Laithiangtho Dokna (Habakkuk 1-2)

1. Mingilote in akuate zo zawsap ziam?
a. Thumaan mihingte
b. Vantungmite
c. Kumpi naseamte

2. TOPA in Babylon tungah ___ pia hi.
a. hauna
b. vaangletna
c. natna

3. Kuate ii siphute sia pawlbeamte sang in manlang zaw ziam?
a. Egypt
b. Babylon
c. Assyria

4. Babylon siphute sia bang taw tengat ziam?
a. Khawmaw
b. Muvanlai
c. Tawpi

5. Israelte daan pia tu in TOPA in kuate teal ziam?
a. Etheopia
b. Egypt
c. Babylon

6. ___ te in ngasa tangthak banghin mihingte man hi.
a. Etheopia
b. Egypt
c. Babylon

7. TOPA in alak thute bangtungah at sak ziam?
a. Sahun
b. Tuipuan
c. Suangpheak

8. Thutangte banghang nungta tu ziam?
a. Pathian tungah maan
b. Thutang ahi man
c. Ngualmit dongkhol ngawl

9. Heak ngawl lanin, ngual zothalte sia___ hi.
a. leiba nei kisuak
b. mawna hi ngawl
c. mawna

10. Luphung suangte ngangawn in ___ tu hi.
a. hong langpan
b. hong lau
c. hong tai san

11. Leitung sia Topa ___ taw kidim tu hi.
a. pauna aw
b. vaangletna heakna
c. tealsa mihingte

12. Banghang a innpaamte niam koi uh ziam?
a. Kiphatsak hang
b. Thin uuk hang
c. Thuheak ngawl hang



Habakkuk 1
1Hi thu sia Topa ii kamsang Habakkuk tungah a pualaak thu ahi hi.

Thumaan ngawlna hangin Habakkuk Phun
2 Topa awng, nong zaak dong bangtan vei kong biakpui tu a, bang hun ciang ngongtatna pan hong hun tu ni ziam? 3Tabang ngimnate banghangin hong mu sak ni ziam? Tabang tatsiat nate bangbangin en thong thei ni ziam? Siatna le ngongtatnate sia ka kiimkot ah om a, kihauna le kidona mun theampo ah om hi. 4Thukhaam in thu nei zo ngawlin a luithathong suak a, thu a maanin seam ngei ngawl hi. Thutang thute kileekai in mi ngilote in thumaan mite zo zawsap hi.

Topa Zo kikna
5Taciang Topa in a mite tungah “Na kiim na paam a minamte encik vun, tua hile na mu uh thute hangin lamdang na sa tu uh hi. Na zaak ciang zong na up ngawl natu dong bang khat po kong vawt tu hi. * 6Tua a kiitak huai a omthim thei ngawl Babylonte tungah vaangletna ka pia hi. Amate in ngamdangte a zaw natu in leitung theampo ah kuan tu hi. * 7Amate in kiitakna le launa kizel sak a, amate kiphasak in a dei bang thukhen hi.

8“A siphute pawlbeam sang manlang zaw a, a ngilkial ngiapuite sangin kiitak huai zaw hi. A siphu ngalkapte ngam khuala pan hong pai a; a siphute in lei khuat uh hi. Muvanlaite suktun in a mat tute a zap bangin hong pai uh hi.

9“A ngalkap honte in a subong tu in hong pai uh a, amate a thet ciang a kuama po lau vadil hi. A ngal matte, senvui za in tam hi. 10Amate in kumpipate sia zawnsak vawt a, uliante sia nuisan zazan lel hi. Bang kulh po ahizong amate a khaktan zo om ngawl a, amate in a kulhte lei sunnel in la hi. 11Taciang amate vuiva bangin paisuak a, a thahatna sia a pathian za in ngaisun uh hi,” ci hi.

Habakkuk Topa tungah Phun kik
12 Topa awng, a kipatciil a kipan nangma in Pathian na hi hi. Nangma in ka Pathian na hi a, thiangtho in, a tawntung in na om hi. Topa ka Pathian le hong dal pa awng, nangma in Babylonte na teal zo a, daan hong pia tu in amate tha na hat sak hi. 13Ahizong banghangin hi mingilote, a thumaan ngawlte koithong thei ni ziam? Na mittangte sia siatna et natu in thiangtho leih a, ahi ngawl a ngamta mite na mu thei bua hi. Tua ahikom amate sangin a thutang zawte hong suksiat ciangin banghangin omthim thei ni ziam?

14Banghangin mihingte sia amate lam a hil tu ukpa nei ngawl ngasa le lungno hon khat bangin vawt thei ni ziam? 15Babylonte in ngasa tangthak bangin mihingte man uh hi. Amate in ngen taw kaikeak in a ngasa mat te tungtang ah lungdam in au ngawp lai hi! 16Amate in a ngente uh ngawngawn bia in tuate atu sangaw biakpiakna vawt hi, banghangziam cile na theampo sung pan a pha belte tua ngente in nga sak hi.

