1. Thingkung le ___ kitengat thei ngawl tu hi.
a. paakkung
b. thingtawng
c. sapit ngui
2. Thingkung le ___ tengat hang aphatna om ngawl hi.
a. paakkung
b. thingtawng
c. Sapit ngui
3. Meihol taw bang kivawt thei ziam?
a. Milim
b. Banghma
c. Aieng
4. Thingtang sungpan bang kinga thei ziam?
a. Khaungui
b. Lungtui
c. Zatang
5. Israelte meikuang sungpan suakta ahihang ___ tu hi.
a. lau in tai
b. ki puavawk vave
c. kaang tum tu hi
6. Israelte ngimh angaa ciang ___ pheang hi.
a. ngal kinging
b. ahuu tute theng
c. Pathian he pheang
7. ___ sia Canaan ngam pan piang hi.
a. Ninaveh
b. Jerusalem
c. Damascus
8. TOPA in Jerusalem sia bangtaw tengat ziam?
a. Pumpi kizuak numei
b. Ngalhang pasal
c. Siphu
9. Jerusalem lampi hui sim ah milim biak mun le ___ mun om hi.
a. tuathalupna
b. meihal tau
c. pumpi zuak natu mun
10. Jerusalem sia___te in apuansuut sak aa pumnguak in hoi hi.
a. A veangpa
b. A kithuapuite
c. A lawmpate le a etsatte
11. TOPA in Jerusalem ii nu sia ___ ci hi.
a. Egypt
b. Hit
c. Moab
12. Jerusalem in Sodom sia ___ ngei hi.
a. ciamuina in nei
b. huu
c. sim
Ezekiel 15
Sapit ngui taw Sonteena
1TOPA in kei hong paupui hi. 2“A thi thei mihing awng, sapit ngui le thingkung bangbangin kitee ngat thei tu ziam? Thingtang sung a thingkungte le sapit baakte ii tee ngat hang bang phattuamna om ziam? 3Bang khatpo vawt natu in zangh thei na ni ziam? Thawn in sui a vanh khaina beakin kizangh thei na ziam? 4Ama sia meitawna in kizangh thei bek hi. A mongte nii kaangin a lai sia meihol a sua zawk ciangin, tua taw bang kivawt thei ziam? 5A kihal ma ngangawn in kimanna nei ngawl hi. Tu in mei in kaang a, hol a sua seseam ciang mannung ngawl va-ial hi.
6Tu in hisia in Vaanglianpipa TOPA ii ci nop teng ahi hi. “Thingtang sung pan khaungui kila in a kihal bangin, ka mihingte Jerusalem pan ka la tu a, 7daan ka pia tu hi. Amate in meikuang khat panin suakta zo hi, ahihang tu in meikuang in kaangtum tu hi. Amate ngim ka piak ciangin Keima sia TOPA ka hi hunlam hong tel tu uh hi. 8Amate in kei tungah hong thumaan ngawl ahikom a ngam sia dui ka suak sak tu hi,” ci in Vaanglianpipa TOPA in son zo hi.
Ezekiel 16
A Thumaan ngawl Jerusalem
1TOPA in kei hong paupui kik hi. 2Ama in, “A thi thei mihing awng, Jerusalem te ii a kiihuai ngamtatnate lakin tel sak in. 3Vaanglianpipa TOPA in Jerusalem tungah a ci teng son in. “Nang sia Canaan ngamah piang ni hi. Na pa sia Amor mi hi a, na nu sia Hit mi ahi hi. 4Na sua lai in kuama in na lai hong tan ngawl, hong sil ngawl, ci taw hong zut ngawl a, puan taw hong tun ngawl hi. 5Kuama in nang hong hesuak in, nang atu hite hong vawt sak ngawl hi. Na sua lai in kuama in hong it ngawl hi. Nang sia lozau sung a hong kivawk hi.
6“Taciangin kei kong pai a, na chi sungah na kisan kong mu hi. Chisan taw na kituam a, ahizong na thi tu kong oai bua hi. 7Thingkungno limci bangin kong khang sak hi. Na khang tato a, ngaknu no na suak hi. Na noaite zongh hong bawk a, na sam zongh sau ahihang na pumnguak in na om hi.
8“Nang kantan in kong pai kik ciang, ngual a dei thei tu hun theng zo na hi sia kong mu hi. Na pumpi nguaktang sia ka puantual silh taw kong khu a, itna kamciam kong pia hi. Hi hi kitenna kam kiciamna kong pia a, nang sia keima a na suak hi,” ci hi. Vaanglianpipa TOPA son teng hi teng ahi hi.
