Laithiangtho (Daniel 9-10)

1. Israelte kumh 70 sung sal asua natu thu Daniel in akua kung pan he ziam? 

a. Isaiah

b. Vantung lalang

c. Jeremiah

2. Daniel sia Antangin, khau-ip puan silh a vut sungah to aa ___ hi. 

a. kap nithi

b. au ngawp

c. thungen

3. Daniel thungen in a mite ii khialnate ___ hi.

a. pualaak

b. ngaisun

c. nasa lei

4. Banghun laitak Gabriel sia Daniel kungah haw ziam? 

a. Nitak sang

b. Zankim

c. Zingsang

5. Pathian ii teal lampuipa in kumh bangza sung thukimna vawt tu ziam? 

a. 7

b. 3

c. 1

6. ___ in sangaw biakpiakna-te bo sak tu hi.

a. Pathian teal lampuipa

b. Mihingte

c. Thukhenna 

7. Daniel ni bangza sung tau ziam? 

a. 7

b. 40

c. 21

8. Daniel ___ ngun hui adin laitak puankang neal silh mihing mu hi. 

a. Nile

b. Eupharate

c. Tigris

9. Daniel in mukholna anei laitak mihingte ___ hi. 

a. banghma tat ngawl

b. lau aa tai in kibu 

c. lamdang sa uh

10. Persia ngam cing vantung lalang in Daniel ni bangza sung khak ziam?

a. 40

b.  21 

c. 30

11. Persia acing vantung lalang akisim zawk ciang ___ kilangh tu hi. 

a. Micheal

b. Greece vantung lalang

c. Egypt vatung lalang

12. Israelte a cing vantung lalang sia akua ziam? 

a. Gabriel

b. Michael 

c. Saraphim

Daniel 9-10

Daniel 9

A Mite atu Daniel Thungen

1Xerxes ii tapa, Mede mi Darius in Babylon ngam uk hi. 2Ama kumpi sua a kum khat kumin keima Daniel in a thiangtho laibute simin TOPA ii kamsang Jeremiah tungah a son kum sawmsali sung Jerusalem kisia tu hi, a ci sia thu ka ngaisun hi. * 3An tangin, khau-ip puan silh in vut sungah to in, TOPA Pathian tungah nasia takin thu ka ngen hi. 4TOPA ka Pathian tungah thungen in ka mite ii khialnate ka pualaak hi.

Keima in, “TOPA Pathian awng, nang na lian a kong upat uh hi. Na thuciamna tungah na thumaan a, nang hong it te le na thupiakna bang a nite a tawntung in na it hi.

5“Kote khialna ka vawt zo uh a, ngilo in a pha ngawl ka vawt zo uh hi. Sep tu in nong thupiakte kong nial zo uh a, thumaan nong lakna pan ka pial zo uh hi. 6Kote kumpite, ko hong ukte, kote pu le pate le ko minam bup tungah na min taw thu a son na naseam kamsangte ii thu ka ngai bua uh hi. 7TOPA awng, nangma in a tawntungin a maan na seam a, ahizong ko ka hi uhle koma le koma ka mai ka kimawl sak uh hi. Judea ngam le Jerusalem khua sungah a teang kote theampo le a nai le a khualana ngam tatuam ah na thethaang Israel mite theampo atu in hi thu maan hi. Banghangziam cile amate in nang tungah hong thumaan ngawl hi. 8Kote kumpite, ko hong ukte le kote pu le pate in a maizum huai in ngamta uh a, TOPA nang tungah hong khial zo uh hi. 9Kote in nang hong langpan zo ka hita uh zongin nang in nong hesuak a, nong mai sak hi. 10TOPA kote Pathian awng, na naseam kamsangte tungtawn in nong piak thukhamte bangin nungta tu a nong sawl sia kong ni bua uh hi. 11Israel mite theampo in na thukhamte paltan in na son thute ngai nuam ngawl uh hi. Nang tungah kong khial uh hi, tua hu in na naseam pa Moses ii thukham sungah a ki at bangin ko tungah haamsiatna nong tung sak hi. 12Kote tung le kote hong ukte tungah kong vawt tu hi nong ci sa bangma in nong vawt hi. Leitung a om khuapi dang khat po sangin Jerusalem khuapi sia a nasia zaw in daan na pia a, 13Moses thukham sungah a kison daan theampo nong thuak sak hi. TOPA kote Pathian awng, ahihang tu ngangawn zongin ka khialna te kisiik in, ahibale na thumaan nate zuina taw nang hong lungdam sak tu in, tupna sawmna ka nei bua uh hi.s 14TOPA kote Pathian awng, nangma in kote daan hong pia tu in na kithoai a, nong pia takpi hi. Banghangziam cile nangma in a maanin na seam tawntung a, koma in na thu kong ni bua uh hi.

