hi. A nungta TOPA taw kiciam ing ama ii nung pan del in, na khat papo ama ii tung pan nga tong,” ci hi. 21Tua ahikom ama in Naaman nung panin del hi. Naaman in ama ii nung pan mihing khat in del ci in a mu ciangin a leang tung pan tuakin, ama taw kisi a, “A phamaw po om ziam?” ci in dongh hi.

22“Om ngawl hi,” Gehazi in zo hi. “Ahihang ka topa in nangma tungah sonin hong sawlna pan, tu ma hiat in Ephraim mualtung ngam panin kamsangte pawl sung pan nii hong theng a, amate nguntang tulthum le puan laih natu kop nii pia le hong oai hi,” ci hi.

23Naaman in, “Nong hesuakna taw nguntang tulluk la in,” ci in zo hi. Ama in la sak hamtang a, nguntangte ip nii sungah sawm in, puansilh laihna kop nii pia a, a naseamte nii aap in, Gehazi mai ah tua vanhte pua in pai sak hi. 24Amate in Elisha ii tenna mualtung a thet ciang Gehazi in ipte nii saangin inn sungah sungtan hi. Tua zawkciang ama in Naaman ii naseamte cia sak hi. 25Ama in inn sungah tum kik a, taciang Elisha in ama munah, “Koisung pai ni ziam?” ci in dongh hi.

“Topa awng, koima pai bong,” ci in ama in zo hi. 26Ahihang Elisha in, “A mihingpa in nang taw kisi tu in leang tung pan hong tuak lai in, kei zongh ka thaa taw hong om ngawl ka na khi ziam? Hi sia sum ahizong, puan le olive huante ahizong, sapit huante ahizong, tuu le khuite ahizong, letsong saan tu hun hi ngawl hi. 27Tu in Naaman ii natna teng nang tungah hong theng tu a, nang le na suan na paal theampo in tua natna a tawntungin vei tu uh hi,” ci hi.

Gehazi a paikhiat ciang ama in phaak natna nga in a vun sia vuuk bangin kaang hi.


Kumpite Niina 6
Heitang Nga kikna
1Ni khat ni in, Elisha ii a uk kamsang pawlkhat te in Elisha tungah amate lungkim ngawlna za sak uh hi, “Ka tenna uh mun no lei hi, tua ahikom Jordan ngun ah pai in, thing pawlkhat phukin, 2ten natu inn ka sak tu uh hong oai tan,” ci uh hi.

Elisha in, “Pha hi,” ci in zo hi.

3Amate sung pan khat in amate taw paikhawm tu in Elisha paa a, ama lungkim in paikhawm uh hi. 4Jordan a thet uh ciangin amate sia naseam tu in hong kipan uh hi. 5Amate sung pan khat in thing khat a phuu ciangin thakhat thu in a heitang hong zukin tui sungah taak hi. Ama in Elisha ii munah, “Bang law tu khi ziam? Topa awng. Hei sia a kikawm hi!” ci hi.

6Elisha in, “Koi sung santak ah taak ziam?” ci in dongh hi.

A taakna san a lak ciang Elisha in ciangkang khat saattan in, tui tungah a lot le a heitang tui tungah hong kilaam to hi. 7“La in,” ci in a sawl ciang mihing pa in kun sukin heitang tawm hi.

Syria Ngalkap honpite Kizo

8Syria kumpipa sia Israelte taw kido hi. Ama in uliante taw kikum in, ngiaphual saat natu mun khat teal hi. 9Ahihang Elisha in Israel kumpipa tungah tua mun nai ah a pai ngawl natu, kidop natu kam thaak hi, banghangziam cile Syriate in tua mun panin pang hi. 10Tua ahikom Israel kumpipa in tua mun nai ah a om mihingte munah kidop natu thu puak hi, taciang amate sia ngal nang tu in kithoai sa in om uh hi. Hi bangin tam vei ma hong piang hi.

11Syria kumpipa sia hisia huvau in nasia takin a thin lal hi; ama in a uliante samin amate dongh hi, “No sung pan akua bel sia Israel kumpipa sangah pang nu ziam?” ci hi.

12Khat in zo a, “Kuama a pang om ngawl hi, Kumpipa awng. Kamsangpa Elisha in Israel kumpipa tungah na innkhan sungah thuku na son theampo zong son siat hi,” ci hi.

13Kumpipa in, “Ama koi sungah om ziam? Zong vun! Ama man tu khi hi,” ci hi.

