Laithiangtho (Daniel 1-2)

1. Danielte lawmta sia abang tu in kiteal ziam? 
a. Ukpi le ulian nam
b. Silate uk tu
c. Kumpi ngan cing tu

2. Danielte lawmta sia kum bangza sung laisin uh ziam? 
a. 2
b. 3
c. 7

3. Daniel ii min sia abang in kilaih sak ziam? 
a. Ebenezer
b. Zarchariah
c. Belteshazzar

4. Daniel in kumpi an ngawl taw anneak tu nibangza ngen ziam? 
a. 7
b. 10
c. 14

5. Pathian in Daniel sia ___ le mangnkhiat thiamna pia hi. 
a. kampau thiamna
b. mukholna
c. thukuu heakna

6. Danielte lawmtate sia aisaante sang aza bangza vei he pil zaw ziam? 
a. 7
b. 9
c. 10

7. Nebuchadnezzar ii mipilte in bang kam pau ziam? 
a. Aramaic
b. Babylon kam
c. Assyrian

8. Kumpipa ii mangn taw kisai mipilte akimatna thu Daniel in ___ hi. 
a. kikup pui nuam ngawl
b. tel man ngawl
c. vaipuak la

9. Nebuchadnezzar ii mangn vai Daniel in kuate thungen tu in sawl ziam? 
a. Judah mite kung
b. Mipilte tungah
c. Alawmte 3

10. Nebuchadnezzar ii mangn sia bangbangh ziam? 
a. Pathian ii vaangletna thu
b. Hong piang tu thu 
c. Mihingte ii kisapna thu

11. Pathian in akua sia leitung mihing nganhingte uk tu in koi ziam?
a. Satan
b. Nebuchadnezzar
c. Mihing tapa

12. Daniel ii lawmte teng in banghang Babylon ngamke uk thei ziam? 
a. Pil in ciim tek
b. Kumpipa ii teal
c. Daniel in ngen





Daniel 1
DANIEL LE A LAWMTE TANGTHU (1:1-6:28)

Nebuchadnezzar ii Inn ah a Om Tangvalte
1Jehoiakim ii Judah kumpi a sua zawk a kum thum kumin, Babylon Kumpipa Nebuchadnezzar in Jerusalem khuapi simin uumci hi. * 2TOPA in, Jehoiakim Kumpipa sia Nebuchadnezzar Kumpipa in man sak a, Biakinn na manpha pawl khatte la sak hi. Ama in a mat mihing pawlkhatte Babylon khua ama pathiante biakinn ah ciapui a, a mat vanh manphate biakinn vanh kholna khan ah koi hi.

3Kumpipa in Israel saltangte sung pan ukpi nam le ulian namte tangval pawlkhat teal tu in a khutnuai ulian bel Ashpenaz thupia hi. 4Tua a teal mihingte sia kumpi inn sungah naseam thiamte a sua thei natu in a meal hoi, a pilvang, pha tak nasep a kisin sak sa, thu he pal le pumpi tung paubanna nei ngawlte hi tu hi. Amate sia Babylon lai a sim thei natu le a at thei natu in Ashpenaz in hil tu hi. 5Kumpi inn sungah a om mihingte bangma in amate sia ni simin an le zu a piak natu kumpipa in thupia si hi. Hi bangin kum thum a sin zawkciang kumpipa mai ah kilak tu uh hi. 6Tabang a kitealte sung panin Daniel, Hananiah, Mishael, le Azariah kihel a, a vekpi in Judah nam ahi uh hi. 7A khutnuai ulian bel pa in amate sia min thak phua in; Belteshazzar, Shadrach, Meshach le Abednego ci hi.

8Daniel in kumpi inn sung pan a kipia an le zu neakna taw in ama le ama biakna sangah a kinin sak ngawl natu in a thin khensat ahikom ama in Ashpenaz tungah huna ngen hi. 9Pathian in Ashpenaz sia Daniel tungah hesuakna thin nei sak hi. 10Ahizong Ashpenaz in kumpipa kiita ahikom ama in Daniel tungah, “Kumpipa in na neak tu le na dawn tu see sa nei zo ahikom, khangno dangte ban zo ba zezen tha lete ama in kei hong thatlum tu hi” ci hi.

