Laithiangtho (Thuhilsya 11-12)

1. Na sumte ___ taw sumvawtna ah zangh in.
a. ngamdang
b. Pathian
c. Vantung ngam

2. Ih sum neite banghang mun tatuam ah koi kul ziam?
a. A meet tam
b. Kamsiatna vai kihe ngawl
c. Ngual huuna

3. Pathian ii seplevawtte ei ki___ hi.
a. ciamte zo ngawl
b. mu thei ngawl
c. ki tel zo ngawl

4. Mai sangah ___ tu bangma om ngawl hi.
a. nasep
b. hanciam
c. lamet

5. Nopsak, lungdam vawt nop po vawt thei hun sia?
a. Khangno
b. Sum nei hun
c. Sun khuavak hun

6. Ih khangmoi hun ___ hi.
a. sau peuma
b. khuangei ngawl
c. kilomhtangh hun

7. ___ lai in nang hong Bitphuapa phawk in.
a. Nu ngilsung om
b. Patang na hi
c. Na khangmoi

8. Banghun ciang vacim haam in hong phawng thei tu ziam?
a. Ih no lai
b. Ih cidam ngawl hun
c. Khangham hun

9. Nuntakna hong pia pa kungah banghunciang ih zuan tu ziam?
a. Nuntakna bo ciang
b. Ih khangham ciang
c. A tawntung

10. ___ in a heak thute mihingte tungah hil hi.
a. Mipil mama khat
b. Thuthuk ngaisunpa
c. Kumpipa

11. Mihing ciimte ii paunak sia bang taw kibang ziam?
a. Ci-al
b. Suangtum lian
c. Ciangzum

12. Lai tam lei simna in sak hi.
a. Hong pilsak
b. Khialna phawk sak
c. Pumpi thazawm




Thuhilsya 11
Miciim khat ii Sep
1Na sumte ngamdang taw sum vawtna ah zangh in, tua hile ni khat ni ciang a meet nga tu ni hi. 2Na sumte mun tatuam ah koi in a– mun tam mama ah sum vawt in– banghangziam cile hi leitung ah bang kaamsiatna thuak tu cisia na he bua hi.

3Thingkung khat sia, koisang po ah a puk zong poimaw ngawl hi, a puna mun ah om tu hi. Meei te a niim ciang nguazu hi. 4Vuite le khuahunte a phat dong ngakin na om le bangma hunin an na ciing ngei batu a, bangma hunin an na la ngei batu hi. 5Pathian in na theampo vawt a, ama sep le vawtte numei naupaai khat ii sulh sungah nuntakna thak khat a kipat na tel zawk ngawl bangin na tel zo bua hi. 6Zing ahizong nitak ahizong an ciing in. A pha in po tu maw, ahibale anciin hun khat sia hun khat sang pha zaw tu cisia na he ngei bua hi.

7Sun khuavak nuam na sak thei sia thupha ahi hi. 8Na khan a sau le na nuntak sung lungdam in om in. Bangtan vei na nungta zong khua ngei zaw thi tu na hi sia phawk in. Mai sangah lamet tu bangma om ngawl hi.

Khangnote Ngaisut Piakna
9Khangnote awng, na khangmoi hun nuamsa vun. Na khanmoi lai in lungdam vun. Na vawt nop po vawt vun a, na thin ii dei babang zui vun. Ahihang Pathian in na vawtna tungah thu hong khen tu cisia ciamtee tavun.

10Bangma in thin ngim sak heak vun a, bangma in na sak heak vun, khangmoi hun khuangei ngawl tu nu hi.

---------------------------------------------
Thuhilsya 12
1Na thinngim tu ni le a kum hong thet ma, “Nuntak paw nuamsa bong” na ci ma, na khangmoi lai in nang hong Bitphuapa phawk in. 2Tua hun sia, ni le tha le aksite ii tanna nang atu in a dial hun le ngua meei a ven nawn ngawl hun ahi hi. 3Tasia ciang nang hong dal na baante liing tu a, tu laitak a, a hat na peangte tha zawm tu hi. Na hate na an thai tu in tawm lei tu a, na mitte mangin khua pha tak na mu thei batu hi. 4Na naa ngong tu a, lampi ah awngingte na za batu hi. An ngoaina sette a kingoai ciang ahizong, tumtheite a kitum ciang ahizong, nakheng phaksap vamial in na za tu a, ahizong vacim khat po haam in na mut hong phawng tu hi. 5Mun saangna ah na kiinta tu a, na lampai ciang lauhuai tu hi. Na puakkaang tu a; nangma le nangma kikai vakiat in, na uuk theampo bo tu hi.

Eite in a khakbel ih tawlngak natu mun ih zuan tu a, lampite ah mauna om tu hi. 6Ngunkhau tat tu a, kham mei-inn taaksuk in tamtham tu hi; tuikhuk ah khauzeen sia tatin tuibeal zantham tu hi. 7Ih pumpite leivui ah cia kik tu a, ih thaa ahile nuntakna hong pia pa Pathian kung zuan kik tu hi.

8Luithathong, luithathong, Thuthuk Ngaisunpa in ci hi. A vekpi a luithathong ahi hi.

Thu Ngawmtuana
9Thuthuk Ngaisunpa sia ciim ahikom ama in a heak thute mihingte tungah hil hi. Ama in paunakte encian a, tuate a maanna sittel hi. 10Thuthuk Ngaisunpa in a zaaknop huai in thuson a, a at kammalte maan tatak hi. 11Mihing ciimte ii paunakte sia tuucingte ii tuute a cinna tu a, a zak ciangzumte bang hi a, a khoptua paunakte sia khotak a a kikhen thikpimte bang ahi hi. Tuate sia eite theampo hong cing ih tuucingpa Pathian ii hong piak ahi hi.

12Ka tapa awng, kidop tu thudang khat omlai hi. Laibute a ki at sia tawp hun ci om thei ngawl a, lai tam lei simna in pumpi thazawm sak hi.

13Hite theampo zawkciang son tu thu khat bek omlai hi: Pathian zakta in a, a thupiakte ni in, banghangziam cile hite theampo sia mihing a ki bitphuana thu ahi hi. 14Pathian in ih sep ih vawtte theampo, a pha ahizong, a sia ahizong, ih vawt kute ngangawn dongin thu hong khen tu hi.

0 comments:

Post a Comment