15“TOPA kote Pathian awng, na mite Egypt ngam pan nong paipuina taw in na vaangletna nong lak a, na vaangletna kiciamtee lai hi. Ka khial zo uh a, ka maw zo uh hi. 16Nidang in kote nong huu zo hi, tua ahikom Jerusalem tungah hong thin uuk nawn heak in. Tua in na khuapi, na mual thiangtho ahi hi. Ko khialna le ka pu ka pate uh ii ngitlona hangin ka kiim ka paam ngam mite theampo in Jerusalem le na mite hong nomu uh hi. 17Pathian awng, ka thungetna le kong pakaaina hong ngai tan. A kisia sa na Biakinn hong pua kik tan, tua hile mihing theampo in Pathian na hi hunlam hong he tu uh hi. 18Pathian awng, ko hong ngai tan. Ka ngim thuakna uh le na min a pu khuapi ii thuaknate hong en tan a, hong mu tan. Ko ii ngamtat phatna suang hi ngawlin, nangma ii hesuakna suangin thu kong ngen uh hi. 19TOPA awng, hong za tan, TOPA awng, hong mai sak tan. TOPA awng, hong ngai tan a, hong seam tan! Mihing theampo in Pathian na hi hunlam hong heak natu in haisaang heak in! Hi khuapi le hi mihingte sia nangma aa ahi hi,” ka ci hi. *

Gabriel in Kamsaanna Sonthiang
20Keima khialna le Israel ka mite ii khialna pualaak in thu ka ngen a, TOPA ka Pathian tungah a Biakinn thiangtho nidang ngeina bangin a pua kik natu tatsat ngawlin hesuak ka ngen hi. 21Thu ka nget laitakin, ka mu khol masak lai a ka mu sa Gabriel sia ka omna munah hong leangsuk hi. Tua hun sia nitak sang biakpiak tu hun ahi hi. 22Ama in, “Daniel awng, hi kamsaanna na tel thei natu hu tu in kong pai hi. 23Pathian tung hesuak ngen tu na kipat ciang ama in hong zo hi. Ama in nang hong it ahikom tasia thu son tu in kong pai hi. Tu in mu kholna kong sonthiang laitak thudon in.

24“Mawna le ngamtat siatna pan na mite le na khuapi thiangtho a suatak natu in Pathian in kum sawmsali, sali vei sung ciangtan zo hi. Mawna kimai sak tu a, tawntung thumaanna hong om tu hi, tasia ciang mu kholna le kamsaanna tangtung takpi tu a, a thiangtho Biakinn sia ki aap kik tu hi. 25Hi thuciamte na tel in: Jerusalem khua a kipua kik natu thu hong kipiak hun pan kipan Pathian ii teal lampui pa hong thet dong kum sali mun sali vei ngei tu hi. Jerusalem sia a lampite le a kulh te taw kivawt kik tu a, kum sawmluk le kum nii, sali vei kum dong kho tu a, ahihang hi hun sia buaina hun hi tu hi. 26Tua hun a bo ciang Pathian teal sa lampui pa sia khialna nei ngawl bulin kithat tu hi. Tua khuapi le Biakinn sia a thahat ngam ukpa khat ii ngal sim tu in hong kuan ngalkapte in susia tu hi. A tawpna in tuiliim bangin hong pai tu a, Pathian ii see sa ahi ngal kisimna le suksiatna hong paipui tu hi. 27Tua ukpa in mihing tam mama taw kum sali atu thukimna kho khat vawt tu hi; tua hun khenlang hong cin ciangin ama in sangaw biakpiakna le biakpiak nate bo sak tu hi. A kiihuai a kiitak huai lim sia Biakinn dawn saang belna tungah kikoi tu a, Pathian see sa bangin tua munah a koi pa a bo mateng in tua munah om top tu hi,” ci in hong son hi. *

Daniel 10

Tigris Ngun hui ah Daniel ii Mu Kholna

1Cyrus ii Persia ngam uklian a sua zawk a kum thum kumin Belteshazzar a kici Daniel tungah thu khat kilangh hi. Tua thu in thumaan ahihang tel hak mama hi. Tua thu sia ama tungah mu kholna taw in kison hi.

