Laithiangtho (Daniel 3-4)

1. Nebuchadnezzar ii milim sia pi bangza sang ziam?
a. 90
b. 70
c. 120

2. Banghun zawk ciang Nebuchandnezzar milim bia uh ziam?
a. Lemle tum zawk
b. Ulianpa ii au zawk
c. Tum thei tum zawk

3. Shadrach, Meshach le Abednego tungah thinuk kumpipa ii ___ liang hi.
a. lungtang sak
b. thin so in ciiliing
c. maitang san

4. Shadrach, Meshach le Abednego kivawk suk natu meikhuk sia aza ___ in lingh sak zaw uh hi.
a. 5
b. 7
c. 12

5. Shadrach, Meshach le Abednego te meikhuk sung bangbangh in kivawk ziam?
a. Kiheen kul ngawl
b. Akibang
c. Kiheen cip

6. Shadrach, Meshach le Abednego meikhuk sung avawkte bangtat ziam?
a. Liamlaw
b. Ingh
c. Mei in zaap lumh

7. Babylon kumpipa ii mangn sung amat thingkung sia ___ hi.
a. Lamdang
b. Lian peuma
c. Van baan

8. Babylon kumpipa ii mat thingkung sia koisung pan kimu ziam?
a. Tuipi tung
b. Jerusalem pan
c. Leitung mun tatuam

9. Babylon kumpipa ii mangnmat thing ii ngaa sia ___ ii khamkhop hi.
a. Mihingtheampo
b. Babylon ngambup
c. Nuntakna nei po

10. ___ sia thik le taungo kual taw bulh tu hi.
a. Thingbul
b. Thingbaak
c. Thingkungbup

11. Nebuchadnezzar sia ___ sung khui bangh in lopa ne hi.
a. kumh khat
b. kumh thum
c. kumh sali

12. Ama in a ki phasak a, a ngamta papo ___ thei hi.
a. that lumh
b. maizum pia
c. kiniam khiak sak



Daniel 3
Nebuchadnezzar in Mihing Theampo Kham Milim Bia tu in Thupia
1Kumpipa Nebuchadnezzar in pi sawmkua a saang le pi kua a zai kham milim khat vawt a, Babylon ngamke Dura zaangtam ah phut hi. 2Taciang kumpipa in a ulian theampo, kumpi tapate, ngam ukte, ngam uk zomte, menzite, sumkeam maangte, thukhen maangte, khuapi uk maangte le ngam sungah milian dangte theampo a pai tek natu in thupia hi. Amate sia Kumpipa Nebuchadnezzar ii milim aapna poai siim tek tu ahi hi. 3Kumpi uliante theampo milim aap tu in kikhawmtua a, milim mai ah a din uh ciang, 4thu puak khat in aw nging takin au a, “Minam theampote, minam tatuamte le pau nam tatuamte theampo awng! 5lemle aw na za tu uh a, baja, tengtong, tamngai, zithers le a dang tum thei theampo in hunghuan tu hi. Tum thei teng tum hong kipat po ciang, Nebuchadnezzar ii phu sa kham milim mai ah kunin na bia tu uh hi. 6Kun in a bia ngawl peuma sia, thakhat thu in meiphual sung denna kinei tu hi,” ci hi. 7Tabangin, minam theampo, minam tatuamte le pau nam tatuamte in tum thei a nging awte a zaak papo uh ciang, kunin Nebuchadnezzar phu sa kham milim bia uh hi.

Daniel ii Lawmte Thum Thu ni ngawlin Kimawsiat
8Tasia ciang Babylon mite pawlkhat in Jew mite a siat son natu hunpha khat nga uh hi. 9Amate in Nebuchadnezzar kumpipa tungah, “Kumpipa awng, nungta tawntung tan! 10Tum theite hong kitum papo ciang, mihing theampo kunin kham milim bia tu le 11tua milim mai ah kun ngawlin a bia ngawl peuma meiphual sungah kibum tu hi ci in nangma Kumpipa in thu na pia zo hi. 12Babylon ngam khen uk tu a na koi nangma Kumpipa ii thu a ni ngawl Shadrach, Meshach le Abednego a kici Jew mi pawlkhat om hi. Amate in na pathian le bia ngawl na phu sa milim mai ah la kun ngawl uh hi,” ci uh hi.

