Laithiangtho Dokna (Ezekiel 11-12)

1. Pathian thaa in Ezekiel koisung paipui ziam? 
a. Jerusalem luphung
b. Biakinn kongpi nisuana
c. Jordan ngun

2. Ezekiel, Pathian ii laptona taw apai laitak mihing 25 ___ah mu hi.
a. Sinai mual vum
b. Biakinn kongpi nisuana
c. Hermon mualdawn

3. Jerusalem sia bang taw kitengat ziam? 
a. Anhuanna beal
b. Sathau bung
c. Khuital khat

4. Kamsangte thu sonkholte ka son laitakin,___ thi hi.  
a. Polatiah tosuk in
b. Kumpipa tapate
c. mihing ngilote

5. ___ciang TOPA in Israelte thin thak le ngaisutna thak pia tu hi. 
a. Sila asuak uh
b. A ngam apiak kik
c. Hun nunung

6. Mukholna sungah Ezekiel Babylonia ah bangba pai ziam? 
a. Siphu leang taw
b. Pathian thaa in laamto
c. Laa no khat

7. ___ thin a nei hang za ngawl mu ngawl uh hi.
a. Kiphatsakna
b. Milim biak nopna
c. Tualngal

8. Banghang in Ezekiel ngaltaai tu bangh in kithoai ziam? 
a. Lau 
b. Mihingte kiihuai sa
c. Israelte kidop natu

9. Ezekiel in atai natu panghawng bang taw hut ziam? 
a. Naam sau taw
b. A khut taw
c. Teipi zum taw

10. Koisung athet uh ciang TOPA sia Pathian ahi hun lam tel tu ziam? 
a. Babylon ngam
b. Ngamdangte kawm
c. Khuapi pua sang

11. Amate in an a neak uh ciangin ___ tu hi.
a. liing
b. kap 
c. a kam meima po

12. Israel minamte sungah akuate om nawn ngawl tu ziam? 
a. Lampial sak kamsang
b. Kumpi suan le pal
c. Akiphasak te



Ezekiel 11
Jerusalem Kiningkhiin
1Pathian ii thaa in kei hong laamto a, Biakinn kongpi nisuana sangah hong paipui hi. Tua kongpi naina ah mihing kul le nga ka mu hi. Tuate sungah ngam lampui mite ahi, Azzur ii tapa Jaazaniah le Benaiah ii tapa Pelatiah te ka mu hi.

2Pathian in kei tungah, “A thi thei mihing awng hi pasalte in, a sia vawt tu ngaisutna tupna nei a, khuapi sungah ngaisutna pha ngawl a pia uh hi. 3Amate in ‘Eite in hai ngawlin innte ih sa kik tu hi. Khuapi sia an huanna beal bang hi a, taciangin, ei sia a sungah a kihuan sa taw ih kibang hi. Ahihang tua beal in ei sia meisa panin hong dal zo hi,’ a ci uh hi. 4Tua ahi ciangin, tu in a thi thei mihing awng, amate phat ngawlna son keak in, ” hong ci hi.

5TOPA ii thaa in kei hong uk a, TOPA in mihingte tungah hi kam vaithakte son tu in hong sawl hi, “Israel mite awng bang veu son a bang veu tupna nei ci sia kong he hi. 6No in hi khuapi sungah mihing tam mama thatin, lampi liante sia mithi luang taw a kidim hi.

7“Tua ahikom hi sia sia Keima Vaanglianbel TOPA ii nangma tungah kong son sia ahi hi. Hi khuapi sia an huanna beal hi takpi hi. Ahihang a sa bang sa ziam? Na thalup sate ii luangte hi ngawl ziam? Hi lai ah om ngawl tu nu hi. Khuapi pua sangah hong vawk tu khi hi. 8Namsaute na kiita uh ziam? Namsau taw hong sim tu kong puak tu hi. 9Khuapi pua sangah kong lakeak tu a, ngamdang mite kong aap tu hi. Thina daan kong pia zo hi. 10Taciangin note sia noma ngamsung ngal kisimna ah hong kithatlum tu hi. Tasia ciang mihing theampo in Keima, TOPA ka hi hunlam hong tel tu hi. 11Beal ii a sung a sate a huuk bangin hi khuapi in no hong hu ngawl tu hi. Israel ngam koisung po na om uh zongin, daan kong pia tu hi. 12Kiimkot ngamte ii thukhamte ni in, kei thukhamte paltan in, ka thupiakte na nit ngawl uh ciangin, Kei sia TOPA ka hi hunlam nong he tu hi,” hong ci hi.

