Laithiangtho (Kumpite Niina 17-18)

1. Israel kumpipa Hoshea akuate kungah huu ngen ziam? 
a. Assyria
b. Babylon
c. Egypt

2. Israel ngam sia akuate in susia in bo ziam? 
a. Egypt
b. Syria
c. Assyria

3. Samaria ah ateen sawng Assyriate pawlkhat sia ___ hi. 
a. lungdam uh
b. tawpi in pet
c. kipha sak thei

4. Thongtaak kamsang khat sia banghang suataak ziam? 
a. Kumpipa in hesuak
b. Biakpiakdan ahil tu in
c. Biakinn keam tu 

5. Samaria ah namkim a om sia bang ziam? 
a. minam
b. nganhing nam 
c. milim pathian

6. Israelte in milim bia uh aa, ___ uh hi. 
a. kiihuai 
b. siatna babek zong
c. TOPA zongh bia

7. Hezekiah in kumh bangza sung Judah uk ziam? 
a. 49
b. 40
c. 37

8. Moses vawt taungo ngul sia bang kici ziam? 
a. Nehushtan
b. Norshun
c. Norushun

9. Assyria in Israel kumhbangza sung uumci ziam? 
a. Kumh 5
b. Kumh 9
c. Kumh 3

10. Assyria kumpi atu in Hezekiah in ngun toai ton sawm le khamh ___ pia hi. 
a. ton sali
b. ton kua
c. ton khat

11. Assyria ulianpa in Hebrew kam luang ___ zangh le ci uh hi. 
a. Assyria kam
b. Aramaic kam 
c. Moab

12. Assyria ulianpa ii pau laitak banghang mihingte ii dai khipkhep ziam? 
a. A lau uh hang
b. Hezekiah ii sawl
c. A thuson umh ngawl




Kumpite Niina 17
Israel Kumpipa Hoshea
1Judah ah Kumpipa Ahaz a maan zawk a kum sawm le kum nii kumin Elah ii tapa Hoshea sia Israelte kumpipa suak a, ama in Samaria pan kum kua sung uk hi. 2Ama in TOPA tungah maw a, ahizong ama mai ah a seam Israel kumpipa dangte za in maw ngawl hi. 3Assyria Ngam uk lianpa Shalmaneser in ama tungah ngal phuang hi; Hoshea in Shalmaneser tungah tum in, kum simin shia pia hi. 4Ahihang Hoshea in kum khat ciang, Egypt kumpipa So tungah hu ngetna kamtai pai sak hi, taciang Assyriate tungah shia a piak sia tawp hi. Shalmaneser in hi thu a zaak ciang Hoshea manin thong sungah khum hi.

Samaria khua Bona
5Tua zawkciang Shalmaneser in Israel sim in Samaria uumci hi. A uumci zawk a kum thum kum 6sia Hoshea ii maan zawk a kum kua na hi a, tua kumin Assyriate ii Ngam uk lianpa in Samaria suan hi, Israelte pawl khat thongtaak tu in ciapui a, pawlkhat sia Halah khuapi ah Gozan ngamkhen no Habor Ngun hui ah teang sak hi, taciang pawlkhat sia Mediate khuapite ah teang sak hi.

7Samaria ii bona sia banghangziam cile Egypt ngam panin amate a pusua pui, Egypt kumpipa khut sung pan a hunkhia TOPA a Pathian tungah a maw hu ahi hi. Ama te in pathian dangte bia uh a, 8a mite ii a mainawt ciang TOPA ii a nawkeak mite ii taangh ngeina te zui pui in, Israel kumpipate ii phottawm ngeinate zui uh hi. 9Israelte in TOPA a Pathian ii thukimpui ngawl nate seam uh hi. Amate in Pathian he ngawlte ii biakna munte khua nobel pan khuapi lianbel dongah vawt uh hi. 10Mualtung theampo le thinglim nuai sim ah, Asherah pathian nu ii milim le suangkhuamte phut uh hi, * 11taciang amate in ngim namtuite doaibiate tau tungah hal uh hi, TOPA ii a ngam pan a betkeak mihingte ii ngamtatna zui uh hi. Amate in TOPA thin uuk natu in amate ii khansiat ngamtatna te taw piang sak a, 12milim biak ngawl natu TOPA ii thupiakte ni ngawl uh hi.