9“Tua zawkciang, tui taw na chisan teng kong silh sak hi. Olive thau taw kong zut hi. 10A kizeam puantual kong silh sak a, savun phabel taw kivawt peangdap kong pia a, puankaang neal dial kong khim sak a, nai laktong puasilh kong silh sak hi. 11Suang manpha taw kivawt hak le khi taw kong zeam hi. 12Naakbaa le bilbaate kong pia a, a hoi mama kumpi lukhu na khuk tu kong pia hi. 13Kham le ngun taw kivawt kizepnate na nei a, a kizeam puankaang neal puan le, naaipuan na silh tawntung hi. Taangvui pha bel taw a kivawt anluum na ne a, khuaitui le olive thau neak tu na nei hi. Na mealphat sia nasia mama a, kumpinu na suak hi. 14Ngam simin a kicing na mealphatna taw na min thang hi, banghangziam cile a ithuai mama tu in hong vawt sia keima ka hi hang hi,” ci hi. Hi sia Vaanglianpipa TOPA ci ahi hi.
15“Ahihang na meal phatna le na minthanna te zanghin hong pai po na luppui hi. 16Na puansilh pawlkhatte biakna munte ah zepna in na nei a, pumpi zuak numeite bangin na pumpi sia a kuama theampo na pia hi. 17Ngun le kham kizepna kong piakte na la a, pate lim vawtin tuate taw palngul mawna na vawt hi. 18A kizeam puanneal kong piakte, tua milimte in na silh sak a, olive le ngimnamtui kong piakte milim biakna in na zangh hi. 19An kong pia a, anvui phabel olive thau le khuaitui kong pia hi; ahihang milimte tung pan maipha na nga nopna in, milimte biakpiakna in na nei hi,” Hi sia Vaanglianpipa TOPA ii ci ahi hi.
20“Taciangin kei taw na nei tapate tanute la in, milim biakna in na pia hi. Kei tungah na thumaan ngawl sia, sia khop zo sa ngawl in; 21ka tate milim biakpiakna in nei thua lalai na hi ziam? 22Pumpi zuakin a kiihuai na nuntak sungah na no lai nangma chisan sungah na pumnguak in na ki sasan lai hun khatvei beak na phawk nawn bua hi.”
Jerusalem ii Nuntak sia Pumpi zuak khat bang
23Vaanglianpipa TOPA in, “Nang sia a lal hi zo a! Lal zo ni hi! Siatna theampo na vawt zawkciang, 24lampi hui sim ah milim biak natu mun le pumpi zuak natu mun na vawt hi. 25Na meal phatnate buan sungah na kai zo hi. Hong pai papo munah nangma le nangma na ki aap a, nisim in na paktatna na khan va-ial hi. 26A lan mama na innpaam Egyptte taw na lumkhawm a, na paktatna taw kei nong thin uuk sak hi.
27“Tu in nang daan kong piak natu in, ka khut ka laamto zo a, ka thupha nang ii tel teng kong la kik tu hi. Nang kong ensan a, na ngamtat nate kiihuai a sa, Philistinete tungah nang kong aap zo hi.
28“Banghangziam cile midangte taw lungkim zo ngawl na hikom Assyriate na del hi. Nang sia amate atu pumpi zuak nu na hi a, amate in nang sia hong lungkim sak zo peang bua hi. 29Sumvawt minam Babylonte mun zongh ah pumpi zuak na seam hi. Ahihang amate in nang hong lungkim sak zo tuan ngawl hi”.
30Vaanglianpipa TOPA pauna hi sia hi. “Nang in a maizum maw pumpi zuak nu bangin na seam hi. 31Lampi lian theampo tungah milim biakna tu le pumpi kizuak natu inn na sa hi. Ahihang pumpi kizuak numei bangin sum dei na hi bua hi. 32Nang sia na pasal na it sangin khual mite taw palngul mawna a vavawt numei sia taw na kibang hi. 33Pumpi zuak nu sia sum taw kitham hi. Ahihang nang in na lawmpate theampo letsong na pia a, nang taw lumkhawm tu in mun theampo panin hong paite sumnguk na pia hi. 34Nang sia a tumpian pumpi zuak nu na hi hi. Kuama in tua bang na sua natu in, zawthawk thu taw hong vawt om ngawl hi. Thaman nang hong kipia ngawl a, nangma in na pia zaw hi. Hi hi, nang sia lamdang ni hi,” ci hi.
Pathian ii Jerusalem tung Thukhenna
35Tua ahiciang tu in, nang pumpi zuak Jerusalem awng; TOPA ii hong ci teng ngai in.
36Hi sia Vaanglianpipa TOPA ii ci hi: “Pumpi zuak numei khat bangin, na puan na sut khe a, na lawmpate le a kiihuai milimte tungah nang le nang kipia in, tua zawkciang, milimte tungah sangaw biakpiakna in, na tate thatlum in, milim biakpiakna in na nei hi. 37Hi sia hu in na it lawmpate le na etsat, na lawmpate ka khawmtua tu hi. Amate in kong kiim um sak tu a, tua zawkciang na puante kong suut siat sak tu a, na nguaktang a na om sia amate in kong en sak tu hi. 38Palngul mawna le tualtha na taw kong ningkhiin tu a, ka thin uukna le ka thin sona taw nang sia thi daan kong pia tu hi. 39Amate ii tha hatna nuai ah nang kong koi tu a, pumpi na zuakna le milim na biakna innte sia amate in baltham tu uh hi. Amate in na nikten na puansilh te le na kizepna suang manpha te hong laak sak in, na nguaktang tatak in hong nusia tu uh hi.