13Kamsangte thu sonkholte ka son laitakin, Polatiah tosuk in thi hi. Lei le ka maitang kisi in ka boksuk a, ‘Hi heak in Vaanglianpipa TOPA awng, Israel ngam sungah a taanglai sun theampo thatlum siat tu ni ziam?’ ci in ka au hi.

Saltangte tungah Pathian Kamciam
14TOPA in kei hong paupui hi. Ama in, 15“A thi thei mihing awng, Jerusalem ah a teang mite in, nang le saltang a om na Israel mipuite ii thu a son uh hi. Amate in, ‘Saltangte sia TOPA taw kikhuala lei lalawm uh hi. TOPA in hi ngam sia ei lua tu in hong pia zo hi,’ ci uh hi.

16“Tu in kong son teng sia na saltanpui teng tungah son in. Ngamdang a khuala na ah teang tu a, a puak sia pa le ngamdang ah a thethaang pa sia keima ka hi hi. Ahitazong tawmvei hun sung sia amate paina ngamah amate taw ka om tu hi.

17“Tua ahikom, Keima, Vaanglianpipa TOPA in ka ci teng amate tungah son in. Ngamdang ah ka thethaang na munte panin amate ka khawmtua kik tu a, Israel ngam ka pia kik tu hi. 18Amate hong heak kik uh ciangin, a mu uh a ninnoi a kiihuai milimte theampo vawk siat tu uh hi. 19Thin thak le ngaisutna thak amate ka pia tu hi. A thinpui a suang thin uh ka laak sak tu a, thunit theina thin ka pia tu hi. * 20Tasia ciang amate in, ka thukhamte zui tu a, keima sia amate Pathian ka hi tu hi. 21Ahihang a ninnoi le a kiihuai milimte a bia nuam ka mite daan ka pia tu hi,” hong ci hi. Vaanglianpipa TOPA in son zo hi.

Pathian Vaangletna in Jerusalem Nusia
22Nganhing nungtate leang tu in hong kithoai a, leangmuite in a lenna a zui uh hi. Israelte ii Pathian ii a taang vazal khuataang sia amate ii tungsia ah om hi. * 23Tasia ciangin a taang vazal khuataang sia in khuapi nusia in, tua ii nisuana sang mualpi zuan hi. 24Mu kholna sungah Pathian ii thaa in kei hong laamto a, saltangte tenna Babylonia ah hong paipui kik hi. Tua zawkciang mu kholna hong bo a, 25taciangin saltangte munah TOPA ii hong lak theampo ka son hi.


Ezekiel 12
Kamsangpa Ngaltai khat bang
1TOPA in kei hong paupui hi. 2Ama in, “A thi thei mihing awng, nang sia tualngal hon sungah teang ni hi. Amate in mittang te nei ahihang khua mu ngawl hi. Bilte nei ahihang khua za ngawl hi. Banghangziam cile amate in tualngal thin a nei hang ahi hi.

3“Tu in a thi thei mihing awng, ngaltai khat tu bangin vanh lom khat tuun in khuazin ma in ding in. Mun khat nusia in mundang khat na zot sia a kuama theampo in mu sak in. Tua hile tualngalte in nang hong phawk tha tu hi. 4Amate in nang hong mu thei tu in, ni omlai in sal tai tu bangin, na vanhte heang in. Taciangin ngaltai tu bangin nitak a na din sia en sak in. 5Amate in hong etcik laitakin, na inn pang tungah a hawng khat vut in, na vanh sia tua mun panin la keak in. 6Na vanhte na liangko ah suanin, na pai natu lampi na mu thei ngawl natu in na mit sawm in, khuazing sungah na pai sia mu sak in. Na vawt teng sia Israelte kidop natu hi tu hi,” hong ci hi.

7TOPA ii vawt tu hong sawl bang teng ka vawt hi. Tua ni in ngaltai tu khat bangin ka vanhte ka heang hi. Tua nitak khuazin ciang, ka khut taw pang hawng khat ka vut a, ka pusuak hi. Mihing theampo mu tangin ka liangko ah ka vanh kisuan in ka ding hi.