13TOPA in a kamtai te le a kamsangte pai sakin Israel le Judahte a kidop natu in sawl hi: “Na ngamtat siatna uh te nusia vun a, na pute uh ka piak Thukhamte sungah a om, ka naseam ka kamsangte tungtawnin no tungah kong piak kong sawlna te ni vun,” ci hi. 14Ahihang amate sia TOPA a Pathian uh muang ngawlin a pute uh bangma in thinpui uh hi. 15Ama ii hilnate nit tu nial hi, a pute taw thuciamna a vawtte zongh keam ngawl uh a, kidop natu a piakte zongh ngaingon uh hi. Amate in a mannung ngawl milimte bia uh a, amate mama zongh mannung ngawl uh hi, amate in a kiim a paam ah mite ii taangh ngeinate TOPA in zui heak vun ci in a thupiakna sia ni ngawl uh hi. 16TOPA a Pathian ii thukham theampo amate in paltan uh a, amate in thik taw a kivawt khuital nii ii lim a biak tu in vawt uh hi; amate in Asherah pathiannu ii milim zongh vawt a, aksite bia in, Baal pathian atu sep sak uh hi. * 17Amate in a tapa a tanute Pathian he ngawlte ii pathiante tungah meihal biakpiakna in pia uh hi; amate in thaa taw kipaupui theite le mailam thu son thei te thu dongh uh hi, taciang amate in TOPA ii muna ah a maan ngawlte vawt tu in kipum aap uh a, TOPA thin uukna piang sak hi. * 18TOPA sia Israel tungah thin uuk ahikom ama ii mai pan bengkeak a, Judah kumpi ngam bek khe lai hi.

19Ahihang Judah mite in zongh TOPA a Pathian ii thukhamte ni ngawl uh a, Israel te ii taangh ngeina a zak uh te zui uh hi. 20TOPA in Israelte nial in, daan pia a, a ngilo ngalte khut sungah aap in, ama ii muna pan bengkeak hi.

21TOPA in Israel le Judah a khen zawkciang Israelte in Nabat ii tapa Jeroboam sia kumpi suak sak uh hi. Jeroboam in TOPA taisan in a kiitak huai mama mawna sungah lampui hi. 22Amate in Jeroboam zui in ama ii mawna a vawt theampo vawt paisuak uh a, 23a naseam kamsangte tungah TOPA ii a kidop natu a sonkhol bangin ama ii mai pan betkeakna a thuak uh dong amate in mawna vawt uh hi. Tua ahikom in Israel mite sia Assyria ah sal in kicia pui a, tu ni dong tu munah teang lai uh hi.

Assyriate Israel Ngam sungah Teang
24Assyriate ii Ngam uk lianpa in khuapite ahi Babylon, Cuth, Ivvah, Hamath le Sepharvaimte pan mihingte paipui in, saltang Israelte ii tenna munah Samariate khuapite ah teang sak hi. Amate in hi khuapite taangin tua munah teang uh hi. 25Amate tua munah a ten phit sawngin TOPA bia ngawl uh ahikom TOPA in tawpi te puakin, amate pawlkhat thatlum sak hi. 26Assyriate ii Ngam uk lianpa munah a kison thu pan, Samaria khuapite ah mihing a ten sakte in tua ngam ii pathian le a thukhamte he ngawl ahikom pathian in tawpi puakin that sak hi, ci in kison hi. 27Tua ahikom Ngam uk lianpa in in: “Thiampi ii ciapui thongtaak te sung pan khat puak kik vun a; ama tua munah teangin, a ngam ii pathian zia mihingte a hil natu in vawt vun,” ci in thupia hi. 28Tua ahikom Samaria pan a kihawlkhia Israel thiampi khat sia mihingte in TOPA bangbangin bia tu ci a hil tu in pai sak uh a, ama Bethel ah teang hi.

