Laithiangtho Dokna (Zaphaniah 1-2)

1. TOPA in mihing ngilote ka___ tu ci hi. 
a. hil
b. zangh
c. bo sak

2. TOPA in ama azui nawn ngawlte bang ci ziam? 
a. Hil tu
b. Kisiik sak tu
c. Lal sak tu

3 TOPA in ngalte banghang in sam ziam? 
a. That siat nuam
b. Judahte a suttol tu in 
c. Judahte huu tu

4. ‘TOPA in bangma a sia a pha vawt ngei bo’ a cite___ tu hi. 
a. daan pia 
b. kaikhawm
c. mihing ciim kici

5. Ngal kisimna aw le auna taw ngalkapte in luphungte a simthap ni sia ___ hi. 
a. Ngual zaw ni
b. Satan ki suhsiat ni
c. TOPA ii ni

6. Leitung mihing theampo thakhat thu in ___ sak tu hi.
a. lungmuanna nei
b. khualeng mu 
c. a nuntakna bo

7. Ama thin uukna hong lak maa in, ___ tavun. 
a. kisiik
b. khua phawk
c. ngal sim tu kinging

8. TOPA in tuipi hui teang akuate vau ziam? 
a. Palestine-te
b. Egypt-te
c. Lebanon-te

9. Akuate ii ngam sia tuucingte buk le lozau suak tu ziam?
a. Lebanon-te
b. Moab-te
c. Palestine-te

10. Ngam theampo in ___ ah TOPA bia tu hi.
a. Jerusalem
b. Sinai mual
c. amate ngam tek

11. TOPA in Assyria lal sak natu in a ___ zangh tu hi. 
a. Babylon 
b. vaangletna
c. khuahun siatna

12. Nineveh khuapi bangkua keallei ah ___ haam tu hi. 
a. va-akte
b. va-khute

c. tonbawm-te


Zephaniah 1
1Hi thu in Amon tapa Josiah Judah kumpi a sep laitak TOPA ii Zephaniah tungah a piak thu ahi hi- (Zephaniah pa Cushi, Cushi pa Gedaliah, Gedaliah pa Amariah hi a, Amariah pa sia Kumpi Hezekiah ahi hi.

TOPA Thukhenna Ni
2TOPA in, “Keima in leitung na theampo, ka lalcip sak tu hi, * 3mihing le nganhing, vacim le ngasa dongin ka lalcip sak tu hi. Mi ngilote bo natu ka vawt tu hi. Mihing minpiang ka lalcip sak tu a, kuama kikhoaikhe ngawl tu hi. Keima TOPA in ka son zo hi.

4“Jerusalem mite le Judah mite theampo daan ka pia tu hi. Baal biakna a khakbel te a bosiat dong le tua nasep a seam lawki thiampite dong takin ka lalcip sak tu hi. 5Innkhum tungah kaato a, ni, tha, aksite a bia papo ka lalcip sak tu hi. Kei hong bia hong pai a thumaan tu in kiciamna zongh vawt zo napi Molech pathian tungah tomlo in a kiciam theampo ka lalcip sak tu hi. 6Kei hong nungngat a, kei hong zui nawn ngawlte, ka kungah lamlak natu ngen a, hong zuan nawn ngawlte ka lalcip sak tu hi,” ci hi.

7TOPA thukhen tu ni hong nai zo ahikom ama omna munah thim dide in om vun. TOPA sia a mite sangaw biak piakna ah pia tu in kithoai saan hi. Judahte a suttol tu in ngalte sam hi. 8TOPA in, “Tua kingawlup ni in, lampui uliante, kumpi tapate le ngamdangte ngeina a zui theampo daan ka pia tu hi. 9Lawkite bang a biakpiakna a vawt theampo le a tote innsung sutol vanh taw a kidim natu a a ngute le a thatte theampo daan ka pia tu hi,” ci hi.

10TOPA in, “Tua ni ciang, Jerusalem Ngasa Kongpi ah kaana aw na za tu uh hi. Khuapi a thak zawna munah tauna aw le mual tungah sukthapna awnging lian khat na za tu uh hi. 11No, khua taw sangah a teangte awng, hi thu na zaak uh ciang kapin mau vun, banghangziam cile sumvawtte theampo thi siat tu uh hi!

12“Tua hun ciang in mei-inn khat ka latu a, Jerusalem ka zong tu hi. Mihing amate le amate ki lungkim sak a, kimuang in, ‘TOPA in bangma a sia a pha vawt ngei bo’ a cite daan ka pia tu hi. 13Amate hauna kisuttol tu uh a, a innte ki susia tu hi. Amate in amate sak innte sungah teang ngei nawn ngawl tu a, a ciin sa sapit nguite pan sapitzu ne ngei nawn ngawl tu uh hi,” ci hi.

