Laithiangtho (Zechariah 13-14)

1 Jerusalem mite mawna le milim biakna pan thiansua natu ___tu hi. 
a. tuinaak khat kihong
b. hamsa 
c. mihing ka sawl

2 Akuate ii min theampo kiphiat thiang tu ziam? 
a. Kumpi seam ngeite
b. Milim minte
c. pathian akicite

3. Kamsang aseam nuampa sia akuate in thatlum tu ziam? 
a. A lawmte
b. A veangte
c. A nu le a pa

4. Kamsangte sia bang ahina hang in kiphasak  ngawl tu ziam? 
a. Biakpiakna ahi hang
b. Levi suan ahina
c. Kamsang ahi na 

5. Tucingpa thalup tuh in a sawl pa sia akua te ziam? 
a. Kumpipa
b. TOPA
c. Mihing seksolte

6 Ngambup mihing bangza thi tu ziam? 
a. 2/3
b. 1/4
c. 3/4

7 Akuate in Jerusalem sim tu ziam? 
a. Minam theampo
b. A kiimle paamte
c. Doai biakte

8. Judah kumpipa Uzziah maan hun in bang thu piang ngei ziam?
a. Kial
b. Zinhliing 
c. Kawlhaw natna

9. TOPA ka Pathian sia ___taw hong pai tu hi.
a. Vaangletna 
b. Gabriel 
c. vantung lalang theampo 

10. Jerusalem pan tuithiangtho sia mun bangza ah luang tu ziam? 
a. Munh 7
b. Munh 3
c. Munh 2

11 Jerusalem asimte ii sa sia nungta nginge lai in ___ tu hi. 
a. phaak
b. muat
c. vacim in ne

12. Egyptte in bang poai akham bua le daan ngaa tu ziam? 
a. Buk poai
b. Paisan poai
c. Thawkik poai


Zechariah 13
1Vaanglianbelpa TOPA in “Tua hun hong thet ciang, David suan le paalte le Jerusalem mite mawna le milim biakna pan thiansua tu in tuinaak khat kihong tu hi. 2Tua hun ciang ngam sung pan milimte min theampo ka phiat thiang tu a, kuama in ciamtee nawn ngawl tu uh hi. Kamsang ka hi a ci theampo le, milim biak nopna thinsung theampo ka bo sak tu hi. 3Taciang khat po in kamsaanna a zomto nuam hamtang le, a pa le a nu in nang sia hong kithatlum tu hi, ci tu hi, banghangziam cile ama in TOPA ii kammalte pau a kinei a, leeilot thu a son hang ahi hi. Ama in kam a sang veve le, a pa le a nu in nam taw hollum tu hi. 4Tua hun hong thet ciang kamsang kuama in a mu kholna hu in kiphasak ngawl tu a, kamsang khat bangin ngamta ngawlin, kamsangte puan hampuite ngual theam natu in silh ngawl tu hi. 5Tabang ci zaw ngawlin, ‘Kei kamsang hi bong, kei lothopa khi hi, ka khan tawntung lo ka tho hi’ ci zaw tu hi. 6Tasia ciang khat po in, ‘Na awm a liammate bang ziam?’ ci in a dongh le ‘Lawmte khat ii inn pan ka nga hi’ ci in zo tu hi,” ci hi.

Pathian Tuucingpa Thalup natu Thupiakna
7Vaanglianbelpa TOPA in, “Namsau awng, khanglo in kei atu a seam tuucingpa sim tan! Ama thatlum in, taciang tuute ki thethaang tu hi. Ka minamte ka sim tu a, * 8taciang, ngambup sungah mihingte see thum sua see nii thi tu uh hi. 9A taanglai khen thum sua khen khat teng sia ka sit tu a, meikuang taw ngunte a kithiantho sak bangin amate ka thiangtho sak tu hi. Kham a kisit bangin amate ka sit tu hi. Taciang amate kei tungah thu hong ngen tu a, kei in ka zo tu hi. Amate tungah ka minamte ahi hunlam ka son tu uh a, amate in kei sia amate Pathian ka hi hunlam pualaak tu uh hi,” ci hi.