29Ahihang Samaria ah a teang mite in amate ii milim tek vawt lai uh a, Israelte ii vawt sa biakpiakna munah koi uh hi. A kibang ngawl pawl tatuam sim in amate ii tenna khuapite ah a milimte vawt uh hi; 30Babylon mite in Succoth Benoth pathian ii milimte vawt a; Cuth mite in Nergal milimte; Hamath mite in Ashima milimte; 31Ivvah mite in Nibhaz le Tartak milimte; taciang Sepharvaim mite in a pathian uh Adrammelech le Anammelech tungah meihal biakpiakna in a tate pia uh hi. 32Hi mihingte in TOPA zongh bia uh hi, taciang amate sung pan mihing tatuamte tealin Pathian he ngawlte biakna munte le sangaw biakpiakna munte ah thiampi seam sak uh hi. 33Tabangin amate in TOPA bia uh a, ahihang amate hong paina a ngamte ii taangh ngeina taw amate pathiante zongh bia uh hi.

34Amate in a taangh ngeina luite tu ni dongin zangh lai uh hi. Amate in TOPA bia ngawl a, Israel ci in min a piak Jacob ii suan le paalte tung a piak thukham le thupiaknate zongh ni ngawl uh hi. * 35TOPA in amate taw thuciamna vawt in, thupia a, “A dang pathiante bia ngawl tu nu hi; tuate mai ah kun ngawl tu nu hi taciang sep sak ngawl tu nu hi, tua ahibale zong sangaw biakpiakna vawt ngawl tu nu hi. * 36No in keima thu nong ni tu uh hi, keima, TOPA note Egypt ngam pan vaangletna le thahatna taw hong pusua pa; note kei mai ah nong kun tu uh hi, taciang sangaw biakpiakna zongh nong pia tu uh hi. * 37Note a tawntungin thukhamte le thupiakte no atu ka at te na ni tu hi. A dang pathiante bia ngawl tu nu hi, 38taciang thuciam no taw ka vawtte mangil ngawl tu nu hi. 39Keima TOPA, na Pathian ii thu nong ni tu uh a, tasia ciang, na ngalte kung pan kong suatak tu hi.” ci hi, 40Ahihang tua mihingte in ngai nuam ngawl a, amate ii taangh ngeinate ma zui veve uh hi.

41Tua hi a, tua mite in TOPA bia uh hi, ahihang amate in a milimte zongh bia uh hi; tu ni dong ma in a suan a paalte in tabangin ngamta lai uh hi.

Kumpite Niina 18
Judah Kumpipa Hezekiah
(2Khang tangthu 29:1-2;31:1)
1Israel ah Elah ii tapa Hoshea ii maan zawk a kum thumna ah Ahaz ii tapa Hezekiah sia 2ama ii pian kum, kum kul le kum nga a phak laitakin Judahte ii Kumpipa suak a, Jerusalem panin kum sawmli le kum kua sung uk hi. A nu sia Zechariah tanu Abijah hi. 3A pu David ii ngamtatna zui in ama in TOPA ii dik sak tu in ngamta hi. 4ama in Pathian he ngawlte ii biakpiakna munte sutham hi, suangkhuamte sutan in, taciang Asherah ii limte zongh saattan siat hi. Moses ii vawt taungo ngul, Nehushtan a kici sia zongh sutham hi. Tua hun dong sia Israel mite in tua taungul upat vawtna in ngim namtui hal uh hi. * 5Hezekiah in TOPA Israelte ii Pathian muang hi; Judah in ama bang ama ii mai hi kale ama ii zawkciang hi kale kumpipa nei ngei ngawl uh hi. 6Ama in TOPA tungah thumaan in, bangma hunin a thu a ni ngawl ngei bua hi, TOPA ii Moses tungah a piak thupiakna te phinciing takin keamcing hi. 7Tua ahikom TOPA sia ama taw omkhawm a, taciangin ama sia a sep a vawt theampo ah zawna nga hi. Ama in Assyriate ii ngam uk lianpa langpan in tualngal tho in ama khut nuai ah tum nuam ngawl hi. 8Ama in Philistine te zo in, amate ii tenna khuano bel te pan kipan khuapi lianbel te dong kuanin sim bul hi, tuate sungah Gaza le a kiim a paam ngamte kihel hi.