13Tua ahikom kumpipa a thin uuk mama a, tua mihing thumte a mai ah a kipuak natu in thupia hi. 14Kumpipa in amate tungah, “Shadrach, Meshach le Abednego awng, ka pathian bia nuam ngawl a, ka phu sa kham milim mai ah kun nuam ngawl hong kici sia a maan ma a hi nam? 15Tua ahi ciang tu in lemlete, bajate, tamngaite, zitherste, tengtongte le tum thei tatuam theampote ii aw na zaak po uh ciang kun in tua milim bia vun. Na bia bua uhle, thakhat thu in a lingh mama meiphual sungah hong kithut tu hi. No hong hun zo tu pathian khat papo om tu in um nu ziam?” ci hi.

16Shadrach, Meshach le Abednego in, “Kumpipa awng, hi thu hong zo kik ngawl tu khu hi. 17Ka biak ka paai uh Pathian in meiphual sung pan le na khut sung pan in hong hun nuam le hong hun thei tu hi. 18Ahizong hong hun bahial zong Kumpipa awng, na pathian ka bia tuan batu uh a, na phu sa na kham milim mai ah zongh ka kun batu uh hi, cisia hong heak sak khol tan” ci in zo uh hi.

Daniel ii Lawmte Thum Thalup tu Thu Kikhen
19Ta ciang Nebuchadnezzar Kumpipa in Shadrach, Meshach le Abenego tungah a thin uuk mama a, a mai san liang hi. Tua ahikom ama in a sat ngeina sang a sali vei in meiphual a sat sak zawk natu in a mite thupia hi. 20Taciang ama in a mite sung pan a thahat belte in hi mihing thum teng sawmcip in a lingh mama meiphual sungah vawk tu in thupia hi. 21Taciang amate in tua mihing thumte sia laktong le puantual silh sa le lukhu khu sa in sawmcip uh a, a lingh mama meiphual sung denna in nei uh hi. 22Tu in, kumpipa in meiphual a sat mama natu in ngat takin thupia ahikom tua mihingte thum meikuang sungah a bum ngalkapte sia meikuang in zaaplum hi. 23Taciang Shadrach, Meshach le Abednego sia heencip sa in a lingh mama meikuang laizang ah taaksuk hi.

24Nebuchadnezzar sia lamdang sa in ding vat hi. Ama in a ngam uliante tungah, “Mihing thumte heencip in meiphual sungah khia zo hi ka na ngawl hi ziam?” ci in dongh hi.

Amate in, “Hi hi, Kumpipa awng,” ci in zo kik uh hi.

25“Tua ahile banghang in meikuang sungah mihing li kot vavaa in mu khi ziam? Amate kiheencip ngawl a, liam zongh liam tuak beak ngawl uh hi- taciang a lina pa sia vantung lalang khat taw kibang hi” ci in dongh hi.

Tua Mihing Thumte Kisuatak a, Za Khanna Kipia
26Taciang Nebuchadnezzar sia meiphualpi kongkha kungah paito a, “Shadrach! Meshach! Abadnego! A lianbel Pathian ii naseamte awng, hong pusuak tavun!” ci in sam hi. Taciang amate thakhat thu in pusuak uh hi. 27Kumpipa tapate, ngam ukte, ngam uk zomte le kumpi ngam uliante theampo in mei ii kak ngawl mihing thumte en tu in hong kikhawm uh hi. Amate a sam zongh kaang ngawl, a puante zongh kaang ngawl a, meikhu ngim zongh nam ngawl uh hi.

28Kumpipa in, “Shadrach, Meshach le Abednego ii Pathian pok vun. Ama in a vantung lalang sawl a, ama muangin, ama na a seam hi mihingte suatak hi. Amate in ka thupiakte ni ngawlin amate ii Pathian sim ngawl pathian dang mai ah kunin a biak tu sangin a nuntak nate khaam zaw uh hi.

29“Taciang tu in minamte, minam tatuamte, pau nam tatuamte sung pan khat papo in Shadrach, Meshach le Abednego ii Pathian sonsiatna kampau a om le a khut a peang kithiaktan tu a, a innte nin kholna kisuak sak tu hi, ci in thu ka pia hi. Hi bangin a suatak thei Pathian dang om ngawl hi,” ci hi.