2Tua hun laitakin keima Daniel in, nipi thum sung tau in ka om hi. 3Nipi thum a cin mateng in keima in anlim ahizong sa ahizong zu ahizong ka ne bua a, ka sam zongh ka pot bua hi.

4Tua kum tha masa tha ni kul le ni li ni in Tigris Ngunlian hui ah ka ding hi. 5Ka etto le puankaang neal puanpaak silh a, kham kawngkhau sawm mihing khat ka mu hi. * 6A pumpi sia suangmanpha bangin taang hi. A maitang sia khualeng bangin taang a, a mittangte sia mei bangin leng vazal hi. A baan le a peangte sia taungo kizut thiang bangin te vakil a, a aw sia mi honpi au bangin nging hi.

7Tua mu kholna a mu sia keima bek ka hi hi. Keima taw a omkhawm mihingte in bangma mu ngawl uh a, ahihang amate lau a tai in, buu uh hi. 8Tua munah keima bek ka taang a, hi a lamdang mu kholna sia ka en hi. Ka tha om nawn ngawl a, ka meal kikheal ngawp ahikom, kuama in hong tel ngawl hi. 9Ama ii aw ka zaak ciang khua phawk ngawlin butthi in lei ah ka puk a, ka khuplam in ka bok hi. 10Taciang khut khat in hong len in, ka khut le ka khup taw hong tho sak a; ka liing vadil lai hi.

11Tua vantung lalang in ka tungah, “Daniel awng, Pathian in nang hong it hi. Dingto in a, kong son tu thu pha takin ngai in. Na kungah keima hong kipuak zo hi,” hong ci hi. Ama in hi thu a son zawkciang, liing vadil kawm ma in ka dingto hi.

12Tua zawkciang vantung lalang in, “Daniel awng, lau heak in. Tel theina na nei natu in ki niamkhiak tu a, na khensat ni masa bel ni pan kipan Pathian in na thunget nate hong za zo hi. Na thungetna bang hong pia tu in kong pai hi. 13Persia ngam cing vantung lalang in ni kul le ni khat sung hong khak hi. Taciang vantung lalangte ii ukpi khat ahi Michael sia kei hong panpui tu in hong pai hi, banghangziam cile Persia ngam sungah keima nguak hong kinusia hi. * 14Mai lamsang na mipuite tungah a piang tu thute tel sak tu in hong pai ka hi hi. Hi thu sia maisang a piang lai tu mu kholna ahi hi,” ci hi.

15Ama in hi bang hong son ciang, pau thei ngawlin lei ka sal hi. 16Taciang mihing taw a kibang tua vantung lalang in a khut hong thaak a, ka muk hong tham sak hi. Keima in ama tungah, “Topa awng, hi mu kholna in ka tha hong zawm sak mama a, ka ci liing vadil top hi. 17A topa mai ah a ding sila khat taw ka kibang hi. Bangbangin hong paupui thei tu khi ziam? Thangui thatang ahibale husan tu ka nei bua hi,” ka ci hi.

18Ama in khat vei hong len kik leleau a, tasia ciang ka tha hat zaw hi. 19Ama in, “Pathian in nang hong it hi, tua ahikom bangma in thin ngim sak heak in a, lau sak heak in,” ci hi.

Hi teng a ci zawkciang ka tha hat zaw seseam a, “Topa awng nong son tu po hong son tan. Ka ci hong dam sak zaw ni hi,” ka ci hi.

20-21Ama in, “Banghang a na kungah hong pai khi ziam ci sia na he ziam? Thumaan Laibu sungah a ki at thute lak tu in hong pai ka hi hi. Tu in cia kikin Persia ngam cing vantung lalang sia ka sim tu hi. Tua zawkciang Greece ngam cing vantung lalang hong kilangh tu hi. Israelte a cing vantung lalang Michael sim ngawl kei hong hu tu kuama om ngawl hi.