17Amate in a tawntung in namsau zangh in, hesuakna nei ngawlin minamte thatlum tawntung tu ziam?


Habakkuk 2
Topa ii Habakkuk A Zo kikna.
1Ka ngalvilna tausaang tungah ka kaa tu a, ka lungkim ngawl nate taw kisai Topa ii hong zo kikna le hong son tu thute ngakin ka en tu hi.

2 Topa in hi bangin: “Thakhat thu in et po ciang a kisim thei tu in kong lak thu sia suangpheak tungah thiang takin at in. 3Lai taw at phot in, banghangziam cile a tangtut tu hun theng ngawl lai hi. Ahihang hun sia manlangin hong theng tu a, kong lak sia tangtung tu hi. Hong pian tu sia hong hai tha tu hi, ahizong ngak kenkon in; hong tangtung tatak tu a, hong haisaang ngawl tu hi. * 4Ka thupuak sia hi thu hi; ‘A khansiate nungta ngawl tu a, ahizong thutangte Pathian tungah thumaan ahikom nungta tu uh hi,’ ka ci hi,” hong ci hi. *

Thutang ngawlte Lal natu
5Hauna in hong theam thei hi. A duhop mihingte kiphasak a thim om thei ngawl hi– thina sia a lungkim thei ngawl bangin amate zong lungkim hun nei ngawl hi. Tua hu in amate in ngam khat zawkciang ngam khat amate atu in suanthal hi. 6Ngallelte in ngalzote thato tu a, thusim ngawlna lak tu hi. Amate in “Noma neisa ahi ngawlte lak sak na hi uhciang a lal na hi uh hi! Note tungah lei hong bate zawthawk thu taw siikin bang tanvei na hauna uh belap nuam lalai nu ziam?

7Ahizong, na heak ngawl lanin, noma ngual zothalte sia leiba nei na suak tu uh a, a meet taw na piak tu in zawthawk thu taw hong kisawl tu hi. Ngalte hong pai in hong liing sak tu hi. Na vanhte hong suttol tu uh hi! 8Ngam tam mama ah mihingte na suttol uh hi, ahizong tu in a nungta laite in no hong suttol in hong suan tu hi, banghangziam cile noma in tual na that uh a, leitung mite tung le khuapite tungah maitatna na nei uh hang ahi hi.

9Na lal zo uh hi! Ngongtatna taw na laak uh te taw na innkuanpuite na hau sak uh a; na inn uh sia siatna le launa pan ngam muang tu in na hanciam uh hi. 10Ahihang na tup na sawmnate in na bangkua uh hong maizum sak hi; ngam tam mamate na sukthap uh hangin noma tungah lalna na piang sak uh hi. 11Luphung suangte ngangawn in hong langpan in au a, zawlsaute zongh in tua auna awte taangko hi.

12Na lal zo uh hi! Khuapi sia kithalupna taw na saat uh a, tual thana taw na ding sak uh hi. 13Na zawthal minamte in a mannung ngawl nasepna te taw a tha a ngal uh bo sak a, amate sak sate theampo kaangtum siat hi. Hi sia Topa Vaanglianbelpa ii vawt ahi hi. * 14Ahihang tuipi sia tui taw a kidim bangin leitung sia Topa vaangletna heakna taw kidim tu hi.

15Note na lal zo uh hi! Na thin uukna hu in na innpaam te uh, niam koi in min sia sak nu hi; zukham bangin amate na hoi sak uh hi. 16Noma zongh min phatna sangin maizumna taw na kituam zaw tu uh hi. Noma zongh zu ne in hoi vabak tu nu hi. Topa in daan piakna hai hong dawn sak tu a, na minphatna uh sia min siatna hong suak tu hi. 17Lebanon taamthing na phuktham uh a; tu in noma hong kiphuk tan tu hi. A ngamsate na that uh a, tu in tua ngamsate in hong lau sak tu hi. Hi thu hong piang tu hi, banghangziam cile leitung le a khuapite tungah na ngongtat nate hang le tual na tha uh hang ahi hi.

18Milim ii kimanna bangziam? Mihing ii vawt na khat hi lel a, leeilot thu ngawl po bangma hong son ngawl hi. Tabang a pau thei beak ngawl pathian, a vawtpa in muanin a nei sia, bang phattuam pui tu ziam! 19Note a lal na hi zo uh hi! Thingbek khat tungah “Khanglo in” tua ahibale suangtum khat tungah “Tho in” ci nu hi. Milim in note na khat papo hong lak thei ziam? Kham le ngun taw kituam tha tu hi, ahizong a sungah nuntakna om ngawl hi.

20 Topa sia a Biakinn thiangtho sungah om hi; ama omna munah leitung mihing theampo in thim dide in om tahen.

0 comments:

Post a Comment