30Taciang kumpipa in Shadrach, Meshach le Abednego sia Babylon ngamke sungah a za uh khang sak hi.

Daniel 4
Nebuchadnezzar ii A nii veina A mang Mat
1Nebuchadnezzar Kumpipa in leitung ah a om ngam minam theampote, minam tatuamte, pau nam tatuam a paute theampo tungah a nuai a thute puak hi: “Kong nukset hi! 2A lianbel Pathian ii ka tungah hong lak lim le a lamdang thute ngai vun.

3“Pathian ii eite hong lak na lamdangte
lian lalawm hi!
A vawt na lamdangte
vaanglian lalawm hi!
Pathian sia
a tawntung in kumpi hi a,
ama in a tawntung in uk tu hi.
4“Keima in kumpi inn sungah ka teang hiithiat a, nuamsa mama in ka om hi. 5Ahitazong a patau huai mang khat ka manh a, ka mutthip laitak in a lau huai mu kholnate ka mu hi. 6Ka mang khiakna hong son thei tu in, Babylon ngam sung kumpi thudokte theampo ka kungah hong pai natu in thu ka pia hi. 7Taciang aisaan theite, mitbum thiamte, khangneite le aksi enthiamte theampo kisam a, amate tungah ka mang ka son hi, ahizong amate in a khiakna hong son thei bua uh hi. 8Taciang Daniel (a min dang Belteshazzar, ka pathian min a kitap pa) hong tum hi. A thiangtho pathiante ii thaa sia ama sungah om ahikom, ama tungah ka mang ka son hi. Ama tungah: 9Aisaante sung pan a lianbel, Belteshazzar awng, a thiangtho pathiante ii thaa sia na sungah om in thuthuk theampo na heak thei hunlam ka he hi. Hi sia in ka mang hi. A khiakna hong son tan.

10“Ka mut ciik laitakin leitung laizang ah thingkung lian mama khat mu kholna ka nei hi. 11Tua thingkung sia van a phak dongin khang va-ial khang va-ial a, leitung mihing theampo in mu thei uh hi. 12A teete limci mama a leitung bup ii khamkhop tu za in a nga nga hi. Ngamsate in a lim beahin, vacimte in a baak tungah bu tom uh a, nuntakna nei a minpiang theampo in a nga ne uh hi.

13“Ka mu kholna thu ka ngaisut laitakin a khua phawk vilvel a pilvang vantung lalang khat vantung pan hong tuaksuk ka mu hi. 14Ama in ngingin au a, ‘Tua thingkung phuktan in a, a baak teng saattan in, a tee teng heu thiang in a, a nga thethaang in. A nuai a nganhing teng le thingbaak tungah vacim teng bengkeak in. 15Ahizong a bul sia thik le taungo kual taw khit in lei ah nusia in. Tua mun dui sungah lopa taw nusia in.

“ ‘Tu in hisia pa tungah daaitui kia tahen a, ama in nganhingte le thingkungte taw teangkhawm tahen. 16Ama in kum sali sung mihing ngaisutna nei ngawl tu a, ahizong nganhing ngaisutna nei tu hi. 17Hi thu sia a pilvang le a phawk vilvel vantung lalangte ii thukhenna ahi hi. Tua ahi ciang mun theampo ah om mihing theampo in, A lianbel Pathian in leitung mite ii kumpi ngam sungah thu nei a, ama ii teal papo mihing thupi ngawl bel ngangawn zongh kumpi suak sak thei hi ci thu he tahen, ci in taangko hi.’

18“Ka mangmat sia hi bang hi,” Nebuchadnezzar kumpipa in ci hi, “Tu in Belteshazzar awng, a khiakna hong son tan. Ka kumpi thudokte kuama in hong son thei ngawl hi. Ahizong nang sungah a thiangtho pathiante ii thaa om ahikom nong son thei hi,” ci hi.

Daniel in tua Mangkhia
19Taciang Belteshazzar zongh a kici Daniel lau mama ahikom bangma pau thei ngawl hi. Kumpipa in ama tungah, “Belteshazzar awng, tua mang le a khiakna in lau sak heak in,” ci hi.