8A zingsang ciang TOPA in kei hong paupui hi. 9Ama in “A thi thei mihing awng, tu in Israel tualngalte in bang vawt ni ziam ci in nang hong dongh tu hi. 10Vaanglianpipa TOPA, Keima ii amate tungah ka pauna teng son in. Hi kam vaithak sia Jerusalem a uk Kumpipa tapa le tua mun ah a teangte theampo atu ahi hi. 11Na vawt teng sia amate tungah a piang tu thute ii limte ahi sia amate son in. Amate sia ngaltaite le ngalmatte hi tu hi. 12Amate kumpipa tapa in, khuazing sungah a liangko ah a vanh pua in, ama atu a kitolet panghawng panin a suakta tu hi. Ama in a mit a sawm tu uh a, a pai natu lampi a mu batu hi. 13Ahihang ka ngen ka zaak tu a, a sungah ama ka awk sak tu hi. Tua zawkciang ama sia Babylon khuapi ah ka paipui tu a, tua khuapi mu ngawlin ama sia thi tu hi. 14A zum naseppuite, ngaisutna a piate le ama a cingte theampo, mun theampo ah ka thethaang tu a, mihingte in thalup tu in amate zong tu uh hi.

15“Mi namdangte sung le ngamdang mite sungah ka thethaang tak ciang amate in Kei, a TOPA ka hi hunlam hong tel tu uh hi. 16Amate sungah mihing tawmno khat sia ngal kidona, kialpi le natna a tatuam sung pan ka luhai sak tu hi. Tasia ciangin, tua mun ngamdangte kawmah amate ngamtatna sia bangza in kiihuai ci sia a tel uh a, Kei TOPA ka hi hunlam tel tu uh hi,” hong ci hi.

A liing Kamsangpa ii Lim
17TOPA in kei hong paupui hi. 18Ama in, “A thi thei mihing awng, an na neak ciang liing ngawpin, tui na dawn ciang kiitakna taw ngawk ngawp in. 19A ngam ah a taanglai Jerusalem mite tungah Vaanglianpipa TOPA ii kam vaithak sia hi sia hi, ci in ngambup ah son in. Amate in an a neak uh ciangin liing tu a, tui a dawn uh ciangin kiitakna taw a ngawk ngawp tu uh hi. A ngam uh sia bangma om nawn ngawl dongin kithiak siat tu hi, banghangziam cile tua munah a teangte khat sia in, thukham a palsat hang ahi hi. 20Tu laitak mihing taw a kidim khuapite sia kilalcip sak tu a, taciangin a ngam sia duisung kisuak sak tu hi. Tasia ciangin, amate in Kei TOPA ka hi hunlam hong he tu uh hi,” hong ci hi.

A zaaknop huai Paunak khat le A zaaknop huai ngawl Kam vaithak khat
21TOPA in kei hong paupui hi. 22Ama in, “A thi thei mihing awng, banghangin Israel mite in hi paunak sia lo kikik nuam hi tu ziam? Hi paunak sia, ‘Hunte papai a, son kholnate tangtung ngawl hi,’ ci hi. 23Tu in Kei Vaanglianpipa TOPA in hisia huvau ka ci nop sia amate mun ah son in, tua paunak sia ka bo sak tu hi. Tasia Israel ah kison kikik ngawl tu hi. Tasia sangin, "A hun hong theng zo hi, son kholna te hong tangtung tu hi" ci in son in.

24“Israel mite sungah mu kholna maan ngawl om nawn ngawl tu a, lam pial sak thei kamsaanna om nawn ngawl tu hi. 25Keima TOPA in amate tungah son tu khi hi, taciangin ka son babangin tung tu hi. Hai nawn ngawl tu hi. No tualngalte awng, noma nuntakna hun sungah ka vawt tu na kidopna tu kong piakte vawt tatak tu khi hi, kei son zo khi hi,” Vaanglianbel TOPA in kong ci hi.

26TOPA in kei tungah hong ci hi, 27“A thi thei mihing awng, Israel mite in mu kholna le na son kholnate sia maisang a khuala pi hun atu hi, ci in a ngaisun uh hi. 28Tua ahikom, Keima, Vaanglianpipa TOPA in son zo khi hi;” Haisaang nawn ngawl tu hi. Ka son sa te kiseam tu hi. Kei, Vaanglianpipa TOPA in son zo khi hi.

0 comments:

Post a Comment