Laithiangtho (Daniel 7-8)

1. Nganhing li teng sia koisung pan pusuak ziam? 

a. Senneal ngam sung

b. Tuipi

c. Meei sung

2. ____ in “Tho in sa na neak zawk zaza ne in!” ci hi. 

a. Pawlbeam taw akibang sia 

b. Vom taw akibang sia

c. Tawpi taw akibang sia

3. Nganhing a lina sia kithatlum a, ___ah kivawk in kisucip hi. 

a. tuipi

b. niinvawkna

c. meikuang sung

4. Nganhing lian lite sia leitung ah a piang tu ___ahi hi.

a. kialpi lite

b. kumpi ngam lite 

c. ngalpi lite

5. ___te sia , kumpi ngam uk tu kumpi sawmte hi. 

a. Tha nei tawpi

b. Kii sawm

c. Mei kang mun

6. Kumpi dang khat in, ___tu aa, Pathian ii mihingte vawtsia tu hi. 

a. ki thumaan sak 

b. mihing ngilote kaikhawm

c. kumpi thumte lawnthal 

7. Bang ngunhui ah tuutal khat ding ziam?  

a. Ulai 

b. Nile 

c. Eupharate

8. Nitumna sang pan keal sia ___ mama hi .  

a. ataai manlaang

b. daathawm 

c. a mealhoi 

9. Ni bangza sung nitak le zingsang biakpiakna kivawt ngawl tu hi. 

a. 1150 sung

b. 1000 sung

c. 666 sung

10. Kii nii a nei tuutal sia ___ ngamte ci nopna ahi hi. 

a. Media le Persia

b. Egypt le Media 

c. Babylon le Assyria

11. Keal sia ___ kumpi uk ngam ci nopna hi.

a. Greece

b. nitumna 

c. Babylon

12. Kumpi ukna ngamte a bokuan ciang bang taw ki uk tu ziam? 

a. Ngual theamna taw 

b. Thuman thutak

c. Haamsiatna

Daniel 7-8

Daniel 7

DANIEL IN A MUKHOL NATE SON (7:1-12:13)

Daniel ii Nganhing Lite A mu kholna

1Belshazzar ii Babylon kumpi a sep a kum khat kumin mang khat ka man a zanin mu kholna khat ka mu hi. Ka mang mat sia lai taw ka at a, tua zan a ka mu sia ka tepteena in 2hi bang ahi hi:

Mun theampo pan hui hong va a, tuipi mai seam ngawp hi. 3Tuipi sung pan nganhing lian li pusuak a, khat le khat kibang ngawl hi. * 4A masa bel sia tawpi taw kibang a, ahizong muvanlai khat bangin tha nei hi. Ka et laitakin a thate tong hi. Tua nganhing sia ki laamto in mihing bangin kiding to sak hi. Taciang ama sia mihing ngaisutna kipia hi. *

5A niina nganhing sia a nung peangte taw a ding vompui khat taw kibang hi. Ama in a hate taw telngu thum pu a, awnging khat in ama tungah, “Tho in sa na neak zawk zaza ne in!” ci hi.

6Ka et laitakin pawlbeam taw a kibang nganhing khat kilangh a, ahizong a nungzaang ah vacim tha taw a kibang tha li om in lutang li nei hi. Thu nei mama khat in kimu hi.

7Ka et lalai le, nganhing a lina kilangh hi. Ama sia vang nei a lauhuai in kiitak huai hi. A mat sate sia a thik ha lian taw khimtham in tua zawkciang tuancil hi. Nganhing dangte taw kibang ngawlin, ama in kii sawm nei hi. * 8Tua kiite ka et laitakin, a dang kiite sungah kiino khat hong poto ka mu hi. Tua kiino in tua munah a om sa kii thumte phulkeak hi. Hi kii in mihing mittangte le kiphatsak mama na kam a pau kam khat nei hi. *

A tawntung A nungta khat ii Mu kholna
9Ka et laitakin kumpi tokhumte hong kikoi hi. A nungta tawntung mihing khat sia tua kumpi tokhumte khat tungah to hi. A puante vuuk bangin paak a, a sam sia tuumul taw kibang hi. Meikuang leangmui tungah a kinga a kumpi tokhum sia, meikaang a, * 10tua mun panin meikuang a kipee in hong puasuak hi. Ama ii naseam tu in mihing tul tam mama tua munah om a, ama mai ah mihing mak tam mama ding uh hi. Thukhen natu hun kipan a, laibute kihong hi. *

11Ka et laitakin tua kiino ii kiphatsakna kam a papau ka za thei lai hi. Ka et lalai ciang nganhing a lina sia kithatlum a, a luang sia meikuang sungah kivawk in kisucip hi. 12Nganhing dangte ahile a vaangletna kilaak sak a, ahizong a nuntak lai natu hun ciangtan khat kipia hi.