11Tasia ciang Daniel sia ama le a lawmdang thumte cing tu in Ashpenaz ii a koipa kungah pai hi. 12Ama in, “Ni sawm sung hong sin tan a, ka neak tu uh anteete le ka dawn tu tui hong pia tan. 13Taciang kumpi an a ne khangno dangte taw hong ettee khawm tan a, nong muna bangin thu hong khen tan” ci hi.

14Ashpenaz in ni sawm sung encik tu in thukim hi. 15A hun a cin ciang amate sia kumpi an a nete sangin a ciidam tuak zaw, a tha hat tuak zaw uh hi. 16Tua ahikom tua ni pan kipan amate a cing pa in Kumpipa ii piak an luangin anteete ne suak sak hi.

17Pathian in tua tangval lite sia heak theina, pilna le thuthuk tel theinate pia hi. Tua bek dom ngawlin ama in Daniel sia mukholna le mang khiak thiamna pia hi.

18Kumpipa ii ciangtan kum thum a cin ciang, Ashpenaz in tangvalte theampo sia Nebuchadnezzar kungah paipui uh hi. 19Kumpipa in amate paupui siat a, Daniel, Hananiah, Mishael le Azariah sia a dangte sangin dik sa zaw hi. Tua ahikom amate sia kumpipa inn sungah a vaihawm pawl suak uh hi. 20Kumpipa in a bangbang thu haksa nano dongh kale hi mihing lite in ama ii ngamsung theampo a mitbum thiamte le aisaan theite theampo sangin a sawm vei in he zaw uh hi. 21Daniel sia kumpi inn ah Persia Kumpipa Cyrus ii Babylon a zaw dong om suak hi.


Daniel 2
Nebuchadnezzar ii Mang
1Nebuchadnezzar kumpi a sua zawk a kum nii kumin ama in mang khat man hi. Tua mang in ama thinngim sak mama a, mu thei ngawl hi. 2Tua ahikom ama tungah a mang khiakna son tu in aisaan thiamte, mitbum thiamte, ngual bum theite le khangneite sam sak hi. Amate hong pai in Kumpipa mai ah a din uh ciang Kumpipa in, 3amate tungah, “Mang khat ka man a, hong thinngim sak hi. Tua ka mang ii a khiakna he nuam khi hi,” ci hi.

4Amate in Aramaic kam pau in, Kumpipa tungah, “Kumpipa awng na khansau tahen! Na mang hong son tan, tua hile a khiakna kong son tu uh hi” ci in zo uh hi.

5Kumpipa in amate tungah, “Ka mang nong son natu uh le, a khiakna nong son nanak natu uh in, ka khensat zo hi. Nong son thei bua uhle, na khut le na peangte kong semtan sak tu a, na inn uh sia nin kholna inn ka suaksak tu hi. 6Ahizong ka mang le a khiakna nong son thei uhle letsong le min phatna lian kong pia tu hi. Tua ahiciang tu in, ka mang sia bang hi a, a khiakna bangziam cisia hong son tavun,” ci hi.

7Amate in kumpipa tungah, “Kumpipa awng na mang hong son phot lete, a khiakna kong son tu uh hi” ci kik uh hi.

8Taciang, kumpipa a nging in au a, “Ka ngaisut sa bangma hi nu hi! Hun sau thethei natu hanciam nu hi, banghangziam cile ka mang nong son bua uhle, 9na vekpi a kibangin daan pia tu ci a ka khensat sia na heak uh hang ahi hi. Kei tungah leeilot thu nong sason uh sia na lungkim tek uh ma ahi hi, banghangziam cile hun hong kilaih tu hi ci in na lamet uh hang ahi hi. Ka mang sia bangziam hong son tavun, tua hile a khiakna zongh hong son thei tu ci in ka he tu hi” ci hi.