40Amate in nang suang taw hong deang tu in mihonte thawn tu uh a, a namsau uh taw hong neensem tu uh hi. 41Amate in na innte hong haltum sak tu a, na daan thuakna sia numei honte in hong en tu uh hi. Na pumpi zuak sia kong tawlnga sak tu a, na lawmpate letsong na piak sia kong tawp sak tu hi. 42Tua zawkciang in ka thin uukna hong veng tu a, ka thim tu hi. Ka thin a uuk nawn bua tu a, kong eang nawn batu hi. 43Na khanmoi lai in bangbangin hong phatvawt khi ziam ci sia na mangil zo hi. Tua ciangin nasep na vawt theampo taw kei nong thin uuk sak hi. Tua hangin na ngamtatnate theampo atu in, nang in kong liau sak hi. A kiihuai ngamtatnate belapna in, banghangin nu le pa khialna ngamtat ngina ngawlte vawt ni ziam?” Vaanglianpipa TOPA in ci hi.
Tanu in A Nu sun
44TOPA in Jerusalem awng, “Tanu in a Nu sun ci paunak sia mihingte in nang tungah hong zangh tu hi. 45Nang sia na Nu ii tanu hi takpi ni hi. Ama in a pasal le a tate ensan hi. Na suapui numeite taw kibang ni hi. Amate in a pasalte le a tate huatsa hi. Nang le na suapui numei khuapuite in Hit sia, nu in nei a, Amor sia, pa in nei hi.
46“A u nu sia sak sangah a om, Samaria le a khuanote ahi hi. 47Amate paina khuani te zui in a kiihuai ngamtat bang na zui ciangin na lung kim ziam? Lungkim vet ngawl ni hi. Na vawtna theampo sia tawmvei zawk po ciang amate sangin lawn zaw ni hi.
48“Keima in a nungta Pathian ka hi takpi bangma in,” Vaanglianpipa TOPA in ci hi. “Na suapui nu Sodom le khaunote in siatna khaatna sia nang ii vawt za liangin vawt ngawl hi. 49Ama le a tanute sia kiphasak hi, banghangziam cile amate in neak tu kicing a, ngal kilemin dai takin nungta uh hi, ahihang amate in mizawngte le hamphatna a selte a awlmaw bua uh hi. 50Amate in kisa thei in, thinpui in ka ngaimawk teng veu vawt uh hi. Tua ahikom na heak sa bangma amate sucip khi hi.
51“Samaria in nangma ii vawt, khialna a lang zongh a vawt bua hi. Ama sangin a kiihuai zaw in na ngamta hi. Nang le na suapui dangte ih etkak ciangin amate sia maw hi napi a maw ngawl bangza in kimu hi. 52Tu in min siatna na thuak kul tu hi. Nang mawnate sia na suapui numeite mawna taw tee ngat ciang, amate sia a maw ngawl taw kibang hi. Tu in na suapui dangte sia, a thiangtho bangin ki mu sak na hi ciang, maisan liangin, maizum thuak in,” ci hi.
Sodom le Samaria Kipua kik tu
53TOPA in Jerusalem tungah, “Sodom le a khuanote, Samaria le a khuanote khangto in, ka nuamsa sak kik tu hi. Hi hi, nang zongh khangto in kong nuamsa sak kik tu hi. 54Nangma le nangma na maizum tu a, tua na maimawlna te hangin, na suapui numeite bangza in nuamsa ci sia lak tu hi. 55Amate nei le lamh taw nuamsa kik tu a, taciang nang le na khuanote zongh hong kipuapha kik tu hi. 56Na kisakthei hun lai in, Sodom sia ciammuina in nei hi ngawl ni ziam? 57A sia na vawtte hong kipholaak ma in, tabangin ngamta ni hi. Tu in nang zongh ama bangma na hi hi. Edomte, Philistinete le nang hong ensante ii selno nunau na hi hi. 58A kiihuai zummawk thute nasep hu in, na thuak kul hi.” TOPA in son zo hi.
A kip Tawntung Thuciamna khat
59Vaanglianpipa TOPA in, “Na thuciamnate paltan a, na kamciamte ngaingon na hikom a kiphu bangin kong vawt tu hi. 60Ahihang na khanmoi lai in kong thuciamte ka kholet a, taciang a tawntung a kip tu thuciamna khat nang taw ka vawt tu hi. 61Na unu le na naunu na nga kik ciangin, na ngamtatna sate phawk kik in, na mai zum tu hi. Nang taw ih thuciamna sungah a kihel ngawl hangin, amate sia na tanute bangin hong om tu uh hi. 62Nang taw ka kamciamte ka thaksua tu a, taciang Keima sia TOPA ka hi hunlam na he tu hi. 63Na khialna theampo kong mai sak tu a, ahizong, na ngamtat khialnate phawk kik in, maizum leilam in na kam zongh na kaa ngam batu hi,” Vaanglianpipa TOPA in son zo hi.
0 comments:
Post a Comment