Ama ii munah, Elisha sia Dathan ah om hi ci in a kison ciangin ama in, 14tua munah ngalkap le ngalleang tam ma puak hi. Amate sia a khuapi no ah zan in theng a, uumci uh hi. 15A khuavak ni zing tuungin Elisha ii naseampa hong tho a, inn pua ah pusuakin khua a et ciang, khua ii kiimkot ah ngalkapte, ngalleangte le siphute mu hi. Ama in inn sungah tum kikin, Elisha ii munah, “A lal hi zo hing, topa awng, bang ih law thong tu ziam?” ci hi.

16“Lau heak in!” ci in Elisha in zo kik a, “Amate sangah a pangte sangin ei sangah hong pangte tam zaw hi,” ci hi. 17Tua zawkciang ama thu ngen a, “Aw, TOPA, ama mittangte khua a mu thei natu hon sak in,” ci hi. TOPA in Elisha ii thungetna zo a, taciang Elisha ii naseampa in a et to le Elisha ii kiimkot ah mualte ii pangh sia siphu le meikuang ngalleangte taw kidim in mu hi.

18Syriate in a sim uh ciang Elisha in thungen a, “Aw TOPA, hi mite a mit uh tawcip sak in!” ci hi. TOPA in a thungetna zo a, a ngalte a mittaw cip sak hi. 19Taciang Elisha in amate kungah pai in, “No sia lam khial nu hi, khuapino na zon uh sia hi sung hi ngawl hi. Mihing na zon uh sia kungah keima hong paipui tu khi hi,” ci hi. Taciang ama in amate sia Samaria zotpui hi.

20Amate khuapi sung a tum po ciang Elisha in thu ngen a, “A mittang uh hon sak in, TOPA awng, amate khua mu thei sak in,” ci hi. TOPA in a thungetna zo a, amate khua muna a ngei bang hi sak kik a, taciang khua a et uh ciang amate sia Samaria sungsuam ah om ahi hunlam kimu uh hi.

21Israel kumpipa in Syriate a mu ciang Elisha dongh hi. “Ka thatlum tu ziam, topa ka thatlum tu ziam?” ci hi.

22“Thatlum heak in,” kidona phual ah na mat sa ngalkapte zong thi sak ngawl tu ni hi. Amate neak tu dawn tu khat po pia in a, amate kumpipa kungah cia kik sak in,” ci hi. 23Tua ahikom Israel kumpipa in amate atu anneak poai lian khat vawt sak a, amate ii a neak a dawn zawkciang Syria kumpipa kungah cia sak hi. Tua hun pan kipan Syriate in Israel ngam ngalnguk a sim tawntung teng kheal uh hi.

Samaria Uumci na
24Tua zawk tawm vei ciang Syriate kumpipa Benhadad in ama ii ngalkap hon bupte lampui in Samaria uumci hi. 25Tabang a ki uumci hu in khuapi sungah anneak tu sia hong haksa mama a, laa khat ii lutang sia nguntang sawmliat manh a, inn vakhu eak pound lang ciang nguntang nga manh hi.

26Israel kumpipa sia khuapi luphungte ii tungah vak sia numei khat au in, “Hong hu tan, Kumpipa awng!” ci hi.

27Ama in zo a, “TOPA in nang hong hu bale kei in nang bang hong pia zo thong tu khi ziam? Zungtaang le zu te nei na khi ziam? 28Na haksatna bang tatak ziam?” ci hi.

Ama in zo a, “Ning zeini in hi lai a numei sia in ngaisutna hong pia a, kei nauno sia tua ni in ne tu, a zing ciang ama ii nau sia ne tu ci in ka thukim uh hi. 29Tua ahikom ka nauno sia ka huan uh a ka ne uh hi. A khuavak ni ciang ama nau sia ne tu ka ci le ama in phual hi,’ ci hi.

30Kumpipa in hi thu a zaak ciang a khuangaih suakin a puansilh lai baltham hi, taciang a puansilhte ii sungah khau-ip puan a silh sia ama kung nai ah a pai mihingte in mu hi. 31Ama au in, “Ni tum maa in Elisha ii lu a kitan bale Pathian in hong vaat lum tahen!” ci hi. 32Taciang ama in Elisha man tu in kamtai pai sak hi.

Tua laitakin Elisha sia inn ah ama ii kungah a haw upa pawl khat taw om uh hi. Kumpipa ii kamtaite hong thet maa in, Elisha in upate munah, “Tual that pa in kei that tu in khat hong pai sak hi! Tu in ama hi sung hong thet ciang kongkha khak vun a, tum sak heak vun. Kumpipa ama mama zongh a nung hiat pan hong pai tu hi,” ci hi. 33Hi teng a pau zongh maan tak ngawl lai in kumpipa hong pai a, “Hi ngimna ei tungah hong puak sia TOPA hi. Ama ii na khat papo a vawt tu ngakin banghangin om top tu khi ziam?” ci hi.

0 comments:

Post a Comment