Laithiangtho (Zechariah 9-10)

1. Kuate ii neisate sia nin khol bangh kiciang venvon ziam?
a. Moab
b. Tyre
c. Amon

2. Ashkelon, Gaza le Ekronte in bang ahiciang lau tu ziam?
a. Na lamdang amu ciang
b. Tui khan ciang
c. TOPA daan piak mu

3. Akuate sia Judahte sungah be khat in om tu ziam?
a. Moab
b. Syriate
c. Philistinete

4. TOPA in banghang lar tungah to tu ziam?
a. Kiniamkhiat lakna
b. A kumpi ngam lakna
c. A thupina thu lakna

5. Israelte thuakna hang aza bangza thupha piak sawm ziam?
a. Aza sawm
b. Aza nii
c. Aza sali

6. Thal, thaltang le namsau sia akuate do natu ziam?
a. Egypte
b. Babylonte
c. Greecete

7. Amate sia ___nei ngawl ahikom ngim nga uh hi.
a. sum
b. upna
c. lampui

8 A minamte a uk akuate tungah TOPA thinuk ziam?
a. Ngamdangmite
b. Mi ngilote
c. A seesa kumpite

9 Akuate sungpan aminam a uk tute piang tu ziam?
a. Levi
b. Judah
c. Josepht suan

10 TOPA in akuate suataak tu ziam?
a. Manashete
b. A tate theampo
c. Israelte

11. Egypt le Assyria pan amate ___ tu uh hi.
a. kithat
b. kikaikhawm
c. cia kik tu

12. Ngambup sia ___ taw kidim tu hi.
a. mihing
b. kaana
c. lungdamna



Zechariah 9
Ngampaamte tungah Thukhenna
1Hi thu sia TOPA thupuak ahi hi: Ama in Hadrach ngam le Damascus khuapi tungah daan piakna thutan zo hi. Israel minamte bek hi ngawlin Syria khuapi zongh TOPA neisa ahi hi. * 2Hadrach taw a ki ngamngi Hamath zongh ama neisa ahi bangma, Tyre le Sidon khuapite le a khut thiamna te theampo zongh ama neisa ahi hi. 3Tyre in ama atu in khuapi kulhpite vawt a, ngun le khamte a khol sa tam leilam kisa in nin khol bangin kiciang venvon hi. 4Ahihang a neisa theampo TOPA in laak sak tu hi. Ama haunate sia TOPA in tuipi sungah vawk sak tu a, a khuapi haltum tu hi. *

5Ashkelon khuapi in hi teng mu tu a, lau tu hi. Gaza khuapi zongh in mu tu a, na sa mama tu hi. Ekron zongh tabang hong hi tu a, a lametna bo tu hi. Gaza in a kumpi hong taan tu a, Ashkelon sia a teang om ngawlin kinusia tu hi. * 6Chi kihel minamte in Ashdod ah hong teang tu uh hi. TOPA in, “Tua a kiphasak Philistinete theampo ka niam sak tu hi. 7Amate in chi omlai sate ahibale a kikhaam andangte ne nawn ngawl tu uh hi. A nungta laite theampo ka minamte suak tu a, Judah minam sungah be khat in om tu uh hi. Ekron sia Jebus te bangma in ka minam suak tu uh hi. 8Ka ngam ka cing tu a, ngalkap honte in ka kantan sak batu hi. Kumpi ngilote in ka minamte ka zothaw sak nawn batu hi. Ka minamte thuakna sa teng mu siat zo khi hi,” ci hi.