13Hi mu kholna ka mu ni zanin mihing taw a kibang khat ka mu hi. Ama sia meeikaai in kiim uum in ka kung hong neak a, taciang a nungta tawntung pa kung zuanin tua pa taw kimu hi. * 14Mi namcinte, minam tatuamte, pau nam tatuam paute theampo in ama ii na a sep natu in ama sia thu neina, upatna le kumpi vaangletna kipia hi. A thu neina in a tawntung in kip tu a, a kumpi ngam ukna bo ngei ngawl tu hi. *

Mu kholnate A Khiakna Kison
15Ka mu kholnate in hong patau sak a, ka thin ngim mama hi. 16Tua munah a ding mihingte khat kungah ka pai to a, hite theampo ii khiakna hong son natu in ka dongh hi. Taciang ama in a khiakna hong son hi. 17Ama in, “Hi nganhing lian lite sia leitung ah a piang tu kumpi ngam lite ahi hi. 18Taciang A lianbel Pathian ii mihingte in kumpi vaangletna nga tu a, a tawntung a tawntung in keam tu uh hi,” hong ci hi. *

19Taciang a dangte taw kibang ngawlin kiitak huai mama a, a mat sate sia a taungo peangcin le a thik ha taw balneen in a tuancil nganhing a lina ii thu sia ka he nuam kan lai hi. 20A lu tung a om kii sawmte ii thu le a zawkciang hong poto a, kii thumte a pukvawk sak kii sia ii thu ka he nuam hi. Ama in mittangte le kam khat nei a, kiphatsak mama na kam pau hi. Ama sia a dangte khat papo sangin kiitak huai zaw hi.

21Ka et laitakin, tua kii in Pathian ii mihingte do in zothal hi. * 22Taciang a nungta tawntung mihingpa hong pai a, A lianbel Pathian ii mihingte ngumin thu khen hi. Pathian mihingte ii kumpi vaangletna a nga natu hun hong theng zo hi. *

23Hi sia keima tungah hong kison a khiakna ahi hi: “Nganhing lina sia leitung ah a om tu kumpi uk ngam lina hi a, kumpi uk ngam dangte theampo taw kilamdang tu hi. Ama in leitung buppi sutham in tuancil tu hi. 24Kii sawmte sia tua kumpi ngam uk tu kumpi sawmte hi. Taciang kumpi dang khat hong piang tu a, ama sia a om masate taw kilamdang mama tu a, kumpi thumte lawnthal tu hi. * 25Ama in A lianbel Pathian sia sonsia tu a Pathian ii mihingte vawtsia tu hi. Ama in amate ii biakna taw kipawl thukham le poai vawtna hunte kheal sak tu in hanciam tu a, Pathian ii mihingte sia ama ii khut sungah kum thum le kumlang om tu hi. * 26Taciang vantung thukhenna om tu a, ama vaangletna laak sakin, ama sucip dipdeap tu hi. 27Leitung kumpi uk ngam theampo ii vaangletna le letna sia A lianbel Pathian ii mihingte tungah kipia tu hi. Amate kumpi vaang sia bo ngei ngawl tu a, leitung ukna za a neite theampo in amate thu ni in a na seam tu uh hi,” hong ci hi. *

28Hi sia, thu tepteena ii tawpna ahi hi. Ka lau mama hu in ka mai daang a, thu theampo keima thin sung bekah ka koi hi.

Daniel 8
Daniel ii Tuutal khat le Keal khat A mu kholna
1Belshazzar kumpi a sua zawk a kum thum kumin a nii veina mu kholna ka nei hi. 2Ka mu kholna sungah thakhat in Elam ngamkhen sung a ki uumcip Susa khuapi sungah keima le keima ka kimu hi. Keima sia Ulai ngunhui ah ka ding a, 3tua ngunhui ah kiisau nii a nei tuutal khat ka mu hi; a kii khat sia a dang sia sangin sau zaw in thak zaw hi. 4Tua tuutal in a kiite taw, nitumna sang, saksang le thangsang a sik kakoai sia ka en hi. Nganhing dangin tho zo ngawl a, a khut sung pan suakta zo ngawl hi. Ama sia a uk bang po ngamta in kisa thei hi.

5Bang a ci nopna ahi tam maw ci in lungmang a ka om laitak, nitumna sang pan keal khat hong tai vingveng a, a tai ngang mama ahikom a peang in lei zongh pha ngawl hi. Ama in a mitte kilaklaw ah a kician mama kii khat nei hi. 6Ama in ngunhui ah a ding ka mu tuutal sangah pai in, a tha nei zaza taw tuutal sii hi. 7Keima in tuutal a sik ka en hi. Ama sia a thin uuk mama ahikom, tua tuutal sii ngawp in, a kiite nii taltan sak hi. Tuutal in a nan zawk natu thangui thatang nei ngawl hi. Ama sia lei denna in kinei a, kituancil in, a hun zo tu kuama om ngawl hi.