9Hezekiah ii a maan zawk a kum li na ciang— tasia Israel te tungah Kumpipa Hoshea ii maan zawk a kum salina hi a— Assyriate ii Ngam uk lianpa Shalmaneser in Israel simin Samaria uumci hi. 10A uumci zawk a kum thumna ciangin Samaria bo a; hi sia Hezekiah ii maan zawk a kum lukna hi in, taciang Hoshea ii maan zawk a kum kua na ahi hi. 11Assyria te ii ngam uk lianpa in Israelte thongtaak tu in paipui a, pawlkhat sia Halah khuapi sungah, pawlkhat Gozan ngamkhen sung Habor Ngun hui ah, pawlkhat sia Mediate khuapite ah teang sak hi.

12Samaria sia bo hi, banghangziam cile Israel in TOPA a Pathian uh ii thu ni ngawl hi, tua ban ah amate taw thuciam a vawt te zongh paltan uh a, Moses TOPA naseam pa ii thukham a piakte theampo zongh ni ngawl uh hi. Amate in za nuam ngawl a, ni nuam ngawl hi.

Assyriate in Jerusalem Tawng
(2Khang tangthu 32:1-19; Isaiah 36:1-22)
13Kumpipa Hezekiah ii a maan zawk a kum sawm le kum li ciangin, Assyriate ii ngam uk lianpa Sennacherib in Judahte ii kulh taw a ki uum khuapite sim in zo hi. 14Hezekiah in Lachish a om Sennacherib tungah kam thaak hi, “Keima khial khi hi; nong hesuakna in nong simnate tawp in, nong nget papo hong pia tu khi hi,.” ci hi. Ngam uk lianpa ii zo kikna sia, Hezekiah in ngun toai ton sawm le kham ton khat puak tu hi. 15Hezekiah in Biakinnpi sung le kumpi inn sumkholna ngun teng thaak hi, 16ama in Biakinnpi kongbiang khuamte tung pan khamte khokin, taciang ama mama ii kongbiang khuamte a tuamna khamte la in Sennacherib thaak siat hi. 17Assyria ngam uk lianpa in ngalkap hon lian khat Jerusalem ah Hezekiah sim tu in pai sak hi; tua ngalkap honpi sia ama ii uliante a za lianbel thum teng in uk sak hi. Amate Jerusalem hong thet uh ciangin, amate in puan vawt naseamte ii omna lampi hong lua uh hi, tua lampi sia tuili tungnung sia pan tui hong luanna hawkluam sia ii hui ah om hi. 18Taciang amate in Hezekiah sam sak uh hi, taciang ama ii uliante thum in amate taw kisi tu in pai uh hi: Kumpi inn a keam pa Hilkiah ii tapa Eliakim, zum lai atpa Shebna; le thu tepteena teng a keam Asaph ii tapa Joah ahi uh hi. 19Assyria te ii uliante khat in, Kumpipa Hezekiah sia a bang teng in hi zata in ngammuang sak thei ziam ci sia ngam uk lianpa in he nuam hi, ci in son hi. 20Ama in, “Ngalkap lam sang a thiamna le a hatna te sia kam le muk lel taw kizo thei hi ci in um nu ziam? Assyria te lang pan tualngal nong thaw uh a kua in hong hu tu in um nu ziam? 21Egyptte in no hong hu tu in um nu hi, ahihang tua ngaisutna sia bang taw kibang ziam cile pumpa kung ciangkhut in zak taw kibang hi— hong tal tu a na khut uh hong sun tu hi. Egypt kumpipa sia ama a suang papo atu tasia taw kibang hi,” ci hi.