Hong piang tu Kumpipa
9Lungdam vun, lungdam vun, Zion mite awng!
No Jerusalem mite awng, lungdam in au vun!
En vun, na kumpipa uh no kungah hong pai hi!
Ama in zawna le mualsuana taw hong pai hi.
Ahihang kiniamkhiak in laa tungah to hi.
Laano, laapui ii a no tungah to hi. *
10TOPA in, “Ngal siphu leangte Israel pan ka bo sak tu a, Jerusalem pan siphute ka la tu hi.
Ngal kisimna sung a kizangh thalte ka lalcip sak tu hi.
Na kumpipa in ngam tatuamte sungah kilemna om sak tu hi;
ama in tuipi khat pan tui pi khat dong, Euphrates Ngun pan leimong dong uk tu hi,” ci hi.
Pathian Minamte Kipua kik natu
11TOPA in,  “Sangaw biakpiakna chisan taw thuciamna hangin na saltanna, tui om ngawlna dumsung pan note kong suakta sak tu hi. *
12Heak kik vun, tu in lametna nei no saltangte awng; na ngam muanna munah heak kik vun.
Na thuakna sa theampo hangin a za nii in thupha kong piak kikna, tu in note tungah kong son hi.
13Greece mite do tu in Judah sia ngalkapte thal bangin, Israel sia thaltang bangin, Zion a pasalte sia namsau bangin kazangh tu hi,” ci hi.
14TOPA sia a minamte tungah hong kilangh tu hi.
Ama in a thaltangte sia khualeng bangin kap tu hi.
Vaanglianpipa TOPA in a lemle tum tu a, thangsang pan hong va huipi suangval taw kuan tu hi.
15Vaanglianbelpa TOPA in a mite sungsia tu hi.
Taciang amate in a ngalte laltham sak tu uh hi.
Amate sia ngal kisimna sungah zukhamte bangin au tu uh a, amate in a ngalte chisan luang sak tu uh hi.
Tua chisan sia Biaktau tungah bealsung pan a kisung biakpiakna bangin luang tu hi.
16Tuucingpa in a tuute launa pan a huuk bangin, tua ni ciangin, TOPA in a minamte hun tu hi.
Amate sia ama ngam sungah kumpi lukhu tung a kisuang suang manphate bangin taang tu uh hi!
17Tua ngam sia bangza in pha in hoi tu ziam!
Khangnote sia tua ngam pan piang thaw an le sapit tui neakna taw a thahat tu uh hi.

Zechariah 10
Suatak natu TOPA in Kamciam
1Tuk lai in TOPA tungah nguatui ngen vun. Meeikaai sakin ngua zu sak a, mihing theampo atu in ankung a hing sak pa sia TOPA ahi hi. 2Mihingte in milimte le aisaante thu dongh uh hi. Ahihang amate zo kiknate sia leeilot thu le luithathong thu ahi hi. Pawl khat in mangkhia a, ahihang tuate in nang hong lampial sak bek hi; amate hong piak thin nopna sia manh nei ngawl hi. Tua ahikom mihingte sia tuu bote bangin vaakthap uh hi. Amate sia lampui nei ngawl ahikom ngim nga uh hi. *

3TOPA in, “Ka minamte a uk ngamdang mite tungah ka thin uuk hi, amate daan ka pia tu hi. Judah mite sia keima aa hi, taciang keima Vaanglianbelpa TOPA in amate ka keam tu hi. Amate sia a thahat ka ngal siphute hong hi tu uh hi. 4Amate sung panin ka mite a uk tu ngam ukte, lampuite le ngalkap mangte hong piang tu hi. 5Judah mite sia a ngalte lampi buan sungah a siikcil ngalkapte bangin ngalzo tu uh hi. Amate in ngalsim tu uh hi, banghangziam cile TOPA in amate panpui a, amate in a ngalte siphu ngalkapte ngangawn zothal tu uh hi.

6“Keima in Judah mite ka hat sak tu hi; Israel mite ka suatak tu hi.
Keima in amate tungah khuangai huai sakna ka nei tu a, a vekpi in inn ah ka ciapui kik tu hi.
Amate sia, ka nial ngei ngawlte bang hi tu hi.
Keima in amate ii TOPA a Pathian ka hi hi;
A thungetnate ka zo tu hi.
7Ngalkapte bangin Israel mite sia thahat tu uh hi.
Zu ne te bangin lungdam tu uh hi.
A suan a paalte in hi zawna phawk tu uh a, TOPA nasepnate hangin lungdam tu uh hi.
8“Ka mite ka sam tu a, ka kaikhawm tu hi.
Amate ka suatak tu a, a ngei bangin ka tam sak mama tu hi.
9Ngam tatuamte sungah amate thethaang hi kaleng,
ngam khualana pan ngawngawn in kei hong phawk tu uh hi.
Amate le a tate suakta tu uh a, inn ah cia khawm tu uh hi.
10Egypt le Assyria panin amate inn ah ka ciapui tu a, amate mun le ngamah ka teang sak tu hi.
Amate Gilead le Lebanon zongah ka teang sak tu hi;
ngambup sia mihing taw kidim tu hi.
11Amate in ngimna tuipite a kaan uh ciang, keima TOPA in, tuihualte ka vaatmaai tu a, Nile ngun thuk sia leiko suak tu hi.
A kiphasak Assyria kikhia suk tu a, a thahat Egypt in a thahatna taan tu hi.
12Keima in ka minamte a tha ka hat sak tu hi, amate in kei hong bia tu a, ka thu hong mang tu hi,” ci hi, TOPA in ci zo hi.

0 comments:

Post a Comment