8Tua keal sia kisa thei va-ial a, ahizong a thahat bel laitakin a kii taltan hi. Tua a kii pona munah a kician mama kii li poto a, tuate in mun tatuam tek kawk uh hi. 9Tua kii lite sung pan, khat sung pan kiino khat po a, a vaangletna in thangsang le nisuana sang le Kamciamna Ngam sangah ngam keak hi. 10Ama sia vantung ngalkapte, aksite mama do zawk natu in thahat a, pawlkhatte leitung ah lawn suk in tuancil hi. * 11Ama in vantung ngalkap Maangpipa ngangawn langpan in ama tungah nisim a kipia biakpiaknate khaamin Biakinn susia hi. 12Tua munah nisim biakpiakna a piak luangin mihingte in khialna vawt uh a, biakna maan sia lei ah lawnthal uh hi. Tua kii in a sepna theampo ah maa tun hi.

13Taciang vantung lalang khat in a dang khat ii munah,“Mu kholna sung a a kimu hi thute bangtan vei khua ngei lai tu ziam? A kiihuai khialna in nisim biakpiaknate bangtan vei khak tu ziam? Vantung ngalkapte le Biakinn sia bangtan vei kituancil tu ziam?” ci in a dok ka za hi.

14A dang vantung lalang in, “Ni 1150 ngei tu a, tua hun sungah nitak le zingsang biakpiakna kivawt ngawl tu hi. Tasia zawkciang Biakinn sia a ngeina bangin kipua kik tu hi,” ci in a zo kikna ka za hi.

Vantung lalang Gabriel in Mu kholna ii A Khiakna son
15Mu kholna ii a khiakna tel nuam a ka hanciam laitak, tha khat thu in ka mai ah mihing khat hong ding hi. 16Ulai Ngun ngal pan bia puina aw khat ka za a, “Gabriel awng, ama ii mu sia ii a khiakna ama tungah son in,” ci hi. * 17Gabriel hong pai in ka kungah hong ding a, lau mama ka hikom lei ah ka puk hi.

Ama in kei tungah, “A thi thei mihing awng, a khiakna tel in. Na mu kholna sia leitung bo natu thu taw kisai hi,” hong ci hi. 18Ama ii thu a son laitakin butthi in lei ah ka puk hi. Ahihang ama in hong phong to a hong ding sak kikin, 19ama in, “Pathian thin uukna hangin hong piang tu thute kong lak hi. Mu kholna in hun bo natu lakna ahi hi.

20“Kii nii a nei tuutal na mu sia Media le Persia kumpi uk ngamte ci nopna ahi hi. 21Keal sia Greece kumpi uk ngam ci nopna hi a, a mitte kilaklaw ah a po a kician kii sia kumpi masa bel ci nopna ahi hi. 22A kii po masa bel sia a tal zawkciang a po kii lite sia, a kikhen zawkciang hong piang tu kumpi ngam li a ci nopna ahi hi. Ahihang tua ngam lite sia a masa bel kumpi uk ngam za in thahat ngawl tu uh hi.

23“Tua kumpi ukna ngamte a bokuan ciang ngilo mama uh ahikom amate daan kipia tu hi, taciang ama thu bek thu a sa, siatna nguicing a vawt le ngual theam thei kumpi khat piang tu hi. 24Ama a thahat tu a, ahihang ama ii thahatna hi ngawl tu hi. Ama in a lauhuai siatna piang sak tu a, a sep theampo zo tu hi. Ama in mihing thahatte le Pathian ii mihingte susia tu hi. 25Ama sia thimthel pil ahikom ngual theamna taw in a maa tun tu hi. Ama kiphasak tu a, hil khol ngawlin mihing tam mama susia tu hi. Ama in kumpite sung pan a lianbel Kumpipa ngangawn langpan tu a, ahihang mihing thahatna zangh ngawlin ama ki susia tu hi. 26Nitak le zingsang biakpiakna thu taw kisai a, nang tung hong kison sa hi mu kholna tangtung tu hi. Ahihang hi mu kholna thu a tangtun tu hun khua ngei lai tu ahikom tu in thuku in koi in,” hong ci hi.

27Ka thin ngim in ni tam ma ka cina hi. Taciang thoto in kumpipa hong sawl ka nasep ka seam kik hi, ahihang ka mu kholna in ka lung hong mang sak a, ka teal zo bua hi.