10Kumpipa ii thudok mipilte in, “Kumpipa awng, na heak nop bang hong son thei tu, hi leitung ah mihing khat beak om ngawl hi. Kumpipa dom ngawlin, milian bel le a vaanglian bel khat beak in, aisaan theite, mitbum thiamte le khangneite tungah tabang thute a dongh ngei kuama om ngawl lai hi. 11Kumpipa ii nong thu dokna sia haksa mama ahikom pathiante sim ngawl hong son thei tu khat zongh om ngawl a, amate in mihingte sungah teang ngawl hi” ci in zo uh hi.

12Tua hu in, kumpipa thin uk mama a, Babylon ngamsung kumpi thudok mipilte theampo thalup siat tu in thupia hi. 13Tua ahikom amate theampo thalup siat tu in thu kipia a, tuate sungah Daniel le a lawmte zongh kihel hi.

Tua Mangkhiakna Pathian in Daniel Lak
14Taciang Daniel sia mihing that tu a thu a piak, kumpipa a cing ngalkapte a uk maangpa Arioch kungah pai hi. Kampau kidawm a, 15ama in banghangin kumpipa in tabang thungam vasat khat suak sak ziam ci in, Arioch tungah dongh hi. Taciang Arioch in Daniel tungah thupiang teng son hi.

16Thakhat ma in kumpipa kungah Daniel pai in kumpipa ii a mang khiakna a son thei natu in hun tawmvei sung a ngak lai natu in ngen a, nga hi. 17Taciang Daniel, inn ah cia a, thupiang teng a lawmte Hananiah, Mishael le Azariah tungah son hi. 18Vantung Pathian in amate hesuak a, tua thuthukte son thei in, Babylon ngamsung a kumpi thudok mipil dangte taw a ki thalup khop ngawl natu in, thungen tu in ama in a lawmte sawl hi. 19Taciang tua zan in thuthuk sia Daniel mu kholna sungah kilangh a, ama in vantung Pathian pok hi:

20“Pathian sia ciim in vaanglian hi!
Ama a tawntung a tawntung in pok vun.
21Ama in hunte le khua hunte uk hi;
ama in kumpite khan a kumpite phiat hi;
ciimna le pilna a pia pa sia ama ahi hi.
22Ama in thuthukte le thukute pholaak hi;
ama in khuazing sungah a kiphualte he a,
ama mama sia khuavak in uumci hi.
23Ka pu ka pate Pathian awng,
nang kong pok a, kong upat hi.
Nangma in ciimna le thahatna nong pia zo a;
Ka thungetna hong saangin,
kumpipa tungah ka son tu thute nong lak zo hi” ci hi.
Daniel in Tua Mang le A Khiakna Kumpipa tung Son
24Tua ahiciang Daniel sia kumpipa ii thudok mipilte that tu a a sawl pa Arioch kungah pai hi. Daniel in Arioch tungah “Kumpipa ii thudok mipilte that heak in. Kumpipa kungah hong paipui tan, a mang khiakna ka son tu hi” ci hi.

25Thakhat in Arioch in Daniel sia Nebuchadnezzar Kumpipa omna ah paipui in kumpipa tungah, “Kumpipa awng, Judah saltangte sung panin na mang khiakna a son thei tu khat mu zo khi hi” ci in son hi.

26Kumpipa in (Belteshazzar zongh a kici) Daniel tungah, “Ka mangmat sia le a khiakna nong son thei tu ziam” ci hi.

27Daniel in, “Kumpipa awng, hong son thei tu in, aisaan thiam, mitbum thiam, khangneite le aksi en thiamte kuama om ngawl hi. 28Ahihang thuthuk a pualaak vantung ah Pathian khat om hi. Ama in maisang thupiang tute, nangma Kumpipa tungah hong za sak zo hi. Na mutthip laitak a na mu kholna mang sia tu in kong son tu hi.

29“Kumpipa awng, na mut laitak in, maisang thupiang tute mangin na man a, thuthuk a pholaak Pathian in a piang tu thu hong lak khol hi. 30Tu in midangte saangin ka pil zawk man hi ngawl hi, ahizong kumpipa in na mangmat a khiakna le na ngaisut thu na heak natu in tua thuthukte kei tungah hong kilangh hi.