Zechariah 14
Jerusalem le Minam Dangte
1TOPA thukhen in a to tu ni nai zo hi. Taciang Jerusalem kiphuul tu a, na mutang in a vanh laakte kihawm tu hi. 2TOPA in Jerusalem sim tu in minam theampo khawmtua tu hi. Khuapi kila in, innte kiphuul tu a, numeite kibuan in kikhialpui tu hi. Khua mite a lang sia sal in kipai pui tu a, ahihang a taanglai teng khuapi pan kipaipui ngawl tu hi. 3Taciang, nidang lai in a simngei bangma in TOPA kuanin tua minamte sim tu hi. 4Tua hun ciang ama sia Jerusalem nisuana sang Olive mual tungah ding tu hi. Taciang Olive Mual sia nisuana sang pan nitumna sangah kuam lian khat in phel nii in khen tu hi. Mual a lang sia sak sangah kikhin tu a, a lang sia thang sangah kikhin tu hi. 5Mual lang khat dongin a kithung hi kuam panin note na suakta tu uh hi. Judah Kumpipa Uzziah hun lai a zinlinna taw a sathap lai in na pute na pate tai bangin na tai tu uh hi. TOPA ka Pathian sia vantung lalang theampo taw hong pai tu hi.

6Tua hun hong thet ciang, khuasik le vuukkhal 7le khuazing cite om nawnngawl tu hi. Zan ngangawn suntang bang hi tu hi. Hi thu a pian tu hun TOPA bekin he hi.

8Tua ni hong thet ciang, Jerusalem panin tui thiangtho hong luang tu a, a lang sia Tuipi Thi ah, a lang sia Mediterranian tuipi ah luang tu hi. Tua tui sia tuk taw khal taw kum tawntung in, luang tu hi. * 9Taciang TOPA sia leitung theampo ii kumpipa in hong mang tu a, mihing theampo in ama sia Pathian in bia tu a, tua min ma taw in he tu uh hi.

10Saksang Geba panin thangsang Rimmon dong ngam theampo zaangtam kisua tu hi. Jerusalem sia kiim le paamte sang saang zaw tu hi. Khuapi sia Benjamin kongpi pan King Kongpi, nidang kumpi omna ngei dong, Hananel Tausaang pan kumpite sapitzu suukna dongin kithung tu hi. 11Mihingte tua munah ngam muangin teang tu a, a lauthawng nawn batu uh hi. *

12TOPA in Jerusalem khuapi a sim minam theampote tungah a kiitak huai mama natna tung sak tu hi. Amate nungta nginge lai in a sa uh muat tu hi. A mitte uh le a leeite muatmang tu hi.

13Tua hun ciang TOPA in amate thin am sak biaibuai in lau sak tu a, mihing simin a kungah a om khat papo manin lai tu hi. 14Judah mite in Jerusalem huu tu in ngaldo tu uh hi. Amate in minam dangte theampo ii hauna, kham, ngun le puan tam mamate kilaak sak tu hi.

15A kiitak huai mama natna khat sia ngal phual a om nganhingte theampo, siphute, laate, kalauhte, laano namte tung zongh ah tung tu hi.

16Tua zawkciang Jerusalem khua a sim minam dangte sung pan a taanglaite theampo in Vaanglianbelpa TOPA sia kumpi hi ci in bia tu le Buk Poai khaam tu in kum simin Jerusalem khua ah pai tu uh hi. * 17Minam khat papo in Vaanglianbelpa TOPA sia kumpi bangin paai in biak tu a nial le amate ngamah ngua zu ngawl tu hi. 18Egyptte in Buk Poai, a khaam tu a nial le, Jerusalem ah pai tu a nialte le Pathian a bia nuam ngawlte tungah a lauhuai mama natna TOPA ii a tun sak sia amate tungah tung tu hi. 19Egyptte le a dang minam dangte theampo in Buk Poai a khaam bua ahile hi daan amate tungah tung tu hi.

20Tua hun ciangin siphu ngawlok ngangawn “TOPA atu a ki tavaw” ci kammal ki at lai tu hi. Biakinn sung a an huanna bealte zongh biaktau mai a kuangte bangma in thiangtho tu hi. 21Jerusalem khua le ngamsung a an huanna beal theampo sia Vaanglianbelpa TOPA biakpiakna a zak tu in kituam koi tu hi. Tua bealte sia sangaw biakpiakna a pia po in biakpiakna sate huanna in zangh tu hi. Tua hun hong thet ciang Vaanglianbelpa TOPA Biakinn sungah sumzuakte le sumleite khat zong om nawn ngawl tu hi.

0 comments:

Post a Comment