22Assyria ulianpa in ci lai a, “Tua ahibale zong noma in na TOPA Pathian uh suang a kinei nu ziam? TOPA ii biakpiakna munte biaktaute a sutham sia Hezekiah hi, ama in Judah mite tungah Jerusalem biaktau bekma ah biakpiakna vawt thei tu nu hi, ci in thu pia hi. 23Ngam uk lianpa min taw thukimna khat kivawt tu hi. Siphu tulnii hong pia tu khi hi, a to tu mihing ta za ma mu lei tu nu ziam? 24No sia Assyriate sung pan a za nobel sia taw zong kitee ngat thei ngawl lai nu hi, hi napi Egypt te in ngalleang le siphu ngalkapte puak tu in na muangmaw uh hi! 25TOPA ii hong huna kihel ngawlin na ngam uh sim tu in hong um nu ziam? TOPA ama mama in simin susia in ci in hong sawl hi,” ci hi.

26Tasia ciang Eliakim, Shebna le Joah in ulian pa munah, “Aramaic kam in hong pau tan, topa awng, tua kam tel khu hi. Hebrew kam in hong pau heak vun, luphung tungah a to mite theampo in hong ngai hi,” ci hi.

27Ama in zo a, “Ngam uk lianpa ii hite theampo son in hong sawl sia no le na kumpipa zaak tu bek sa nu ziam? Hi dek ngawl hi. Mihingte luphung tungah a to te, noma bang keakin, na eak uh ne, na zun uh dawn tu, luphung tungah a to te ii zaak tu in ka pau ahi hi,” ci hi.

28Tua zawkciang ulian pa hong dingto in Hebrew kam in hong au hi, “Assyria Ngam uk lianpa ii hong son teng ngai vun! 29Ama in Hezekiah ii hong theam ngawl natu kidopna hong pia hi. Hezekiah in no hong hun zo ngawl tu hi. 30Taciang TOPA suan natu ama in zol sak heak vun. TOPA in no hong hun tu in um heak vun. 31Hezekiah ii thu son ngai heak vun. Assyria te Ngam uk lianpa in thu hong pia hi, khuapi panin hong pusuak tavun a hong tum tavun. Noma sapit nguite panin sapitte hong kine sak tu a, na thingkung uh te panin thei ngate hong kine sak tu hi, taciang na tuikhuk uh pan tui hong kidawn sak tu hi—- 32ngam uk lianpa in note ten natu hong piak hun dong hi tu a, tua mun sia noma ngam taw ma kibang tu hi, sapitzu na neak natu uh sapit huan om a, anluum vawt natu antang om tu hi: tua ngam sia olive kung le olive thau, le khuaitui omna ngam hi. Ama ii hong thupiak bangin na ngamta uh le na thi batu uh a, na nungta tu uh hi. TOPA in note hong suatak tu hi ci in Hezekiah in theam sak heak vun. 33Ngamdangte ii pathiante in zongh a ngam uh sia Assyria Ngam uk lianpa ii khut sung pan hunkhia ngei na ziam? 34Amate tu in koi sungah om ziam? Hamath le Arpad ii pathiante, koi sungah om ziam? Sepharvaim, Hena, le Ivvah te ii pathiante koi sungah om ziam? Samaria akua in hunkhia ngei ziam? 35Ko ii ngam uk lianpa khut sung pan hi pathiante khat papo in hi ngamte hunkhia ka na ziam? Tua ahile TOPA in Jerusalem hunkhia thei tu hi ci in bang in hong ngaisun sak ziam?” ci hi.

36Mihingte sia kumpipa Hezekiah ii sawl bangma in dai khipkhep in om uh a, amate in kam khat zongh pau ngawl uh hi. 37Taciangin Eliakim Shebna le Joah te in heena taw a puansilh lai uh baltham uh a, taciangin Assyria ulian pa ii pauna teng kumpipa munah son uh hi.

0 comments:

Post a Comment