Belteshazzar in, “Kumpipa awng, mang le a khiakna sia nang tungah hong tung ngawlin na ngalte tungah tung zaw le ka oai hi. 20A saang mama van a ban thingkung sia leitung mihing theampo in mu thei uh hi. 21A teete limci mama a, leitung bup a vaak khom zo tu in a nga nga hi. Ngamsate a nuai ah tawlnga in, vacimte a baak tungah bu tom uh hi.

22“Kumpipa awng, nangma in a saang a thahat thingkung na hi hi. Khangto in lian mama na hikom vantung na baan to a, na vaangletna sia leitung buppi ah kizel hi. 23Kumpipa nangma in na et laitakin, vantung lalang khat vantung panin hong tuaksuk a, ama in ‘Thingkung phuk in a, susia cip in, ahizong lei sungah a bul nusia in. A bul ah thik le taungo kual vial in a, duisung lopate taw nusia khawm in. Hisia pa tungah daaitui kia tahen a tua munah kum sali sung nganhingte taw teang tahen.’ ci hi.

24“Kumpipa awng, a khiakna sia hi bang hi a, A lianbel Pathian in nang tungah hong tung tute hong lakna ahi hi. 25Mihingte sung panin hong kihawlkeak tu a, ngamsate taw na teang khawm tu hi. Khuital bangin kum sali sung lopa ne in dui sungah na mu tu a, na tungah daaitui hong kia tu hi. Taciang A lianbel Pathian in leitung kumpi ngam uk tu a, ama teal papo kumpi suak hi ci sia na saang tu hi. 26Vantung lalangte in lei sungah tua thingbul a ki nusiat natu in thupia hi. Ta sia in, Pathian in leitung theampo uk hi ci in, na heak ciang kumpi na sua kik tu hong sonna ahi hi. 27Tua ahiciang kumpipa awng, kong thuhilna hong ni tan. Mawna vawt nawn heak in a, a maan in ngamta in, a zawngte hesuak in. Tua hile na nuamsa tato tu hi,” ci in zo hi.

28Hi thu theampo Nebuchadnezzar Kumpipa tungah tung siat hi. 29Tha sawm le tha nii zawk bek ciang, ama in Babylon a kumpi innkhuvum tungah a va kakoai kawmin, 30ama in, “En vun, Babylon khua bangza ta lian ziam! Ka vaangletna, ka thahatna, ka minthanna le ka letnate lak natu in ka khuapi in ka sa hi,” ci hi.

31A pau zongh khuangkhim ngawl lai in, vantung pan aw khat hong nging a, “Nebuchadnezzar kumpipa awng, ka thu son ngai in! Na kumpi vaangletna sia tu in na tung pan hong kilaak sak hi. 32Nangma sia mihing dinmun pan hong kibeng tu a, ngamsate taw teang khawmin, khuital bangin kum sali sung lopa na ne tu hi. Taciang, A lianbel Pathian in mihingte ii kumpi ngam uk a, a dei papo sia kumpi suak sak thei ahi hunlam na he tu hi,” ci hi.

33Hi kammalte tangtung pai hi. Nebuchadnezzar sia mihing dinmun pan kibengkeak a, khuital bangin lopa ne hi. A pum tungah daaitui kia in a mul sia muvanlai mul za in sau a, a khutcinte sia vacim peangcin za sau hi.

Nebuchadnezzar in Pathian Pok
34Kumpipa in, “Kum sali a cin zawk ciang vantung ka ento a, ka thin hong ciim kik hi. A lianbel Pathian ka pok a, a nungta tawntung pa tungah upatna le minthanna ka pia hi.

“Ama in a tawntung in uk tu a
a ngam sia kip tawntung tu hi.
35Ama in leitung mite bangma in a sim bua a;
vantung mite le leitung mite ama in uk hi.
Ama deina kuama in nial thei ngawl a,
a vawt nate kuama in dongh thei ngawl hi.
36“Ka thin a ciim kik ciang ka kumpi za, ka minthanna le ka ngam minthannate hong kipia kik hi. Ulian ka mite le ka thudok mipilte in hong muak uh a, nidang sangin a lianzaw minthanna le ka kumpi za hong kipia kik hi.

37“Tu in Keima Nebuchadnezzar in Vantung Kumpipa pok in, upat in, a min ka thang sak hi. Ama ii a vawt theampo thumaan thutang hi a, ama in a ki phasak a, a ngamta papo kiniam khiak sak thei hi,” ci hi.

0 comments:

Post a Comment