31“Kumpipa awng, na mu kholna sungah a taang hemhom a kiitak huai milim lian mama khat na mai ah ding na mu hi. 32Tua milim lutang sia kham ciitak taw kivawt a, a awm le a baante sia ngun taw kivawt in, a kawng le a pheizangte sia taungo taw kivawt hi. 33A peangte thik taw kivawt a, a peangpakte khen khat thik taw kivawt in, khen khat tungman taw kivawt hi. 34Tua milim na et laitak, kuama thuthaak ngawl het in, liang tung pan suangtum lian khat hong liiksuk a, thik le tungman taw a kivawt milim ii peangte kha in tamtham sak hi. 35Thakhat in thik, tungman, taungo, ngun le khamte tamneen ngawp a, khuakhal lai ancilna mun a leivuite taw kibang hi. Vui in tuate seammang a, bangma taang nawn ngawl hi. Ahizong tua suangtum sia khang va-ial a, mual cia pha a, leitung buppi huam hi.

36“Na mangmat sia tu a bang ahi hi. Tu in nangma Kumpipa tungah a khiakna kong son tu hi. 37Kumpipa awng, nangma in kumpi theampo sung panin a lianbel na hi hi. Vantung Pathian in nang sia ngam uklian in hong koi zo a, vaangletna, thahatna le upatna hong pia zo hi. 38Ama in nang sia leitung ah a teang mihingte le nganhingte le vacimte theampo uk tu in hong koi zo hi. Nangma in kham lutang na hi hi. 39Nang zawkciang nang saang a no zaw kumpi ngam khat hong piang tu a, tua zawkciang leitung buppi a uk tu taungo ahi kumpi ngam thumna piang tu hi. 40Tua zawkciang kumpi ngam lina hong piang tu hi, thik bangin a sak na theampo sutham in a tamtham sak thik in na theampo a sukthap bangin tua ngam in kumpi ngam masa teng theampo sutham in ngoaivui tu hi. 41A peangpak le a peangmete khen khat sia thik hi a, khen khat tungman a hina zongh na mu hi. Tua in a kikhen tham ngam hi tu hi, a cina ahi hi. Tungman le thik kingawm ahikom tua in thik ii thahatna a khom khat nei tu hi. 42Peangmete khen khat thik hi a, khen khat tungman a hina sia ngam khen khat thahat in khen khat thazawm tu, ci nopna ahi hi. 43Thik le tungman a kihel khawm na mu hi. Tua kumpi ngam ukte in kingawm tu hanciam in zi le ta in kiman tu uh a, ahihang thik le tungman a kimat thei ngawl bangma in kingawm thei ngawl tu uh hi. 44Tua kumpite hun sungin, vantung Pathian in a bo ngei ngawl tu kumpi ngam khat phut tu hi. Tua ngam sia kuama in zo zo ngawl tu a, ahizong tua ngamin ngamdangte theampo zo ngawp in kip tawntung tu hi. 45Kuama ii thuthaak ngawl bulin liang tung pan hong liik suangtum khat in thik, taungo, tungman, ngun le kham taw a kivawt milim sia a denvawk na mu hi. A lian Pathian in mai sangah bang piang tu thu, nangma kumpipa tungah hong son hi. Na mangmat sia ahi bang vateak in kong son zo a, a khiakna zongh a maan bangin kong son zo hi” ci in zo kik hi.

Kumpipa in Daniel Minphatna Tel pia
46Taciang Nebuchadnezzar Kumpipa lei ah kunsuk in, sangaw piakkhiat biakpiakna le biakpiakna Daniel tungah piak tu in thupia hi. 47Kumpipa in, “Na Pathian sia pathian theampo sung pan a lianbel, kumpite tungah TOPA le thuthukte a pholaak pa ahi hi. Hi thu ka he hi, banghangziam cile nangma in hi thuthukte na pualaak thei hang ahi hi” ci hi. 48Taciang kumpipa in Daniel sia letsong pha tam ma pia in a za khang sak a, Babylon ngam teng uk sakin, kumpi thudok mipilte theampo ii lampui in koi hi. 49Daniel ii ngetna bangma in kumpipa in Shadrach, Meshach le Abednego te sia Babylon ngamke uk tu in koi a, Daniel ahile kumpi inn sungah om suak hi.

0 comments:

Post a Comment