14TOPA ii Ni a thupi sia hong nai zo hi– hong nai mama zo a, manlang in hong tung tu hi! Tua ni sia siatna ni hi tu hi, banghangziam cile, ngalkap hangsan belte zongh thinkiam in kap tu hi! 15Tua ni sia thin uuk ni khat, haksatna le thinkiam ni khat, hi tu a, ngimna ni, tuasiatna le lalcipna ni khat, khuazing le khuathim ngawpna ni khat, meeikaai a, a vom neamnuum ni khat hi tu hi. 16Ngal lemle aw le ngal kisimna aw le auna taw ngalkapte in luphungte le tausaangte taw a kidal khuapite a simthap ni hi tu hi.

17TOPA in, “Mihingte tungah tuasiatna lalna ka tun sak sia nasia mama tu a, amate khat sim in mittawte bangin lei a zawt tu uh hi. Amate in kei tungah hong khial ahikom a chisante tui bang luang tu a, a mithi luangte lei ah kisial in muat tu uh hi,” ci hi.

18TOPA in a thin uukna hong lak ni ciang a ngun a khamte theampo zongin amate a hu zo batu hi. Leitung bup sia a thin uukna meikuang in kaangin haltham tu hi. Leitung mihing theampo thakhat thu in a nuntakna bo sak tu hi.

Zephaniah 2
1A maizum maw ngam awng, khua phawk tavun, 2paak bang vulin na thi maa in, TOPA thin uukna a kuang sia na tung hong thet maa in, ama thin uukna hong lak maa in, khua phawk tavun. 3Ama thu ni note le ngam sungah a kiniamkhiak theampo awng, TOPA sangah hong kiheak tavun. A maante vawt vun a, TOPA mai ah noma le noma kiniamkhiak vun. Tua hile TOPA thin uukna hong lak ni ciangin daan khak natu panin suakta tha tu nu hi.

Israel kiim A ngamte Lal natu
4Gaza khua ah a kinusia kuama om ngawl tu hi. Ashkelon khua kinusia tu hi. Nilang sungah Ashdod khua mite kihawlkeak tu hi, taciang Ekron khua ah, mihingte sia amate khuapi pan kihawlkeak tu hi. 5Tuipi hui ah a teang no Philistine mite awng, a bo hi zo nu hi. TOPA in no tungah thukhen zo hi. Ama in, hong susia tu a, khat zongh na taang batu uh hi. 6Tuipi hui na ngam uh sia tuucingte buk le tuukhawkte omna lozau suak tu hi. 7Judah mi a nungta laiteng in na leitangh uh lua tu hi. Amate in a ngan honte thana in nei tu a, Ashkelon innte ah ngiak tu uh hi. TOPA a Pathian sia amate taw omkhawm tu a, amate nuamsa sak kik tu uh hi. *

8TOPA Vaanglianbelpa in, “Moab le Ammon mite in ka mite a zawnsakna le a nomuna ka za zo a, a ngam ka sut tu hi ci a, a kiphatsakna zongh ka za zo hi. * 9Israelte Pathian, a nungta TOPA ka hi bangma in Moab le Ammon sia Sodom le Gomorrah bangin kilalcip sak tu hi, ci in ka kiciam hi. Amate sia cikhuk le a zantham top mun, lopa bek pona mun suak tu hi. Ka mi a nungta laite in amate vanh suttol tu a, a leitangh laak sak tu uh hi,” ci hi.

10TOPA, Vaanglianbelpa ii mite selno a kiphatsakna le kisaktheina taw a om Moab le Ammon mite daan a piak tu zia sia hi bang ahi hi. 11TOPA in amate lau sak tu hi. Ama in leitungte pathiante sia bangma ngawl suak sak tu a, taciang ngam theampo in amate ngam tek ah TOPA bia tu hi.

12TOPA in Ethiopia mite zongh thi sak tu hi.

13TOPA in Assyria lal sak natu in a vaangletna zangh tu hi. Nineveh khuapi sia a ki nusia sa khua zancip tui om ngawl senneal ngam suak sak tu hi. 14Tua mun in tuuhon, khuihon le nganhing nam tatuamte ngiaphual ahi tu hi. Tua ngiaphual ah simbute teangin kongkha vangte pan in haam tu hi. Bangkua keallei ah va-akte haam tu hi. A inn sakna innkal cedar thingte ki lakeak tu hi. 15Khuapi kiphasak, ama thahatna suang a ngam muang a kisa khat tungah tabangin piang tu hi. A mite in amate khuapi sia simlei tungah khuapi lianbel in ngaisun uh hi. Bangza a ngamthimna mun suak tu ziam, ngamsate tawl ngakna mun suak lel hi. Tua mun kantan in apai papo in a mu ciang laungawp in ton valeam tu hi.

0 comments:

Post a Comment